Bilbo
EH Bildu Bilbo udal taldeak "bere ardurak bere gain hartzeko" eta "prebentzio lana eta lan pedagogikoa" egiteko eskatu dio Udal Gobernuari, "atzo gertatutakoa saihesteko, ireki zuten hainbat Bilboko ostalaritza establezimenduen terrazatan eta inguruetan jende pilaketak izan baitziren".
EH Bildu Bilbok azaldu duenez, ostalaritza sektorea "COVID 19ren krisiaren ondorioak zuzenean pairatzen ari da, eta oso gaizki pasatzen ari da". "Atzo ostalari batzuek terrazak irekitzea erabaki zuten, beste batzuek, ordea, ezin izan zuten, edo ez zuten komenigarritzat jo, konpentsatzen ez dietelako. Hala ere, ireki zutenetako batzuek, erantzukizunagatik, euren lokalak ixtea erabaki zuten arratsaldean, egoerak gainezka egin zuelako, besteak beste, jendearen pilaketak eman zirelako, horrek egungo egoeran dakarren arriskuarekin".
Egoera horren aurrean, EH Bilduk esan duenez, Bilboko Udal Gobernuak "irtenbide gisa soilik proposatzen digu izuna, eta horrek epe laburrean arazoa konpon dezakeen arren, epe ertain-luzera ez du konponduko". Bilboko hainbat tabernetako terrazatan atzo gertatutakoa saihesteko, bere ustez, "ezinbestekoa da Udal Gobernuak lan pedagogikoa eta prebentzio lana egiteko baliabideak ezartzea".
"Udal Gobernuak bere erantzukizunak onartu eta, zigorretatik haratago, konponbideak mahai gainean jarri behar ditu, bilbotar guztion osasuna arriskuan jartzen duten egoerak saihesteko", nabarmendu du.
COVID-19ak sortutako egoerari aurre egiteko Kohesio Sozialerako eta Ekonomia, Enplegua eta Kultura suspertzeko Neurrien Plana aurkeztu du gaur Bilboko Udalak. Plan horren inguruan akordio bat lortzeko "batasuna, konfiantza eta elkarlana" izan direla "gakoak" adierazi du, Jone Goirizelaiak, EH Bilduko Bilbo udal taldeko bozeramaleak. Plan horrek EH Bilduk sozial, ekonomi eta kultur arloko bere proposamen ugarien zati handi bat jasotzen duela argitu du Goirizelaiak, “pertsonen zaintza eta ongizatea helburu beti premisa nagusitzat hartuta” nabarmendu du.
EH Bildu Bilboko bozeramaleak gogorarazi duenez, COVID 19ak eragindako osasun krisia hasi zenetik, arduraz jokatu du EH Bilduk Udal Gobernuari proposamenak helaraziz, bilbotarren unean-uneko beharrei erantzuteko, kalean bizi direnen alde, pertsona nagusien eta umeen alde, mugikortasunerako neurriak proposatuz eta abar.
Halaber, bultzada sozialerako eta suspertze ekonomikorako proposamen bat aurkeztu zuen alderdi subiranistak apirilean, orain sinatu den itunaren aurrekari gisa. Krisi sanitarioren ondorioz hartutako neurriek kalte sozial eta ekonomiko handiak ekarriko zituztela jakinik, kalteok ahalik eta lasterren arintze aldera neurri publiko ausartak hartu behar zirela defendatu zuen EH Bildu Bilbok. Alde horretatik, bere proposamenean babes laguntza sozialak, zerga-hobariak eta hiriko jarduera ekonomiko eta kulturala aktibatzeko neurriak jasotzen ziren.
Ildo horretan, EH Bilduko bozeramaleak azaldu duenez, Gobernu taldearekin negoziatu eta lan egin ondoren, azkenean, lortutako akordioari esker, adostutako neurriak lehen bailehen aktibatzea bideratuko dugu. "EH Bilduk proposatu dituen neurri eta partida asko sartzen" ditu, eta, bere esanetan, horiek "ezinbestekoak" dira. Beste batzuen artean, Gizarte Larrialdietarako Laguntzen eta Prestazio Ekonomiko Berezien zenbatekoak 3,5 milioi eurora igo dira eta baldintzak malguak izango dira, eskuragarriagoak izateko; bestetik adinekoen, emakumeen, haurren eta etxerik gabeko herritarren aldeko neurriak eta arrakala digitalari aurre egiteko inbertsioak ere jaso ditu planak”.
EH Bilduren neurriak “proposamen ekonomiko hutsetatik haragokoak ere baziren arren”, koalizio subiranistak “tasen inguruan proposatutako hobari batzuk ere jaso ditu azken Udal Akordioak”.
"Enpleguari dagokionez, Bilbao Ekintzaren Enplegu Planak bultzatzeko hasierako zenbatekoak handitu dira, baita “kontsumo lokala estimulatzeko erosketa-bonuak ere ugaritu dira, saltzaileen eta erosleen alde", gehitu du Goirizelaiak.
Ildo berean, Goirizelaiak esan duenez, EH Bilduk kultur agenda suspertzeko abiarazitako ekimenetako batzuk ere gehitu ditu, eta, aldi berean, euskarazko kultur ekoizpenerako laguntzak gehitu dira.
Lehen alea eta ariketa kolektiboa
Goirizelaiaren hitzetan, "premiazko plan bat dugu, premiazko neurriak dituena, eta berehala jarri behar ditugu martxan neurriok"; izan ere, "Bilboko herritar guztiei lehen bailehen laguntzen hastea tokatzen zaio Bilboko Udalari, eta bidean ikusiko dugu ea proposatutakoa nahikoa den ala bultzada publikoa handiagoa izan behar den”.
Bere esanetan, gaur aurkeztutako Udal Plana “guztiok egiten ari garen ariketa kolektiboan pieza bat gehiago; sarean milaka bilbotar egiten ari diren ariketaren beste pieza bat”. Gaineratu duenez, “danak lotuta goaz aurrera: osasun arloko langileak, auzoetako elkartasun-sareak; garbitzaileak, gizarte-langileak, irakasleak, sindikalistak, etxetik urrun konfinatuta dauden bilbotarrak eta euren senideak, haurrak, aitite-amamak…".
Azkenik Jone Goirizelaiak gogoan izan ditu bidean joan zaizkigun auzokideak eta bilbotarrak animatu ditu etorkizunera begira baikor azaltzeko, “gora bihotzak” aldarrikatuz.
Bilboko Udalak birjarpen-tasa desagerrarazteko eskatu dio Espainiako Gobernuari, horrek pribatizazioa saihestuko du eta zerbitzu publikoak indartzea ahalbidetuko du