AKTUALITATEA

| 2026-02-26 11:18:00

EH Bilduren ekimenez, Bilbok adingabeen eta haien familien esku hartzera bideratutako hirugarren eguneko zentro bat izango du, gobernu taldearen eta alderdi subiranistaren arteko zuzenketa bat onartu ondoren. Akordio horren bidez, gobernu-taldeak konpromisoa hartzen du Haurren eta Nerabeen III. Udal Planean beharrezkoak diren baliabideak eta zerbitzuak aztertzeko eta zehazteko, batez ere hirugarren eguneko zentro honi dagozkionak.

Maria del Rio EH Bilduko bozeramailearen ustez, albiste "oso positiboa" da, zerbitzu hori hiriko beste toki batzuetan zabaltzeko beharra baitago, adingabeei eta familiei sarbidea errazteko eta zabaltzeko.

Del Riok Bilboko Udalak haurrak babesteko arloan duen "erantzukizun  garrantzitsua" aipatu du. Ildo horretan, adierazi duenez, egoera larriak edo babesgabetasun egoerak Bizkaiko Foru Aldundira bideratzen diren arren, Udalak prebentzio eta kalteberatasun-egoerak hautemateko kasuetan esku hartu behar du, bai eta arrisku arintzat edo moderatutzat jotzen diren egoerak lehengoratzen saiatu ere.

Ildo horretan, EH Bilduren bozeramaileak azaldu duenez, eguneko zentro horietan, hain zuzen ere, adingabeekin eta haien familiekin lan egiten da, “hazkuntzan laguntzeko, egoerak okerrera egin ez dezan eta babesgabetasun larritzat jo ez dadin”. Gaur egun, Bilbok bi zentro ditu, bata Atxurin eta bestea Errekalden, eta biek eskaintzen dute arreta intentsibo eta pertsonalizatua, adingabeen zein helduen ezaugarrietara egokitzen dena.

De Riok zehaztu du eguneko zentro horiek helburu asko betetzen dituztela: “adingabeen oinarrizko beharrak betetzen direla ziurtatzea, familia-loturak indartzea, familiak ahalduntzea, haurrek dituzten zailtasunak identifikatzea…”. Era berean, baliabide komunitarioekin egiten duten koordinazio-lana nabarmendu du, hala nola ikastetxeekin edo osasun-zentroekin.

EH Bilduren bozeramailearen esanetan, Bilbok horrelako hirugarren zentro bat izateko lortutako akordioari esker, “pertsona gehiagori eman ahal izango zaio arreta, eta, era berean, espazio hori irisgarriagoa izango da adingabeentzat eta haien familientzat, eskola orduak amaitu ondoren joaten baitira”.

Ildo horretan, “familia asko esleitu zaizkien zentroetatik oso urrun bizi dira, beraz, zailtasunak dituzte heltzeko, kontuan hartuta gainera adin txikiko haurrez ari garela”. “Adibidez, zaila da egoera zaurgarrian dagoen Deustuko ume bat arratsaldero Errekalderaino joatea eta garaiz heltzea arratsaldea ondo aprobetxatzeko”, nabarmendu du.

Bilbon, 2026ko otsailaren 26an