Araba

Landa-eremua mantentzeko eta indartzeko neurri eraginkorrak eta premiazkoak eskatu dizkio EH Bilduk Arabako Foru Aldundiari

Javier Argote: "Gure landa eremua balioan jarri behar dugu, baita bertako gizarte, kultura, ekonomia eta ingurumen balioak ere, eta, horretarako, erakunde guztien inplikazioa beharrezkoa da"

| 2020-02-28 08:42:00

EH Bilduk kezka handiz ikusten du Arabako landa-ingurunea jasaten ari den  egiturazko krisi luzea, eta ondorioz lurraldea bideraezin bihurtzeko mehatxua egon badagoela, sozialki, ekonomikoki eta demografikoki. Horregatik, neurriak hartzea premiazkoa dela uste du, baita ahalegin horretan erakunde guztiak inplikatzea ere. Helburu horrekin, EH Bilduk mozio bat aurkeztuko du datozen asteotan Arabako udalerri guztietan. Mozio horretan, Arabako Foru Aldundiari eskatzen zaio lehentasuna eman diezaiola Arabako landa-eremua eta bertako biztanleria mantentzeko eta indartzeko beharrezkoak diren ekintzak egiteari.

Javier Argote Arabako Batzar Nagusietako EH Bilduren prokuradoreak nabarmendu duenez, "lurralde oreka eta kohesioa lortzeko, beharrezkoa da erakundeak inplikatzea, baina baita, ekintza eta politika egokien bidez, herritar guztiak konbentzitzea ere". Hori dela eta, EH Bilduren ustez, ezinbestekoa da landa-eremuari lotutako gizarte, kultura eta ingurumen-balioak bistaratzea.

Bultzatu beharreko esparruen artean, bederatzi arlo nabarmendu ditu EH Bilduk; besteak beste, teknologia, zerbitzu publikoak, azpiegiturak edota jarduera ekonomikoa eta enplegu iraunkorra. Baina EH Bilduk ere ulertzen du zerga-politikatik urratsak egin behar direla, eta egungo etxebizitza parkea berritzeko aukera emango duen etxebizitza politika berri bat bultzatu behar dela. Nola ez, toki erakundeen finantza nahikotasunak eta toki erakundeetaik eman behar diren zerbitzuen eskumenekiko errespetuak izan behar dute beste ardatz estrategiko bat, EH Bilduren ustez.

Azkenik, landa kultura eta nortasuna defendatzeko beharra azpimarratu du EH Bilduk. "Irtenbideak landa munduaren errealitatera egokituta hartu behar dira, eta ez soilik hiriko sozioekonomiaren irudira", ohartarazi du Argotek.

EAJ-k eta PSE-k ustelkeriaren aurkako neurririk hartu nahi ez izatea deitoratu du EH Bildu-k

Kike Fdz de Pinedo: "De Miguel auziarekin gertatutakoaz hausnartu behar dugu, baina ustelkeria amaitzeko ezer egiten ari ez izanak kezkatzen gaitu: ekintzak behar ditugu"

| 2020-02-26 14:05:00

EH Bildu-k ustelkeriaren aurkako borrokarako tresna instituzional independenteak sortzeko eta hauek martxan jartzeko beharrari buruzko mozioa eraman du asteazken honetan Arabako ganberara.

Kike Fdz de Pinedo bozeramaileak De Miguel, Montai edo STOA bezalako kasuak ekarri ditu gogora, Arabako ustelkeriari buruzko azken epaien larritasunak gizartean sortu duen kezka azpimarratzeko.

"De Miguel auziarekin gertatutakoaz hausnartu behar dugu, baina ustelkeria amaitzeko ezer egiten ari ez izanak kezkatzen gaitu: ekintzak behar ditugu", nabarmendu du Fdz. De Pinedok. "Kaka, Zaldibarren bezala, ikusten ez bada, badirudi ez dela existitzen. Baina, azkenean, eztanda egiten du", gaineratu du bozeramaileak, Gipuzkoako zabortegiaren inguruan edo beste erakunde batzuetan ematen ari diren sare klientelarrak salatzeko, hala nola Montai edo STOA-ko kasuak Araban.

Hori dela eta, EH Bildu-k Batzar Nagusiek eska dezatela ustelkeriaren aurkako EAEko Fiskaltza sortzea eskatu du, eta Eusko Jaurlaritzako Justizia Sailari eskatzea Fiskaltza horrek beharrezko baliabide materialak eta giza baliabideak eman ditzala, ustelkeria-kasuak modu eraginkorrean ikertzeko.

Hala ere, EAJ-k – Diputatu Nagusia ez da mozio honen eztabaidan egon– eta PSE-k berriro eragotzi dute mozio hau aurrera ateratzea eta ustelkeriaren aurkako neurri eraginkorrak hartzea.

 

Gizarte zerbitzuen egoera kezkagarria eta etorkizun hurbila aztertzeko ponentzia sortzea defendatuko du EH Bildu-k

Claudia Venceslao: "EAJ-k eta PSE-k kolapso egoera batera eraman dituzte Arabako gizarte zerbitzuak"

| 2020-02-25 10:52:00

EH Bildu-k iragarri duenez, ostegun honetan Batzar Nagusietan ponentzia bat sortzea proposatuko du, eztabaida "sosegatu eta eraikitzaile" bati ekin ahal izateko. Gainera, batzordean, gizarte zerbitzuen parte diren eragileek parte hartzeko proposatuko du EH Bildu-k.

Txosten honen helburua ongizatearen laugarren zutabea izango den Gizarte Zerbitzuen Sistema bat ezartzea izango da, "pertsonak erdigunean jarriz, ahaldunduz eta gizarte-zerbitzuak sistema patriarkalak eta neoliberalak sortutako egoerak arintzeko beharrezko eskubidetzat hartuz. Honen bitartez, gizarte-zerbitzuen egungo egoera irauliko duten proiektu eraldatzaileak bultzatu nahi ditugu", iragarri du Claudia Venceslao batzarkideak.

Horren harira, EH Bildu-k gogoratu du aurrekontu ezak eta EAJ eta PSE-ren Gobernuen interes ezak, bi alderdi hauek duten pribatizazioarekiko eta negozioarekiko zaletasunak Arabako politika sozialen "inboluzio larria" eragin dutela.

Horren adibide da zaintza lanetako prekarizazioa. Aipatutako prekarizazio hau adineko pertsonei ematen zaien arretan ikus daiteke, non egoitza pribatuei mesede bereziak egiten zaizkien, zerbitzuari lotutako prestazio ekonomikoaren bidez (PEVS). "Egoitza pribatuetako langile gehienek –emakumeak gehienbat- hilabeteak daramatzate euren baldintzak hobetzeko eskatzen, eta langileek beraiek adineko pertsonei ez zaiela merezi duten kalitatea ematen salatu dute, langile faltagatik eta lan-karga handiengatik batik bat. Gainera, nagusienek arreta pertsonalizaturik ez dutela eta bakarrik eta aisialdiko jarduerarik egin gabe ordu asko daudela salatu dute".

"EAJ-k eta PSE-k prestigioa kendu diote gizarte-zerbitzuei, Arabako Gizarte Zerbitzuak prekarizatuz eta merkantilizatuz", salatu du batzarkideak Gizarte Ongizaterako Foru Erakundearen egoera "kezkagarria" deitoratzearekin batera. "Departamentu horren balizko berrantolaketa aztertu behar dugu, ziurrenik foru erakundeko garrantzitsuena baita eta gabezia larriak dituelako", gaineratu du.

Hori gutxi balitz, oraindik ere ez-betetze larriak daude Gizarte Zerbitzuen Legearen (2008) eta 2016-2019 plan estrategikoaren ondorioz Araban egon behar duten zerbitzuei dagokienez. Horien artean, honako hauek nabarmendu ditu EH Bildu-k: etxez-etxeko laguntza-zerbitzuen arreta-orduak gutxienez %15a handitzea, adinekoentzako 400 egoitza-plaza sortzea, gaueko arretako egoitza-plazak sortzea, okupazio-zentro bateko 42 plazak, desgaitasuna duten pertsonentzako 50 egoitza-plazak, gaixotasun mentala duten pertsonentzako 25 egoitza-plazak, familiekin gizarte- eta hezkuntza-arloan eta/edo arlo psikosozialean esku hartzeko zerbitzuak eta eguneko zentroko eta egoitzako 134 plaza sortzea bazterketa egoeran dauden pertsonentzako. EAJ-k eta PSE-k, gaur-gaurkoz, lege hori bete gabe jarraitzen dute.

Kontzientzia eta pedagogía

Ponentziaren sorreraren bidez, Arabak erronka berriei aurre egitea nahi du EH Bildu-k, hala nola zahartzeari, mendekotasun berriei, pobreziaren kronifikazioari eta klase sozialen estratifikazio aldaezinari. "Beharrezkoa da kontzientzia eta pedagogia sortzea gertuko eta kalitatezko proiektu sozialak ezartzearen garrantziaz. Jendearen beharrei erantzungo dieten zerbitzuak, kontzientzia soziala sortuko dutenak eta justizia sozialeko politikak bultzatuko dituztenak", aurreratu du Venceslaok.

Amaitzeko, batzarkideak azpimarratu du egungo egoera eta 2016-2019 aldirako Arabarako Plan Estrategikoan adostutakoa bete ez dela ikusita, EH Bildu-rentzat garaia dela ponentzia honek Arabako Gizarte Zerbitzuen errealitatea zuzenean ezagutzen duten pertsona eta erakundeekin eztabaida ahalbidetzea. Horretarako, bertan gizarte-zerbitzuen egungo egoera ikusaraziko litzatekeela eta beste zerbitzu-eredu bati buruzko hausnarketa sakona irekiko litzatekeela ondorioztatu du.

EH Bilduk azken lan istripua salatu du

Doluminak eta elkartasuna helarazi die senide, lankide eta langunei

| 2020-02-21 17:53:00

EH Bilduk Gasteizen lan istripuan hildako azken langilearen senide, lankide eta lagunei doluminak eta elkartasuna helarazi die gaur. Era berean, azken lan istripu hori salatu egin du eta deituko diren mobilizazioetan parte hartzeko deia egin du. Azkenik, Arabako Batzar Nagusietan bozeramaileen batzordean eztabaidatzeko adierazpen instituzionala aurkeztu du. EH Bilduk agerian utzi nahi du 2020a zorigaiztoko urtea  izaten ari dela. Honekin 13 dira urtea hasi zenetik lan istripuetan hildako langileak, eta beste bik desagertuta jarraitzen dute Zaldibarko zabortegiaren hondamendiaren ondorioz. Hildakoetako hiru arabarrak dira, eta bat gehiago Gasteizera lanera etortzean. Hori dela eta, EAJk eta PSEk duela aste gutxi gertatutakoa ez errepikatzea espero du eh Bilduk, eta, oraingoan, ekimena babestea.

Jarraian testu osoa: 

1.-  Arabako Batzar Nagusiek atsekabea adierazten dute atzo Gasteizen beste langile bat hil zelako asteazkenean izandako lan istripuaren ondorioz. Honekin 13 dira lan istripuetan hildako langileak urtea hasi zenetik eta beste bik desagertuta jarraitzen dute Zaldibarko zabortegiaren hondamendiaren ondorioz. Hildakoetako 3 arabarrak dira, eta beste 1 Gasteizera lanera zetorrenean. Arabako Batzar Nagusiek doluminak helarazi nahi dizkiete hildakoen langileen familiei, lagunei eta lankideei. Era berean Arabako Batzar Nagusiek lan-istripuen salaketa publikoa egiten dute, eta Eusko Jaurlaritzaren Segurtasun Sailak eta Osalanek heriotzaren inguruabarrak argitu ditzatela eskatzen dute, familia eta senitartekoei informazioa eman ahal izateko.

 

2.- Arabako Batzar Nagusiek agerian utzi nahi dute lan-prekarietateari aurre egin behar zaiola, lan istripuak ekidin egin behar direla gauza guztien gainetik eta kosta ala kosta, lan-segurtasunak lehentasunezkoa izan behar baitu edozein lanetan. Ezinbestekoa da laneko osasunari eta segurtasunari buruzko kanpainak bultzatzen jarraitzea, baita laneko arriskuen prebentziorako arauak bete daitezela eskatzea ere, bereziki lan-prekarietate egoeretan.

 

3.- Horregatik guztiagatik, Arabako Batzar Nagusiek erakunde guztiei eskatzen diete lan-arriskuen prebentziorako jardunbide egokiei buruzko proiektuak gauzatzen laguntzeko – lan-administrazio, sindikatu eta patronal-erakundeekin koordinatuta–, laneko segurtasunaren eta osasunaren aurkako delituen kontra aritzeko zein ikuskapen-zereginak areagotu eta hobetzeko.

 

4.- Halaber, Arabako Batzar Nagusiek bat egiten dute heriotza hauek guztiak salatzea eta hildakoen familiei babesa eta elkartasuna adieraztea xede duten ekimenekin, eta horietan parte hartzera dei egiten diete herritar guztiei.

EH Bildu-k Arabako Haranak ureztatzeko alternatibak bilatzeko, berregituratzeko eta eguneratzeko eskatu du

ACUAES enpresa publikoak Barrongo urtegia eraikitzeari uko egin ostean, beste aukera batzuk aztertzeko eskatu du EH Bilduk, hala nola baltsak eraikitzea.

| 2020-02-19 09:16:00

ACUAES enpresa publikoak Barrongo urtegia eraikitzeari uko egin ostean, EH Bildu-k mozio bat aurkeztu du Arabako haranak ureztatzeko proiektua "eguneratu, berreraiki eta alternatibak bilatzeko" eskatuz.

Mozio horren bidez, beste aukera batzuk aztertzeko ere eskatu du EH Bildu-k, hala nola, baltsak eraikitzea, beharrezkoa balitz, eremu horretako ureztatze beharrak bermatzeko. "Lehen sektorea eta eskualdea biziberritzeko Uraren Kultura Berria Fundazioak egindako txostenaren ondorioak kontutan hartu behar ditu Foru Aldundiak, haren garapen sozioekonomikoa eta populazioaren finkapena indartzeko helburuarekin", adierazi du Kike Fernandez de Pinedok.

EH Bildu-k Batzar Nagusietan duen bozeramaileak gogoratu duenez, ureztatzeko eremuetako bat -IV. Eremua- amaituta dago eta martxan dauden hainbat putzu ditu. Are gehiago, Uraren Kultura Berria Fundazioaren txostenean islatzen den bezala, gune horren esperientziak erakusten du ureztatze sarean sartutako azalera hasieran planifikatutakoaren erdia izan dela. "Horrek beharrezko egiten du Arabako haran eremu osorako eguneratzea ureztatze eskaera errealak".

Azkenik, eta zonaldearen etorkizuneko behar eta alternatiba agronomiko, sozial eta ekonomikoak aztertu ondoren, EH Bildu-k uste du beharrezkoa dela egiteke dagoen zatia berregituratzea, bai eta tarteko putzuen eraikuntza edo beharrak estaliko dituzten beste neurri batzuk baloratzea ere.

 

 

ALBISTEAK

EH Bildu Kuartangok txalotu du Udala Arkamun proiektatutako zentral eolikoaren aurka azaltzea

2021-05-04 08:06:00

Atzo egindako osoko bilkuran onartutako adierazpen instituzional baten arabera, “parke eoliko horrek ingurumenean eta paisaian duen eragin handiak eta biodibertsitatearen galerak ez dute konpentsatzen energia berriztagarrien ekoizpena”.

Egoitza-gune berriaren eraikuntza eta kudeaketa zuzenean kudeatzeko exigitu dio EH Bildu-k Foru Gobernuari

2021-04-27 09:35:00

Kike Fdz de Pinedok salatu duenez, Gobernuaren eta Arabarrenen arteko akordioa EAJ-ri gustatzen zaion elkarlan publiko eta pribatuaren ereduaren beste adibide bat baino ez da: "Galerak diru publikoarekin finantzatzen dira, baina irabaziak ez dira inoiz administrazio publikora itzultzen". Gizarte Zerbitzuen Batzordean Ahaldun Nagusiaren agerraldia eskatu dute jada.

Arabako Errioxako mahastizaintza eta ardogintza sektorerako zuzeneko konpentsazio laguntzak eskatu dizkio EH Bildu-k Eusko Jaurlaritzari

2021-04-20 10:06:00

Eva Lopez de Arroyabe: "Administrazioak ekimena hartu behar du sektoreari egoera larri honetara egokitzea errazteko, arazoei aurre hartzeko eta sektorearen oreka bultzatzeko".

EH Bildu-k Aiaraldean eukaliptoaren hedapena geldiaraztea eta espezie autoktonoak eta hostotsuak bultzatuko dituen baso-plan iraunkorra bultzatzea proposatu du

2021-04-13 09:18:00

Kike Fdz de Pinedo: "Erakunde eta administrazio bakar bat ere ezin da bazterrean geratu: ikerketa zientifikoen arabera, espezie hori kaltegarria da biodibertsitatearentzat, baso-ekosistementzat eta ibaiak edo lupeko uren tankerako ur-baliabideentzat".