Gasteiz

EH Bilduk Erakunde Adierazpen bat erregistratu du Olarizun gertatutako lan istripua dela eta, non langile bat hil den

Erakunde Adierazpenak hildako langilearen senide eta lagunei elkartasuna adieraz diezaiela eskatu dio Gasteizko Udalari, baita bat egin dezala ere gertaera larria dela eta deitutako mobilizazioekin, bai eta lan-prekarietateari aurre egiteko ardura har dezan ere

| 2020-01-03 13:21:00

EH Bilduk, 2020ko urtarrilaren 3an, langile bat hil den zorigaiztoko lan-istripua gertatu eta egun batera, Adierazpen Instituzional bat erregistratu du, non Gasteizko Udalari eskatzen dion "lan-prekarietateari aurre egiteko eta lan-istripuak saihesteko, kosta ahala kosta eta guztiaren gainetik” neurriak har ditzan.

Era berean, dokumentu horrek Udalari eskatzen dio gertatutakoagatik atsekabea adierazteko eta doluminak helarazteko hildako langilearen senide, lagun eta lankideei. EH Bilduko bozeramailea Miren Larrionek, langilearen familiari babesa adierazteaz gain, lan egiteko deia egin die erakundeei, ezbehar hau errepika ez dadin: "EH Bildutik gure elkartasun eta babesa adierazi nahi diegu hildakoaren gertukoei. Erakunde publikoetatik lan arriskuen prebentzioan lanean jarraitu behar dugu, eta lan prekarietateari aurre egin. Lehentasunezko gaia da hau".

EH Bilduren ustez, ezinbestekoa da lan-osasunari eta laneko segurtasunari buruzko kanpainak bultzatzen jarraitzea, bai eta laneko arriskuen prebentziorako arauak bete daitezela eskatzea ere, batez ere lan-prekarietate argia dagoenean. Halaber, Eusko Jaurlaritzako Segurtasun Sailari eta Osalani eskatzen zaie heriotzaren inguruabarrak argitu ditzatela, familiari informazioa emateko.

Adierazpen Instituzionala Udalaren osoko bilkurari atxikitzeko eskaera batekin amaitzen da, istripua salatzeko egiten diren ekimen guztietan partaide izan dadin, herritarrak horietan parte hartzera animatuz, eta hildakoaren familiari elkartasuna eta babesa adieraztera.

EAJk eta PSEk opozisioari ezkutatutako diru-sarrera berriekin gizendu dute udal aurrekontua

Gobernua sostengatzen duten bi alderdiek aurkeztutako zuzenketek duela hilabete eskas aurkeztu zen proiektua baino milioi bat gehiago jasotzen dute

| 2019-12-16 11:26:00

EH Bilduk egiaztatu duenez, EAJk eta PSEk udal aurrekontuaren proiektuari aurkeztutako zuzenketek milioi bat euro inguruko igoera jasotzen dute gastu osoan. Funtsean, OHZ -Ondasun Higiezinen gaineko Zerga- eta EIOZaren -Eraikuntza, Instalazio eta Obren gaineko Zerga- diru-sarreretan oinarritzen da 800.000 eurotik gorako hazkundea, bai eta bide-garbiketako zerbitzuaren kontratuaren gastu murrizketan ere, lizitazio-prozesua hutsik geratu izanaren ondorio zuzena baita.

Horrela, gobernuko alderdiek oposizioko taldeei jakinarazi ez dieten kontabilitatearen udal-zerbitzuaren birkalkulu berria baliatu dute, hauei garaiz eta modu egokian zuzenketetan erabili ahal izateko aukera ukatuz. "Normala da gobernuko alderdiek proiektua zuzentzea, izaera teknikoko zuzenketa batzuekin. Baina hau askoz haratago doa, hau da gobernuaren aurpegia salbatzen saiatzea aurrekontuak jaso dituen kritiken aurrean, ez dielako herritarren eskaerei erantzuten", azaldu du Miren Larrion EH Bilduko udal bozeramaileak.

Izan ere, iragarritako zuzenketetako batzuk Gizarte Kontseiluak Ogasun Batzordean egindako agerraldian eginiko eskaerei erantzuten diete. "Kezka horiek, aurretik, ez zuten islarik EAJ eta PSEren aurrekontu proiektuan, gerora erreakzionatu egin behar izan baitute, eta diru sarreren aurreikuspen berri bat atera dute", azpimarratu du Larrionek.

EH Bilduk zuzenketa epe berri bat ireki dadin eskatuko du bozeramaileen batzordean, udal talde guztiei gobernuak darabilen diru-sarreren aurreikuspen berria txertatzeko aukera emango diena.

EH Bilduk osoko zuzenketa aurkeztu die 2020ko aurrekontuei

Miren Larrion, bozeramailea: "Gobernuaren aurrekontu proposamena txarra da, ez delako parte-hartzailea, ezta anbizio handikoa ere; Gasteizek duen potentzialean sinesteari utzi dion kabinete batek egindako aurrekontu kontserbadoreak dira"

| 2019-12-11 10:37:00

Euskal Herria Bilduk osoko zuzenketa aurkeztu die datorren ikasturterako aurrekontuei. "Aurrekontu-proiektu bereziki garrantzitsua da, datozen lau urteetarako gobernu-taldeak planteatzen duen gobernantza-eredua markatzen duelako. Hala ere, proposamen hutsa da, proposamen kontserbadorea, eta anbiziorik gabekoa", deitoratu du Miren Larrion EH Bilduko Gasteizko bozeramaileak, zeinek argi eta garbi ikusi duen gobernuarekin egindako bilera bakarrean, Urtaranen gobernuaren jarrera baztertzailea. Izan ere, lehenengo momentutik eta ezkutatu gabe, argi utzi dute zein alderdi nahi zuten aurrekontuen arloan bidelagun eta aukera horretatik kanpo utzi dituzte gainerako taldeak.

Era berean, Urtaran kabineteak bereziki berritzaileak ez diren aurrekontuak aurkeztu ditu, EH Bilduk ez bezala, izan ere, proposamen eraldatzaile, aurrerakoi eta berritzailea proposatu duen beste behin ere Larrionek. "Politika berritzailerik gabe, Europako funtsik ere ez da egongo", adierazi du Larrionek, eta EH Bilduk legegintzaldi honetan hiriko proiektuak egitea bermatuko duen Inbertsio Ituna mahaigaineratu du berriro ere.

Hala ere, bozeramaileak azpimarratu du zuzenketa partzialak mantenduko dituztela, EH Bilduk aurrekontuetarako proposatzen dituen ardatz nagusiak jasotzen dituztelako, Rocio Vitero zinegotziak azaldu bezala: "EH Bilduk larrialdi klimatiko eta feministaren aurka borrokatzeko planteamendu integral bat defendatzen du, mugikortasun iraunkorraren alde egiten duena, Gasteiz hiri-zaintzaile bihurtuko duena eta hiri-eraldaketan aurrera egingo duena ere".

EH Bilduk energia berriztagarrien aldeko bere apustua berretsi du, baita deskarbonizazioarekin bat datozen enpresak babesten jarraitzearen aldekoa ere. Hori guztia mugikortasun iraunkor, osasungarri eta seguruaren alde lan egiten duen hiri batean, bidegorriak handituko dituena eta hiriko hainbat zonaldeetako trafiko-arazo larriak konponduko dituena, hala nola, Amerika Latina edo Esmaltazioen biribilguneetan ematen diren arazoak.

Viterok, gainera, Gasteiz berrasmatu egin behar dela defendatu du, eskura dauden baliabideak errentagarri bihurtuz, hala nola, jada eraikita dauden azpiegiturakin. Horri jarraiki, kultura-eskaintzan jarri behar dela arreta azpimarratu du, jada eraikita dauden azpiegiturak aprobetxatzearen alde eginez, Iradier Arenaren kasuan bezala. EH Bilduk, halaber, Gasteizko auzoetan etxebizitzak birgaitzearen aldeko apustua egin nahi du -bereziki, Alde Zaharrean, ageriakoa den premia nabarmenagatik-, eta, horretarako, udal etxebizitza-parke baten beharra berresten du, bai eta gazteen etxebizitza-beharrari erantzuna ematean ere.

Izan ere, aurrekontuek Gasteiz osatzen duten pertsonei begiratu behar diete. Hori dela eta, EH Bilduk adinekoentzako etxebizitza komunitarioak sortzearen alde egin nahi du, zaintzaileei laguntzeko programen alde, egoitzei eta etxeei zerbitzua ematen dien sukalde-eredu berri baten alde. Horrez gain, Rocio Vitero zinegotziak nabarmendu du hiri-proiektuak diruz hornitzea beharrezkoa dela, Emakumeen Etxea eta LGTBI Behatokia kasu.

Iradier Arenan "akustika bikaina" lortzeko potentziala erakusten duen txosten bat argitara atera du EH Bilduk

Urtaranen gobernuak 6 hilabetez baino gehiago izan du ezkutatuta txostena, non "aparteko kalitatezko ekipamendua" lor daitekeela jasotzen den, 3 milioi eurotik beherako kostua duen erreforma eginda

| 2019-12-09 10:51:00

Euskal Herria Bilduk argitara atera du Kanpo-aholkularitza batek egindako txostena, Iradier Arena erabilera anitzeko eraikin gisa egokitzeko beharrezkoak diren erreformak eta obrak definitzea helburu duena. Txosten horretan, enpresak aipatutako eraikinaren potentziala ezagutzera ematen du: "Proposatutako erreformak eginez gero, ekipamenduak aparteko kalitatea izatea bermatuko luke, edozein motatako jarduera artistiko, eszeniko, kongresual edo kirol jarduera hartzeko".

Txostenak dioenez, "obra horien kostua 2,376,904,80 eurokoa da. ERABILERA ANITZEKO IRADIER ARENAk” aparteko akustika izango du, edozein auditorio nazionalen parean, intsonorizazio oso garrantzitsua izango du kutsadura akustikoa saihesteko, […] nazioarteko ekoizpen handiak hartzeko aukera izango du, honako hauek izango dituelako: kutxa eszeniko bat, estalki akustikoa eta tramoya", dio txostenak. Dokumentuak jasotzen du, gainera, hiri osoan ez dagoela ekipamendu garrantzitsuagorik "Gasteiz gorenean egon daitekeela” sinesten uzten ez digunik.

Izan ere, EKO Ingenieria Acustica enpresak ere osatu duen dokumentuan jasotzen denez, erabilera anitzeko ekipamendu deritzona eraikitzeko orduan, "ez zen kontuan hartu ez sonoritatea (akustikoa), ezta intsonoritatea ere (kutsadura akustikoa)”. Horregatik dio "hiltzeko zorian" jaio zen ekipamendua dela, eta horregatik azpimarratzen du txostenak hura eraberritzea beharrezkoa dela; izan ere, Iradier Arena "gure hiriko eta inguruko kultura-erreferentziazko ekipamendua" izango dela dio.

Miren Larrion EH Bilduko Gasteizko bozeramaileak txosten horren garrantzia azpimarratu du. "Dokumentuak aukera ematen du gutxiagora datorren eta erabilerarik ez izatera kondenatuta dagoen kultur azpiegitura bat bizitzaz betetzeko. Txosten horrek erakusten du hori alda daitekeela, eta Gasteizen jada ezarrita dauden kultura-azpiegiturak benetan aprobetxatzeko bidean aurrera egin dezakegula", adierazi du bozeramaileak. Halaber, mahai gainean jarri du alderdiak hiriko azpiegituretarako planteatzen duen ibilbide-orria: "Eraberritu dezagun Iradier Arena, eta gauza bera egin dezagun Printzipal Antzokiarekin, eta bata bestearen osagarri bihur ditzagun, kultura-programazioan eskaintza handiagoa egin ahal izateko. Gero, hirugarren urrats gisa, hirian auditorium bat beharrezkoa den ala ez erabakiko dugu”.

Txostenak nabarmentzen duenez, "kutxa eszeniko oso bat duen antzoki bihurtu ahal izango da". Eszenatoki nagusiak 25x16x16ko neurriak izango ditu. Era berean, txostenak honako hau dio: "Ekipamendu erosoa izango da. Bere ezaugarriak dituen edozein antzoki edo barrutiren erosotasunak izango ditu, 4.000 eta 7.100 pertsona artean kultur ekoizpenetan eserita eta 10.000 pertsona arte kirol erakustaldietan".

Akustikari dagokionez, txostenak egin beharreko hiru ekintza zehazten ditu: sabai proiektatu bat jartzea, gortina akustikoak jartzea eta, azkenik, perimetroan gortina akustiko motordunak jartzea.

Hala ere, kezkatzekoa da duela urte erdi baino gehiago egindako txosten bat dela, 2019ko maiatzaren 23koa, eta gobernuak denbora horretan guztian ez duela argitaratu, txosten horrek sortzen duen interes orokorra kontuan hartu gabe. Felix Gonzalez EH Bildu Gasteizko zinegotziak salatu duenez, "Urtaranen gobernuak txosten hau kajoi batean gordeta izan du 6 hilabetez baino gehiago. Auditoriumaren gisako proiektuak lehenesten ditu Urtaranek eta horiek arriskuan jar ditzaketen proiektu guztiak ezkutatzen ditu gobernuak".

EH Bilduk Euskararen Egunari buruzko Adierazpen Instituzionalarekin Alderdi Popularraren irudia zuritzea saihestuko du

EH Bilduk euskara erabili eta sustatzeko konpromisoa berretsi du, eta, horregatik, ez da PPren ondoan agertuko Adierazpenaren egunean; izan ere, PPk, beste behin ere, gure hizkuntzari eraso egin dio azken asteetan

| 2019-12-02 09:17:00

EH Bilduk ez du Euskararen Egunerako EUDELek proposatutako Adierazpen Instituzionala sinatuko. Hori egiten du, hain zuzen ere, gure hizkuntzarekin duen konpromiso sendoagatik eta koherentziagatik; izan ere, EH Bilduk uko egiten dio adierazpen polit eta hutsala sinatzeari egunez egun euskara desprestigiatzen eta erasotzen dutenekin.

Euskal Herria Bildutik ezinbestekotzat jotzen da euskararen sustapenari eta normalizazioari begira konpromisoak hartzea. Horregatik, Euskararen Eguneko Adierazpen Instituzional batek jaso beharko luke, beste proposamen batzuen artean, erakundeek euskara lehentasunez erabiltzea herritarrei komunikazio ofizialetan eta beste erakunde batzuetara jotzerako orduan.

Azken asteetan, ordea, Alderdi Popularrak agerraldia egin du neurri hori salatzeko eta hizkuntza-askatasunen aurkako erasotzat jotzeko. Are gehiago, PPk mozio bat eramango du hurrengo Gasteizko osoko bilkurara, eta, bertan, "aho batez" gaitzetsi nahi dute Eusko Jaurlaritzak euskarari buruz duen dekretu berria. Adierazpena asmo onez eginda dago, hobetzea posible den arren. Edonola ere, EH Bilduk ez du testu hori irakurriko geure hiritarren hizkuntz eskubideak murriztu eta mugatu nahi dituztenenekin batera.

EH Bilduren bozeramailea den Miren Larrionek adierazi du, “euskararekiko gehitzeak baino ez du balio, bada garaia gure hizkuntza defendatzeko eta euskara eta euskaldunon eskubideak erasotzen dituztenei aurre egiteko. Horregatik ez dugu Alderdi Popularraren irudia txurituko Adierazpen Instituzional honekin”.

ALBISTEAK

Iturritxu kalean 30km/h-ko gehienezko abiadura ezartzea eskatzen du EH Bilduk

2020-11-04 11:55:00

Felix Gonzalez: “Behin eta berriro adierazi dugu Gasteiz 30 Hiria izateko beharra, eta eskari honek indarra hartzen du Iturritxu bezalako kaleetan, non trafiko dentsitatea oso handia den eta kalea auzotar askorentzat pasabide”.

Gasteizen Adinekoentzako Behatokia sortzea eskatu du EH Bilduk

2020-11-03 10:25:00

Rocio Vitero: "Behatoki bat martxan jartzea eskatzen dugu, behar berriak antzemateko, prebentzioan proposamenak egiteko eta zaintzen politiketan hobekuntzak sustatzeko".

TUVISAko autobusen maiztasuna berehala eta premiaz handitzea eskatu du EH Bilduk

2020-11-02 10:00:00

EH Bilduren ustez, Eusko Jaurlaritzak ezarritako irizpideei jarraituz, segurtasun neurriak betetzeko maiztasuna handitzeko unea da. Bestela, EH Bilduk zinegotzi delegatuaren agerraldia eskatuko du.

EH Bilduk salatu du Olarizuko etxebizitzak eraistearen helburua alokairu sozialik aurreikusten ez duten 356 etxebizitzako hirigintza operazio handi bat egitea dela

2020-10-29 09:43:00

Felix Gonzalez: "Urtaranen gobernuak planteatzen duen hirigintza-operazioak eraikuntza-enpresen interesak asetzea du helburu, babestutako etxebizitza eskatzen duten 9.000 pertsonak alde batera utziz eta Etxebizitzaren Euskal Legea urratuz".