AKTUALITATEA

EH Bildu Arraia-Maeztuk ohartarazi du Iturrietan estazio meteorologikoa jartzeko obrek ingurumen inpaktuko adierazpena urratzen dutela

| 2021-05-10 12:24:00

EH Bildu Arraia-Maeztuk ohartarazi du Iturrietako mendietan estazio meteorologikoa jartzeko lanek ingurumen inpaktuko adierazpena urratzen dutela. Joan den astean hasi ziren estazio meteorologiko bat instalatzeko lanak, baina Ingurumen Inpaktuko Adierazpenak dio lanek beti errespetatuko dutela martxoaren 1etik uztailaren 1era bitarteko ugalketa generikoaren aldi kritikoa. Horregatik, EH Bilduk Udalean galdera- sorta bat erregistratu du. Horietan galdetu du ea Udalak obren hasieraren berri izan duen, ingurumen-inpaktuaren adierazpenean jasotakoa betearaziko duen edo, araudiak ezartzen duen bezala, Arabako Foru Aldundiaren Natur Ondarearen Zerbitzua jakinarazi den.

Ruth Ibisate Arraia-Maeztuko Udaleko EH Bilduren bozeramaileak gogorarazi duenez, irregulartasun ugari ari da gertatzen Iturrietako mendietan zentral eoliko bat eraikitzeko prozesuan. “Badirudi kasu honetan denak balio duela, baina aspalditik ari gara energia berriztagarriak modu arduratsuan garatzeko plan adostua izateko beharra azpimarratzen, eta bitartean proiektu guztiak geldiaraztea eskatzen dugu, kalteak itzulezinak izan daitezkeelako”, zehaztu du.

2019ko abenduan, 82 metroko altuerako dorre meteorologikoa Onraitan jartzeko baimena bertan behera uztea lortu zuen EH Bilduk. Orduan, alkateak, dekretu baten bidez, obra lizentzia eman zuen, kasu horietan nahitaez egin beharreko ingurumen ebaluazioaren txostena egin gabe. Urtarrilean, Arraia-Maeztuko Udalak berriro ekin zion proiektuari. Orduan, EH Bilduk horren aurkako alegazioa aurkeztu zuen, Natura 2000 Sarean sartutako babes bereziko eremua delako, eta hegazti nekrofagoen elikadurarako babes-eremua delako, handik hiru kilometrora Arabako bi mandadarretako bat baitago. Gainera, EAEko nahiz Arabako araudietan, leku hori paisaia-intereseko eremuetako katalogoetan sartzen da, eta 200 metroko altuerako errotak jartzea “erabat bateraezina” da