Bilbo

EH Bildu Bilboren ustez, ondo dago udal kiroldegi berriak irekitzea, baina ezinbestekoa da Bilbao Kirolak-eko lan gatazkari irtenbidea ematea

| 2019-07-19 14:30:00

~~EH Bildu Bilbok “begi onez” ikusten du udal kiroldegi berriak irekitzea Bilboko auzoetan, baina Jone Goirizelaiaren, EH Bilduko Bilboko udal taldearen bozeramalearen esanetan, kiroldegi horiek herritarrei zerbitzu ona eskaini ahal izateko “ezinbestekoa” da langileek “lan baldintza duinak” izatea.
Ildo horretan, Jone Goirizelaiak; Bilboko alkate Juan Mari Aburtori eskatu dio Bilbao Kirolak-en “egun dagoen lan gatazkari lehenbailehen irtenbidea emateko”. “Zerbitzu publikoak diren heinean, Udalaren eskumena dira langileen lan baldintzak, eta Aburtok ezin du ez-ikusiarena egin eta arazoa azpikontrataren ardurapean utzi”.
Goirizelaiak adierazpen hauek egin ditu gaur San Mameseko udal kiroldegiaren inaugurazioan. Jone Goirizelaiak eta Asier Gonzalezek, EH Bilduko Bilboko zinegotziek, inaugurazioan parte hartu dute eta, era berean, Bilbao Kirolak-eko langileekin egon dira euren aldarrikapenekin bat egiteko,  bertan kontzentrazioa egin baitute.
Bilbao Kirolak-eko langileak maiatzetik grebak egiten ari dira dagozkien eskubideak aldarrikatzeko. Gaur lanuzte partzialak egiten ari dira eta uztailaren 23an, asteartean, egun guztiko greba egingo dute.
Horren ondorioz, Goirizelaiak adierazi duenez, “herritarrek lanuzteetan ezin dituzte udal igerilekuak erabili, gainera udan, bilbotar askok kanpoko igerilekuekin gozatzen duten garaian”. Horrez gain, gaineratu duenez, “lanuzteetan gimnasioak begirale barik gelditzen dira eta horren ondorioa erabiltzaileen segurtasun falta da”.
Hortaz,  Goirizelaiak Aburtori Bilbao Kirolak-eko lan gatazkari “ahalik eta arinen irtenbidea emateko eta langileen lan baldintza duinak bermatzeko” eskatu dio, “alkatearen ardura eta erantzukizuna delako”. “Udal kiroldegien aldeko apustu argia egiten dugu, herritarrei kalitatezko zerbitzu publikoak eskaintzeko eta horretarako ezinbestekoa da langileek lan baldintza onak izatea”, azpimarratu du.

EH Bilduk ‘Jaietan ere, emakumeok libre’ izateko sentsibilizazio kanpaina martxan jarri du eta jai parekideak bermatzeko hainbat neurri proposatu ditu

| 2019-07-18 13:15:00

~~Euskal Herrian jaietan murgilduta gaude eta, horrela izanik, ‘Jaietan ere, emakumeok libre’ kanpaina abiarazi du EH Bilduk.  Kanpainaren helburua da herritar oro konturatzea emakumeek eta gizonek ez dutela askatasun eta behar berdinekin jokatzen jaietan eta jai eremuetan eta egiazko jai parekideak eraikitzea.
Kanpaina horren aurkezpena egin dute gaur prentsaurrekoan Jasone Agirrek, EH Bilduko legebiltzarkideak; Jone Goirizelaiak, Bilboko udaleko EH Bilduko bozeramaleak; Bea Ilardiak, Bizkaiko Batzar Nagusietako EH Bilduko bozeramaleak; eta  Idurre Bidegurenek, EH Bilduko senatariak.
Bea Ilardiak gogoratu duenez, “zoritxarrez, azken asteetan hainbat eraso sexual pairatu izan dituzte Euskal Herriko hainbat emakumek herri eta hiri ezberdinetan: Barakaldo, Bilbo, Beasain, Santurtzi, Hernani, Iruña…”. “Argi dago datuak ez direla onak, Euskal Autonomi Erkidegoan udako 3 hilabeteetan iaz 174 salaketa tarteratu ziren eta salatzen direnak eragiten dituzten erasoen gutxiengoa dela kontutan hartzen badugu, datuak jasanezinak dira”, adierazi du.
Ildo horretan, azaldu dutenez,  “jai eremuak eta jai giroak aproposak dira sexu erasoak emateko” eta “horren guztiaren inguruan kontzientzia hartzea eta egiazko jai parekideak eraikitzea ezinbestekoa da, emakumeen eta LGTBIQ kolektiboaren aurkako edozein eraso saihesteko helburuarekin”. 
Protokoloa
Horrela, hainbat neurri proposatu dituzte EH Bilduko ordezkariek. Horien artean, Goirizelaiak adierazi duenez, herri eta hiri guztiek izan behar dute emakume elkarte eta mugimendu feministako kide eta berdintasun teknikariekin batera koordinatutako jaietarako indarkeria matxista protokoloa. Gainera, bere esanetan, protokolo horretan garrantzitsua da, besteak beste, txosna eta gazte mugimendua atxikitzea.
Jaien aurretik autodefentsa feminista ikastaroak antolatzea, eraso sexistei buruzko kontzientziazio kanpainak martxan jartzea eta jaietako egitarauaren eta ekintzen inguruko erabaki espazio guztietan parekidetasuna bilatzea dira EH Bilduko ordezkariek proposatutako beste neurri batzuk.
Era berean, Goirizelaiaren esanetan, jaietan eta espazio ludikoetan  sortzen diren jardun, portaera, bizitzeko modu desberdinak, rolak… identifikatzea eta parekidetasuna lantzeko tailerrak zein espazioak aktibatzea ere “garrantzitsua” da.
Bilboko Udaleko EH Bilduko bozeramaleak nabarmendu duenez, jaietako ekintzak nori zuzenduta dauden, zenbateko aurrekontua duten eta nortzuk parte hartuko duten hausnartzea beharrezkoa da eta, behar izanez gero, orekatzeko irizpideak ezartzea: emakume elkarteak eta talde feministak zuzenean gonbidatu, bilera orduak eta egunak zaindu, informazioa partekatu, jardueren formatua emakumeentzat erakargarria egin, ikusarazi eta lehenetsi emakumezkoak protagonista diren jarduerak (kultura, kirol jarduerak), epaimahai parekideak sortzen saiatu, balioa eta aitortza soziala eman gehienetan emakumeek egiten dituzten eta bigarren mailakotzat hartzen diren lanei...
Ildo horretan, azpimarratu duenez, ezinbestekoa da jai egitarauetan eta komunikazioko materialetan mezu, irudi edo hizkuntza sexistarik ez erabiltzea eta  gizonen eta emakumeen aniztasuna (adina, jatorria, sexu orientazioa, genero adierazpena...) ikusaraztea.
Indarkeria matxistari aurre egiteko neurriak martxan jarri behar diren moduan, askatasun afektibo-sexualaren kontrako indarkeriari ere aurre egin behar diogula, LGTBIQ koleltiboekin elkarlanean, nabarmendu du Goirizelaiak, izan ere, “sistema heteropatriarkalean oinarrituta dauden indarkeriak dira biak”.
EH Bilduko ordezkariak gogoratu dutenez, “jaietan eta horien inguruan sortzen diren egoera desberdinak, bai eta bertan ageri diren elementuak aitzakiatzat hartzen dira naturalizatzeko gertatzen diren hamaika eraso sexista eta sexual”.
Testuinguru orokor honetan, EH Bilduko emakumeen ustez, jaiak dira “unerik aproposena eremu hurbilean nahi dugun eredua eraikitzeko: herrikoia, parte hartzailea, berdinzalea, librea, segurua....”. “Bide hori lantzeko azterketa kritiko bat egin behar dugu; eta horrela aipatutako neurriak proposatu ditugu”, nabarmendu dute.

EH Bilduk Bilboko Udalari eskatu dio ez erantzuteko Gotzaindegiak Begoñako Andra Mari irakaskuntza eskola eraisteko egindako eskaerari , Eusko Jaurlaritzaren erantzuna izan arte

| 2019-07-12 14:07:00

Bilboko EH Bilduko udal taldeak Asier Abaunzari, Bilboko Obretako eta Hiri Plangintzako zinegotziari, eskatu dio ez erantzuteko Gotzaindegiak Begoñako Andra Mari irakaskuntza eskola eta horren patioa eraisteko egin duen eskaerari, Eusko Jaurlaritzaren erantzuna jaso arte; izan ere, ‘Por un Abando Habitable y Saludabe’ auzo elkarteak irakaskuntza eskola eta horren patioa Ondare Kulturala izendatzeko eskatu dio Eusko Jaurlaritzaren Kultura Sailari.

Abaunzak gaur agerraldia izan du Bilboko Udalean, Cervantes ikastetxe publikoko ordezkaritza taldeen arteko gatazkaren berri emateko Begoñako Andra Mari Irakasleen Unibertsitate eskolan aurreikusi den proiektua dela eta.  Bertan, Jone Goirizelaiak, EH Bildu Bilboko bozeramaleak, adierazi duenez, Eusko Jaurlaritzak eraikin horri buruz erantzun bat ematen ez duen bitartean, “horren eraispena ez litzateke baimendu behar”, izan ere, “gero ezin da egin ezer eta damutu gaitezke”.

Era berean, Abaunzari eskatu dio gai hau barrutiko kontseilura eramateko, gai honek eragina baitu “eskolan, ikasleengan, gurasoengan, baina baita ere auzo guztian, bizilagunengan eta euren beharrizanetan”.

Trukatze edo desjabetze aukerei dagokienez, Goirizelaiak Obretako eta Hiri Plangintzako zinegotziari gogoratu dio “bilbotar guztien diruaz hitz egiten ari galara eta baita ere toki horretako bizilagunen diruaz eta ez Bilboko Udalaren diruaz”. Horregatik, bere esanetan, “dirua ez da eralgi behar”, baina, “bizilagunek zerbait proposatzen dutenean, beharrezkoa da aztertzea eta birplanteatzea” erabaki egokiak hartzeko helburuarekin.   

“Bilboko Udalak lan-gatazka pila ditu herritarrengan eragina dutenak eta Aburtok horien irtenbideari buruz ez du ezer jakin nahi”, salatu du EH Bildu Bilbok

Goirizelaiak kalitatezko zerbitzuak eskaintzeko zuzeneko kudeaketaren alde egin du eta, bitartean, azpikontraten kontrol zorrotza eta klausula sozialak ezartzea aldarrikatu du

| 2019-07-11 11:45:00

EH Bildu Bilbok salatu duenez, Udal Gobernuak “udan ere martxan dagoen Bilbo idiliko baten itxura saldu nahi duen arren, hori ez da benetako egoera”; izan ere, “Bilbo errealean eta udalean martxan daudenak lan-gatazkak dira, langileen eskubideak behin da berriz urratzen direlako eta horrek, eragina du zerbitzu publikoetan eta, ondorioz, herritarrengan”.

 “Bilboko alkateak gatazka horiei buruz ez du ezer jakin nahi eta joan den astean proposatutako 100 proposamenetan ez ditu aipatu ere egiten; izan ere, Aburtori bost axola langileen eskubideak. Ametsetako Bilbo bat aurkezten digu alkateak, Bilbo hori langile askorentzat ametza gaiztoa denean”, adierazi du EH Bildu Bilboko bozeramaleak, Jone Goirizelaiak.  

Goirizelaiak gaur prentsaurrekoa eskaini du Bruno Zubizarreta eta Asier Gonzalez, EH Bildu Bilboko zinegotziekin, batera. Bertan, egun Bilboko Udalean dauden lan-gatazka ezberdinen berri eman du. Horren adibide argia Bilbao Kirolak-en gertatzen ari dena dela adierazi du.

“Bilbao Kirolak-eko langileak, azpikontratatutako enpresa batekoak, grebak egiten ari dira dagozkien eskubideak aldarrikatzeko. Horren ondorioz, herritarrek ezin dute udal igerilekuak erabili, gainera udan, bilbotar askok kanpoko igerilekuekin gozatzen duten garaian. Aburto, udan martxan dagoen Bilbon, igerilekuak etenda daude”, azaldu du.

010, Cimubisa eta Etxez etxeko zerbitzua

Era berean, kaltetutako beste zerbitzu bat herritarren arretarako 010 telefonoa dela esan du, izan ere, “bertoko langileek protestak egin dituzte baldintza-agiriak behin da berriz urratzen direlako”. Udal informatika zerbitzuen mantenuaz arduratzen den Cimubisa enpresaren kasua ere aipatu du Goirizelaiak. Hemen, salatu denez, “langileak azpikontratatu dira 20 urteetako egiturazko zerbitzu bat eskaintzeko, lan baldintza oso txarrekin eta subrogazio aukera ere izan barik”. “Lan inspekzioak salatu du, horrek Bilboko udalaren utzikeria agerian uzten du, langileen baldintzei dagokienez ”, gaineratu du. 

EH Bildu Bilboko bozeramaleak azaldu duenez, etxez etxeko zerbitzuak ere “gabezia garrantzitsuak” ditu eta horrek “eragin zuzena du gure nagusien eta menpekotasuna duten pertsonen arretan”. Gogoratu duenez, EH Bildu Bilbok langileen lan baldintzak hobetzeko eta zerbitzuaren prestazioa baloratzeko organo bat sortzea proposatu zuen, eragile guztien parte hartzearekin, baina “udal gobernuak ez zuen onartu, Bilbo idiliko honetan”.

“Martxan daukagun beste lan-gatazka bat Bilboko suhiltzailerena da eta herri segurtasuna bermatu nahi badugu ezinbestekoa da euren aldarrikapenak onartzea (EPEak ahalik eta gehien aprobetxatzea , gutxieneko guardiak handitzea…)”, gaineratu du.

Etxebarriako parkea eta BBK Live jaialdia

Bestalde, gogoratu duenez, atzo udal gobernuak Etxebarriako parkean egin diren hobekuntzak aurkeztu ditu “baina ez ditu irregulartasunak aipatu”. Kasu honetan, bere esanetan, “azpikontratatutako enpresak ohiko hiru langile erabili ditu, lorezaintzako beste lan batzuk egiten egon beharko zirenak, nahiz eta baldintza-agirietan zehaztu Etxebarriako parkeko lan hori egiteko langile gehiago kontratatu behar zirela, ez ohiko aurrekontua duen lana delako”

Goirizelaiak BBK Live bezalako jaialdi handiak ere aipatu ditu; izan ere, udal gobernuak “diru kantitate garrantzitsuak bideratzen ditu, baina gero ez du ezelako kontrolik egiten enpresa antolatzaileengan eta, jakin badakigu, langileak esplotatzen dituela eta iaz ingurumenean ere kalte izugarriak eragin zituztela, ur fekalak Kadaguako errekara jaurti zituztelako, kontrolik gabe”.

 “Hau da udan ere eteten ez den Bilbo? Hau da auzoei eta herritarrei erantzuna emateko makinaria guztia martxan duen Bilbo?”, galdetu du Goirizelaiak. “Aipatutako lan-gatazkek auzo eta herritarren beharrei erantzuna eman beharrean, Bilboko Udalak eskaini beharko lituzkeen kalitatezko zerbitzu publikoak kaltetzen dituzte”, gaineratu du.

Ildo horretan, Aburtori gogoratu dio, joan den astean 100 proposamenen zerrenda aurkeztu zuela eta horietan “ez zuela aipatutako lan-gatazkei irtenbiderik proposatzen”. “Argi dago zeintzuk diren Aburtoren lehentasunak eta ez direla ez langileak ezta ere herritarrei kalitatezko zerbitzu publikoak eskaintzea; zinegotziek ez diote lan-gatazken berri ematen? Desordena eta zentzugabekeria horien aurrean zelan ahal da beste alde batera begiratu?”, azpimarratu du.

Proposamenak

Goirizelaiaren ustez, “ezinbestekoa” da arazo hauei “ahalik eta arinen” irtenbidea aurkitzea. Bere esanetan, EH Bildu Bilbok zerbitzu publikoen “zuzeneko kudeaketaren” alde egiten du, “langileen eskubideak eta kalitatezko zerbitzu publikoak bermatzeko erarik onena delako”.

Hala ere, gaineratu duenez, azpikontratekin jarraitzen den bitartean, udal gobernuari aldarrikatzen diogu, “azpikontratazioak egiterakoan, baldintza sozialak eskatzeko, azpikontratatutako enpresek lan baldintza duinak, berdintasuna, euskara eta ingurumenaren zaintza berma ditzaten”. Horrez gain, Goirizelaiak azpikontratak “kontrolatzeko mekanismoak” aldarrikatu ditu, izan ere, “egun ez daude Bilboko udalean”.

 Goirizelaiak Bilboko EH Bilduko taldea “bideratzaile” izateko prest dagoela nabarmendu du.  “Premiazkoa da lan-gatazka horiei irtenbidea ematea, batetik, lan eskubideak bermatzeko eta, bestetik, bilbotarrei kalitatezko zerbitzu publikoak eskaini ahal izateko”. “Azpikontratak eta txandako Last Tour-ek eurek nahi dutena egiten dute eta administrazio publikoak ez luke horrelakorik onartu behar”, esan du.  

ALBISTEAK

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

2021-03-17 12:02:00

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

2020-08-06 11:33:00

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko