AKTUALITATEA

| 2020-03-02 18:13:00

Etika.

Definizioz, ona eta egokia moralki aztertzeaz arduratzen den filosofiaren adarra da. Etika politikoa, beraz, politika arloari zuzendutako azterketa dela esan genezake. Zertara dator  baina, etika, etika politikoa eta liberatuak nahastea? Ondo da, jarraian, Beasaingo azken Osoko  bilkuran gertatutakoa salatzera gatoz!

Kokatzearren: Beasaingo Udalak, duen egiturarengatik, 5 liberatu politiko izateko aukera du,  eta EUDEL-eko taulan (taula honek, biztanle urkila baten araberako soldata gomendagarri bat zehazten du kargu publiko bakoitzarentzat) 10.000-20.000 biztanleen lerroan kokatzen da. Orain  artean 2 liberatu izan ditugu herrian, Alkatea eta Alkateordea.

Herriak dituen beharrak eta gure taldeak behar bezalako jarduna ziurtatu asmoz, oposizioko  talde bezala dagokigun liberatua edukitzeko eskaera luzatu genuen. Hasieran, gure liberazioa  bi pertsonen artean banatzea eskatu genuen, baina Alkatearen borondatepean dagoen erabakia  denez, UKATU egin zigun. Badakizue, borondate ezak dituen ondorioak… Ondoren, eskaera  norbanako bati zuzendua egin genuen, hau da, pertsona bakarrak liberazio osoa eskuratzeko  egin beharrekoak egin eta, azkenik onartzea besterik ez zuten izan. Hala ere, EAJ-k dagozkion  bere 2 liberatu gehiago eskatuko zituela jakinarazi zigun. Ados, euren eskubidea izanik, ezin  ukatu! Baina, juxtu orain? Badirudi baietz…

Orain Etikaren bueltan dantzan hasiko gara. Jakin badakigu, gure Alkatearen soldata dagokion  lerroko maximoa dela, hau da, Beasainek 13.800 biztanle pasatxo izanik, 20.000 biztanle balitu  adina kobratzen du: 71.000€ bueltan, urtero. Hi, majo!

Guk, ordea, gure liberatuari dagokion soldata gure Herriko errealitateari binkulatzeko eskaera  egin genuen. Hiruko erregela egitea besterik ez da! Noski, ez gureari bakarrik. Irizpide hau,  gainontzeko liberatuekin ere aplikatzea eskatu genuen. Ba, ziurrenik algara arteko handikeria- bilera batean, gure eskaera onartzea pentsatu zuten, hori bai, euren 2 liberatu berriek,  dagokien MAXIMOA kobratuko dute. 

Posible al da, kargu BERDINA hartzen duten 3 zinegotzik DESBERDIN KOBRATZEA? BAI. EAJ-ren  ustezko berdintasun irizpideak argudio, gaur egungo soldata arrakala zabaltzen dihardute! Eta  erabaki hauek hartzeko formari dagokionez, betikoa: 5 minutuko etenaldi batean, bulegoan  sartu eta ttak! Urte oso baterako erabakia sukaldatuta… Handikeria hauek ezin ditugu onartu!

Orain dela ez askora arte, zoru etikoa aipatu izan dute (euren lagunekin batera). Ea noizbait  sabai etikoren batez hitz egiteko tartea hartzen duten! Eta ETIKOA diogu, ez legala. Politika ez  baita arlo legaletik soilik egin behar, nolabaiteko koherentzia puntu bat ere behar da!

Momentuz, Udal Gobernu honen etikari usain onik ez dario, eta koherentzia: POLTSIKOARENA! 

Nahikoa da!