AKTUALITATEA

| 2021-10-05 22:14:00

Gaur egun, Burlatan etxebizitza bat alokatzea, beste herri askotan bezala, ia ezinezkoa da gero eta prezio garestiagoekin eta merkatu espekulatiboak alokairuaren burbuila deiturikoan blokeatutako etxebizitza-eskaintzarekin. Gainera, higiezinen agentziek gero eta oztopo gehiago jartzen dizkiete baliabide gutxien dituzten pertsonei, hala nola Errenta Bermatua jasotzen dutenei, aukera hori zuzenean ukatzen baitzaie. Estatuko Gobernuaren eta Nafarroako Gobernuaren ekintzarik eza pairatzen dugu, haiek baitituzte arlo horretan eskumen gehienak eta gaitasuna . Biek ala biek ez dute irtenbiderik eskaintzen alokairuen neurrigabeko errentei muga jartzeko, eta Nafarroako Gobernuaren kasuan, etxebizitza babestuen 9000 eskaera baino gehiagori erantzun gabe, eta ez dute etxebizitza publikoen funtsik sortzen herritarren benetako premien mailan asetzeko. Horrela, etxebizitza publikoen eskasiak eragotzi egiten du herritar askori etxebizitza-eskubidea bermatzea, nahiz eta Nafarroako Etxebizitzaren Legeak eskubide subjektibotzat eta interes orokorreko gizarte-zerbitzutzat jo.

Testuinguru kezkagarri honetan, Burlatako Udalak ere neurriak hartu beharko lituzkeela uste dugu. Horregatik, gobernu-taldearen kezka sozialik ez dagoenez, instantzia bat aurkeztu dugu erregistroan etxebizitzaren gaia legegintzaldi honetan berreskura dadin. Horrela, EH BILDUk gure udalerriko etxebizitzarekin lotutako ondorengo gaiei buruzko informazioa eskatu du:

* Txosten bat hutsik dauden udal etxebizitzen kopuru zehatza ezagutzeko zein egoeraren berri jakiteko: zenbat etxebizitza dauden hutsik, zenbat denbora daramaten hutsik eta zergatik dauden hutsik.

* Legegintzaldi honetan udal-etxebizitzak mantentzeko egindako jarduketei buruzko txostena.

* Udal etxebizitzak eskuratzeko zerrendaren egoerari buruzko txostena. Hala nola, SUMBek zerrendatik kanpo erregistratutako pertsonen kopurua.

* Udal-etxebizitzetako maizterrek hartutako zorren egoerari buruzko txostena eta Udalak zorraren kudeaketan izango duen aurreikuspenari buruzkoa.

* Nafarroako Gobernuaren Lurralde Antolamendu, Etxebizitza, Paisaia eta Proiektu Estrategikoen Departamentuak egindako Burlatako etxebizitza hutsen erroldako prozesuari buruzko informazioa.