| 2021-05-25 10:02:00

EH Bildu Bilbok mozio bat aurkeztu du biharko Osoko Bilkuran eztabaidatzeko. Bertan, pandemiak Bilboko arte-adierazpeneatan sortutako egoeraren diagnostikoa egiteko eskatu du, hainbat eragilerekin harremanetan eta lankidetzan (profesionalak, amateurrak, elkarteak, akademiak, etab.), egungo eta etorkizuneko egoerak eta beharrak ezagutzeko eta Udalak neurriak ezartzeko.

Era berean, kultura eta hezkuntzarako udal laguntzen esparruan, promesa artistiko diren gazteei zuzendutako ekimenak abian jartzea aztertzeko eskatu du.

Ildo beretik, Jone Goirizelaiak, EH Bildu Bilboko bozeramaileak proposatu du, profesionalek eta amateurrek egiten duten lan garrantzitsua kontuan hartuta, hau da, tokiko kulturaren erakusle eta oinarri direla, horiek aitortzea eta balioan jartzea dagozkien adierazpen artistikoak (antzerkia, dantza, musika, abesbatza…) ospatzeko Nazioarteko Egunarekin bat eginez.

Goirizelaiak gogoratu duenez, pandemiak ondorioak izan ditu esparru guztietan, eta bereziki Bilboko eta Euskal Herriko kultur esparruan. Iazko martxoan konfinamenduarekin, dantzara, antzerkira, musikara, edo beste adierazpen artistiko batzuetara dedikatutako pertsonek, elkarteek, akademiek "ezohiko egoera batera egokitu behar izan zuten, horretarako asmamen dosi handiak erabiliz, horrek ekarri duen kostuarekin eta zailtasunekin".

Egia da gaur egun presentzialtasuna berreskuratu ahal izan dela, baina, Goirizelaiak esan duenez, egoerak "zaila izaten jarraitzen du diziplina artistiko desberdinentzat, segurtasun-arauek jarduera mugatzen dutelako (edukiera, distantzia, etab.) eta zenbait jarduera oraindik ezin direlako gauzatu”. "Abesbatzek, antzerki taldeek, akademiek, ikuskizunetako teknikariek edo laguntzaileek egoera ezohikoan eta prekarioan jarraitzen dute", gaineratu du.

Goirizelaiak azaldu duenez, Bilbao Aurreraren esparruan, kultur sektoreari laguntzeko neurriak hartu dituzte, ordezkari politiko guztien artean adostuta, baina "ezinbestekotzat" jo du "orain, urtebeteko salbuespen egoeraren ondoren", arte diziplinen egoera aztertuko duen diagnostiko integrala egitea, "horrela, ondoren, egoera iraultzeko beste neurri batzuk ezarri ahal izateko".

 

 

EH Bilduk gatzaren matxinadan jazarritako herritarrak omendu ditu Bilbon

| 2021-05-24 14:27:00

EH Bilduk Gatzaren Matxinadan jazarritako herritarrak gogoratu ditu gaur lore eskaintza xume baten bidez. Omenaldira bertaratutakoek krabelin gorri bana jarri dute San Anton elizako oroitarriaren azpian, Bilboko Udaletxe zaharra zegoen lekuan.

1631 eta 1634 urte artean luzatu zen matxinada hura ez zen izan gatzaren inpostuaren igoeraren kontrako protestaldi soil bat, Espainiar Erresumaren asmo zentralisten kontrako eta Bizkaiko foruen aldeko altxamendu herritarra baizik.

Horregatik, EH Bilduk garai hartako krisialdi politiko, ekonomiko eta sozialaren eta gaur egungo egoeraren arteko zenbait lotura nabarmendu nahi izan ditu. “Egun asko dira beren eskubideen alde borrokatzen ari diren langileak, besteak beste, Tubacex, Petronor, PCB, H&M eta COSeko langileak, eta, hemen Bilbon, argiteria publikoko langileek 28 egun daramatzate greban", adierazi du Jone Goirizelaia, EH Bildu Bilboko bozeramaleak.

“Politika publikoetan garrantzi handiko aldaketa premiazkoa den arren, Udal Gobernuak zaharkituta geratu diren bere politikekin jarraitzen du, eliteen, enpresa handien, konstruktoreen eta enpresa aholkularien interesei erantzuten jarraitzen du, baita ekitaldi handien politikarekin ere, oinarrizko zerbitzu publikoak desegiteko eta pribatizatzeko bidean aurrera egiten duen bitartean ", kritikatu du.

Goirizelaiaren esanetan, EH Bilduk beste eredu bat defendatzen du, “langileen eskubideak defendatuko dituena eta Bilboko bizilagunak eta auzoak erdigunean jarriko dituena, auzoak aintzat hartuko dituena eta haien beharrei erantzungo diena".

Azkenik, pandemiaren ondorioak gehien pairatzen ari diren herritarrak omendu nahi izan ditu Goirizelaiak gaurko ekitaldian: langabezian dauden pertsonak, saltoki txikiak, tailerrak eta ostalaritza, zaintza-lanak egiten dituzten pertsonak, prekarietate egoeran dauden gazteak eta pentsiodunak.

Goirizelaiak adierazi duenez, “euren etorkizuna defendatzeko modurik onena politika eta zerbitzu publikoak sendotzea da”, eta “interes zentralisten aurrean, EH Bilduk Bilboko eta Euskal Herriko herritar guztiak defendatuko ditu”.

 

 

EH Bilduk Bilboko Udalak ikasketa gelen eskaintza lehenbailehen handitzeko eskatu du

| 2021-05-21 12:42:00

EH Bildu Bilbok,  maiatzeko Osoko Bilkurara aurkeztutako proposamen baten bidez, gobernu-taldeari eskatzen dio ikasgelen eskaintza zabal dezala, premiaz eta ezohiko moduan, bai ordutegiei dagokienez, bai eskainitako plazen kopuruari dagokionez. Horretarako, barruti guztietan eta asteko zazpi egunetan, ikasleen egungo eskaerak beteko dituen eskaintza nahikoa ziurtatzea eskatzen du EH Bilduk,  osasun neurri berriak bermatuta.

Asier Gonzalezek, EH Bilduko zinegotziak, azaldu duenez, pertsona askok dute ikasketa gela batera joateko beharra, eta, ondorioz, urteko zenbait unetan espazio horiek gainezka daude. Espazio horien eskaria izugarria da azterketa garaiak oposizioak bezalako beste proba batzuekin bat datozenean, epe laburrean gertatuko den bezala.

Pandemia dela eta, adierazi duenez, udalak normalean eskaintzen dituen espazio gehigarriak, non edukiera murriztu behar izan den, “ez dira nahikoak dagoen eskariari erantzuteko eta askotan ilarak sortzen dira ikasgeletan sartu ahal izateko, ikasleengan ezinegona sortuz”.

Horregatik, Gonzalezen ustez, “eskaintza zabaltzeko neurriak hartu behar dira, ikasteko leku gehiago gaituz eta ordutegiak zabalduz”. Era berean, EH Bilduren zinegotziaren esanetan, eskaria kontuan hartuta, “Udalak Bizkaiko Foru Aldundiari eta unibertsitateei eskatu beharko lieke beren ikasgelak berrirekitzeko eta berregokitzeko, lehenbailehen”.

“Berehala hartu beharreko neurriak dira, kontuan hartuta jende gehien biltzen diren hilabeteak ekaina, iraila eta urria direla”, nabarmendu du.

 

EH Bilduk eskatu du Bilboko Udalak Kutxabanki eta gainerako banketxeei eska diezaiela bulegoetan aurrez aurreko arreta bermatzeko

| 2021-05-20 11:05:00

EH Bildu Bilbok,  maiatzeko Osoko Bilkurara aurkeztutako mozio baten bidez, Bilboko Udalari eskatu dio Kutxabanki eta bertan dauden gainerako banketxeei eska diezaiela beren bulegoetan arreta presentziala bermatzeko, eguneroko ordutegietan, bezeroei arreta egokia emateko, behar dituzten banku-izapide guztiak egin ahal izan ditzaten.

Jone Goirizelaiak, EH Bilduko bozeramaileak, adierazi duenez, bankuak bulegoak sistematikoki ixtean ari dira eta horrek kalte handiak eragiten ditu herritarrengan, batez ere adinekoengan; izan ere, askotan, ilara handietan itxaroten egon behar izaten dira banku-zerbitzuak eskuratzeko edota beste auzo batera joan behar dira arreta presentziala jasotzeko.

Gogorarazi duenez, Kutxabank Publikoa plataformak, Pentsionistak Martxan erakundearen bitartez, eskaera hori herri-mozio baten bidez martxoko Osoko Bilkuran aurkeztu zuen. Pentsiodunen elkarteak, berriz, hainbat mobilizazio egin ditu, eta gutun bidez eskatu die finantza-erakundeei adineko pertsonentzako arreta espezifikoko leihatilak irekitzeko, zerbitzuak berrezartzeko eta komisioen ezarpen gero eta handiagoa murrizteko, besteak beste.

Arangoitiko bizilagunak ere mobilizazio batzuk egiten ari dira auzoko banketxeen itxiera salatzeko; izan ere, 5.000 biztanle eta irisgarritasun txarra izan arren, sukurtsalik gabe geratu dira eta horrek kalte handiak eragiten die auzo horretako bizilagunei.

Goirizelaiak gogorarazi duenez, “Kutxabank aurrezki-kutxen finantza-gaitasuna indartzeko eta handitzeko konpromisoarekin sortu bazen ere, urteen poderioz aurrezki-kutxek herrialdearekiko eta gertuko zerbitzuarekiko hurbiltasuna murriztu dute, eta erakunde bihurtu dira, banku pribatu baten egitura juridikoa ez ezik, haren praktikak ere bere gain hartu baititu”.

"Denborak aurrera egin ahala, bankua herritarrenganako arreta gero eta gehiago mugatzen hasi da, eta bulegoak itxi edo ordutegiak murriztu ditu, eta horrek ezinegona sortu du kaltetutako guneetan", azaldu du.

Gainera, esan duenez, "zuzeneko arretaren desagerpena bereziki kezkagarria da ohiko banku-harremanak ez dituzten errenta txikieneko kolektiboentzat, besteak beste, gero eta zailagoa egiten zaielako eskudirua jasotzea". Horregatik guztiagatik, EH Bilduk adostasunak lortzea espero du eta bere mozioa onartzea.

 

 

EH Bilduk Otxandianoren agerraldia eskatu du, Udalak MEBNk zigortutako aholkularitza-enpresekin duen harremana eta horren ondorioak azal ditzan

| 2021-05-13 13:04:00

EH Bildu Bilbok Xabier Otxandiano Garapen Ekonomiko, Merkataritza eta Enplegu zinegotziaren agerraldia eskatu du Bilboko Udalak Merkatu eta Eskumenen Batzorde Nazionalak zigortutako enpresa aholkulariekin duen harremana azaltzeko, baita zigor horiek udal eremuan izango dituzten ondorioak azaltzeko ere.

Era berean, alderdi subiranistak galdera sorta bat erregistratu du, hainbat gai argitzeko. Ildo horretan, besteak beste, EH Bilduk Udal Gobernuari galdetu dio ea, MEBNk 2019az geroztik irekitako zigor-prozesu bat zegoela kontuan hartuta, aholkularitza-enpresa horiei kontratuak esleitzen jarraitu zuen.

Ildo berean, etorkizuneko esleipen prozesuetan aipatutako aholkularitza enpresen inguruan neurriren bat hartzeko asmoa duen argitzeko eskatu dio, izan ere, EH Bilduren ustez, "neurriak hartu behar dira horrelakorik berriro gerta ez dadin".

EH Bilduk gogorarazi duenez, zigortutako enpresen artean Udalak kontratu ugari egin dituen batzuk daude. "Agerikoa da enpresa horien praktika irregularra eta iruzurrezkoa, Udal Gobernuak horren inguruko azalpenak eman beharko ditu. Gardentasuna eta horrelako jarduerak saihesteko neurriak eskatzen ditugu ", gaineratu du.

 

 

 

 

• «
• 1
• 2
• 3
• 4
• 5
• 6
• 7
• 8
• ...
• 23
• 24
• »