Donostia

Donostian hezkuntza unibertsala bermatzeko eta haurren konfinamenduari aurre egiten laguntzeko hainbat neurri proposatu ditu EH Bilduk

EH Bilduk Donostian dugun egoerari buruzko txosten bat egin du, eta hiriko hezkuntza-komunitateekin, sindikatuekin, auzoetako boluntarioen sareekin eta beste eragile batzuekin partekatzen ari da, eta Udal Gobernuari eta gainerako talde politikoei konpromisoak eskatu dizkie

| 2020-04-03 11:39:00

TXOSTENA

COVID-19 pandemia krisi honen aurrean hartutako hezkuntza irtenbideak diseinatzerakoan familia eta ikasle prototipo zehatz batean pentsatu da, egoera txarrean dauden kolektiboak kontuan hartu gabe. EH Bilduk beharrezkotzat jotzen du neurri zuzentzaileak hartzea, instituzio guztietan eta baita Donostiako udalean ere. Inguruko udalek egoerari aurrea hartzeko eta behar dutenei ordenagailuak eta Interneterako sarbidea eskaintzeko gaitasuna izan dute. Donostiako Udal Gobernua, Covid19ren krisi honetan beste neurri batzuk hartzerakoan bezala, berandu doa jada, baina horrek ez du esan nahi guztiz beharrezkoak diren hainbat neurri hartzeko garaiz ez gaudenik.

Ildo horretan, EH Bilduk ekimena hartu du, eta sortutako egoera aztertzen duen dokumentu bat egin dugu. Bertan, guztiz gauzagarriak diren hainbat neurri proposatzen ditugu, eragile sozial eta politikoen eta Donostiako hezkuntza-komunitatearen artean adostu beharko liratekeenak, eta, nolanahi ere, osasun-berme guztiekin gauzatu beharko liratekeenak, birusaren hedapenari eustea baita oraindik ere gizarte osoaren lehentasuna.

Bestalde, auzoetan sortu diren boluntariotza eta zaintza sareekin ere harremanetan gaude, ikasleei laguntzeko formulak aztertzeko. Auzoetako sare horietan 600 boluntario baino gehiago parte hartzen ari dira eta, orain arte, adinekoei laguntza ematen ibili dira. Orain, berriz, prest agertu dira Donostiako ikasleen arteko desberdintasunak arintzeko eta hezkuntzarako eskubidea bermatzeko neurriak hartzeko.

Udal Gobernuaren konpromisoa lortzea falta da, baliabide materialak eskaintzeko (kultur etxeetan eta liburutegietan, esaterako, erabiltzen ez diren ordenagailuak) eta baita giza baliabideak ere (haurtxokoetako eta gaztelekuetako langileak …). Udal gobernuaren ardura da inplikatutako eragileen artean koordinazio lanak egitea, hezkuntza-komunitateak, Hezkuntza Saila, zaintzako boluntarioen sareak, Udaltzaingoa, etab.

EH Bilduren aldetik hainbat hezkuntza-komunitaterekin harremanetan jarri gara dagoeneko, haien egoeraren berri izateko, eta egiaztatu ahal izan dugu arazo larria dela Donostian ere.

Eustat-en arabera (2019), seme-alabak dituzten EAEko familien % 91,2k ordenagailua du etxean. Hau da, seme-alabak dituzten familien %8,8k ez dute ordenagailurik. Donostiako datu ofizialen faltan, EH Bildu zuzenean ari gara informazioa biltzen ikastetxeetatik, eta ziurta dezakegu Donostian eremu batzuetan ordenagailurik eta Interneterako sarbiderik eza uste baino zabalduago dagoela. Ehunka dira etxean ordenagailurik ez duten Donostiako haurrak.

Bestalde, gurasoen esku utzi da ikastetxeek bidalitako etxeko lanen jarraipena, baina kasu askotan, hori erraz egitekoa ez dela ikusi da. Alde batetik, guraso askok telematikoki egiten dute lana, beraz ezin laguntzen egon uneoro, eta batzuetan horietako batzuek ez dute izango, ez hizkuntza aldetik, ez ulermen aldetik haurrei laguntzeko mailarik, eta aurrek ezin izango dituzte lanak aurrera eraman.

Gainera, Eusko Jaurlaritzak jantoki-beka duten ikasleei jantoki-zerbitzua etenda dagoen bitartean laguntza horiek mantentzea erabaki badu ere, laguntza horiek zuzenean familietara ez iristea gertatu daiteke.

Laburbilduz, COVID-19 pandemia krisia dela eta, haurrak etxean geratzeko agindua eman eta EAEko Hezkuntza sailak hezkuntza presentziala eten du. Honek, praktikan, esan nahi duena da ikasleak etxetik egingo dutela “lan” eta irakasleek on-line (emaila, barne sareak, sare sozialak) bidaliko dietela egin beharreko lana. Gainera, ikasleak ezin direnez ikastetxeetara joan, bertako zerbitzu guztiak eten egin dira. Tartean, oinarrizkoa: jantoki zerbitzua. Ondorioz, gabeziak eta desberdintasunak sortzen ari dira, batez ere Interneterako sarbide faltagatik. Eta ikasle askoren hezkuntzarako eskubidea urratzen ari da.

ERTEn dauden udal langileen soldatak osatzeko konpromisoa hartzeko eskatu dio EH Bilduk Udal Gobernuari

EH Bilduk proposatu du aurreztutako dirua babes-ekipoak erostera eta dendariei, indarkeria matxistaren biktimei eta bazterketa-arriskuan dauden pertsonei laguntzera bideratzea

| 2020-04-01 11:03:00

Koronabirusak eragindako krisiak udal-zerbitzu publikoetako langileei ere eragiten die, eta horietako askok Enplegua Aldi Baterako Erregulatzeko dosierrak (ERTE) jaso dituzte. Neurriak dBus, garbiketa zerbitzu, kiroldegi eta abarretan lan egiten duten ehunka langileei eragiten die. Oso kezkatuta daude joan den martxoaren 24an ERTEren jakinarazpenak iristen hasi zirenetik. Joan den ostiralean Bozeramaileen Batzordearen azken bilera informalean, Udal Gobernuak jakinarazi zuen 'aztertzen' ari direla soldata osatzeko aukera eta etorkizunerako kontratuei eustea.

EH Bilduk behin eta berriz esan du udal kontratetako langileen soldatak osatu behar direla, hau da, SEPIk soldataren %70 ordainduko duela ziurtatzen badu, udalak beste %30a osatu beharko duela. Gobernuari eskatzen diogu modu ofizialean konpromisoa har dezala langileekin, idatziz, neurri hori hartuko duela adieraziz. Izan ere, osasun krisiaren eta konfinamenduaren eraginaz gain, familia asko ere ziurgabetasun ekonomiko izugarriarekin bizi dira egunotan. Donostiako Gobernuak bere langileei eta, oro har, herritarrei segurtasuna ematen lagundu dezake eta lagundu behar du. Proposatzen ari garen neurri hau udaletxe barruan nola kudeatuko den alde batera utzita, bada garaia ehunka langile hauei ofizialki jakinarazteko udalak bere soldata osatzeko konpromisoa hartzen duela.

Bestalde, ERTEaren eraginez, udalak diru asko aurreztuko du soldatetan. Eta ez dezagun ahaztu donostiar askok ordaindu dutela erabiltzen ez duten zerbitzu bategatik, adibidez, Kirol Txartela. Eta gogora dezagun ere Donostiako udalak 2019an 6,7 milioiko superabita izan zuela, eta kontingentzia fondoa ere erabiltzeko aukera dagoela.

Hauek horrela, EH Bilduk proposatu du udalak aurrezten duen dirua krisiaren ondorioei aurre egiteko ekimenetara bideratzea. COVID19ren ondorio ekonomiko eta sozialei aurre egiteko epe ertainera egin behar diren beste laguntza eta inbertsio batzuk momentuz alde batera utzita, uste dugu berehala konpondu beharreko arazoak daudela, gehiago itxaron ezin dutenak:

  • Babes-ekipoak (gela desinfektatzaileak, maskarak, eskularruak) erostea eta banatzea funtsezkotzat jotzen diren zerbitzu-jardueretako langileentzako: etxez etxeko laguntza-zerbitzuko langileak (publikoki eta Lan Ikuskaritzaren aurrean salatu dute ia babes neurririk gabe ari direla lanean), irekita egon behar duten saltokiak (janari dendak, kioskoak …), bus langileak, kale-garbiketa, sanitarioak, auzoetako zaintza sareetako boluntarioa...

  • Merkataritza txikientzako laguntzak: diru-laguntza sorta bat onartzea krisiak gogor zigortutako sektore honi laguntzeko.

  • Indarkeria matxista: oraintxe bertan emakume asko daude beren erasotzailearekin giltzapetuta Donostian, eta ondorioak lazgarriak izan daitezke. Beraz, beharrezkoa da Udal Gobernuak atal horretara bideratzen dituen baliabideak handitzea. Gogoratu behar da, gainera, Emakumeen Etxea itxita dagoela eta hortik egiten zen prebentzio eta asistentzia lan guztia orain ez dela egiten. Berdintasunaren Udal sailaren ardura da hau dena behar bezala bideratzea.

  • Etxerik gabeko pertsonak: zerbitzu bereziak prestatu badira ere (Atano III., …), gaur egun oraindik kalean bizitzen jarraitzen duten 70 pertsona daude Donostian.

  • Ezohiko gizarte-larrialdietarako laguntzak: bizi dugun larrialdi-egoera dela-eta, laguntzak biderkatu egin behar dira, eta gizarte-langileen balorazioak izan behar du laguntza horiek emateko baldintza bakarra.

Nahiz eta jarduera instituzionala salbuespen egoeran egon, EH Bilduk herritarren zerbitzura lan egiten jarraitzen du. Sindikatuekin, auzo elkarteekin, eragile sozial eta ekonomikoekin, kultur jaialdiekin eta abarrekin harremanetan gaude, eta euren eskaerak modu ofizialean Eneko Goiaren gobernuari helarazten ari gara. Izan ere, gure zinegotziak bitartekaritza-lanak egiten ari dira erakunde horien eta udalaren artean, kasu askotan gainera eskatutakoa lortuz.

ALBISTEAK

Etxebizitza babesturik gabeko operazio urbanistiko bat ahalbidetzeko Udal Gobernua eskuzabalegi jokatzen ari dela salatu du EH Bilduk

2020-09-16 12:14:00

Intxaurrondoko Luisa Enea eremuan, Monseko kiroldegiaren ondoan , 48 etxebizitza libre eta 115 aparkaleku eraikitzeko egitasmoa dago

EAJ-PSEk Ekialdeko Barrutia ziurgabetasunean murgildu dutela salatu du EH Bilduk

2020-09-14 14:50:00

Ekialdeko Barrutia zergatik ez den arrankatzen jakiteko helburuarekin EH Bilduk eskatutako Manu Narvaez Presidentetzako zuzendariaren agerraldia egin da gaur. Izan ere, Ekialdeko Barrutiko Batzordea osatzen duten elkarteek orain dela aste batzuk salatu zutenez, “2019an gauzatzeko onartutako 23 proiektuak 2020. urtera aldatu behar izan ziren eta gaur egun, egoera askoz larriagoa da, 2019ko aurrekontuaren exekuzioa % 1etik beherakoa baita” (1). Eta 2020ko proiektuak ere geldirik daude. Ziurgabetasun egoera honen aurrean, EH Bilduk bertatik bertara ezagutu nahi zituen Eneko Goiaren gobernuak hartu behar dituen neurri zuzentzaileak.

Udal honen lehentasunak eta gobernantza eredua goitik behera aldatu behar dira pandemiak jarri dizkigun erronkei aurre egiteko

2020-09-10 12:36:00

Ikasturte politikoaren hasiera honetan, Donostiako EH Bilduk Eneko Goiaren Gobernuaren azken hilabeteetako kudeaketaren balantzea egin du gaurko prentsaurrekoan. Reyes Carrerek Covid-19ren ondorio sozial, ekonomiko eta sanitarioengatik markatuta egon den uda honetako balantzea egin du.