IRITZIAK
Hezkuntza, denon erronka
Nagore Lozano eta Mariam Bilbatua | 2025-10-16 17:10:00
2019an Durangoko Udal Eskola Kontseilua sortu genuenetik hainbat urrats eman dira Udala eta hezkuntza komunitatearen elkarlanari esker. Espazio horrek aukera eman digu herriko hezkuntza-arloaren erronkak identifikatu, elkarrekin proposamenak diseinatu eta elkarlanean irtenbideak martxan jartzeko. Identifikatutako erronkak handiak dira, hala nola, jaiotza tasaren jaitsiera, aniztasunaren kudeaketa, euskararen erabilera bermatzea, lanbide heziketaren orientazioak edo eta nerabeen arteko tratu desegokiak.
EH Bildutik hasieratik bultzatu dugu prozesua, eta gure ekarpena etengabea izan da. Egindako lanari esker esan dezakegu Durango aitzindaria izan dela EAEko Hezkuntza Lege berriak Udalen esku uzten duen Udal Hezkuntza Kontseiluari ematen dizkion ardurak bereganatzen.
Bestalde, orain dela 6 urte Durango Herri Hezitzailea bihurtzeko Udal talde guztiek sinatu genuen konpromezuaren emaitza izan dira urte hauetan martxan jarri diren beste ekimenak, hala nola “Haurren Kontseilua”, “Gazte Foroa”, “Eskolara Bidea Elkarrekin” edo “Jolas Egunak auzoetan”.
Beste ekimen interesgarri bat Jolas librerako gunea izan da. Ume txikientzat neguan espazio babestu bat eskaintzea helburu zuen proiektu honek arrakasta handia izan zuen: familian eta beste umeekin jolasteko espazio seguru bat, herriaren erdigunean. Jolas librerako gunea indartzeko apustua egiten dugu.
Ikusten denez, proiektu hauek ez dira ekimen isolatuak. Etengabeko lanketa eta begirada estrategikoa eskatzen dute. Hurrengo urteetan, egindako lanari heldu eta erronka berriei erantzun egokia eman nahi badiegu, Udalaren konpromisoa areagotzeko beharra ikusten dugu, bai aurrekontuak zehazterakoan eta baita Udal sailen arteko erantzukizuna partekatzeko eskatzen den koordinazioan ere.
EH Bildutik argi daukagu: hezkuntza denon ardura da, eta Udalaren konpromisoa eskatzen du. Gure konpromisoa berresten dugu: elkarlanean jarraitzeko prest gaude, norabide partekatu bat eraikitzeko, eta, behar denean, kritika eraikitzaileak egiteko ere bai.
Ereindako haziak fruitua ematen
Ima Garrastatxu Urbaneja | 2025-10-08 06:52:00
Durangoko jaiak ate joka ditugu eta lehen aldiz jaietan indarkeria matxista prebenitzeko eta horren aurrean jarduteko protokolo bat izango dugu. Benetan pozik gaude denon artean egindako lanarekin.
Aurreko legealdian EH Bilduk mugimendu feministarekin batera egindako lanaren eta hartutako konpromisoaren ondorioz, Durangok Indarkeria Matxistaren Unitatean espezializatutako Teknikari bat du gaur egun.
EH Bildutik pozten gaitu guk bultzatu genuen proiektu bat, Indarkeria Matxistaren Unitatea, martxan jarraitzen duela ikusteak. Azpimarratu nahi dugu, Indarkeria Unitatearen Teknikariari esker, posible izan dela Durangoko Jaietan Indarkeria Matxista prebenitzeko eta horren aurrean jarduteko protokolo bat garatzea, non talde politiko ezberdinek ez ezik, mugimendu feministak eta elkarteek ere parte hartu duten.
Jarduteko protokoloa egiteak argi erakusten du Teknikariaren figura hau beharrezkoa izateaz gain, funtsezko tresna dela gure udalerrian indarkeria matxista prebenitzeko eta haren aurka jarduteko. EH Bildutik irmoki uste dugu indarkeria matxistari aurre egitea lehentasun instituzionala izan behar duela, eta horretan aditua den profesional bat izatea ezinbesteko urratsa da bide horretan. Guk hori horrela izan dadin lanean jarraituko dugu
Gure formaziotik, bereziki eskertu eta zoriondu nahi ditugu Indarkeria Matxistaren Teknikariak eta mugimendu feministak egiten duten guztia, haien konpromisoa eta lana funtsezkoak baitira gure udalerrian indarkeria matxistaren aurkako prebentzioan, detekzioan eta jardunean aurrera egiteko.
Jaiak aske gozatu!
Ez dugu inolako eraso matxistarik onartuko!