Legebiltzarrak proposamena onartzen badu, herritar guztiek bermaturik izango dute oinarrizko hornidura energetikoa. Pandemiak pobrezia energetikoaren arazoa larriagotu egin du eta egun 200.000 pertsona inguruk ez dute kalefakzioa pizteko gaitasun ekonomikorik.

| 2021-01-21 16:27:00

Nerea Kortajarena eta Mikel Otero EH Bilduko legebiltzarkideek ongizate energetikoa bermatzeko lege proposamena aurkeztu dute gaur, “herritarren babesean jauzi kualitatiboa” emateko asmoz. Kortajarenak azpimarratu duenez, “etxebizitza duina izatea ongizate sozialaren dimentsio nagusienetako bat da, eta hor ezinbesteko elementua da etxean herritar guztiek oinarrizko baliabide energetikoetarako sarbidea izatea”. Hala, EH Bilduk proposatu duen legeak herritar guztiei oinarrizko baliabide energetikoak bermatzea ahalbidetuko luke, “eskubide hori egikaritzeko sistema bat eraikiz, marko energetiko jasangarri batean, gainera”.
Kortajarenak ohartarazi du 2008az geroztik pobrezia energetikoa areagotu dela Araba, Gipuzkoa eta Bizkaian eta egun 200.000 inguru direla kalefakzioa edo errefrigerazio egokiak lortzeko gastuei aurre egiteko gaitasun ekonomikorik ez duten herritarrak. “Ongizate energetikoari dagokionez, arrakala handitzen ari da gurean eta horri erantzuteko politikak eta neurriak ez dira nahiko”. Pandemiak, gainera, arazoa larriagotu egin du eta, “inoiz baino gehiago, herritarrek ziurtasunak eta erantzunak behar dituzte, politika publikoetatik etorri behar direnak”, azaldu du Kortajarenak.
Gogoeta eta konpromiso hori dago EH Bilduren lege ekimenaren oinarrian. Mikel Oteroren esanetan, proposamena pobrezia energetikotik harago doa, “ongizate energetikoaren kontzeptu berritzailea” gorpuzte aldera. Onartzekotan, debekaturik geratuko da energia hornidura moztea egoera zaurgarrian dauden kontsumitzaileei eta “ongizate energetikoa eskubide subjektiboa litzateke, Administrazioak bermatu beharrekoa, beraz”. Modu horretan, Araba, Gipuzkoa eta Bizkaiko herritar guztiek Oinarrizko Hornidura Energetikoa bermaturik izango lukete, bi irizpideren baitan: batetik, etxean 18 eta 25 gradu arteko tenperatura izatea eta, bestetik, hori lortzeko gastuak unitate familiarraren diru-sarreren %10 ez gainditzea.
Horretarako, lege proposamenak prestazio sistema bat planteatzen du: alde batetik, prestazio ekonomikoak; bestetik, teknologikoak, hala nola faktura energetikoa arintzen laguntzen duten gailu eraginkorrak eskuratzeko laguntzak. Oterok azaldu duenez, EH Bilduk prestaziotetatik harago joan nahi du eta, hala, proposamenak azpimarra jartzen du etxebizitzen birgaitze energetikoan eta, energia berriztagarrien bitartez, autokontsumoaren edo komunitate energetikoen sustapenean, horrela CO2 isuriak eta fakturak murriztuko liratekeelako.
 

Sagarduik azalpenak zor dizkio gizarteari Basurtu eta Santa Marina ospitaleetako zenbait goi karguk txertoa protokoloa bete gabe jartzeagatik

EH Bilduk gardentasunik eza salatu eta Osasun sailburua Diputazio Iraunkorrean ager dadila eskatu du, gertatutakoa azaldu eta kasu gehiago izan ote diren argitu dezan. Txertaketa kanpainak irizpide eta egutegi zehatz eta argiak behar ditu, baina Jaurlaritza estrategia barik ari da.

| 2021-01-21 12:43:00

Gotzone Sagardui Osasun sailburua Legebiltzarrean izan zen atzo, Basurtu eta Santa Marinako zuzendariek (biak Bilbon EAJko zinegotziak izandakoak) protokoloa errespetatu gabe eta ez zegokien arren, txertoa jarri dutela argitara atera zen egunean. Gertatutakoa oso-oso larria izan arren, sailburuak ez zuen ia informaziorik eman eta bere jarrerarekin Legebiltzarra bera, bai eta herritar guztiak ere, mespretxatu zituen. Sagardui zorretan dago gizartearekin; txertaketa kanpainan gertatzen ari denari buruzko azalpenak zor dizkio, ezin du Basurtu eta Santa Marinako zuzendariek eginikoa esaldi batekin garbitu. Hori dela eta, EH Bilduk Legebiltzarreko Diputazio Iraunkorrean berehala ager dadila eskatu du, Araba, Gipuzkoa eta Bizkaiko herritarrek merezi eta behar dituzten azalpen guztiak eman ditzan.
Rebeka Uberak adierazi duenez, “Gotzone Sagarduik gardentasunez jokatu behar du behingoz; argitu behar du zer gertatu den Basurtun eta Santa Marinan, nola izan den posible hango zuzendariak protokolo guztien gainetik pasatzea eta txertoa jartzea; argitu behar du horrelako kasu gehiago gertatu ote diren eta zer nolako neurriak hartu dituen, dirudienez, beste kargu batzuek ere berdin egin omen dutelako; argitu behar du zertan dagoen Osakidetzak ireki omen duen ikerketa. Une honetan ezinbestekoa da Osasun Sailaren eta Gobernu osoaren jokaera eredugarria izatea, herritarrei konfiantza eta ziurtasuna emateko, baina, tamalez, kontrakoa gertatzen ari da. Jendeari bidaltzen ari zaion mezuak ez kontrolik, ez estrategiarik ez dagoen ideian sakontzen du, bai eta pribilegiatu batzuek, betikoek, abantailak dituzten ideian ere. Eta hori benetan arriskutsua da pandemia egoera honetan, guztiok bat eginda eta irizpideak argi edukita aritzea funtsezkoa delako. Txertaketa kanpainak baliabideak, irizpide zehatzak eta egutegi argiak behar ditu, baina Jaurlaritza estrategia barik ari da”.
 

Osoko zuzenketarekin batera, EH Bilduk 36 zuzenketa partzial aurkeztu dizkie aurrekontuei, gehi beste zazpi legearen artikulatuari

Zuzenketek 429 milioi euroko inpaktua dute aurrekontuetan.

| 2021-01-19 12:26:00

~~Maddalen Iriartek atzo iragarri bezala, EH Bilduk osoko zuzenketa aurkeztu die gaur Jaurlaritzaren 2021eko aurrekontuei.
Horrekin batera, 36 zuzenketa partzial aurkeztu ditu, bai eta aurrekontuen legearen artikulatuari eginiko beste zazpi ere.
Zuzenketa partzial horien bitartez, EH Bilduk 429 milioi euroko aldaketak sustatu nahi ditu aurrekontuetan:
- Osasun sistema indartzeko 140 milioi mugitzea planteatzen du, Gobernuak aurrekontuen proiektuan erreserban utzi dituen 140 milioiak erabilita. Egoera larri honetan ez du inolako zentzurik eskura ditugun baliabide guztiak ez erabiltzea. Osasun sistema itota dago, baliabide falta bistakoa delako.
- Hezkuntza indartzeko, 50 milioi.
- Gizarte Zerbitzuen Sistema indartzeko, 14 milioi.
- Pandemiaren eta krisiaren ondorioak gehien pairatzen ari diren sektoreak Erreskatatzeko Plana: 200 milioi euro, aurrekontuen soberakina erabilita.
- Gazteen kontratazioa sustatzeko plana (20 milioi euro), gazte langabezia tasa %42koa baita.
- Argindarraren prezioaren igoera arintzeko. 5 milioi.

Aldaketa horiek ahalbidetzeko, lau dira nagusiki EH Bilduren zuzenketek proposatzen dituzten finantzazio iturriak:
- Aurrekontuetan baina printzipioz ez erabiltzeko Jaurlaritzak erreserbatu dituen 140 milioiak, osasun sistema indartzeko erabiliko genituzkeenak.
- Aurrekontuen soberakinetatik hartuko genituzkeen 200 milioiak, Erreskate Plana finantzatzeko.
- Azpiegitura handiak, hala nola Donostiako metroa, finantzatzeko partidak, obra horiek orain ez direlako ez beharrezkoak, ez premiazkoak.
- SHESAren desagerpena. Energia arloan inbertsio publiko guztia energia berriztagarrietara eraman behar delako.

Artistaren Estatutua kulturaren sektorearekin batera diseinatzeko ponentzia eratzea proposatu du EH Bilduk

Estatutu horrek arau-marko bat eta jarduteko baldintza egokiak emango lizkieke kultura arloko langileei, Josu Estarronak azaldu duenez. Ezinbestekotzat jo du Estatutua sektorearekiko elkarlan eta adostasunaren emaitza izatea, eta ez Jaurlaritzaren erabaki bertikal bat.

| 2021-01-12 12:34:00

Hauteskundeetan hartutako konpromisoa beteta, EH Bilduk legez besteko proposamen bat aurkeztu du gaur Legebiltzarrak ponentzia bat eratu dezan Artistaren, Sortzailearen eta Kultur Langilearen Euskal Estatutua diseinatu eta onartzeko. Formula horrek, azpimarratu du Josu Estarronak, kulturaren sektoreak prozesu horretan parte hartzea ahalbidetuko luke, bai eta Estatutua elkarlanaren eta adostasunaren emaitza izatea ere. Legebiltzarkideak gogora ekarri duenez, Kongresu espainolak halako prozesu bat burutu zuen hilabete askotako lanaren ondorio izan zen Artistaren Estatutua onartzeko, “eta hori da, hain zuzen ere, Legebiltzarrean planteatzen duguna, Artistaren, Sortzailearen eta Kultur Langilearen Euskal Estatutua aniztasun, parte-hartze zabal, elkarlan eta adostasunaren emaitza izan dadila, eta ez planteamendu bertikal bat”. Izan ere, Jaurlaritzak Estatutu hori sustatzeko borondatea agertu du, baina ez du inolako mekanismorik planteatu horren diseinua sektorearekin batera, elkarlanean, zehazteko.
Estarronaren iritziz, baldintza guztiak ematen dira EH Bilduk proposatutako ponentzia martxan jartzeko, Gobernuko alderdiek Estatutuaren beharra ikusten dutelako eta “kultur ekosistemako eragileek prest daudelako parte-hartze zabala bermatuko duen espazio batean ekarpenak egiteko”.
Lanbide artistikoek dituzten berezitasunak aintzat hartuta, Artistaren, Sortzailearen eta Kultur Langilearen Euskal Estatutua onartzea behar-beharrezkoa dela nabarmendu du legebiltzarkideak. “Behin-behinekotasunak, aldizkakotasunak, heterogeneotasunak, proiektuetan oinarritutako sektore bat izateak eta sortze-prozesuaren emaitzei buruzko ziurgabetasunak, besteak beste, zailtasunak dakartzate egungo legegintza-esparruan garatzeko. Kultura eta sormen arloko profesionalek eta enpresek baldintza egokiak behar dituzte; alegia, sorkuntza ahalbidetu eta erraztuko duen arau-marko bat, gutxieneko lan-baldintzak ezarriko dituena, babes soziala emateko esparrua egokituko duena, erretiro-prestazioa eta egile-eskubideengatiko diru-sarrerak bateragarri egingo dituena, fiskalitatea moldatuko duena, finantzazioa erraztuko duena, euren lana zabaltzeko eta nazioartekotzeko aukerak areagotuko dituena, kontratazioak erregulatuko dituena”.
Kongresu espainolak duela gutxi onartutako Artistaren Estatutu Berriak Araba, Gipuzkoa eta Bizkaian eragina izango duen arren, Estarronak ezinbestekotzat jo du artisten euskal estatutu propioa garatzea, hemen ditugun eskumenak baliatu ahal izateko, zerga politikaren arloan, esaterako.
 

EH Bilduk mezu eta neurri kontraesankorretatik harago joateko eta birusari aurre egiteko baliabideak handitzeko eskatu dio Jaurlaritzari

“Ohitura aldaketak beharrezkoak izanik ere, ez dira nahiko”, ohartarazi du Rebeka Uberak. Txertaketa kanpaina azkartzeko Osakidetzan langile gehiago kontratatzea eta 6 urtetik 79 urtera bitarteko herritar guztiei PCR probak egitea proposatu du. Proposamena aurkeztu du Legebiltzarrean.

| 2021-01-10 16:26:00

EH Bilduren iritziz, pandemiari aurre egiteko ezinbestekoa da mezu eta neurri kontraesankorretatik harago joatea eta adosturiko estrategia kolektibo batean oinarritutako neurriak hartzea, besteak beste, Osakidetzaren baliabideak handitzeko. Rebeka Uberak adierazi duenez, “Osakidetzan badago non eragin, zer indartu eta zer hobetu; Jaurlaritzak ohitu gaituen neurri batzuk beharrezkoak izanda ere, ezin dira neurri bakarrak izan, eta ezin daiteke neurriak etengabe aldatzen aritu osasun egoera kontuan izan gabe; egoera honetan neurri proaktiboak ere nahitaezkoak dira birusari aurrea hartu ahal izateko. Jaurlaritzak bere ardurak bere gain hartu behar ditu, herritarrei ardurak eskatzen eta nahasten aritu beharrean. Bestela, orain arte bezala jarraituko dugu, birusaren atzetik, ondorioei erantzuten, Gobernuaren estrategiak horretara eraman gaituelako”.

Hori dela eta, koalizioak legez besteko proposamena aurkeztu du Legebiltzarrean norabide horretan, premiaz eztabaidatzeko. Txertaketa kanpaina ahalik eta azkarren egitea premiazkoa delakoan, Osakidetzak langile gehiago kontratatu ditzala proposatu du EH Bilduk. Zehazki, erizain kopurua handitzea planteatu du Uberak helburu horrekin, bai eta aztarnarien ekipoak, laborategiak eta laginak jasotzeko ekipoak indartzea ere, horrek covid-19aren detekzioa eta kontrola hobetzea ekarriko duelako. “Finean, Jaurlaritzak dagokion ardura bere gain hartzea eta birusari aurrea hartzeko neurriak indartzea planteatzen ari gara; Osakidetza Covid-19 ez den jarduerari ere behar bezala erantzuten hasteko moduan egongo da horrela”.

Halaber, 6 urtetik 79 urtera bitarteko herritar guztiei PCR probak egitea proposatu du, koronabirusaren intzidentzia tasarik altuenak dituzten udalerrietatik hasita. Uberaren esanetan, “baheketa masiboak egitea komeni da –noski, betiere helburu eta planifikazio baten baitan– birusari aurrea hartu ahal izateko, ahalik eta positibo gehien berehala atzemateko, bistakoa delako Jaurlaritzaren estrategia ez dela kutsatze kopurua murriztea lortzen ari eta, gainera, datuak are okerragoak izango direlako datozen egun eta asteotan, Gotzone Sagardui Osasun sailburuak berak aitortu duenez”. Baheketa masiboak egitea beharrezkotzat jo du EH Bilduko legebiltzarkideak, beraz, “betiere testeo, jarraipen eta zaintza epidemiologiko estrategia eraginkor baten baitan eta bitartekoak indartuz eta gizarte bezala dugun inteligentzia kolektiboa elkarlanean jarriaz”.

• «
• 1
• 2
• 3
• 4
• 5
• 6
• 7
• 8
• ...
• 42
• 43
• »