Donostia

Donostiako erabilera turistikoko pisuen Ordenantza "zuzenbide osoz deusez" dela dio epai batek

Plan Orokorra betetzen ez duten pisu turistikoei baimen gehiago ez emateko eskatu du EH Bilduk, eta Eneko Goia alkatearen agerraldia eskatu du

| 2019-12-04 12:06:00

Donostiako Administrazioarekiko Auzien 3. zenbakiko Epaitegiak azaroaren 27an emandako epai batek, Zubieta kaleko pisu bati buruzkoak, hankaz gora jarri du etxebizitza turistikoak legeztatzeko Udal Gobernuak eraikitako egitura juridiko guztia. Auzitegiek erabilitako argudioek arrazoia eman diote EH Bilduk hasieratik esandakoari: ordenantza batek ezin du HAPOaren kontra joan.

Epaiaren ondoren, atea irekitzen da kaltetutako edozein partikularrek edo bizilagunen komunitate interesatuak errekurritzeko Plan Orokorra urratuz Udalak emandako baimenak. Beraz, erabilera turistikoko pisuen ordenantzaren segurtasun juridikoa oso ahula da eta Udalak erantzun bat eman behar du.

Hori dela eta, Plan Orokorra betetzen ez duten pisu turistikoei baimen gehiago ez emateko exijitzen dio EH Bilduk Udal Gobernuari. Plan Orokorrak ezarritakoa bete gabe baimenak emateak ondare-erantzukizunak hartzea ekar dezake, eta horrek ondorio kaltegarriak izan ditzake Udal Ogasunean.

Ordenantza berriaren aterkipean irekitako 800 etxebizitza turistikoei dagokienez, Plan Orokorra betetzen ez badute, emandako baimenak berrikusi egin litezke.

Hori guztia dela eta, behar-beharrezkoa da pisu turistikoen ordenantzaren erreforma abian jartzea, Donostiako Hiri Antolamenduko Plan Orokorrera (HAPO) egokitzeko. Eta, horren ondorioz, erabilera turistikoko etxebizitzetarako baimen berriak ezin dira eman.

Epai horretan, epaileak Donostiako pisu turistikoen ordenantzaren 14.2 artikulua aztertu du, honako hau ziurtatzeko:

El concepto concreto impugnado de la Ordenanza Municipal es contraria a la ordenación pormenorizada contenida en el propio Plan General de Ordenación Urbana, y ello porque el artículo 59.2.1.E (…) ‘Condiciones generales de implantación de usos autorizados’ referido a los ‘Usos terciarios de carácter hotelero’ establece como: ‘Criterios de implantación en plantas altas ubicadas por encima de las anteriores: - Se autoriza la implantación de usos hoteleros en esas plantas siempre que ninguna de las ubicadas por debajo de la última en la que existan y/o se pretendan implantar los mismos esté destinada o se proyecte destinar a uso residencial (…); disposición de carácter general que es transgredida por la regulación contenida en el artículo 14.2 de la Ordenanza, lo cual establece una excepción al requisito de que no exista o se proyecte uso residencial por debajo del solicitado de vivienda turística que encuentra acomodo en la regulación contenida en la ordenación pormenorizada del Plan General de Ordenación Urbana. Por el referido motivo considero que, en efecto, el artículo 14.2 de la Ordenanza es nulo de pleno derecho”


Baina hau ez da berria, arrazoi bera erabili zuen EH Bilduk ordenantzari egindako zuzenbidetan Gogora dezagun orduan hitzez hitz esaten genuena:

Ikuspegi juridikotik, Ordenantza honek talka egiten du Plan Orokorrarekin (PO), eta PO hierarkikoki edozein ordenantzaren gainetik dago. Ezin da izan, alde batetik, jarduera ekonomikoek lehen solairuko araua bete behar dutela POn ezartzea eta ordenantzan justu kontrakoa ezartzea, bizilagunak bizitzeko ez diren erabilerak ezartzeko, hala nola pisu turistikoetarako.

Orduan, Udal Gobernuak EH Bilduren zuzenketak baztertu zituen, baina orain epaile bat EH Bilduri arrazoia ematera dator.

Horregatik guztiagatik, Eneko Goia alkatearen premiazko agerraldia eskatzen dugu, epai honen ondorioak azal ditzan, eta baita erabilera turistikoko pisuen kudeaketaren arloan emango dituen pausoak ere, gutxi batzuen interes partikularren gainetik interes orokorra lehenesten has daitezen.

Herritarren parte hartzean atzerapausoak Donostian: orain Urrezko Danborraren txanda

EH Bilduk hiru izen proposatu ditu sarirako, eta gero haien artean herritarrei erabakitzeko aukera eskaintzea proposatu du, baina EAJk, PSEk eta PPk ezetz esan dute

| 2019-12-03 12:48:00

Lehenik eta behin, zoriondu nahi ditugu Realeko emakumezkoen futbol eta hockey taldeak, 2020ko Urrezko Danborra jasotzeagatik.

Baina saridunen izen-abizenak alde batera utzita, EH Bilduk berretsi nahi du Eneko Goiak Urrezko Danborra aukeratzeko prozedura aldatzea erabaki zuenean adierazi zuena: herritarren ahalduntze prozesuan atzerapausoa eman du Udal Gobernuak. Hori dela eta, gaurko Bozeramaile Batzordean EH Bilduk ez du parte hartu azken erabakia hartzeko ariketan. Orain arteko prozeduraren arabera, udal taldeon lana hiru izen aukeratzera mugatzen zen eta gero azken erabakia herritarren esku uzten zen. Aurten ere EH Bilduk hiru izen proposatu ditu, eta gero haien artean herritarrei erabakitzeko aukera eskaintzea proposatu du, eta EAJk, PSEk eta PPk ezetz esan dute. Ondoren, Eneko Goiak prozeduran sartutako aldaketaren ondorioz, azken erabakia hiru udal taldeen artean hartu dute gaur. Joan den urtean 3.666 donostiarren artean erabaki zutena hiru kargu politikoren artean erabaki dute aurten. Atzerapauso erraldoia.

Jakina denez, 2017ko edizioaren eskandaluaren ondoren, saridunaren aukeraketa herritarren partaidetzaren bidez egiten hastea ongi baloratu genuen udal talde guztiok, baita jendartearen gehiengoak ere. Aldiz, 2020ko edizioari begira, Eneko Goiak herritarren partaidetza bigarren mailara eraman nahi izan du berriz ere, eta hemendik aurrera galdeketa soilik egingo da baldin eta, Bozeramaile Batzordean, Udalbatzako ordezkaritzaren bi herenen arteko adostasunik ez bada lortzen. Hau da, politikariek kontrolpean mantendu nahi dute prozesu osoa. Ez da sorpresa bat izan, beraz, aurten sariduna herri galdeketara eraman ez izana.

Baina, Urrezko Danborraren aukeraketan emandako atzerapausoa ez da ekimen isolatu bat izan Eneko Goiak zuzentzen duen Udal Gobernuaren jardueran. EAJ-PSEren kudeaketa ereduaren adibide paradigmatikoa da, parte hartze politiketan atzerapausoak bata bestearen atzetik ematen ari batira. Gaur Urrezko Danborraren aukeraketa izan da, baina gogoratu behar da 2020ko aurrekontuetan ez dagoela herritarrekin eta ehun sozialarekin batera prestatutako egitasmorik. Are gehiago, partaidetza prozesuetatik eratorriko egitasmoak ere deuseztatzen ari da Goiaren Gobernua. Adibidez, auzotarrekin egindako prozesu parte-hartzaile baten bidez erabakitako kirol kantxa kendu dute Egia auzoko Blas de Otero plazan; auzotarrekin hitz egin gabe, gainera.

2021eko edizioari begira Urrezko Danborraren saridunaren aukeraketaren gaitasuna herritarrei itzultzeko eskatuko du EH Bilduk.

Antiguako bizilagunen segurtasuna bermatu eta kaltetuei hitza emateko eskatzen dio EH Bilduk Udal Gobernuari biharko agerraldiari begira

Bihar, Eneko Goia alkateak EH Bilduk eskatutako agerraldia egingo du batzordean, Lizarriturriko etxeetako lur-jauziari buruzko azalpenak emateko. Hain zuzen, joan den asteko osoko bilkuran egin nahi ez zuen agerraldiari buruz ari gara. Bertan, Alkateak ez zuen hitz egin nahi izan eta kaltetuei ez zien hitz egiten utzi, Donostiako Udala oraindik herritarrak arduratzen dituzten arazoetatik zein urrun dagoen eta zein jarrera duen argi eta garbi erakutsiz.

| 2019-11-26 10:49:00

Zarautz Etorbideko etxeetan bizi diren familia horien guztien arazoak ez ziren joan den astearte goizaldean hasi, hilaren 19an, goizeko ordu batean. Auzokideek esan duten moduan, horrelako zerbait gertatu zitekeela aurreikusten zuten. Metroaren pasantearen lanak hasi zirenetik, etxe horien azpitik, hain zuzen, bizilagunek bibrazioak eta zaratak jasan behar izan dituzte eta hormetan pitzadurak agertu dira eta, bereziki asteartean behera etorri zen magalean isurtzen den ur kopurua areagotu egin dela eta hormaren azpiko ubideak gainezka egiten duela ikusi ahal izan dute.

Bizilagunek egoera salatu zuten bai udaletxean, bai ETSren (Eusko Jaurlaritzaren) bulegoetan, baina inork ez zien, ez die orain arte, kasurik egin.

Astearteko gertaerari dagokionez bizilagunak, udal-taldeak eta donostiar askok harritu egin gintuen lehenengo gauza izan zen goizean goizetik, bai udaletxetik, bai ETStik, lur-jausiak metroaren pasantearen obrekin zerikusirik ez zutela zioen mezuak zabaltzen saiatu zirela. Ez ikerketa iragarpenik, ez lan-hipotesirik, ez ezer: ez da metroa izan, eta kitto. Zalantzan jartzen dugu horrela jokatuko ote zuten ekuazio honetan obra faraoniko eztabaidagarri hau presente egon izan ez balitz. Izan ere, lur-jausi horrek, eta horren ondorioz egin behar izan diren etxebizitzen uzteek ez dute alkatearen twit ziztrin bat ere merezi izan.

Gainera, lur-jausia gertatu eta 24 ordu baino gehiago behar izan ziren Udal Gobernuko lehen ordezkari politikoak Antiguan agertzeko. Orduan, lehen aldiz, udal gobernuak ikerketa egingo zuela iragarri zuen. Pentsatu nahi dugu bihar Goia alkateak ikerketa horien berri emango duela, nahiz eta ulertzen dugun atariko ikerketa bat izango dela, eta espero dugu aurrerago bibrazioen, zaraten, hormen pitzaduren eta magalean bestelako neurketak egingo dituztela.

Asteburuan, harri batzuk erortzen jarraitu dute, eta arazoren bat izan da isurtzen den urarekin. Hori dela eta, bizilagunek adierazi digute beldur direla oraindik ere mendi-magalaren egoeragatik, eta, batez ere, ez dakitela beren etxeetan seguru egongo diren ala ez.

Horregatik guztiagatik, biharko agerraldiari begira, EH Bildutik, funtsean, bi gauza espero ditugu:

  1. Lehenik, bizilagunei hitz egiten uztea eta, batez ere, entzutea (biharko Batzordean izango direla baieztatu baitute). Uste dugu udal gobernuak aukera ezin hobea duela pasa den osteguneko osoko bilkuran egindako akatsa zuzentzeko eta kaltetuen hitzak entzuteko. Eta gainera, edozein azalpen erdipurdikoa izango da ez bada gutxienez, kaltetuen bizipena jasotzen.

  2. Eta, bigarrenik, uste dugu Eneko Goiaren Gobernuak konpromiso esplizitua hartu behar duela auzotarren segurtasunarekin. Udalak ETSrekiko duen erabateko mendekotasun horrekin amaitu egin behar du. Metro-pasantearen obrei dagokienez, Eusko Jaurlaritzaren aurrean ahots propioarekin jokatzen hasi behar du, udal-gobernu batek egin behar duena eginez: beste erakunde bateko obrek kaltetutako bizilagunak defendatzea, alegia. ETS zuzentzen duen arduradunaren kolore politikoa bata edo bestea izan, udal-gobernua gauzak ondo egiten hasi behar du, metro-pasantearen obrek sortutako ondorioen aurrean udal-gobernua jarrera bera erakusten ari delako behin eta berriro (San Martin, Amara,...): hau da, ETSri men egitea.

Eraso matxistak jasandako emakumeei laguntzeko koordinazio mahai bat eratzea proposatu du EH Bilduk

Reyes Carrere: "Hiri askotan dagoen eredua Donostian ere ezartzea eskatzen ari gara, besterik ez"

| 2019-11-20 10:43:00

Joan den Aste Nagusian, ikusi genuen deskoordinazio handia dagoela indarkeria matxistaren aurkako borrokan jarduten duten erakundeen artean, erasoen biktima izan diren emakumeen salaketei erantzuteko orduan.

Gertaerak honako hauek izan ziren: abuztuaren 14an, Donostiako Piratak jai eremuko emakume taldeak bertan behera utzi zituen gau horretan egitekoak ziren festa ekitaldiak, salaketa ugari jaso zituztela eta. Horrez gainera, publikoki adierazi zuten salaketa judiziala jartzen duten biktimak babesik gabe geratzen direla. Hurrengo egunetan, zenbakiak ez ziren bat etorri, Berdintasun Bulegoak, Ertzaintzak, Udaltzaingoak eta Emakumeen Etxeak nork bere erara zenbatu baitzituen salaketak. Koordinaziorik ere ez zegoen erasoa jasan zuten emakumeei babesa emateko eta lagun egiteko zerbitzuei dagokienez.

Beraz, argi geratu zen ez dagoela koordinaziorik erasoak jasandako emakumeei laguntzen eta salaketa sexistak jasotzen modu batera edo bestera aritzen diren erakundeen eta taldeen artean: Emakumeen Etxea, Udaltzaingoa, Berdintasuneko Zinegotzitza, Emakumeen Asanblada, Abokatuen Elkargoa, Psikologoen Elkargoa, Osakidetza, Gizarte Zerbitzuak, eta abar. Gobernu taldeari dagokio koordinazioa bultzatzea, lantzea eta bermatzea.

Baina, beste behin ere bistan geratu da epaitegietara jotzea erabakitzen duten biktimek pairatzen duten babesgabezia. Izan ere, emakume horien ibilbidea ez da amaitzen puntu morean: salaketa judiziala jartzea erabakitzen badute, bide latz eta zail bat egin behar dute polizia etxetik ospitalera eta epaitegira. Baina hor ere ez da amaitzen bidea, erasoaren ondorengo faseari aurre egitea faltako dute eta: nola kudeatu egoera familiarekin eta gizarte zirkuluarekin, nola aurre egin etorkizunean kalean ordu jakin batzuetan ibiltzeari, nola aurre egin etorkizuneko harremanei, eta abar. Alegia, bide luzea dela, eta handik duintasunez irten ahal izateko, tresna juridikoak, medikoak, psikologikoak… behar direla, eta, askotan, ez dela halako tresnarik izaten.

Indarkeria sexista errotik atera ahal izateko gure hirian, ikuspegi integral batetik ekin behar zaio, eta modu batera edo bestera erasoak prebenitzen, biktimari laguntzen eta erreparazioa ematen jarduten duten eragile guztiak inplikatu. Era berean, sinergiak sortu eta denon ahaleginak batu beharra dago; izan ere, noizean behingo kanpainak ez dira nahikoak erasoak prebenitzeko, biktimei lagun egiteko eta erreparazioa emateko.

Joan den irailaren 16an, interpelazio bat egin genion Berdintasuneko zinegotzi ordezkariari gai horri buruz eta eraso sexisten aurkako protokoloa hobetu beharraz. Haren erantzunak lausoak eta nahasiak izan ziren, baina premiazkoa da alderdi hori hobetzea.

Horregatik guztiagatik, hauxe da biharko udalbatzarrean EH Bilduk aurkeztuko duen proposamena:

Donostiako Udalbatzak hertsatuki eskatzen dio Udal Gobernuari bultza dezala indarkeria matxista prebenitzeko eta ekintzak koordinatzeko diziplina anitzeko mahai iraunkor bat, profesionalek, ordezkari politikoek, talde feministek eta inplikatutako beste erakunde batzuek osatua (Abokatuen Elkargo Ofiziala, Osakidetza, gizarte zerbitzuak, Berdintasun Bulegoa, Emakumeen Etxea, Ertzaintza, Udaltzaingoa, Donostia Psikologoen Elkargo Ofiziala, Donostiako Asanblada Feminista eta indarkeria matxista prebenitzeko lanean aritzen diren bestelako herri elkarteak).

Metro-pasantearen obrak direla-eta gaur Antiguan izan den luizi larriarengatik azalpenak eskatuko dizkio EH Bilduk Eneko Goiari

Garbiñe Alkiza (EH Bilduren zinegotzia): “Hau da ezkutatzen ari diren metro-pasantearen B aldea”

| 2019-11-20 10:36:00

Gaur goizeko ordubatan luizi larri bat gertatu da Zarautz hiribideko 31. zenbakiaren atzealdean. Honen ondorioz, bizilagun batzuek gaua pasatu behar izan dute hotel batean, eta gauza bera egin behar izango dute hurrengo egunetan ere, arriskua handia dagoelako oraindik ere. Beheko solairuan bizi den familia, zehazki, metro gutxi batzuengatik libratu da, tamaina handiko harriak ondoko lokalean sartu baitira, une horretan hutsik zegoela.

Eremu honetan metro pasantearen obren eragina nabarmena da, bizilagunek EH Bilduren zinegotzia den Garbiñe Alkizari azaldu dioten moduan. Mendi magalaren egoera salatu izan dute bizilagunek behin baino gehiagotan. Izan ere, gero eta ur gehiago erortzen ari zela azaldu diote Alkizari eta, gainera, batzuetan urak kolore desberdina hartzen duela. Honek soilik obrekin zerikusia izan dezake, bistan denez. Hortaz gain, bizilagunek behin baino gehiagotan salatu dituzte bibrazioak, pitzadurak eta gaueko zarata. Metroaren tunela igarotzen den lekuan hau gertatzea ez da, inolaz ere, kasualitate bat izan.

Nahiz eta ezbeharra hain handia izan, bizilagunek salatu dute Eneko Goiak zuzentzen duen udal gobernuko arduradun politikorik ez dela beraiekin harremanetan jarri. Eta gauza bera esan dute Arantza Tapia zuzentzen duen ETS-ri buruz. Teknikari batzuk azaldu dira, besterik ez. Are gehiago, iturri ofizialetatik saiatu izan dira goizean zahar luizia metro pasantearen obretatik bereizten, obrak eremuaren azpian egiten ari badira ere. Ikertuko ote duten ere ez dute argitu eta euriengatik izan dela zabaltzen ari dira, inongo lotsarik gabe.

Garbiñe Alkiza zinegotzia bertan egon da eta, kaltetuei elkartasuna adierazteaz gain, lehen eskutik egoera ezagutu ahal izan du. Bizilagunek ez dute zalantzarik eta argi eta garbi adierazi dute luizia obren ondorioz izan dela. Hilabeteak daramatzate salatzen egoera gero eta okerragoa zela. Honen aurrean, Garbiñe Alkizak adierazi du “hau da donostiarroi ezkutatzen ari zaigun metro-pasantearen B aldea; milaka euro gastatzen dute metroa promozionatzeko baina ez dira gai izan gaur goizean kaltetuekin harremanetan jartzeko”.

Hauek horrela, EH Bilduk premiazko agerraldia eskatu du, osteguneko udalbatzarrean tratatzeko, Eneko Goiak azaldu dezan, besteak beste, ea zergatik ez den mendi-magala egonkortu.

ALBISTEAK

“Parte Zaharreko Mahaia” eta “Donostiako Gazteria mahaia” eratzea proposatu du EH Bilduk

2021-09-29 12:40:00

Azken hilabeteotan, bizikidetza arazoak agertu edota areagotu dira gure hirian, batez ere Parte Zaharrean, nahiz eta Erdialdeko eta Groseko beste leku batzuetan ere gertatu diren. Askotan, gertakari horiek kaleko edanarekin (“boteiloiarekin”) lotuak izan dira, baina arazo konplexuagoa da, beste hiri askotan ere gertatu da, eta agerian uzten du arazoaren benetako tamaina.