AKTUALITATEA

Abenduko kronika laburra: Bi erabaki garrantzitsu, adosteko borondaterik ez

| 2026-01-09 16:40:00

Abenduan zehar elgoibartarren bizitzan eragin zuzena izango duten garrantzi handiko bi proiektu onartu dira: Irisgarritasun Plana eta 2026ko Udal Aurrekontuak. EH Bildutik bi dokumentuak hobetzen saiatu gara, arrazoizko proposamen bideragarrien bidez, aurreko egunetan jakinarazi dugun bezala. Hala ere, udal gobernuak ez du adostasunik lortzeko aukerarik eman.

Irisgarritasun-plana

Abenduko batzordean onartzeko aurkeztu zen Irisgarritasun Unibertsalaren Plan Integralak ez zuen EH Bilduk edukia hobetzeko aurkeztutako alegazioetako bat ere jaso. Bestalde, ez da bermatzen herritarren eta inplikatutako kolektiboen parte-hartzea, proiektua hobetu dezaketen alegazioak eta proposamenak aurkezteko aukera emango lukeen jendaurreko erakustaldirik ez baita irekiko.

Udal aurrekontuak

Abenduko osoko bilkuran 2026rako Udal Aurrekontuak eztabaidatu ziren. EH Bilduk 16 neurri aurkeztu zituen, hainbat ardatzen inguruan antolatuta, bai batzordean, bai EAJrekin izandako bileran. Gobernu-taldeak konpromiso seriorik hartu ez zuenez, gure taldeak proposamenaren aurka bozkatu zuen.

Mobilizazioak:

Ohiko kontzentrazioez gain (presoak, Palestina), abenduaren 3an Euskararen Eguna izan zen, eta ekitaldi nagusi gisa, Elgoibarren euskara sustatzeko "Batera" proiektua aurkeztu zen Herriko Antzokian.

Azkenik, Barakaldon eraildako emakume baten berri izan genuen, beraz, abenduaren 23an mobilizatu ginen matxismoaren krimen izugarri hori salatzeko.