AKTUALITATEA

EH Bildu Getxok Lazorarekin sinatutako hitzarmena bertan behera uztea eta etxebizitza publikoen kudeaketa publikoa bermatzea eskatuko du. Udalbatzan salatuko ditugu bizilagunek jasaten dituzten baldintzak, eta etxebizitza publiko guztiak zuzenean sektore publikotik kudeatzea aldarrikatuko dugu.

EH Bildu Getxok ostegun honetan eskatuko du udal osoko bilkuran Udalak 2011n Lazorarekin —gaur egun Nestar izenarekin ezagutzen den enpresarekin— sinatutako hitzarmena bertan behera uztea. Hitzarmen horren bidez, Getxoko etxebizitza publikoen kudeaketa enpresa pribatu baten esku utzi zen. EH Bilduren ustez, nahikoa arrazoi daude akordio horri amaiera emateko, lurzoru publikoa 75 urtez enpresa pribatu bati laga baitzitzaion. Hitzarmen horren bidez, Getxoko Udalak lurzoru publikoa laga zion Lazorari, bertan eraikitako etxebizitzen kudeaketaz arduratzeko. Hala ere, EH Bilduk salatzen du etxebizitza horietan bizi diren pertsonek jasaten dituzten baldintzek ez dutela bermatzen etxebizitza duina eta eskuragarria izateko eskubidea.

Azpimarratutako arazoen artean daude maizterrak hainbat gastu ordaintzera behartzen dituzten klausulak, hala nola Ondasun Higiezinen gaineko Zerga (OHZ), komunitate-gastuak edo ez-ordaintzeen aurkako asegurua. Horri gehitu behar zaizkio etxebizitzen mantentze-lanetako gabeziak eta enpresak bizilagunen eskaerei erantzuteko duen borondate falta.

EH Bildu Getxorentzat, egoera horrek agerian uzten ditu etxebizitza publikoen kudeaketa enpresa pribatu baten esku uzten duen ereduaren mugak. Izan ere, etxebizitza horietan bizi direnek baldintza eta gastu neurrigabeei aurre egin behar dietela salatzen dute. Horregatik, konpromiso argia eskatuko diogu udal-gobernuari: Getxoko etxebizitza publiko guztiak modu publikoan kudeatzea, etxebizitza izateko eskubideari eta herritarren beharrei lehentasuna emanez, interes pribatuen gainetik.

EH Bilduk defendatzen du lurzoru publikoak interes orokorraren zerbitzura egon behar duela eta etxebizitza publikoek funtzio soziala bete behar dutela. Horretarako, baldintza bidezkoak, mantentze-lan egokiak eta bizilagunen beharrei erantzungo dien kudeaketa gardena bermatu behar dira.