Bilbo

EH Bildu Bilbo: “Segurtasun itunean pausoak ematen ari diren arren, eskasak dira eta atzerapenarekin datoz”

| 2020-02-14 13:01:00

Asier Gonzalezek, EH Bildu Bilboko zinegotziak, adierazi duenez, Segurtasun  Itunean jasotako 35 neurriak martxan jartzeko “pausoak ematen ari diren arren” horiek “eskasak dira eta atzerapenarekin datoz; izan ere, ituna 2018. urtean sinatu genuen eta neurri horiek jadanik ezarrita egon beharko lirateke, gertuko polizia eredu bat lortzeko helburuarekin, EH Bilduk defendatzen dugun moduan”.

Gonzalezek adierazpen horiek egin ditu atzo Segurtasun Itunaren batzarrean parte hartu ondoren. Horretan, Juan Mari Aburtok, Bilboko alkateak, segurtasun itunaren betetze mailari buruzko informazioa eman zuen eta segurtasunari buruz bilbotarrek duten iritziari buruzko inkesten emaitzak aurkeztu zituen.

Segurtasun faltaren iritziari buruz, EH Bilduko zinegotziak esan duenez, “ikusten dugu herritarren segurtasun ezaren sentsazio falta igo egin dela, %27ra, hain zuzen ere, baina, aldi berean poliziaren presentziaren sentsazioa igo egin da ere bai”.

“Horrek honakoa adierazten du: kalean polizia gehiago egoteak ez du segurtasun sentsazioa areagotzen, EH Bilduk aspaldi esaten ari garen moduan. Gakoa poliziaren eredua da eta horrek argi uzten du hurbiltasun poliziaren eredua behar dugula, auzoetan eta herritarrekin gertua”, azpimarratu du.

Helburu hori lortzeko xedearekin, Gonzalezek esan duenez, atzoko batzarrean auzoetan tailerrak martxan jarri direla jakinarazi zuten. Bere esanetan, tailer horiek hurbileko polizia lortzeko “estrategikoak” dira eta horregatik orain horien “garapena eta emaitzak zeintzuk diren ikusi behar ditugu. Etorkizunerako apustu garrantzitsua da, eta horregatik jarraipen zehatza egingo dugu”, gaineratu du.   

Era berean, adierazi duenez, biolentzia matxistaren biktimei zuzendutako arreta unitatea sortzeko perfilak egiten ari direla jakinarazi zuten atzoko bileran. “EH Bilduren eskaera bat da, eta nahiz eta berandu heldu, ezinbesteko neurria da. Orain espero dugu lan hori ahalik eta arinen egitea biolentzia matxistaren biktimekin zuzendutako arreta unitatea beharrizan bat delako”, nabarmendu du.

Itunean jasotako beste neurri bat da edozein motatako ekimen jendetsuei zuzendutako protokolo berriak ezartzea. “Ez da ezer edo ia ezer egin”, kritikatu du Gonzalezek, Eurokoparen bezperatan gaudela gogoratuz. “Ulertezina”, esan du.

Azkenik, Asier Gonzalez EH Bilduk neurri guzti horien jarraipen zuzena egingo duela adierazi du, “horien ezarpena oso garrantzitsua delako hurbileko benetako polizia bat lortzeko, prebentzioa egiten duena, genero ikuspegiarekin eta eskubideei buruzko formazioarekin”.

“Udal Gobernuak proposatutako HAPOa merkatu eta interes pribatuen menpe dago eta ez ditu bilbotarren beharrizanak asetzen”

EH Bildu Bilbok alokairuzko etxebizitza publikoa defendatzen du, aldiz, Udal Gobernuak HAPOan etxebizitza librearen aldeko apustu argia egiten du

| 2020-01-29 11:52:00

EH Bildu Bilboko kideok urtarrilaren 30eko greba orokorrarekin bat egiten dugu, arrazoi nahiko ditugulako Bilbon grebarako. Bilboko alkateari, Juan Mari Aburtori, data aldatzeko eskatu genion beste leku batzuetan, adibidez Donostian, egin duten bezala. Baina Aburtok ezetz esan digu. Hori dela eta, gure mozioak erretiratu ditugu eta soilik HAPOaren eztabaidara joango gara bihar; izan ere, herritarren eta elkarteen alegazioak eztabaidatzen dira eta HAPOak gure hiriko urigintzaren eredua ezezik, eredu sozio-ekonomikoa baldintzatuko du epe luzean.

Nahiz eta HAPOa egiten ari zirenean hainbat itxaropen sorrarazi zituzten, lurreratzen joan den heinean, argi gelditu da ez duela inolako aldaketarik ekarriko eta, horregatik, hiri eredu berri bat lortzeko geneukan ilusioa guztiz itzali du. Proposatzen diguten HAPOak beti egin duten apustua sakontzen du, hau da, berriro ere merkatuaren, eleizaren eta interes pribatuen menpe dago, gainera, badirudi eliza higiezin-sustatzailea bihurtu dela. Aldiz, ez ditu gure auzoetako bizilagunen beharrizanak asetzen, etxebizitza eta ekipamendu publikoen eta gune berdeen beharrizanak, alegia. 

Zertaz hitz egiten ari gara? Udal Gobernuaren apustua etxebizitza berri gune handiak sortzea da, birgaiketaren alde edo leheneratzeko dauden zonaldeetan etxebizitzaren aldeko apustua egin beharrean. Zehazki, udal gobernuak hurrengo 25 urtetan 16.409 etxebizitza berri egitea aurreikusten du, biztanleriaren hazkunderik aurreikusten ez denean. Gainera, ez du kontuan hartzen Bilbon, orain dela gutxi egindako udal ikerketa baten arabera, 5.453 etxebizitza huts ditugula, erroldatze barik eta ur eta argiaren kontsumo barik eta merkatura berriro atera daitezkeenak.

Baina milaka etxebizitza horietatik soilik %18ak izango dute babes izaeraren bat, eta horietatik oso gutxi izango dira alokairu sozialerako. %16a tasatuak izango dira, nahiz eta jakin badakigu tasatuen balioa egun merkatuaren baloretik hurbil dagoela. Gainerakoak libreak izango dira.

Udalak Bilbon etxebizitzari buruz egindako ikerketak honakoa adierazten du: bilbotarren %70ak babestutako alokairuzko etxebizitza behar dute. Hala ere, udal gobernuak ez ditu herritarren beharrizanak asetzen, eta etxebizitza librearen eta makro operazioen alde egiten du, dauden espazioak suntsituz eta aukerazko espazio eskasak deseustatuz (Zorrotzaurre, Punta Zorrotza, Elorrieta eta Boluetan, batez ere)

Eredu honek EH Bildu Bilbok defendatzen dugun ereduarekin talka egiten du. EH Bilduk alokairuzko etxebizitza publikoaren aldeko apustua egiten dugu. Gure galdera da, EAJ-PSEk proposatzen duen ereduarekin, non biziko dira Bilboko gazteak eta ez hain gazteak? Kontuan hartu behar da, gainera, bilbotar askok lan prekarioak dituztela. Politika hauekin bilbotar asko Bilbotik kanpo joatera kondenatzen dituzte, izan ere, Bilbon ezin dute etxebizitza bat eskuratu.  

95. urteko plangintzarekin gertatu zen bezala, egungo HAPOak hiriko erdigune eta auzoen arteko ezberdintasunak areagotzen ditu.

Biharko Osoko Bilkuran 265 alegazioekin eta 21 sektore-txostenekin talde erredaktoreak egindako txostena  eztabaidatuko da. Udal Gobernuak proposamen pribatu, enpresa eta elizaren proposamen gehienak onartzen ditu. Aldiz, auzokideen edota kultur eta elkarte sozialen proposamen gehienak bertan behera uzten ditu, hau da, auzoen beharrizanak asetzea eskatzen duten alegazio gehienak deuseztatzen ditu. Lotsagarria eta onartezina da.

Bestalde, espazio libreari dagokionez, plangintzak mendi-hegalean eremu handiak ditu Pagasarri mendian Peñaskalen edo Artxandan tunelen gainean, hiri parkeak izango balira bezala. Hori guztia biztanleko metro karratu berdearen ratioak betetzen dituztela esateko. Baina oso zaila da legea betetzea Bilbok dituen hiri espazio libreekin.

Aldaketa klimatikoari aurre egiteari buruz eta Bilbo jasangarriak duen garrantziari buruz asko hitz egiten da. Baina errealitatea bestelakoa da. Bilbon Pagasarri soilik dugu aisialdiko gune librea eta oso erabilia dago. Gainera hemen daukagu Zabalgarbi, Super Sur-aren handitzea eta harrobiak funtzionatzen jarraitzen du. Azken ideia Pagasarri zementatzea izan da, inoren iritzia kontua hartu barik. Bitartean Iparreko mendi-hegalerako ez dago proposamenik. Udal gobernuak ez du espazio berdeak berreskuratzearen aldeko inolako apusturik egiten.

Bilbok eraldaketa handia izan du, horregatik, orain auzoei merezi duten protagonismoa emateko garaia zela pentsatzen genuen eta pentsatzen dugu,  auzoetan espazio berdeak,  kultur eta kirol ekipamenduak eta alokairuzko etxebizitza sozialak jartzeko garaia eta auzotarren eskaerei erantzuteko garaia, hain zuzen ere. Hori da EH Bilduren apustua baina, ez, ordea, udal gobernuarena, beste behin ere enpresen eta elizaren interesak defendatzen ditu eta auzoen eta herritarren  aldarrikapen eta zor historikoei erantzuteko aukera aukera ederra galdu du.

 

 

 

 

EH Bildu Bilbok urtarrilaren 30eko greba orokorrarekin bat egiten du, erabaki politikoen erdigunean bizitzak jartzeko

| 2020-01-24 10:42:00

EH Bildu Bilbo udal taldeak urtarrilaren 30ean Euskal Herriko Eskubide Sozialen Kartak deitutako greba orokorrarekin bat egiten du “erabaki politikoen erdigunean bizitzak jartzeko eta hauek ez egoteko elite ekonomikoen interesen menpe”. Jone Goirizelaiak, EH Bilduko Bilboko bozeramaleak azaldu duenez,  “bilbotarrok arrazoi asko dauzkagu greba egiteko”.

 

“Bilbon 2019ko urrian erroldatutako 345.821 pertsonako 22.671 langabe zeuden, populazioaren % 13,38, hain zuzen ere, eta 3.451 dira langabezian dauden gazteak. Azken hamar urteetan pobrezia erreala Bilbon 7,6tik 10,1 puntura pasa da, ia hiru puntu handituz, eta ongizate errealaren falta 13,8tik 18,5era igo da, hots, bost puntu”, adierazi du. Bitartean, gaineratu duenez, “hileroko alokairua Bilboko hiru gelako etxebizitza batean 900 eta 1.200 euroren artekoa da eta batezbesteko errenta urteko 27.627,3 eurokoa”.

 

Horrez gain, EH Bildu Bilboko bozeramaleak adierazi duenez, grebarako arrazoiak argi gelditzen dira “Bilboko mugimendu feministaren aldarrikapenetan eta eraso matxistak salatzeko egiten dituzten kontzentrazioetan, baita ere udaleko azpikontratetako langileen mobilizazioetan, lan eskubide duinen alde.”

 

Era berean, Goirizelaiak gogoratu duenez, pentsiodunek bi urte daramatzate astelehenero mobilizazioak egiten Bilboko Udaletxe aurrean, “greba orokorra egitea ezinbestekoa da pentsio sistema publikoa defendatzeko, lan harremanetarako eta babes sozialerako sistema propioa lortzeko, 1.080 euroko gutxieneko edota eros-ahalmena legez bermatzeko”.

 

Horregatik guztiagatik, EH Bildu Bilbo bozeramalearen esanetan, “eskubide sozialak aldarrikatu behar ditugu, zerbitzu sozialean sistema publiko, unibertsal eta doakoa, hain zuzen ere”. “Hori lortzeko mobilizazioa ezinbestekoa da eta horregatik EH Bildu Bilboko udal taldeak greba orokorrarekin bat egiten du”, azpimarratu du.

 

Osoko Bilkura

Jone Goirizelaiak adierazi duenez, urtarrilaren 30ean, greba orokorraren egunean, Bilboko Udalean Osoko Bilkura deituta dago eta, horregatik, EH Bilduk Bilboko alkateari, Juan Mari Aburtori, data aldatzea eskatu zion.  

“Nahiz eta beste toki batzuetan Osoko Bilkuraren data aldatu duten greba eskubidea errespetatzeko, Bilbon Aburtok eskaera ez du onartu; izan ere, Aburtok bizkarra ematen die greba orokorrean Bilboko hiritarrek egiten dituzten aldarrikapenei”, kritikatu du EH Bildu Bilbo udal taldeko bozeramaleak.

Goirizelaiaren esanetan, “Osoko Bilkuraren data egun bat aurreratzeak edo atzeratzeak ez luke inolako eragozpenik sortuko; esate baterako, Donostiako Udalean, EH Bilduko udal taldeak eskatuta, gainerako udal taldeek onartu dute eta urtarrilaren 30erako deituta zuten Osoko Bilkuraren data aldatu dute; baina Aburtok berriro ere bere izaera autoritarioa agertu digu eta argi utzi digu ez duela inolako borondate politikorik greba eskubidearen alde egiteko”.

Hori dela eta, EH Bildu Bilbo udal taldeko zinegotziak Osoko Bilkurarako aurreikusita zituen gaiak erretiratuko ditu eta puntu bakar baten eztabaidan egongo direla aurreratu du Goirizelaiak, HAPOren eztabaidan, hain zuzen ere.

“Puntu honetan beharrezkoa deritzogu Osoko Bilkuran egotea, gai guztiak garrantzitsuak izanik, gainerakoak beste Osoko Bilkura batzuetara eraman ditzakegu, baina HAPOren kasuan,  epe luzean Bilboko hiri eredua baldintzatuko duen plangintzaz ari gara eta urtarrilaren 30eko Osoko Bilkuran herritarrek eta elkarteek aurkeztutako alegazioak eztabaidatuko dira”, azaldu du EH Bildu Bilbo taldeko bozeramaleak.

Hortaz, EH Bildu Bilbok urtarrilaren 30eko greba orokorrarekin bat egingo du eta Osoko Bilkurako puntu bakarraren eztabaidara joango da, “zoritxarrez, Aburtok, data aldatu nahi izan ez duelako”.

Misericordiako aterpea martxan ez jartzeak, Aburtoren “diskurtso soziala bertan behera uzten duela” adierazi du EH Bildu Bilbok

| 2020-01-22 15:10:00

 

Juan Mari Aburtok, Bilboko alkateak, Misericordiako aterpea martxan ez dela jarriko jakinarazi du gaur. Horrek, EH Bildu Bilboren ustez, “Aburtoren diskurtso soziala bertan behera uzten du”.

Bruno Zubizarretak, EH Bildu Bilboko zinegotziak, gogoratu duenez, aurreko legealdiaren bukaeran, Misericordian aterpe bat irekitzeko inbertsio bat aurreikusi zen, baina legealdiaren bukaeran ez zen martxan jarri.

Hori dela eta, azaldu duenez, 2020ko aurrekontuak azaltzeko Juan Ibarretxek, Gizarte Ekintza Saileko zinegotziak, egindako agerraldian, horri buruz zer asmo zuten galdetu zion EH Bildu Bilbok. “Erantzuna ez zen argia izan, koste altuei eta bideragarritasun planei buruz hitz egin zuen. Horregatik, udal gobernuak proiektu hori martxan jartzeko asmorik ez zuelaren susmoa geneukan”, azaldu du.

Zubizarretak adierazi duenez, “zoritxarrez” gaur alkateak “gure susmoak baieztatu ditu eta etxegabeko pertsonentzat Misericordiako aterpea ez dutela egingo esan du, ustez, kontuek ez dutelako ematen”. “Berriro ere EAJk zerbitzu sozialak kosteekin lotzen ditu, gizartearentzako inbertsio bat  egiteari buruz hitz egiten gaudenean”, salatu du.  

Ildo horretan, esan duenez,  “atzo Aburtok agintaldi planaren aurkezpenean, bazterketaren kontra lan egiteak duen garrantzia azpimarratzen zuen bitartean, gaurko albisteak argi uzten du ez duela esandakoa betetzen eta egoera txarrenean dauden pertsonak ez direla bere lehentasuna”, gaineratu du.

Gainera, bere esanetan, “Misericordiaren aterpea ez dela egingo esaten digute, orain dela gutxi Montañoko aterpea itxi denean. Aterpe horrek 90 ohe zituen eta migranteen harrera sarearen aldarrikapenei esker sortu zen”. “Bi albiste horiek argi uzten dute gero eta baliabide gutxiago daudela”, gaineratu du.

Zubizarretak adierazi duenez, “beste ekimen batzuetarako udal gobernuak nahi beste diru gastatzen du, esate baterako, Eurocopara bi milioi euro bideratuko ditu”.  “EH Bildu Bilbotik egoera txarrenean dauden pertsonei zuzendutako baliabideak defendatzen jarraituko dugu, guretzat ezinbestekoa delako pertsonak erdigunean kokatzea”, nabarmendu du.

 

 

EH Bildu Bilbok adierazi du Aburtoren gobernuarentzat “lehentasuna ez direla Bilboko hiritarren beharrizanak, baizik eta azpiegitura handiak “

| 2020-01-21 14:58:00

Juan Mari Aburtoren udal gobernuak, udal hauteskundeetatik urte erdi pasa denean, gaur agintaldi plana aurkeztu du. Plan hori, EH Bildu Bilboren ustez, “bi hauteskunde programen fusioa besterik ez da” eta horretan “lehentasuna ez dira Bilboko hiritarren beharrizanak, baizik eta azpiegitura handiak, besteak beste, aireportuaren handitzea, AHT eta Zorrozaurre”.

Aurkeztutako neurrien balorazio zehatza egiteko badute ere, Asier Gonzalezek, EH Bildu Bilboko zinegotziak, adierazi duenez, plan horren aurkezpenean, Aburtok “langileen eskubideak ez ditu aipatu eta zerbitzu sozialak azaletik  azaldu ditu, krisiak oraindik eragina duela adierazi duen arren”. “Krisi berri baten aurrean gaudela esaten duten adierazleak ere ez ditu aipatu”, gaineratu du.

“Aburtok bilbotarron bizi kalitateari garrantzia eman ordez, Zorrozaurre bezalako urigintza proiektuak nabarmendu ditu, aurreko legealdietatik datozenak eta ez dakigunak zertan geldituko diren”, adierazi du EH Bilduko zinegotziak. Ildo horretan, gogoratu duenez, Alkateak plana aurkeztu duen ordu berdinean, pentsiodunek agerraldia egin dute urtarrilaren 30eko greba orokorrerako deia egiteko, eta Bilbao Kirolak-eko langileak, mobilizazio batean, lan eskubide duinak aldarrikatu dituzte. “Hori da Bilboko benetako argazkia”, nabarmendu du.

Era berean, esan duenez, “alkateak enplegu gehiago eta hobea eta kalitatezko zerbitzu publiko hobeak udal gobernuaren erronka direla esaten duenean, guk udal zerbitzu publikoetan dauden lan gatazkak konpontzea eskatzen diogu; izan ere, langileen lan eskubideetan eta zerbitzu publikoen kalitatean eragin zuzena dute”.

Bestalde, Aburtoren udal gobernuak aireportuaren handitzearen aldeko apustua egiten duenean, Gonzalezen ustez, “Txorierriko auzokideen eskubideak eta iritziak kontuan hartu behar dira”. Ildo berean, “aireportua nazioarteko ekimen handiak erakartzeko soilik handitu nahi duen” galdetu dio; “etxean prekarietatea sortzen duten eta bilbotarron bizia garestitzen duten ekimenak, hain zuzen ere”.

Horrez gain, Aburtok aipatutako proiektuetan, Deustualdean suhiltzaileen parke berri baten proiektuaren falta sumatu du EH Bildu Bilboko zinegotziak, izan ere, “langileen aldarrikapena da, Herri Babesak aitortutakoa”. Segurtasunaren alorrean, Gonzalezen esanetan, “komisaldegi berriei buruz hitz egiten digu Alkateak, baina beharrezkoa da formakuntzan inbertsioak egitea, segurtasunaren beste eredu bat indartzeko”.

Euskarari dagokionez, esan duenez, “plangintza bat eta bi edo hiru neurri aipatzen digu, baina apustu ausartagoa egin behar da Bilbo euskararen etorkizunean giltza delako”.

Azkenez, Asier Gonzalezek Bilboko alkateari gogoratu dio “gardentasunari eta parte hartzeari buruz hitz egiten duenean, horiek ez direla bermatzen soilik kontuak ematen”. EH Bildu Bilboko zinegotziaren ustez, “gizarteak eta auzoek duten proposatzeko ahalmena indartu behar da eta euren proposamenak kontuan hartu, ez soilik lau urtetik behin”. “Herritarren gaitasunaren adibide ona Abusun tranbiaren erdibideko estazioa izan da“, gaineratu du.

ALBISTEAK

Bilbon ‘Bizikletan adinik gabe’ programa martxan jartzeko eskatu du EH Bilduk, mugikortasun zailtasunak dituzten nagusiek bizikletan paseatzeko aukera izan dezaten

2022-01-04 13:24:00

Programa honen bidez, hainbat ibilbide egiten dira eta belaunaldien arteko topagune bat sortzen da aisialdi osasungarriko jarduera baten inguruan.

EH Bilduk salatu du Udal Gobernuak Atxuriko kantxak itxi dituela, bertan gaua igarotzen duten etxerik gabeko pertsonei alternatibarik eskaini gabe

2022-01-03 14:08:00

Neurri “bidegabe eta ankerra” dela adierazi du eta udal gobernuari azalpenak eskatuko dizkiola iragarri du.