AKTUALITATEA

| 2023-09-28 09:28:00

EH Bilduk bere proposamena aurkeztu du Ordenantza Fiskalen eztabaidari begira, udalerriko erronkei erantzuteko eta herritarrei zerbitzu hobeak eskaintzeko politika publiko indartsuak antolatzean oinarrituta. Rocio Vitero EH Bilduko bozeramailearen ustez, beharrezkoa da udalak baliabide ekonomiko nahikoak sortzea, besteak beste, arreta soziala indartzeko, ekonomia eta enplegua suspertzeko eta trantsizio energetikoa eta mugikortasun jasangarria indartzeko.

«Laburbilduz, EH Bilduk diru-sarrera publikoak zuhurtziaz handitzea defendatzen du, Udalak herritarrei baliabideak eta zerbitzuak eskaintzen jarraitu ahal izateko, pertsonen egoera hobetzen eta hiriko erronkei aurre egiten lagunduko duten hainbat neurri eta kenkari fiskalez gain. EH Bilduk ardura politikoz jarraituko du lanean, interes orokorra eta herritarren ongizatea lehenetsiz, gure bokazio bakarra jendearen bizi-baldintzak hobetzea baita. Zentzu horretan, bi premisa horiek kontuan hartuko dituen akordio bat negoziatzeko borondatea agertzen dugu», esan du Viterok, betiere kontuan hartuz «testuinguru ekonomiko orokorra eta familia askok gaur egun ekonomia orokorrarekiko duten ziurgabetasuna».

EH Bilduren apustua fiskalitate justu eta progresibo baterantz aurrera egitea da, non zergen azken helburua herritarrentzako hobekuntzak ekartzea izango den. «Horregatik, erakundeetatik herritarren beharrei erantzun nahi badiegu, zergak eta tasa publikoak neurrian eguneratu behar ditugu. Datorren urterako %2,5 eguneratzea proposatzen dugu, salbuespen batzuekin. Igoera orekatua da, baliabide publikoak handitzea ahalbidetzen duena, zergadunei karga fiskala neurriz kanpo handitu gabe. Hori bai, igoera horrekin batera progresibitate fiskala hobetuko duten neurriak hartu behar dira», nabarmendu du Viterok.

OHZn, hobari fiskalaren zero tarte bat sartzea planteatzen dugu, LGStik beherako diru-sarrerak dituzten pertsonek jasotzen duten kenkaria hobetzeko. Gainera, hobariaren tarte ekonomiko guztiak eguneratzea proposatuko dugu, LGSren azken eguneraketarekin lotuta, pertsona gehiagok orain arte jasotzen zutena baino hobari handiagoa eskura dezaten. Gainera, diru-sarrerak hobetzeko, balio handieneko ondasun higiezinen %10ak orain arte baino gehiago ordaintzea planteatzen dugu – etxebizitza ez diren higiezinak –. Eta igoera bat planteatzen da ezaugarri bereziak dituzten ondasun higiezinentzat ere (BICES).

Ibilgailuen gaineko zergan, gehien kutsatzen duenak gehiago ordaintzeko ideia jarraituz, EH Bilduk potentzia handieneko ibilgailuak gehiago zergapetzea proposatu du. Gainera, errenta-irizpidea sartuko du ibilgailu hibridoak edo elektrikoak erosteagatiko kenkariak arautzeko orduan.

Baina, gainera, Viterok adierazi duen bezala, EH Bilduk pertsonen karga fiskala arintzeko kenkari batzuk proposatu ditu. Adibidez, EIOZn, EH Bilduk proposatu du irisgarritasun-obrei lotutako kenkariak %80ra arte igotzea komunitateentzat eta norbanakoentzat. Eta aldaketak proposatu ditu errenta-tauletan, bai partikular horiei dagokienez, bai beren etxebizitzetan obrak eta egokitzapenak egingo dituzten 65 urtetik gorako pertsonei dagokienez. Era berean, etxebizitzetako energia-eraginkortasunaren hobekuntzei lotutako kenkariak %90eraino igotzea proposatzen du, eta %25eko kenkaria ekonomia zirkularrean aritzen diren enpresa eta negozioentzat.

Azkenik, JEZari dagokionez, EH Bilduk uste du egokia dela enpresa handien egoera fiskala beste hiriburu batzuenarekin parekatzea, eta zerga hori 2,1era igotzea 2024an eta 2,2ra 2025ean. Eta gaineratu du energia berriztagarrietatik edo kogeneraziotik abiatuta energia erabiltzen edo ekoizten duten enpresen kasuan, %25erainoko kenkaria jarriko litzatekeela abian.

Tasa eta prezio publikoei dagokienez, EH Bilduk %2,5eko eguneratzea proposatu du, salbuespen batzuekin, hala nola, zaborren tasari dagokionez, jarduera ekonomiko handienak eta hondakin gehien sor ditzaketenak.

Azkenik, politika fiskalean gazteei laguntzeko pare bat neurri azpimarratu ditu Viterok. «Kirol-jardueren hirugarren tartea zabaltzea proposatzen dugu, gazteentzako kuota murriztua 30 urtera irits dadin. Gainera, aparkaleku seguruen doakotasuna defendatuko dugu 30 urtera arte, espazio horien erabilera areagotzeko eta Gasteizen zehar joan-etorri osasuntsuak errazteko neurri gisa».