Gasteiz

EH Bilduk zor historiko bat kitatu nahi du Miren Larrion Gasteizko lehen emakume alkatea izatea lortuta

«Arduradun politiko batzuentzako emakumeok ez dugu merezi herrialdeko boteregune nagusiak gobernatzeko aukera izatea», gaitzetsi du Larrionek

| 2019-05-23 13:33:00

EH Bilduko alkategai Miren Larrionek agerraldia egin du gaur, koalizioak herrialdeko erakunde ezberdinetara aurkeztu dituen hainbat emakume hautagairekin: Gasteiz, udalak edo Batzar Nagusiak. Larrionek Gasteizko lehen emakume alkatea izan nahi du igandean, eta ziurtatu du «garaipen kolektiboa» zatekeela «emakume aurrerakoi eta feminista bat alkate izatea», Hautagaiaren ustez, «emakumeen botoa erabakigarria izango da geurea hautagaitza Gasteizen lehen indarra izatea lortzeko».

Larrionek txalotu ditu amaitzen ari den legealdian ordezkaritza instituzionala izan duten EH Bilduko emakumeak, eta baita ere orain urratsa eman eta euren burua aurkeztu dutenek izandako borondatea: «Gasteizko eta Arabako pertsonen bizimodua hobetzen lagun dezakegula sinetsita eman dugu pausua, herriz herri».

Alkategaiak gogoratu du EH Bilduren konpromisoa hasieratik izan dela emakumeek herrialdeko ardura instituzional gorenak lortzeko aukera izatea, alderdi guztietan gertatzen ez den zerbait. «Zoritxarrez, oraindik ere badira herrialde honetan alderdi batzuetako zenbait arduradun, denak gizonak noski, uste dutenak emakumeok ez dugula merezi herrialdeko boteregune nagusiak gobernatzeko aukera izatea, eta, aukera baldin badugu, gizonen asmoen menpe dela», gaitzetsi du. «Hemen gaudenok argi dugu: prestakuntza osoa dugu geure burua aurkeztu dugun ardura instituzionalak betetzeko, batzuei molestatu arren», nabarmendu du jarraian.

Larrionek aldarrikatu ditu Gasteizerako proposatzen duen eredu aurrerakoi eta irekiaren baloreak, Araba osora heda daitezkeenak. «Ezberdinen arteko entzutea, eraikuntza kolektiboa, konplizitateak eta aliantzak jostea, zintzotasuna eta lidergo eredu berri bat. Entzuten dakien lidergo bat, eta, aldi berean, argi duena nora jo nahi duen. Lidergo eroso bat, ziurtasunak eta norabide argia eskaintzen dituena».

Larrionek udal alokairu parkea jarriko du martxan, etxebizitza duina izateko eskubidea bermatzen laguntzeko

Alkategaiak azpimarratu du beharrezkoa dela EH Bildu lehen indarra izatea «Gasteizen gobernu aukerrerakoi eta ireki bat bermatu ahal izateko»

| 2019-05-21 11:35:00

Gasteizko EH Bilduko alkategaiak, Miren Larrionek, gogoratu du gaur koalizioak legealdi osoan lan egin duela udaletik etxebizitza politika publiko bat bultzatzeko , baina udal gobernuaren bultzada eta interes faltak ezinezko egin du: «Hasieratik sustatu izan genuen akordio bat alokairurako udal etxebizitza parke bat sortzeko, baina ez da sekula garatu. Bien bitartean, Iruñean aldaketaren gobernua bai izan da gai abian jartzeko hemen Urtaranek egin nahi izan ez duena».

Larrionen konpromisoa da neurriari berriro heltzea hurrengo legealdian. Kontuan hartuta Gasteizen 11.000 etxebizitza hutsik daudela, eta 6.000 elkarbizitza unitatek alokairu sozialeko etxebizitza bat eskatzen ari direla, koalizioak uste du udalak lagundu egin behar duela etxebizitza duin baterako eskubidea bermatzen.

Parke honetan sartuko lirateke erabilerarik ez duten udal etxebizitza guztiak, eta baita ere bestelako erakunde publikoek edo norbanakoek utz ditzaketen etxebizitzak. «Hiritar guztien alojamendu beharra asetzeak izan behar du etxebizitza politika publikoen azken helburua, eta uste dugu alokairu soziala dela erakundeek horren alde egiteko daukaten tresnarik egokiena», defendatu du Larrionek.

Alokairu parkearekin batera, zaharberritzea indartuko du EH Bilduk, hala banan banako etxebizitzena nola zonalde eta auzo osoena. Espazio publikoa berreskuratzeak lagun dezake baita ere alokairuan dauden etxebizitzen hiriko eskaintza handitzen.

Era berean, EH Bilduk beharrezkotzat jo du hirian etxebizitza eredu berriak bultzatzea, bereziki bi kolektibo handiei zuzenduta: familiaren etxebizitzatik emantzipatzeko adinean dauden gazteak, eta adinekoak.

Hain zuzen ere, gazteentzako bizileku komunitarioak dira, eta zuzkidura alojamenduak adinekoentzako. Larrionek proposatu du bi proiektu pilotu martxan jartzea hirian bi eredu hauek probatzeko, Auzoan bizi izenarekin. Gazteei dagokionean, banakako logelak eta zerbitzu komunak bateratzea da asmoa. Proiektu pilotua Hedegile kaleko 127. atariaren blokean kokatuko litzateke.

Adinekoei zuzendutako Auzoan bizi-ri dagokionez, proposamenak apartamentu autonomo txikiak eraikitzea aurreikusten du, zerbitzu komunekin osatuta. Lehen proiektu pilotu bat martxan jartzeko, koalizioak Fontetxa Gazteluko kalean dagoen orube bat erabiltzea proposatu du, Ariznabarrako adinekoen zentroaren ondoan.

Azken astea

Hauteskunde kanpainaren bigarren eta azken astea martxan dagoenean, EH Bilduko alkategaiak mezu bat bidali nahi izan du maiatzaren 26ko hitzorduari begira: «Lehen indarra izan behar du EH Bilduk Gasteizen gobernu aurrerakoi eta ireki bt bermatu ahal izateko. Nahikoa da boto bat gehiago lortzea. Horregatik, pertsona guztien botoa ezinbestekoa da helburua lortzeko», azpimarratu du Larrionek.

Larrionek ikuspuntu feminista eta LGTBI udal departamentu guztietara hedatu nahi du, era transbertsal batean

Koalizioko bigarren hautagaiak, Rocio Vitero independenteak, nabarmendu du «lehentasuna» eman behar zaiola «bizitza guztien jasangarritasunari»

| 2019-05-20 20:00:00

Miren Larrion EH Bilduren Gasteizko alkategaiak, politika LGTBI eta feministei buruzko ekitaldi batean parte hartu du gaur, Santa Barbara plazan. Alkategaiarekin batera egon dira Rocio Vitero, Amancay Villalba eta Alberto Porras ‘Titos’ hautagaiak. Yogurihna Borova artistaren ikuskizunak ere lekua izan du ekitaldian.

Larrionek argi utzi du bere asmoa badela esparru horiei eskaintzen zaien arreta handitzea: «Ikuspuntu feminista eta LGTBI bat izan behar dugu udal departamentu guztietan, era transbertsal batean, berdintasun zerbitzutik haratago».

Horren haritik, EH Bilduren apustua da udaleko lantalde guztiari formakuntza egokia ematea, eta bereziki pertsonei aurrez aurreko arreta ematen dizkioten langileei. «Udalean lan egiten duten profesionalei prestakuntza ona eman behar diegu, ikuspuntu feminista eta LGTBI bat sartu behar dugu zerbitzu sozialetan, udaltzaingoan, etab.», argudiatu du alkategaiak.

Koalizioko bigarren zerrendaburuak, Rocio Vitero independenteak, zehaztu du beharrezkoa dela ikuspuntu intersekzional bat martxan jartzea halako politikei heltzerakoan: «Zapalkuntzaren ardatz ezberdinak aintzat hartu behar ditugu: sexu orientazioa, genero nortasuna, klase, arraza, jatorria, adina. Ez gaude hitz egiten ari zapalkuntzaren olinpiar jokoei buruz, baizik eta zaurgarritasuna eragiten duten aldagaien konbinazioari buruz».

Viteroren aburuz, beharrezkoa da esku-hartzea hala emakumeen eta kolektibo zaurgarrien zapalkuntzaren gainean nola ingurumenaren zapalkuntzaren gainean. «Bizitza guztien jasangarritasunak izan behar du geure lehentasuna, eta udal maila da egokiena hausnartzeko, diseinatzeko eta aurrera eramateko ekintza eraldatzaileak, modu kolektiboan», azaldu du.

Bestalde, Alberto Porras ‘Titos’ hautagaiak azpimarratu du koalizioaren borondatea dela LGTBI kolektiboarekin modu jarraian lan egitea. «Geure eginkizuna da mugimenduari laguntza ematea, gu izango gara euren ahotsa udalbatzan, baina politikak haiekin batetra diseinatu behar ditugu. Garrantzitsua da ulertzea nor den subjektu politikoa eta nolako beharrak eta desioak dituen, eta horregarik LGTBI kolektiboaren eskutik ezarriko ditugu politikak».

 

Larrionek lan egingo du Gasteizko gazteek etorkizunerako enplegu eta etxebizitza aukera duinak izan ditzaten

Xabi Ruiz de Larramendi hautagaiak ziurtatu du Gasteizko gazteria aktibo eta errebeldearen bozkak EH Bildurekin bat egingo duela maiatzaren 26an

| 2019-05-18 14:05:00

EH Bilduko alkategaiak, Miren Larrionek, ekitaldi txiki batean parte-hartu du gaur hiriko hainbat gazterekin, Xabi Ruiz de Larramendi zerrendako zazpigarren hautagaiarekin batera. Larrionek bermatu du lan egingo duela «iraganeko belaunaldiek aurrera egiteko izan zituzten aukera berdinak bermatzeko gaur egungo hiriko gazteei».

Alkategaiak azpimarratu du etorkizun bat lortzeko gazteak egiten ari diren ahalegina: «Belaunaldi prestatuena dugu, eta gehiegitan ez diegu eskerrak eman, eta ez diegu baliorik eman». Baina belaunaldi oso bati behartu zaio gurasoen etxean egotera ia 30 urte bete arte, eta eskaintzen zaien enpleguak oso baldintza prekarioak ditu.

Industria indartzea, alokairuko etxebizitza eta komunitarioa eskaintzea, eta klima aldaketaren aurkako borrokari transtzio energetikoaren bidez irmo aurre egitea dira EH Bilduk gazteen beharrei buelta emateko planteatzen dituen elementuetako hiru. «Bermatu behar zaie enplegu duina, baldintza egokiekin eta segurua, etxebizitza bat izateko aukera, eta hemen eta orain trantsizio energetikoari heltzea, planeta ahalik eta baldintzarik egokienak izan ditzan», bukatu du Larrionek.

Bestalde, Ruiz de Larramendik salatu du «elite ekonomiko eta politikoek» saltzen dutela «gazteria sumiso eta pasibo baten irudia». EH Bilduko hautagaiaren aburuz, irudi faltsua da, eta ez dator bat euren auzoetan, prekarietarean aurka edo ikastetxeetan gogotsu lan egiten ari diren gazteen benetako egoerarekin.

Ruiz de Larramendik uste du haizeak alde jotzen duela orain, eta aukera handiak daudela Gasteizen aurrera egiteko. «Orain dugu aukera. Maiatzaren 26an argi geratuko da noren alde dagoen gazteria aktiboena eta politizatuena, boto gazte eta errebeldea EH Bildurena delako», argudiatu du.

 

Larrionek Gasteiz berrikuntzaren hiri bezala bultzatuko du, Arana Ekosisteman egingo diren jardueretan oinarrituta

Espazio berriak erraztuko du lanpostu eta negozio berriak sortzea eta garatzea, etorkizun handiena duten sektore ekonomikoetan

| 2019-05-17 12:30:00

EH Bilduko alkategai Miren Larrionek azpimarratu du gaur koalizioaren apustu nagusia Gasteizko industriaren oinarria indartzea dela, hiriaren etorkizuna bermatzeko bide modura. Industriak aurrez aurre dituen erronka globalen aurrean, Larrionen helburua da profesionalei eta enpresei bidea erraztea aldaketa horietara egokitzeko, Gasteiz berrikuntzaren gune bat izan dadin, ekonomia jasangarri batean begirada jarrita.

Arana Ekosistema sortzea izango da berrikuntza sustatzeko tresna nagusia. Antzinako Arana erresidentzian eta ondoko parkean kokatutako espazioa izango da, udalerriaren berrikuntza sozial eta ekonomikoa sustatzeko, ikuspuntu jasangarri eta etorkizunera begirako batetik. Ideia eta enplegu aukera berriak garatzeko lekua izango da, baina, aldi berean, hiritar guztien gozamenari irekiko zaio, parkeari eutsita.

Proposamenak Gasteizko ni nortasun ikur handienak bateratu nahi ditu. «Alde batetik, hiri industriala, aberastasuna eta enplegu egonkorrago eta hobeto ordaindutakoak sorten dituena. Bestetik, hiri berdea, Green hiriburua, orain urrats bat gehiago egin, eta trantsizio energetikoari ekin behar diona», argudiatu du Larrionek.

Koalizioak inspirazioa eta ideiak bilatu ditu mundu osoan martxan dauden proiektuetan. Besteak beste, aipagarriak dira Bordeleko (Frantzia) Darwin Ecosysteme, eredugarria zaharberritze eta konpromiso jasangarriaren ikuspuntutik. New Yorkeko (AEB) NewLab, ekintzaileak, ikertzaileak eta erakundeak batuta ideia eta erabilpen teknologiko berrien sustatzaile bihurtu dena. Edo Varoshaza udako parkea Budapesten (Hungaria).

Arana ekosistemak gutxienez bost alor edo erabilera proposatu ditu antzinako egoitzaren eta parkearen inguruan, esparru ekonomiko edo sozial ezberdinekin lotuta daudenak: enplegua eta berrikuntza, elikagaien sektorea, eta aisialdia. Zehazki:

  • Partekatutako lanerako zonalde bat (Co-working).

  • Fabrikazio laborategi bat.

  • Gastronomia eta elikadura hurbil eta ekologikorako gune bat.

  • Jolaserako zonalde estali bat, skatepark batekin

  • Aisialdirako zonalde bat inguruan parkea baliatuta.

Arana ekosistemaren erdiguneak zerikusia du enpleguarekin eta enpresa ideia berrien sorrerarekin. Lehen elementua partekatutako lanerako (co-working) zonaldea da. Lantokia, sorkuntza eta ikerkuntza izatea bilatzen dugu, aldi berean izango dena enpresen hazitegia eta start-up ereduak bultzatuko dituen lekua.

Aranako bihotza fabrikazio laborategia da. Etxe berri bat izango da hiriko sortzaile, ikertzaile era ekintzaileentzako. Ideiak eta aukera berriak sortzeko eta garatzeko espazio bat, eta topaleku bat enpresak, langileak, ikasleak eta ikertzaileak elkarlanean aritzeko.

Arana ekosistemaren bigarren helburu nagusia da narratiba sozial berriak erraztea, adin eta interes ezberdinak dituzten Gasteizko auzotar guztiei topaleku bat eskainita, berreskuratuko diren espazioei esker. Besteak beste, elikadura jasangarrian oinarritutako gune bat izango du, jarduerak programatzeko atrio estali bat, eta baita ere eraikin nagusia inguratzen duen gune berdeari eusteko eta modernizatzeko erreforma bat.

«Azken finean, nahiko nuke Arana ekosistemarekin Gasteiz jartzea hiri aurreratua izateko behar duen bidean, erakundeen arteko lankidetzaren bidez, eta baita ere baliatuta hirian daukagun goi hezkuntza sistema bikainarekin sor daitezkeen sinergiak», nabarmendu du alkategaiak.

ALBISTEAK

Udal gobernuaren arduragabekeriak eta utzikeriak bizikleta-lonjen proiektu bat aurrera eramatea eragotzi duela salatu du EH Bilduk

2021-02-15 11:20:00

Proiektua, jada esleituta zegoena, Florida kaleko 28. eraikinerako pentsatuta zegoen, baina EIT negatiboa du, gobernuak, jabe nagusia izan arren, konpondu ez duena.

Martxoaren 3ko eliza: hor eta orain

2021-02-10 11:51:00

Miren Larrion, EH Bilduko bozeramailea Gasteizko Udalean

EH Bilduk ostalarientzako 600.000 euroko laguntza zuzenen funts bat sortzea proposatu du

2021-02-09 10:33:00

Rocio Vitero: "Terrazen tasaren salbuespen proposamena ez da nahikoa, alde batera uzten duelako terrazarik ez duen ostalaritzaren zatia, hain zuzen ere, kaltetuena. Sektore osora iritsiko diren laguntzak behar dira".

Miren Larrion: "Aldaialdek konponbide bat behar du lehenbailehen, eta EAJk ezin die familiei iruzur egiten jarraitu"

2021-02-08 12:23:00

Aldaialde HLHI eraikitzeko premiazko irtenbidea eskatu du EH Bilduk alkatearen agerraldian, ikastetxeko familiek gehiago itxaron behar ez izateko.