AKTUALITATEA

| 2026-06-11 14:03:00

RETAren mutualitate alternatiboei lotutako Gizarte Segurantzaren Lege Orokorraren erreformaren lege-proposamenaren alde bozkatu du EH Bilduk Kongresuko osoko bilkuran. Formazio subiranistaren iritziz, onartutako testua lehen pauso garrantzitsu bat da elkarteen aldarrikapenei erantzuteko eta honakoaren gainean lanean jarraitzeko.

Erreformak urte luzez mutualitate alternatiboen bidez kotizatu duten profesionalen gizarte-babesa hobetzea du helburu. Izan ere, orain arte zailtasun handiak izan dituzte egindako ekarpenekin lotutako erretiro-prestazio duinak eskuratzeko. 

Marije Fullaondo diputatuak balioan jarri du tramitazioan zehar elkarte eta plataformekin batera egindako lana. Lan horren ondorioz, Kongresuak onartutako testuak aurrerapauso garrantzitsuak jasotzen ditu: mutualitate alternatibo batean kotizatutako hilabete bakoitza RETAn alta emanda kotizatutako hilabete oso gisa zenbatuko da, eta arauak gizarte-aurreikuspeneko mutualitate bateko kide izan diren profesional elkargokideak ere hartuko ditu barne, ez soilik gaur egun jardunean daudenak.

Fullaondok azpimarratu du garrantzitsua dela «lanean jarraitzeko oinarri izango den lege bat» eskuetan edukitzea, eta nabarmendu du inplikatutako plataforma eta kolektiboen lana erabakigarria izan dela honaino iristeko.

Eskuinak bultzatutako atzerapausoa

EH Bilduk, ERCrekin eta Sumarrekin batera, batzordean onartutako irizpenean hobekuntza garrantzitsuak txertatzea lortu zuen: pasabidea 2026ko abenduaren 31rako 52 urte beteta zituztenei zabaltzea; transferentziak PFEZari dagokionez zerga-ondoriorik ez izatea; KPIaren araberako eguneratzeari buruzko aipamena kentzea; eta erregelamendu bidezko garapena egiteko hiru hilabeteko epea ezartzea.
Hala ere, osoko bilkuran PPren zuzenketa bat onartu da Voxen aldeko botoarekin eta Juntsen abstentzioarekin. Horren ondorioz, hobekuntza horiek bertan behera geratu dira eta atzerapausoa eman da batzordean adostutako irizpenarekiko. Eskuinak, beste behin ere, kolektiboekin batera egindako lanaren eta negoziazioaren fruitu ziren aurrerapausoak geldiarazi dituela kritikatu du EH Bilduk.

Indar subiranistak lanean jarraituko du Senatuan, ERCrekin partekatzen duen Izquierdas por la Independencia taldearen bidez, egoera iraultzeko, negoziazioan lortutako hobekuntzak berreskuratzeko eta mutualisten aldarrikapen guztiei oraindik erantzuten ez dien araua hobetzen jarraitzeko.

«Legegintza-prozedura ez da gaur amaitzen», azpimarratu du Fullaondok. EH Bilduk plataformen eskaerak erakundeetara eramateko eta pertsona guztientzat ahalik eta erantzun zabalena eta bidezkoena lortzeko lanean jarraituko du.