Araba

Mendialdea Biziberritzen plan pilotua abian jartzea "aukera galdutzat" jo du EH Bildu-k

Ruth Ibisate: "Plangintza falta sumatu dugu, eta epe ertain eta luzera asmo handiko proiektua garatu behar dela uste dugu" Kike Fdz de Pinedo: "Erakunde guztien inplikazioa beharrezkoa da, baina horretarako erakundeen arteko mahaiak eraginkorra izan behar du. Araba osorako plan estrategikoa aldarrikatzen jarraituko dugu"

| 2020-03-02 10:27:00

Arabako Foru Aldundiak "Mendialdea Biziberritzen" plan pilotua martxan jarri zuenetik urtebete igaro denean, EH Bildu-k ondorioztatu du aukera bat galdu dela. Ekimenak 650.000 euroko aurrekontua zuen guztira, baina Ruth Ibisatek, EH Bilduk Arabako Mendialdeko Koadrilan duen ordezkariak, azaldu duenez, egin den bakarra inprobisatzea izan da, eta inolako plangintzarik gabe burutu dira ekimenak.

Arabako Mendialdeko Kuadrillarekin aurreikusitako ekintzen gauzatzeari buruzko datuak aztertu ondoren, EH Bildu-k kritikatu du ez dela ekimen berririk sartu, eta jada egiten ari ziren ekintza batzuk fakturatu direla. Horren adibide gisa jarri du eskaintza turistikoa edo skualdeko gazteentzako aisia-programa. Lehenengo kasuan, aurrekontuaren %40a baino ez da gauzatu 12 panel informatibo jartzeko eta mapa bat egiteko. Bigarren kasuan, ez da inolako lanketarik egin gazteekin eta ez dira epe luzeko jarduerak aurreikusi.

Beste horrenbeste gertatzen da eskualdeko azoka ibiltaria martxan jartzeko ekimenarekin. Kasu honetan, 35.000 euro baino gehiago gastatu dira (partidaren %88a), baina stand batzuk erosteko izan da soilik. "Teilatutik hasi dugu etxea, eskualdeko ekoizleekin egin beharreko lana ahaztuz. Bide batez, benetako ekonomia zirkularra bultzatzeko kontzientziazio eta sozializazio lana ere ahaztu da", nabarmendu du Ibisate zinegotziak.

Gertatutakoa ikusita, Ibisatek ezinbestekotzat jo du kanpo balorazio bat martxan jartzea, non eskualdeko eragileek parte hartuko duten. Ebaluazio-prozesu horretan oinarrituta, EH Bildu-k urratsak eman daitezela eskatu du, benetan eraginkorrak diren neurriak ezartzeko eta epe ertain-luzean asmo handiko proiektua garatzeko despopulazioaren aurka eginez. Hiru erronka nagusiri aurre egiteko beharra azpimarratu du: ekintzailetza, etxebizitza eta tokiko garapena.

 

"Arabak lurralde osorako plan estrategiko bat behar du"

Bestalde, Kike Fdz De Pinedo EH Bildu-ren Batzar Nagusietako bozeramaileak gogorarazi du EH Bildu-k berak Bernedon egin zen Lur Jareetako osoko bilkuran despopulazioaren aurkako ekimen bat aurkeztu zuen eta aho batez onartu zen.

"Plan horrek arrakasta izan dezan, beharrezkoak dira eragile ezberdinen parte-hartzea eta inplikazioa erdigunean jarriko duten oinarri batzuk. Ez ditugu oinarri horiek ikusten, ez dugu ikusten epe luzerako proiektua denik, eta ez dugu ikusten hainbat kolektiborekin lanean ari garenik", deitoratu du bozeramaileak.

Amaitzeko, Fdz de Pinedok iragarri du EH Bildu-k erakundeen arteko mahaiaren aktak eskatuko dituela: "Beharrezkoa da erakunde guztien inplikazioa, baina horretarako erakundeen arteko mahaiak eraginkorra izan behar du. Araba osorako plan estrategiko bat aldarrikatzen jarraituko dugu".

Landa-eremua mantentzeko eta indartzeko neurri eraginkorrak eta premiazkoak eskatu dizkio EH Bilduk Arabako Foru Aldundiari

Javier Argote: "Gure landa eremua balioan jarri behar dugu, baita bertako gizarte, kultura, ekonomia eta ingurumen balioak ere, eta, horretarako, erakunde guztien inplikazioa beharrezkoa da"

| 2020-02-28 08:42:00

EH Bilduk kezka handiz ikusten du Arabako landa-ingurunea jasaten ari den  egiturazko krisi luzea, eta ondorioz lurraldea bideraezin bihurtzeko mehatxua egon badagoela, sozialki, ekonomikoki eta demografikoki. Horregatik, neurriak hartzea premiazkoa dela uste du, baita ahalegin horretan erakunde guztiak inplikatzea ere. Helburu horrekin, EH Bilduk mozio bat aurkeztuko du datozen asteotan Arabako udalerri guztietan. Mozio horretan, Arabako Foru Aldundiari eskatzen zaio lehentasuna eman diezaiola Arabako landa-eremua eta bertako biztanleria mantentzeko eta indartzeko beharrezkoak diren ekintzak egiteari.

Javier Argote Arabako Batzar Nagusietako EH Bilduren prokuradoreak nabarmendu duenez, "lurralde oreka eta kohesioa lortzeko, beharrezkoa da erakundeak inplikatzea, baina baita, ekintza eta politika egokien bidez, herritar guztiak konbentzitzea ere". Hori dela eta, EH Bilduren ustez, ezinbestekoa da landa-eremuari lotutako gizarte, kultura eta ingurumen-balioak bistaratzea.

Bultzatu beharreko esparruen artean, bederatzi arlo nabarmendu ditu EH Bilduk; besteak beste, teknologia, zerbitzu publikoak, azpiegiturak edota jarduera ekonomikoa eta enplegu iraunkorra. Baina EH Bilduk ere ulertzen du zerga-politikatik urratsak egin behar direla, eta egungo etxebizitza parkea berritzeko aukera emango duen etxebizitza politika berri bat bultzatu behar dela. Nola ez, toki erakundeen finantza nahikotasunak eta toki erakundeetaik eman behar diren zerbitzuen eskumenekiko errespetuak izan behar dute beste ardatz estrategiko bat, EH Bilduren ustez.

Azkenik, landa kultura eta nortasuna defendatzeko beharra azpimarratu du EH Bilduk. "Irtenbideak landa munduaren errealitatera egokituta hartu behar dira, eta ez soilik hiriko sozioekonomiaren irudira", ohartarazi du Argotek.

ALBISTEAK

EH Bildu-k deitoratu du EAJ-k eta PSE-k udal-eskumeneko Gizarte Zerbitzuak zentralizatzearen alde egin izana.

2020-10-21 12:44:00

Foru Gobernuak uko egin dio, halaber, FOFEL-en bidez EGLZ-en finantzaketa arautzeari. Luis Maria Salgado: "Aldundiak ezin du udal bat behartu bere eskumena lagatzera. Bere eskumenaren kudeaketarekin jarraitzea erabakitzen duen udalak gainerakoen askatasunean eta baldintza berdinetan egiten jarraitu ahal izatea defendatzen dugu".

Diru bilketaren jaitsieraren ondorioz, udalek izango duten murrizketa datozen bi urteotan itzultzea eskatuko dio berriz ere EH Bilduk Foru Gobernuari

2020-10-20 12:01:00

Biharko osoko bilkurari begira, “arrazoituta eta salbuespenez, berregokitzeak geroratzea edo zatikatzea” dioen zuzenketari eutsiko dio horrela eskatu baitu udalerrien heren batek

EH Bildu-k deitoratu du Foru Gobernuak diru-bilketaren jaitsiera arintzeko ekimenik ez izatea.

2020-10-16 10:28:00

Kike Fdz de Pinedok epe luzerako beste politika fiskal bat eskatu du COVID TASA ezartzearen beharra nabarmenduz.

EH Bilduk neurri eraginkorrak eskatu ditu ardoa ekoizpen prezioen azpitik saltzen ez dela bermatzeko

2020-10-16 09:28:00

Iñaki Ruiz de Pinedo: "Arabako Errioxaren kasuan mahatsa saltzen duten 1.000 familia baino gehiago daude eta uste dugu administrazioek ezin dutela beste alde batera begiratu eta legea betetzen dela zaindu behar dutela, sektore ahul eta babesgabe hori babestu behar dutela berriak ez diren baina sektorea kolokan jartzen duten praktika horien aurrean"