Araba

Zuiako Udala langile autonomoei laguntzeko neurri ekonomikoak aztertzen ari da

Beren egoeraren eta beharren berri helarazteko deia egin du erakundeak

| 2020-04-29 10:42:00

COVID 19k udalerriko sare sozioekonomikoan daukan eraginaren aurrean, Zuiako Udala hartuemanetan ari da langile autonomoekin, merkatariekin, ostalaritzako profesionalekin (taberna, jatetxe, hotel eta landetxeetakoak), eta Zuian lan egiten duten tailer txikien eta zerbitzuak ematen dituzten beste establezimendu batzuen arduradunekin. Gauza bera egingo du, datozen egunetan, udalerriko enpresa txiki eta ertainen (ETEen) jabeekin. Eta jendeari irekitako lokalik ez duten autonomoen kasuan, berarekin harremanetan jartzeko deia egin du udalak, azuia.general@ayto.araba.eus e-posta helbidearen bidez.
"Helburua da bertatik bertara ezagutzea zer egoera bizitzen ari diren, zer nolako beharrak dituzten eta zailtasunak gainditzeko zer neurri beharko lituzketen", azaldu du Unai Gutierrez Urkiza alkateak.
Jasotako proposamenetatik abiatuta, beti ere udalaren aukerak eta eskumenak kontuan hartuta, udalak laguntzak diseinatuko ditu, egoera gainditzen laguntzeko.
"Zuiako Udalak egoera ekonomiko ona du, kudeaketa eraginkor eta arduratsuaren ondorioz. Une honetan, soberakin hori gure herritarrei laguntzeko erabili behar dugu", gaineratu du alkateak.
 
Erantzun komunitarioa
Ekimen hau, Zuiako Udala COVID 19ari komunitate bezala aurre egiteko egiten ari den lanaren testuinguruan dago. Izurritearen hasieratik, etengabeko harremana du Oroko Ama Birjinaren eskolako zuzendaritzarekin, familiei arreta emateko orduan koordinatzeko, eta ikastetxeak eskaini ezin dituen zerbitzuak garatzeko ere; adibidez, ikasleen etxebizitzetara eskola-materiala eramateaz arduratu da udala.
Era berean, harreman zuzena dauka udalerrian dauden adinekoentzako 3 egoitza pribatuekin, dituzten premiekin lagundu ahal izateko, egoitzen eta adinekoen egoera onari eusteko.
Alokairu sozialeko etxebizitzei dagokienez, martxoko eta apirileko errenten ordainketak atzeratu egin dira. Beharrezkoa izanez gero, maiatzean ere aplikatuko litzateke neurria. Zorra zatikatu egin da, aurtengo bigarren seihilekoan ordainketak errazteko. Gainera, deialdi bat prestatzen ari da etxebizitza sozial horietan bizi diren eta ABEEEak (Aldi Baterako Enplegu Erregulazioko Espedienteak), lan-kaleratzeak edo lan egiteko ezintasuna izan dituzten familiek udalari alokairua ordaintzeko laguntza ekonomikoa eska diezaioten.
Azkenik, alarma egoeraren hasieran eta familien ekonomia arintzeko asmoz, Zuiako Udalak udal tasa eta zergen ordainketa atzeratzeko dekretu bat onartu zuen. Martxokoak eta apirilekoak ez dira igorri, eta egutegi berri bat ezarri da, hilean zerga edo tasa bat baino gehiago ez igortzeko (ekainaren 1etik aurrera, ibilgailuena; uztailaren 1etik aurrera, 2019ko azken seihilekoko zaborrarena eta urarena; abuztutik aurrera, beste zerga batzuk; hala nola OHZa, Hondasun Higiezinen Gaineko Zerga).

EH Bilduk Aberastasun Handien Zerga ezartzea eskatu du, baita Arabako zerga-presioa Eurogunekora progresiboki hurbiltzea ere

Kike Fdz de Pinedo: “Aurreko krisitik ateratzeko, fiskalitatea are gehiago desorekatu zen eta gaur egun diru-bilketaren zati handiena PFEZren kontura lortzen da, hots, langileen nominetatik ateratzen da. Hala ere, oraindik fiskalitatean erabakiak hartzeko tarte oso handia daukagu”

| 2020-04-29 10:21:00

EH Bilduk Araban zerga-presioa Eurogunekora progresiboki hurbiltzea eskatu du, horretarako, besteak beste, Aberastasun Handien Zerga ezarriz herrialdean. Izan ere, aurreko legealdian Foru Aldundiak egindako aurreikuspenen arabera zerga berri horri esker 26.000.000 gehiago sartuko lirateke urtero Ogasunaren kutxan. Horretaz gain, Kike Fdz de Pinedo bozeramaileak proposatu du PFEZn kapital- eta lan-errenten tributazioa parekatzea, Sozietate Zergan kenkariak zerga-oinarriaren %20ra mugatzea eta etekinen araberako progresibitatea ezartzea. Beste bi proposamen ere luzatu ditu EH Bilduk: Oinordetza eta Dohaintzen gaineko Zergan ere progresibitate printzipioa ezartzea eta zerga guztiak arautzeko eskumena eskuratzea, batez ere BEZaren kasuan.

Fdz de Pinedok gogoratu duenez, Arabako zerga presioa Europako batez bestekotik behera dago: Euroguneko 19 estatuen batez bestekoa %40,2koa da, Espainiar Estatukoa %33,8koa eta Arabakoa are baxuagoa da, soilik Madril eta Bizkaia egonez Arabaren atzetik. Iruzur fiskalari dagokionez, “oso handia” dela salatu du: 2018an 132.000.000 euro antzeman ziren, baina soilik 81.000.000 berreskuratu ziren. Atzera begira jarrita, aurreko krisialdian hartutako neurriak gaitzetsi ditu EH Bilduk: 2007ko dirubilketan, Sozietate Zergak %15,7koa suposatu zuen, eta PFEZak %30,87koa. 2019ko diru-bilketan, ordea, %8,14 eta %35,73, hurrenez hurren.

“Aurreko krisitik ateratzeko, fiskalitatea are gehiago desorekatu zenez, gaur gun diru-bilketaren zama handiena PFEZren kontura lortzen da, hots, langileen nominetatik ateratzen da. Hala ere, oraindik fiskalitatean erabakiak hartzeko tarte oso handia daukagu”, nabarmendu du bozeramaileak. 

COVID19a eta Arabako fiskalitatea 

 Pairatzen ari garen krisi sozio-sanitarioaren ondorioz, Arabako diru-bilketaren jaitsiera %20 ingurukoa izango da gutxienez, jarduera ekonomikoaren jaitsieraren ondorioz PFEZ, Sozietate Zerga eta BEZaren sarrerak jaitsiko direlako. Horren ondorioz, datorren urtean Aldundiak 500/600.000.000 euro gutxiago ingresatuko ditu, eta jaitsiera hori Eusko Jaurlaritza, AFA eta Toki Erakundeen artean banatu beharko da. “Kupoa, berriz, berdin-berdin ordaindu beharko dugu”, gaitzetsi du bozeramaileak.

Hala ere, gastu publikoa areagotzeko beharra nabarmendu du EH Bilduk, eta osasun eta gizarte zerbitzuak, politika sozialak edota sektore kaltetuenentzako diru-laguntza zuzenak jarri ditu adibidetzat. "Gainera, Toki Erakundeen finantzazio egokia ere  bermatzeko beharra dago, aipatutako arloetan euren eskumenak egokiro bete ahal izateko" ondorioztatu du Fdz de Pinedok. 

ALBISTEAK

ALESTIS-eko langileen ordezkariek agerraldia egingo dute Batzar Nagusietan, EH Bildu-k eta Elkarrekin Araba-k hala eskatuta

2020-09-11 08:23:00

Talde aeronautiko horren zuzendaritzak enplegua erregulatzeko espedientea (EEE) aurkeztu du, Miñaoko Parke Teknologikoan dagoen lantegiko 178 langileetatik 87 kaleratzeko.

Aldundiak ardogintza sustatzeko kontratu bat “atzamarrez” esleitu duela salatu du EH Bildu-k.

2020-09-08 09:50:00

Kike Fernandez de Pinedo: "Sektoreak neurri zehatzak eta gardenak behar ditu, sektore osoari zuzenduak, eta ez gutxi batzuei bakarrik. Aldundiak ezaugarri bereko beste proiektu bat ezagutzen duenean, onartezina da lehiaketa publikorik gabeko kontratu bat sinatzea".

EH Bildu-k Denis Itxasoren agerraldia eskatu du, Barrongo urtegiaren proiektuaren inguruan Espainiako Gobernuak dituen kontraesanak azaltzeko.

2020-09-04 08:44:00

Kike Fernandez de Pinedo: “Kontraesanen garaia amaitu da. Barrongo urtegiaren proiektua behin betiko baztertu behar da, neurrigabekeria hutsa baita: Arabako Haranak ureztatzeko proiektua eguneratu, berregituratu eta alternatibak bilatu behar ditugu”

Adinekoentzako eta desgaituentzako egoitzei buruzko zein etxez etxeko laguntza zerbitzuari buruzko informazio zehatza eskatu du EH Bilduk

2020-08-26 11:50:00

Zerbitzu Sozialen Foru Diputatuaren agerraldia eskatu du egoera azaldu dezan eta bigarren olatuari aurre egiteko hartu diren neurriak azaldu ditzan