Gasteiz

EH Bildu-k 'San Prudentzio Bizirik!' ekimena aurkeztu du, San Prudentzio CIAM-en adinekoei arreta emateko 70 plaza berri sortzeko

EAJ-ren eta PSE-ren gobernuek enplegua suntsitzen ari diren honetan, EH Bildu-k CIAM-eko plantilla indartzea aurreikusten du bere proposamenean, 50 profesional baino gehiago kontratatuz, laguntzaileen, erizainen eta administrarien artean.

| 2021-03-18 09:54:00

EH Bildu-k 'San Prudentzio Bizirik!' ekimena aurkeztu du, CIAM San Prudentzio kalitatezko zaintza publikoetarako gune bihurtzeko eta zentroko profesionalentzat enplegu duina bermatzeko proposamena. Ekimena bera Gasteizko Udalean eta Arabako Batzar Nagusietan erregistratuko du EH Bildu-k mozio bidez datozen osoko bilkuretan. Adinekoei arreta emateari dagokionez, EH Bildu-k 70 egoitza-plaza publiko berri sortzea proposatu du. "Bada garaia 2016an adostutako 1. eta 2. solairuen erreforma planteatzen duen CIAM-en birgaitze-proiektuari berriro ekiteko. Horrela, adinekoei arreta emateko 70 plaza publiko berri ezartzea eta bizi-espazio duinak sortzea berma genezake", adierazi du Rocio Vitero zinegotziak.

 

Gaur egun, egoitza-plazetarako itxarote-zerrendak 300 eskaera baino gehiago ditu, eta bitartean San Prudentzio CIAM-ek %67ko okupazioarekin jarraitzen du, erabiltzen ez diren 56 plazarekin. Plaza huts horiei, erabiltzen ari ez diren eguneko arretarako 9 plaza gehitu behar zaizkie. "Ez da kasualitatea: EAJ-ren eta PSE-ren politiken noraezaren emaitza baizik, pertsonak dauden tokietan zenbakiak ikusten dituztelako. Ez da eskumen kontua, pertsona kontua baizik. Udalean eta Aldundian gobernuko kideen artean lortutako akordioa arduragabekeria hutsa da, egoitza ezkutuan ixteko prozesua aurreikusten baitu, hutsik geratzen diren plazak bete gabe utziz", adierazi du Claudia Venceslao batzarkideak.

 

Era berean, 'San Prudentzio Bizirik!' ekimenak kalitatezko zaintzan urrats berri bat planteatzen du. Hau da, gaur egun "asistitua" deritzon eremu soziosanitarioa sortzea da proposamena, zainketa aringarriak eskaintzeko eta adinekoek, beren bizitzaren azken fasean, azken urteetan beren etxea izan den tokia utzi behar ez dezaten.

Enplegua sortu

EH Bildu-k, 'San Prudentzio Bizirik!' proposamenean azaltzen duen bezala, uste du kalitatezko zainketak kalitatezko enpleguaren eskutik etorri behar direla. Hori dela eta, eta azken hilabeteetan EAJ eta PSE 11 kaleratze egin dituzten arren, EH Bildu-k 50 profesional baino gehiago kontratatzea proposatu du.

 

"Pandemian txalotu ditugun profesionalak eta bizitzari eusteko giltzarri izan direnak EAJ-k eta PSE-k prekarizatu eta kaleratu egiten dituztenak dira. EH Bildu-ren proposamena guztiz kontrakoa da: kalitatezko enplegu duina sortzea bilatzen dugu", adierazi du Venceslao batzarkideak. Hala, sortu beharreko 50 lanpostu horien barruan, banaketa 41 laguntzailerekin, 7 erizainekin eta 2 administrariekin egingo litzatekeela uste du.

EH Bilduk espero du hauxe izatea Gasteizek bere garbiketa zaborren multinazional baten esku utziko duen «azken aldia»

Villalba: «Urteak daramatzagu enpresen irabazi asmoan oinarritutako sistema bati lotuta, non garbiketa edo lan baldintzak beti bigarren maila batean geratzen diren. Gehiengoa badago udal honetan %100 publikoa izango den sistema batera aldatzeko»

| 2021-03-16 14:51:00

EH Bilduren ustez, gutxi edo ezer gutxi aldatuko da Gasteizko garbiketa kontratu nagusia zaborren beste multinazional bati adjudikatzearekin. 2015. urtetik aurrera FCCren kudeaketa negargarriak eragindako arazo eta polemika segida amaitztik aparte, sakoneko arazoa bazen eta bada enpresen kartel baten gainean eraikitako eredu batekin segitzeak. «Urteak daramatzagu enpresen irabazi asmoan oinarritzen den konpainia handi batzuen sistema bati lotuta,  non garbiketa edo lan baldintzak beti bigarren maila batean geratzen diren», salatu du EH Bilduren Gasteizko zinegotzi Amancay Villalbak. Zoritxarrez, judizializazio mehatxuak ikusita, badirudi FCCk kontratuaren buruan duen behin behineko egoera are gehiago luzatuko dela.

Hortaz, EH Bilduk soilik espero du hauxe izatea Gasteizek bere garbiketa eta hondakinen bilketa zaborren sektoreko multinazional baten eskuetan utziko duen azken aldia. Txosten juridikoek agerian uzten dute posible dela zerbitzuaren bermunizipalizazio bati heltzea, kontrol eta kudeaketa publikoa bermatuko lukeen beste formularen baten bidez. Izan ere, EH Bilduren ekimenez, udalean lantalde bat dago martxan eredu aukera ezberdinak aztertzeko.

Badago, gainera, udaleko alderdien gehiengo bat mintzatu dena aukera horren alde. «Bada gehiengo bat udal honetan %100 publikoa izango den kudeaketa sistema batera igarotzeko. Orain er4edu aldaketa hori diseinatzea eta martxan jartzea dagokigu, Gasteiz bezalako Green hiriburu baten neurrira egongo den garbiketa eta hondakin bilketa gauzatzeko», azaldu du Villalbak.

EH Bilduk Iradier Arenan inbertitzeko eskatu dio Udalari, erabileraz betetzeko

Lopez de Aberasturi: "Egungo egoerak agerian uzten du EH Bilduk urtebete baino gehiago daramana eskatzen: bide orri baten beharra kultur azpiegituretan, Iradier Arena berritzetik eta egokitzetik hasita".

| 2021-03-15 13:17:00

EH Bilduk Iradier Arenan inbertitzea eskatu du, pandemiaren beharretara egokitu ahal izateko. Kulturak espazio zabalak eta seguruak behar ditu, eta hor Iradier Arenak behar horiek bermatu ahal izango lituzke. Une honetan, kultur espazioen beharra larria dela ulertuta, EH Bilduk ulertzen du espazioa laster egokitzea, baina inola ere ezin ditu baldintzatu, ordeztu edo partxeatu etorkizunean egin behar diren ezinbesteko hobekuntzak. Are gehiago, Iratxe Lopez de Aberasturi EH Bilduko zinegotziak adierazi duenez, "entsegu bat izan liteke espazioak izan ditzakeen aukera bikainak egiaztatzeko eta berritzeko beharra berresteko".


EH Bilduk positibotzat jo du udal eta foru gobernuak Iradier Arena erabileraz betetzea eskatzen duen EH Bilduren kultur arloko eskari handienaren alde egitea; izan ere, Iradier Arena "erabilera anitzeko espazio" gisa sortu da, eta azken urteotan "erabilera gabeko espazio" bihurtu da. Horrela, Lopez de Aberasturik EH Bilduk proposatutako ibilbide-orria birplanteatzeko eskatuko dio Kultura Sailari datorren batzordean, non, kultur azpiegituren aprobetxamenduan oinarrituta, Iradier Arenaren kalitate akustikoa hobetzeko espazioa berritu eta egokitu dadin proposatzen den.


"Egungo egoerak agerian uzten du EH Bilduk urtebete baino gehiago eskatzen daramana: kultur azpiegituretan bide-orri baten beharra, Iradier Arenaren berrikuntza eta egokitzapenetik hasita", adierazi du Lopez de Aberasturik. EH Bilduk proposatzen duen bide-orriak Iradier Arenaren eraberritzea jasotzen du, hau jardueraz betetzeko, eta bigarren fase batean, non Printzipal Antzokia birmoldatuko lirateken, azkenen honen jarduera hartu ahal izateko. Ondoren, bi espazio eszenikoak izan ondoren, Auditorio bat eraikitzea beharrezkoa den ala ez baloratu beharko litzateke.


Iradier Arenak tarifa berezi bat du esleituta kultur, biltzar edo funtzio anitzeko ekipamenduen eta gizarte-etxeen tasen barruan (7.11), Gasteizko Udaleko Ordenantza Fiskalen barruan. Hori dela eta, EH Bilduk jakin nahi du gobernu-taldeak zer neurri hartuko dituen formula horren pean programatzen diren jardueretan aplikatu beharreko tasei dagokienez, eta tasa horiekiko aldaketarik proposatzen den.

EH Bilduk BEAren obren gainbalioarengatik azalpenak eman ditzala eskatuko dio Urtarani

Felix Gonzalez zinegotziaren ustez, 2,3 milioi eurokoak diren aldaketa horren beharrak 2018tik ezagutzen ziren, baina ez zirenez jatorrizko proiektuan sartu, diru publikoaren kostu handiagoa ekarriko dute, ez baitute inolako lehia publikorik izango.

| 2020-08-03 10:16:00

Joan den ostiraleko bileran eta gai-zerrendatik kanpo, Udal Gobernu Batzordeak, BEAren proiektuaren aurrekontua ia 2,3 milioi eurotan aldatu eta handitzeko proposamena onartu zuen.
Kontratuaren prezioa %3 baino gehiago igo denez eta Sektore Publikoko Kontratuen Legeak azpimarratzen duenez, aldaketa justifikatu behar da. Aldaketak kostuen igoera zerk justifikatzen duen azaldu behar du. EH Bildurentzat baina, espediente honetan ez daude behar bezala justifikatuta aurrekontu igoera horiek.

EH Bilduko zinegotzi Felix Gonzalezek gogorarazi du EH Bilduk proiektu hau hasieratik babestu izan duela: "Giza- eta ingurumen-onurak irizpide nagusitzat hartuta, Autobus Elektriko Adimentsuaren proiektua gure hirian garraio jasangarri eta elektrifikatuaren aldeko apustu sendoa egiteko beharrezko urratsa da".

EH Bilduk proposatu zuen akordioak jasangarritasun ekonomikoa ere bilatu zuen; izan ere, 100 milioi euro baino gehiagoko aurrekontua zuen finantzazio publiko-pribatuaren hasierako proposamena, erdira baino gutxiagora jaistea lortu zuen, %100eko finantziazio publikoarekin.

Felix Gonzalez zinegotziak gogorarazi duenez, "Hiria ahalegin handia egiten ari da azpiegituretan inbertitzeko, eta hortaz, ezin zaio ahalegin handiagoa eskatu ondorengo aldaketekin, ez baitirudi ustekabeko arrazoi berriak daudenik. Aldaketa gehienak jatorrizko esleipenaren unean ezagutzen ziren. Hori dela eta, kostuen igoerari buruzko azalpenak eskatuko ditugu, hiriaren egoera ekonomikoa okerrenetarikoa denean datorrelako gainera. Gogora dezagun aldaketek prezioen konkurrentziarik ez egotea dakartela, kontratak prezio horiek finkatzen baititu".

Proiektu publikoetan, sistematikoki, egin beharreko obren kostuen beherako balorazioa egiteak herritarrek kudeaketan duten sinesgarritasuna kaltetzen du, eta azpiegiturei buruz egingo den edozein proposamen oztopatzen du, are gehiago, egungo egoera ekonomikoan, non nabariak diren aurrekontuen inguruan diren zailtasunak.

EH Bilduk uste du «gutxiegi» dela Urtaranek Juan Carlos I-ari kalea kentzea eta aldaketa gehiago proposatuko ditu

Larrionek nabarmendu du ulertezina dela udalerrian monarkia ustelari lotutako beste etorbide izen batekin jarraitzea, eta gogoratu du udalbatzak duela zortzi urte hartutako akordio batean jaso zela kaleari izena kentzea

| 2020-07-29 11:12:00

Gasteizko alkate Gorka Urtaranek erabaki zuen atzo, dekretu bidez, Juan Carlos I-ari eskainitako kale izena kentzea, eta horren ordez Martxoaren 8ko Etorbidea deitzea. EH Bilduren aburuz, pozgarria da behingoagatik errege emerituaren kalea udalerritik desagertzea, baina uste du erabakia oso berandu iritsi dela, eta, gainera, gutxiegi dela.

«Erabakia zortzi urte berandu dator, 2012. urtean dagoeneko udalbatzaren adierazpen bat zegoelako kale izena aldatzeko beharra jasotzen zuena. Aurten bertan beranduegi dator, halaber, hilabeteak igaro direlako iragarri zenetik, eta Urtaranek hauteskundeak pasa arte itxaron duelako gauzatzeko, soilik bere interesak lehenetsita. Gainera, erabat eskasa da, ezin delako ulertu horrekin batera kale izendegitik monarkia ustel osoa desagerrarazi ez izana, Juan Carlos Iaren emazte Sofiari kalea kenduta», azaldu du EH Bilduren udal bozeramaile Miren Larrionek.

Deigarria da orain dela urte batzuk memoria historikoa aztertzeko lantaldeak proposatu zuela kale izendegiari hainbat moldaketa egitea, erregimen frankistari lotutako kale izenak aldatzeko. Orduan Urtaranek ezezko borobila eman zuen, aldaketa horiek gauzatzeko ustezko arazo teknikoak eta zailtasun hipotetikoak argudiatuta. «Gertatu denak agerian uzten du benetako borondate politikoa dagoenean posiblea eta egingarria dela balizko edozein arazo tekniko gainditzea», azpimarratu du Larrionek.

EH Bilduk uste du aukera bat galdu dela kale izendegiaren egoerari buruzko gogoeta sakon bat abiatzeko, Gasteizko kaleen izenetan emakumeen presentzia eskasa zuzentzeko lantalde berrian adostutako erabaki bat hartzeko, edo Salburuko auzokideek gaiari buruz duten iritzia entzuteko. Urtaranek, berriro ere, ez du beste inorrekin hitz egiten, eta alde bakarreko erabakiak hartzen ditu inolako parte-hartze edo adostasun izpirik gabe.

«EH Bilduk lanean jarraituko du monarkia ustel bati aipamenik egingo ez dion kale izendegi baten alde, irmoki emakume gehiago kale izenetan sartzeko, eta diktadura frankistatik geratzen diren arrastoak behingoz ezabatzeko», iragarri du udal bozeramaileak,eta aurreratu du EH Bilduk ekimenak aurkeztuko dituela norabide horretan.

ALBISTEAK

Urtaranen gobernua eztabaida publikora FOFELetik datozen 18 milioi euroko aurrekontua ezkutatzen ari dela azaldu du EH Bilduk

2021-11-15 11:23:00

Rocio Vitero: «Gardentasunez jokatzeko eskatzen diogu Urtarani, aparteko diru-sarreren aurreikuspen hori aurrekontu-eztabaidan sartzeko, eta taldeei diru horrekin zer inbertsio lehenetsi behar diren proposatzea ahalbidetzeko. Une garrantzitsu honetan, etorkizuneko Gasteiz eraikitzea dago jokoan, eta EH Bilduk proposamen zehatzak egingo ditu».

EH Bilduk 17. Sektorearen garapenak ingurumenean duen eraginari buruzko txostena eskatuko dio IGIri

2021-11-12 10:52:00

Amancay Villalba: «Espazio honen ingurumen- eta nekazaritza-balioa guztiz frogatua eta aitortua dago, eta HAPO berriaren aurrerapenarekin bat etorriz, desklasifikatu beharreko sektorea izan beharko luke, horrela, esparru honetako edozein espekulazio asmo ixteko».

EH Bilduk Gasteizko udalaren zuzeneko arreta berreskuratzea eskatu du

2021-11-11 09:56:00

Iratxe Lopez de Aberasturi: «Giza baliabideekin eta baliabide materialekin indartu beharko litzateke zerbitzua, beharrezkoa balitz, arreta hurbila, berehalakoa, irisgarria eta herritarren eskubideak bermatuko dituena ahalbidetzeko».

Gasteizen trenbidea lurperatzeko irtenbide integrala eta behin betikoa exijitu du EH Bilduk

2021-11-05 10:30:00

Felix Gonzalez: “Azken hamarkadetan hamar ministro izan dira hiri honetan, heltzen ez den lurperatze bat agintzeko. Gasteizko herritarrek hitzetatik ekintzetara pasatzea eskatzen dute, lurperatze hori bideratu dadila eta osorik egin dadila, auzo berriak ahaztu gabe”.