AKTUALITATEA

| 2026-09-22 11:35:00

• Proposamena 2024an adostu zen, eta orain arte ez da martxan jarri.
• Belit Solar zinegotziak adierazi duenez, “onartzen diren akordio, proiektu eta politika publikoak betearazteko daude, eta ez bakarrik hedabideak titularrez betetzeko”.

EH Bilduk Barakaldoko Udalaren Ohiko Osoko Bilkurara eramango du datorren ostegunean Barakaldoko Kirolakeko Gazte Abonoa martxan jartzeko beharra, 2025eko eta 2026ko tasa eta prezio publikoen proiektuan onartua izan zena. Eskaera baten bidez, alderdi subiranista eta ezkertiarrak kuota modalitate hori ahalik eta lasterren ezartzea eskatuko du.

Belit Solarrek gogorarazi duenez, “2024ko azaroan, Barakaldoko Udalak Barakaldo Kirolakeko Gazte Abonoa onartu zuen. Kirol kuota bakarreko modalitate bat, igerilekua, gimnasioa eta kantxen alokairua barne hartzen zituena, besteak beste, 14 eta 35 urte bitarteko gazteentzat. Baina gaur egun abono hori ez da errealitate bat, ez dago eskuragarri eskaintza publikoaren baitan, nahiz eta 2025erako eta 2026rako prezio publikoetan onartu zen ”.

Solarrek gaineratu duenez, “titular batzuk bete zituen 2024ko promesa hura ez zen 2025aren hasieran aplikatu. Horregatik, urte bereko martxoan, galdera bat egin genion Gobernu Taldeari, eta hark jakinarazi zigun abonu horrek oraindik ere propaganda eta kudeaketa-denbora behar zituela, eta, aldi berean, fitness aretoa egokitu behar zutela ”.

Zinegotzi subiranista eta ezkertiarrak salatu duenez, “gaur egun, ia 2 urte geroago, kuota modalitate hori aplikatu gabe dago oraindik. Eta, beraz, Barakaldoko gazteek ezin dute oraindik ere kirola egiteko aukera ematea eta erraztea helburu duten beherapen fiskal horiez gozatu .

Azkenik, Belit Solarrek adierazi duenez, “uste dugu Udalean onartzen diren akordio, proiektu eta politika publikoak betearazteko daudela, eta ez soilik komunikabideak titularrez betetzeko. Horregatik, eta kezkatik, ostegun honetan Osoko Bilkuran EAJren eta PSEren Gobernu Taldeari eskatuko diogu ordainketa modalitate hori ahalik eta lasterren abian jartzeko”.