Bilbo

EH Bilduk hiriaren sorreraren urteurrena ospatzeko banderaren igoeran parte hartu du

Goirizelaiaren esanetan, pandemiak sortutako egoerak agerian utzi du Bilbo berri baterantz aurrera egiteko beharra

| 2020-06-15 12:22:00

EH Bildu Bilbo udal taldeak hiriaren sorreraren urteurrena ospatzeko bandera jasotzeko ekitaldian parte hartu du gaur, eta aurten COVID 19ko biktimak gogoratu dituzte, minutu bateko isilunearekin. Jone Goirizelaiak, EH Bildu BIlbo udal taldeko bozeramaileak, elkartasuna adierazi die coronavirusaren ondorioz maite duten pertsonaren bat galdu duten pertsona guztiei.

Goirizelaiaren esanetan, koronabirusaren ondorioz sortutako egoerak agerian utzi du, "beste hiri eredu baterantz aurrera egiteko beharra, etorkizuneko Bilbo berri baterantz, non auzotarrak izango diren lehentasuna, Bilbo bidezkoagoa, inklusiboagoa, jasangarriagoa, feministagoa eta erabakiak hartzeko prozesuan parte-hartzaileagoa, hain zuzen ere".

EH Bildu udal taldeak bilbotar guztiak ordezkatzen dituen banderaren igoeran eta “politika publikoaren sinboloa” den Beteluriko bankuaren aurrean egindako omenaldian parte hartu du. EH Bilduk azpimarratu duenez, "zoritxarrez, Beteluritik ekarritako bankada Seberetxen gaur egun lehertzen ari diren harriekin eginda dago, zentzurik gabeko makro-proiektu batean aurrera egiteko". Bestalde, aurten ez da lore-eskaintzarik egingo Diego Lopez de Haroren estatuaren aurrean; EH Bilduren ustez, estatua hori "gerlari feudal bat gogorarazten duen iraganeko aztarna bat da, gure garaiekin bat ez datorrena".

COVID 19ak sortutako egoerak ondorio sozio-ekonomiko garrantzitsuak izan dituela eta izango dituela azaldu du Goirizelaiak eta, hori dela eta, Bilboko Udalak “bere politika eta lerro estrategikoak birplanteatu behar ditu, antzinako errezetak bertan behera utzi eta pertsonak erdiguneak jarriko dituen beste eredu bat adostu”.

Adibidez, “orain HAPO berria tramitatzen ari denean,  ezin da sakondu zaharkituta dagoen eredu batean, oraindik ere interes pribatu handien zerbitzura dagoena eta auzoen beharrei erantzuten ez diena”, adierazi du. Horren aurrean, "EH Bilduk alokairuko etxebizitza publikoak, berdegune handiak eta hurbileko oinarrizko ekipamenduak lehenetsiko dituen eredu baten alde egiten du".

"Mugikortasun iraunkorra eta kolektiboa ezarri behar dugu, eta alokairuko etxebizitza publikoa handitu, sustapen pribatuaren aurrean", eta, gainera, "Bilbo euskaldun, feminista eta integratzailearen aldeko apustua egiten dugu, herritarren parte-hartzea bermatuko duena", azpimarratu du.

 

 

EH Bilduk Botika Zaharra-Zorrotzaurreko hirigintza-operazio "espekulatiboak" eremu horretan dagoen espazio libre eskasa okupatzea dakarrela kritikatu du

“Hirigintza-operazio espekulatiboen ordez, auzo honek bizilagunen eskaerei modu duin batean erantzungo dieten ekipamendu publikoak egitea eta handitzea behar du”

| 2020-06-12 12:44:00

EH Bildu Bilbo udal taldeak Botika-Zaharra Zorrotzaurreko hirigintza-operazio "espekulatiboa" kritikatu du, besteak beste, "gehiegizko eraikuntza duen gune batek duen espazio libre urria okupatzea" dakarrelako, baita "Botika Zaharreko Skate parkea kentzea eta, Deustu eta itsasadarraren artean, izugarrizko horma altxatzea ere, eta auzoko aisialdirako gunea gero eta urriagoa izatea".

"Biribilgune hori kenduta, parkea handitzeko aukera bakarra galtzen da, inguruko bizilagunek hain beharrezkoa den aisialdirako espazioa izan dezaten", adierazi du Jone Goirizelaiak, EH Bildu Bilbo udal taldeko bozeramaileak; izan ere, datorren astelehenean, ekainaren 15ean, IMQren eraikinaren ondoan dagoen Euskaldunako biribilgunean  etxebizitza-blokeak eraikitzeko Zorrotzaurre plangintzako "urbanizazio" lanak hasiko direla iragarri da.

Goirizelaiak gogorarazi duenez, 230 etxebizitza inguru eraikitzeak biztanleriaren hazkundea ekarriko du, eta kontuan hartu behar da egungo ekipamendu publikoak, hala nola, kiroldegia, ikastola publikoa edota anbulatorioa, "urteak dira txikiak eta zaharkituak geratu direla eta ez dietela auzoko egungo beharrei erantzuten".

Hori dela eta, bere esanetan, “aurreikusten duten hirigintza-operazio espekulatiboen ordez, auzo honek bizilagunen eskaerei modu duin batean erantzungo dieten ekipamendu publikoak egitea eta handitzea behar du".

"Auzoko bizilagunek kiroldegi berri bat behar dute, Deustuko Ikastola publikoa handitzea behar dute, horretarako egungo kiroldegiko lurrak bideratuz; baita Botika Zaharreko parkea handitzea eta babestea ere, eta ez etxebizitza gehiago", nabarmendu du.

Bestalde, biribilgune hori Bilboko sarrera- eta irteera-leku bat dela esan du, eta zirkulazio-bolumen handia duela. Horren harira, adierazi duenez, barrutiak behin baino gehiagotan eskatu duen arren, "ez dugu informaziorik obra horrek Deustuko trafikoan eta mugikortasunean eragingo duen inpaktuari buruz, ez lanak egin bitartean, ez amaitu ondoren".

Horregatik guztiagatik, EH Bilduk “espekulazio politika” erabat baztertu du, eta ekipamendu eta zerbitzu publiko duinak defendatu ditu.

EH Bilduk uda honetan Bilboko hirigunean kale aisialdi osasuntsurako alternatibak eskaintzea eskatzen du

Helburua da urruntze soziala mantentzea ahalbidetuko duten espazio berriak antolatzea, itzalgune eta ur horniketa nahikoarekin, herritar eta familia guztien eta, bereziki, haurren eta pertsona nagusien aisialdirako

| 2020-06-03 11:16:00

EH Bildu udal taldeak, ekaineko Osoko Bilkuran eztabaidatuko den mozio baten bidez, Udal-gobernuari eskatu dio Bilboko hirigunean aisialdirako espazio berriak antolatu ditzan, itzalguneak eta ur horniketa ziurtatuz, eta era berean beharrezkoa den urruntze soziala mantentzea ahalbidetuz. Helburua da, datozen hilabeteotan eta pertsonen arteko distantziak mantentzeko neurriak indarrean dauden bitartean, kale aisialdi osasuntsurako alternatibak eskaintzea herritar eta familia guztiei eta, bereziki, haurrei eta pertsona nagusiei.

EH Bildu udal taldeak azaldu duenez, COVID-19 birusaren zabalpenaren ondorioz pairatu behar izan dugun konfinamenduaren osteko deseskalada faseek aurrera egiten duten heinean, “hiriguneko parke eta berdeguneetan jendetza biltzen hasi da, askotan gainezka egin arte”.

Gainera, adierazi duenez, horri gehitu behar diogu,  udal igerilekuak, Bilbon uda garaiko kale aisialdi alternatiba nagusia, alegia, mugatuta egongo direla ohiko aforoaren %30era, eta gertuko hondartzetarako sarbidea ere murriztuta egongo dela. “Bestalde, segurtasun arrazoiak direla eta, jolas parkeek itxita jarraitu beharko dute”, gaineratu du.

Era berean, EH Bilduk gogoratu duenez, “ezin dugu ahaztu, pandemiaren ondorio ekonomikoak direla eta, pertsona eta familia askok ez dutela hiritik kanpo oporrak ordaintzeko diru sarrera nahikorik izango”. 

Faktore horiengatik guztiengatik, EH Bildu Udal Taldearen ustez, uda honetan “beharrezkoa” izango da “hirigunean espazio berriak antolatzea, aisialdi osasuntsu baterako alternatibak herritar eta familia guztiei eskaintzeko, baina bereziki haurrei eta pertsona nagusiei”. “Espazio hauek itzala eta ur nahikoa eskaini beharko dute, uda garaiko tenperatura altuei behar bezala aurre egin ahal izateko”, zehaztu du.

"Gure mozioa aurrera ateratzea espero dugu; izan ere, bilbotarren beharrizan bat da, eta egungo egoeran, ohiko espazioak gainezka daudelarik, ez dute alternatiba nahikorik kalean disfrutatzeko", nabarmendu du.

EH Bildu Bilbok Udal Gobernuaren "gardentasun falta" kritikatu du "diru publikoarekin" inkestak egin dituelako "oposizioa informatu gabe”

| 2020-06-02 10:20:00

Jone Goirizelaiak, EH Bilduko bozeramaileak, EAJ eta PSEren Udal Gobernuaren "gardentasun falta" kritikatu du; izan ere, Legebiltzarrerako hauteskundeen bezperan, "udal kudeaketari buruzko inkestak egin dituzte, diru publikoarekin, oposizioko alderdiei horren berri eman gabe, ezta horren edukiari ere ez"

"Udal Gobernuaren jarrera ez da ez gardena ez parte-hartzailea izan", adierazi du. "Ez da onargarria inkesta horiek egitea gainerako alderdiei horren berri eta edukien berri eman gabe", salatu du.

Hori horrela, Goirizelaiak esan duenez, Udal Gobernuari berriro ere azalpenak eskatuko dizkiote: "zergatik ez diguten inkesta honen berri eman, ezta haren edukiaren berri ere".

“EH Bilduren ekimenez, Udalak akordio oso garrantzitsua lortu du austeritate politikak bertan behera uzteko eta kalitatezko zerbitzu publiko indartsuak defendatzeko, Bilboko herritar guztien mesedetan"

Bilboko Udalak birjarpen-tasa desagerrarazteko eskatu dio Espainiako Gobernuari, horrek pribatizazioa saihestuko du eta zerbitzu publikoak indartzea ahalbidetuko du

| 2020-05-28 18:35:00

Jone Goirizelaiak, EH Bilduko bozeramaileak, azpimarratu duenez,  gaurko osoko bilkuran, EH Bildu Bilboren ekimenez,  "aurreko krisian ezarritako austeritate politikak bertan behera uzteko eta kalitatezko zerbitzu publiko indartsuak defendatzeko akordio oso garrantzitsua lortu da”, eta “hori Bilbotar guztientzat ona izango da, are gehiago bizi dugun egoeran".

Ildo horretan, azaldu duenez, “COVID19ak sortutako egoera baino lehen, gure hiriko beharrei aurre egiteko zerbitzu publikoak indartu behar baziren ere, pandemiaren ondorio sozioekonomiko larriek Bilbon behar sozialak eta egoera ahulean dauden pertsonak areagotu besterik ez dute egin”. “Beharrezkoa da erakundeok egoera horiei erantzuteko mekanismoak aktibatzea, eta hori da akordio honen helburua", esan du.

EH Bildu udal taldeak aurkeztutako mozioan Bilboko Udalak Espainiako Gobernuari eskatzen zion, hurrengo Aurrekontuen Legean, birjarpen-tasaren mugak desagerrarazteko, udalei aukera emanez gizarte-zerbitzuetan zerbitzu egokia emateko behar diren pertsonak kontratatzeko. Azkenik, EAJren zuzenketa onartu da, kontratazio hori herritarrei zerbitzuak egokiro emateko behar dituzten baliabideak kontratatzera zabaltzen zuena.

Goirizelaiak adierazi duenez, EH Bilduk bere mozioan gizarte zerbitzuetan jartzen zuen arreta, "arlo horretan izango den beharrizanen hazkundea kontuan hartuta; izan ere, krisi guztietan bezala, egoera ahulenean dauden pertsonak dira kaltetuenak". Hala ere, beste zerbitzu publiko batzuek ere indartzeko beharra izango dutela jakinik, zuzenketa onartu dute.

"Gure helburua pertsonak erdigunean jartzea da eta, horretarako, austeritate politika guztiak irauli behar dira. Helburu horrekin, EH Bilduren ekimenez, aurreko osoko bilkuran gastu-muga malgutzeko ekimen bat onartu genuen, eta, oraingoan, akordio bat lortu dugu Gobernuari eskatzeko birjarpen-tasa desagerraraz dezala”, azpimarratu du.

Goirizelaiaren hitzetan, birjarpen-tasa "neurri politiko bat da, zerbitzu publikoen kalitatea urratzea ekar dezakeena, baita zerbitzuari aurre egiteko enpresa pribatuen aukerak bultzatu ere, zerbitzua garestituz eta langileen lan-baldintzak debaluatuz, horrek zerbitzuaren kalitatean dituen ondorioekin".

Horregatik, bere ustez, "ezinbestekoa" da neurri hori indargabetzea, izan ere, "herritar guztiek kalitatezko zerbitzu publikoak jasotzeko eskubidea izango duten sistema publiko indartsu baten aurkakoa da".