Legebiltzarra

Matute: “Bankuek oparitu zitzaizkien 60.000 milioiak itzuliz gero, 1.080 euroko gutxieneko pentsioak bermatu ahal izango lirateke”

Bizkaiko zerrendaburuak ziurtatu du EH Bildu euskal pentsiodunen ahotsa izango dela Madrilen eta euren aldarrikapenak Gorteetara eramango dituela.

| 2019-04-25 14:59:00

Oskar Matutek Banka eta botere ekonomiko nagusien erdigunera eraman du gaur hauteskunde kanpaina, Bilboko Gran Via kalera, alegia, eta hantxe bertan salatu du bankuak salbatzeko aitzakiapean Estatu espainoleko herritar guztiek pairatu zuten iruzurra. Esan duenez, “bankuak erreskatatzeko oparitu zitzaizkien 60.000 milioiak itzuliko balira, bermaturik egongo litzateke euskal pentsiodunek aldarrikatzen duten 1.080 euroko gutxieneko pentsioa”. Hori dela eta, “EH Bildu lehena izango da Madrilen dirutza hori oso-osorik itzul dezatela exijituko duena, eta erabil dadila herritar guztiak babesteko eta jende guztiari bizi baldintza duinak bermatzeko”. Izan ere, dirua egon badago, baina jendearen dirua bankuek daukate; itzul dezatela eta aurrerapauso handia emango dugu bizi baldintza duinak bermatzeko”.
Ildo horri jarraituz, Kongresurako Bizkaiko zerrendaburuak hitza eman du EH Bildu “euskal pentsiodunen ahotsa” izango dela Madrilen. “Haien eskakizun eta aldarrikapenak eramango ditugu Kongresura zein Senatura, bidezkoak eta beharrezkoak direlako bizi baldintza duinak bermatzeko. Berea dena bueltatzea baino ez dira eskatzen ari pentsiodunak eta, beraz, guk beste inork baino indar handiagoarekin eskatuko dugu Madrilen Banka handiak herritarrek utzitako 60.000 milioi euroak bueltatzea eta diru hori herritarren lehentasunetan inbertitzea, besteak beste, gutxieneko pentsioa 1.080 eurokoa izan dadin eta pentsioak KPIren arabera eguneratu daitezen”.
Pentsiodunen mugimenduaren “indarra eta gogoa” goraipatu ostean, Matutek salatu du kolektibo horrek eros ahalmena galdu duela “erabaki politiko jakin batzuen ondorioz, helburua Banka eta botere ekonomiko handiak babestea izan delako eta jendea, aldiz, estalperik gabe utzi dutelako”. “Pertsonak zaintzen dituen herri batek ezin du horrelakorik onartu”, erantsi du, eta ohartarazi du “krisi ekonomikoa ez dela amaitu, edo gezurrezko amaiera izan duela behintzat, milaka herritar, pentsiodunak barne, prekarietatean bizitzera kondenatu dituelako, eta egoera hori are larriagoa da emakumeen kasuan, kobratzen dituzten pentsioak botere publikoak lotsatzeko modukoak direlako”.
 

Oskar Matute: “Soilik EH Bildu da bermea euskal agenda soziala Madrilen egon dadin”

Bizkaiko zerrendaburuaren ustez, telebistako eztabaidek “argi utzi dute Estatuko alderdiek ez dutela proposamenik Euskal Herriarentzat, hemengo errealitatea ezagutzen ez dutelako eta, are okerrago, interesik ez dutelako”.

| 2019-04-24 19:56:00

~~“EH Bildu berme bakarra da euskal agenda soziala Madrilen egon dadin”, azpimarratu du Oskar Matutek gaur arratsaldean Barakaldon, haren jaioterrian, alegia, EH Bilduk bertan egin duen ekitaldi elektoralean. Kongresurako Bizkaiko zerrendaburuak ziurtatu du koalizioak euskal jendarte osoaren interesak eta beharrak defendatuko dituela Kongresu eta Senatuan, eta ohartarazi du ezin dela horrelakorik espero euren erabakiguneak Madrilen dituzten alderdien aldetik. Kritikatu duenez, atzo eta herenegun egindako telebistako eztabaidek argi utzi dute alderdi horiek ez daukatela inolako proposamenik herri honetako pertsonen bizitzak hobetzeko, hemengo errealitatea ezagutzen ez dutelako eta, are okerrago, interesatzen ez zaielako”.
Horri jarraituz, gogora ekarri du Ezkerraldean jendeak ondo baino hobeto dakiela hori hala dela, “eskualderen batek Madrilgo gobernuen interes eta arreta falta pairatu baldin badu, hori Ezkerraldea delako”. Matuteren esanetan, “alderdi horiek urtean behin edo bitan datoz botoa eskatzera; gu, ordea, hemen bizi gara, gure auzokideen errealitatea sentitzen dugu egunero, lehen eskutik dakigu zein diren euren lehentasunak. Hortik dator hain justu euskal agenda soziala Kongresu eta Senatura eramateko gure konpromiso irmoa, besteak beste, pentsio duinak lortzeko, prekarietatea baino ekarri ez duen lan erreforma indargabetzeko eta emakumeek jasaten duten soldata arrakala bertan behera uzteko”.
Jon Iñarritu: “Gure eskubide eta askatasunak jokoan izango ditugu igandean”
Matutek bezala, Jon Iñarritu Kongresurako Gipuzkoako hautagaiak ere telebistako eztabaidak aipatu ditu Barakaldon. Bere hitzetan, “debateetan argi geratu da eskuin espainolentzat EH Bildu dela etsaia eta ez gaituztela Madrilen nahi, ondo dakitelako ezkerreko subiranistak asko eta erabakigarriak izango garela eta aginterako ateak itxiko dizkiegula”. Iñarrituk ohartarazi du “igandean gure eskubide eta askatasunak egongo direla jokoan, gure herriaren eta euskal herritar guztien etorkizuna eta ongizatea”, eta bermatu du trifatxitoak ez duela gobernatuko erabaki hori EH Bilduren esku baldin badago. Horretarako, erantsi du, “ikuspegi nazionaletik zein sozialetik gure herriak aurrera egin behar duela uste duen herritar ororen boto guztiak zenbatu behar dira hautestontzietan; boto bat bera ere ezin daiteke etxean geratu”.
 

ALBISTEAK

EH Bilduren bi lege proposamen eztabaidatzeari uko eginda, Lakuak elkarlanean aritzeko borondate falta agerian utzi du berriz ere

2020-10-13 15:16:00

Jaurlaritza ustelkeriaren aurkako bulegoa sortzeari eta euskara doan ikasteko eskubideari buruzko legeak tramitatzearen aurka azaldu da. EH Bilduren iritziz, “atzerapausoa nabaria, larria eta adierazgarria da, pasa den legealdiak bi proposamenak tramitera onartu zirelako”.

Osasun Sailak azalpenak eman behar ditu Tolosako Asuncion klinika konfinatzeko erabakiaz

2020-10-10 12:26:00

Ibai Iriartek gertaturikoa larria dela eta Tolosaldeko herritarrentzat ondorio negatiboak dituela ohartarazi du. Argibideak eskatu dizkio jada Lakuari. Kasu hau osasun zerbitzu publikoak esku pribatuetan uztearen ondorio da eta eskualdeak ospitale publikoa behar duela frogatzen du.

EH Bilduk mozioa aurkeztu du Urkulluk atzera egin eta Emakunde Lehendakaritzara itzul dadin

2020-10-02 15:43:00

Oihana Etxebarrietaren irudiko, Emakunden eginiko akatsa zuzentzeko aukera galdu du gaur Urkulluk, feminismotik aho batez eginiko kritikei muzin egin baitie.

Pandemiaren ondorioz lan erregulazioan sartu diren langileen %4k soilik kobratuko lukete gaur Jaurlaritzaren laguntza

2020-09-30 16:04:00

EH Bilduren ustez, onartezina da Lakuak laguntza hori oraindik ordaindu gabe jarraitzea. Osagarria 7.800 langile ingururi ordaintzeaz ari da Urkulluren Gobernua, baina 200.000 inguru dira lan erregulazioan egondakoak. Premiazkoa da laguntza horiek hobetzea eta zabaltzea.