Bilbo

“Bilboko Udalak pauso ausartagoak eman behar ditu euskalduntzearen alde”

| 2019-12-03 13:17:00

Abenduaren 3a Euskararen Nazioarteko Eguna dala gogoratu eta Bilboko Udalari euskalduntzearen aldeko pauso ausartagoak emateko eskatu dio Euskal Herria Bilduk. Izan ere, joan den asteko Udalbatzan bertan 2020. urterako aurrekontu proiektua eztabaidatu zuten, eta EH Bilduk hamazazpi zuzenketa proposamen aurkeztu zituen, Udalak euskararen alde egiten duen apustua sendotzeko. Hamazazpi proposamen horietatik bakarra onartu zuen Udal Gobernuak, euskarazko kultur sorkuntzari lotutakoa.

EH Bilduko zinegotzi Asier Gonzalezek ildo desberdinak markatu zituen udal politika euskaltzalearen alde: “kultur sorkuntza osasuntsu mantendu behar dugu, zentroan eta periferian; euskara ikasi nahi duenari ateak parez-pare zabaldu behar dizkiogu, tiketa debalde; eta aspaldi etorri zirenei edo euskararen hegoak moztuta jaio zirenei ere atea zabal-zabalik, sekula ez baita berandu euskahalduntzeko”.

Bere esanetan, “beste erronka garrantzitsuetako bat honakoa da: gazteei aisialdia euskaraz ere izan daitekeela demostratzea, azken kale zuloraino; Otxarkoagan eta Altamiran”.

Horrez gain,  paisaia linguistikoan euskara zaindu eta bultzatzeko eskatzen du EH Bilduk.

Euskararen aldeko Udalgintza ez da “inoren kontra“ egiten den zerbait, EH Bilduk dioenez, “inoiz barne mugak gainditu eta euskararen aberrira inguratu den horrek badaki ez gabiltzala inoren kontra”, gaineratu du.

Gai horiek guztiak aurrekontuetara aurkeztutako 17 emendakinetan proposatu ditu EH Bilduk, besteak beste: gazte etorkinek eta 65 urtetik gorakoek euskara ikasteko diru-laguntzak indartu, komertzioa euskalduntzeko Biribilko proiektua indartu, euskararen paisaia landu eta Otxarkoagan euskara eskolak errekuperatu.

“Joan zen ostiralean Bilboko alkateak, berba politak egin zituen euskararen eguna dela eta; gaur ere antzeko adierazpenak espero daitezke agintari publikoen partetik, baina politika publikoak ez dira batere ausartak eta aurrera jauzi erabakiorra behar dugu. Bide horretan lankidetzarako prestutasun osoa dauka EH Bilduk”.

Bilbon berdintasuna, euskera eta lankidetza sustatzeko eta hiria inklusiboagoa eta irisgarriagoa lortzeko ekimenak martxan jarriko dira, EH Bilduren emendakinei esker

Indarkeria matxista pairatu duten emakumeen aitortza toki bat sortzeko ikerketa egingo da mugimendu feministarekin batera, EH Bilduk proposatuta

| 2019-11-29 12:40:00

EH Bildu Bilbok udal aurrekontuei aurkeztutako eta onartutako emendakinei esker, berdintasuna, euskera eta lankidetza sustatuko dira eta Bilbo hiria inklusiboagoa eta irisgarriagoa izateko neurriak bultzatuko dira.

EH Bilduk proposatuta, indarkeria matxista pairatu duten emakumeen oroimen eta aitortzako toki bat sortzeko ikerketa egingo da, mugimendu feministarekin eta indarkeria matxistaren biktimekin batera.

“Bilbo horrelako gune bat izango duen Euskal Herriko lehenengo hiria izango da, ezinbestekoa biolentzia matxista pairatu duten emakume guztiak gogoratzeko eta balioan jartzeko eta baita ere prebentzio eta hezkuntza lanak egiteko. Errelatoa, memoria eta erreparazioa. Emakume askori zor diegun aitortza, jasotako min parkaezinagatik”, adierazi du EH Bilduk.

Ildo horretan gogoratu duenez, indarkeria matxista gaur egun jendartean daukagun arazo larri eta estrukturala da. Biolentzia horren jatorria da gizonen eta emakumeen arteko egiturazko ezberdintasuna, horregatik, emakume izate hutsagatik indarkeria matxista pairatu duten emakumeei aitorpena egiteko toki bat izatea beharrezkoa deritzogu eta lanketa hori mugimendu feministarekin eta indarkeria matxista pairatu duten emakumeekin batera egitea.

Era berean, EH Bilduren gazteei zuzendutako programetara eta udalekuetara 100.000 euro gehiago bideratzeko emendakina onartu du Udal Gobernuak.

Bestalde, aniztasun funtzionala duten pertsonen aldeko beste emendakin bat onartzea lortu du EH Bilduk; izan ere, lau txirrindu egokitu gehiago izatea lortu du, horrela, zortzi izango dira guztira Bilboko egokitutako txirrinduak, bat barrutiko. ”Mugikortasun jasangarria hiritar guztientzat inklusiboa izan behar da eta horren alde lan egiten ari gara”, esan du EH Bilduk.

Era berean, gizarte mugimenduekin hitzarmenak sinatzeko 50.000 euro gehiago bideratzea lortu du EH Bildu beste emendakin baten bidez. EH Bilduren hitzetan, Bilboko Udalak Gizarte Mugimenduak eta oinarrizko eragile sozialak kontuan izan behar ditu elkartasuna sustatzen duten mugimenduak direlako, talde anitzak elkartzen dituztelako, aldaketa sozialaren alde.

“Udalak nazioarte mailan lan egiten duten Euskal Herrian presentzia duten mugimenduek indartzeko balio izango du partida honek, esate baterako, Vía Campesina edota Emakumeen Mundu Martxa”, azaldu du EH Bilduk.

Horrez gain, EH Bilduren emendakinen bidez, Bilboko Udalaren lankidetzako eragile zuzenaren rola indartzeko 50.000 euroko partida lortu dutela gaineratu du, “Udalak berak sustatutako lankidetza egitasmoetara bideratzeko baliabideak handituz”.

Loraldia jaialdira zuzendutako dirua handitzea ere lortu dutela esan du. “Loraldia euskal kulturaren erakusleiho garrantzitsuenetarikoa da eta partida handitzea ere lortu dugu, Bilbok ahalegin berezia egiteko jaialdi hau kultur ondarea eta sorkuntza nazioarteko mailan jartzeko”.

Bestalde, auzoetako jaietara bideratutako dirua ere handituko da EH Bilduren beste emendakin baten bidez. “Egun inbertsio gehienak hiriaren gunean egiten dira, kultur inbertsioak barne. Gure apustua Udalak kultura deszentralizatzea da eta herri kultura sustatzea, eta horretarako auzoetako ekimen kulturalek aurrekontu gehiago izan behar dute, horregatik garrantzitsua da emendakin honen onarpena”, adierazi du.

Udal aurrekontuari EH Bildu Bilbok 150 emendakin baino gehiago aurkeztu dizkiogu, 21,3 milioi euro suposatzen dutenak eta horietatik zazpi onartu ditu Udal Gobernuak. “Aurkeztutako emendakinekin gure asmoa aurrekontuak bilbotarrak zaintzeko bitartekoa izatea da, eta Bilbo etorkizunera prestatzen ari den hiri inklusibo eta jasangarria bilakatzea eta, neurri txikian bada ere, lortu dugu”, esan du EH Bilduk.

 “Pena bat da soilik zazpi emendakin onartzea, horrek argi uzten du udal gobernuaren borondate falta eta gure hiriaren ereduak eta udal gobernuarenak talka egiten dutela, baina guk lanean jarraituko dugu gure politikak martxan jartzeko, herritarrak erdigunean jarriz. EH Bilduren ekarpenek udal aurrekontua hobetu dute, baina ez aurrekontua onartzeko moduan.”.

EH Bilduk Bilbok Udal liburutegiei buruzko plan estrategikoa eskatu du mozio batean

| 2019-11-26 14:43:00

EH Bildu Bilboko udal liburutegiei buruzko plan estrategiko bat egitea eskatu du azaroaren 28ko Osoko Bilkuran eztabaidatuko den mozio batean. Plan estrategiko horren helburua da egun dauden erronka sozial eta kultural berriei modu eraginkorrean erantzuteko lan ildoak ezartzea eta liburutegiekin zerikusia duten hainbat eragileen parte hartzearekin (erabiltzaileak, adituak, herritarrak…) egitea eskatzen du EH Bildu.

Bilbok egun 15 udal liburutegiekin osatutako sarea du. EH Bilduren ustez, liburutegiak ezinbestekoak dira gure gizartean. “Aldaketa sozial eta kulturalen ondorioz, liburutegi publikoak zalantza momentu batean daude, euren zereginari eta identitateari dagokienez. Galdera da ze paper izan behar duten eta Bilboko kultura mapan zein izan behar den euren tokia”, adierazi du.

Ildo horretan, gaineratu duenez, orain arte liburuetan oinarritutako informazio eta dokumentazio guneak izan dira, baina hori gaindituta gelditu da internet eta euskarri digital berrien ondorioz. Bestalde, Bilboko gazteek  liburutegi publikoetara pilaka joaten dira ikasketa garaietan, ikasteko toki lasai eta ixil baten bila. Ikasketa gune gehiago eskatzen dituzte, baina ez dituzte liburutegiak era sortzailean erabiltzen. 

Hortaz, liburutegien ustezko hutsaltasunaren aurrean ikarak daude, zereginak galtzeko ikarak daude eta horiek ez dute laguntzen egoerari erantzun egokia ematerako orduan. Horregatik guztiagatik, EH Bilduren ustez, ezinbestekoa da udal administrazioak plangintza estrategiko bat egitea, egun dauden erronka sozial eta kultural berriei modu eraginkorrean erantzuteko  lan ildoak ezartzeko.

EH Bildu Bilbok autokonplaziente, kontinuista eta Bilboko benetako beharrei erantzuten ez dieten aurrekontuei osoko emendakina aurkeztu die

Udal Taldeak 150 emendakin baino gehiago aurkeztu ditu, 21,3 milioi euro suposatzen dutenak

| 2019-11-21 13:16:00

Udal Gobernuaren aurrekontuei osoko emendakina aurkeztu diegula jakinarazi nahi dugu. Aurrekontuaren eta adierazgarri ekonomikoen egoera ona dela ematen badu ere, PNVk eta PSEk autokonplazentziazko proposamena aurkeztu digute, eta horren ondorioz, proposamen kontinuista bat, Bilboko eta bilbotarron benetako beharrizanei erantzunik ematen ez diona, hain zuzen ere. Proposamen horrek ez ditu etorkizuneko Bilboren oinarriak ezartzen, hau da, ez du hiri justuagoa, inklusiboagoa, jasangarriagoa, feministagoa eta erabakietan parte hartzaileagoa izateko hiri baten aldeko oinarriak ezartzen. Adibide batzuk emango ditugu.

Agintaldi berriarekin, Berdintasun zinegotzigo propioa eratu da, baina  2019ko jarduerako aurrekontuak eta 2020koak konparatuz, Berdintasunari eskaintzen zaion partida oso antzekoa da. Horrek sailaren sorrera itxurakeria hutsa dela pentsatzera eramaten gaitu.

Bestalde, Auzokide Planei dagokionez, diru partida berdina eskaintzen zaie auzo guztiei, 1.700.000 €. Auzo bakoitzak beharrizan propioak eta hedadura desberdinak dituzte. Ezin da bidezkoa guztiei diru berdina eskaintzea; gure ustez, dagoeneko hiriko auzoen artean existitzen diren desberdintasunak areagotuko ditu.

Herritarren Segurtasunerako Saila da gehien hazi dena, %6,1a, hain zuen ere, baina beste behin ere, plantilla handitzeko eta ez Segurtasun Itunean adostutako hurbileko polizia ereduaren bidean pausuak emateko.

EH Bilduren ustez, hiriaren beste erronka handietako bat enplegu duina sortzea izan behar da. Honi dagokionez, Udal Gobernuak ekitaldi handien sustapenean egiten duen esfortzua azpimarratu nahiko genuke: ekitaldi hauek enplegua sortzen dutela adierazten dute behin eta berriro, baina enplegu hori kasu askotan erabat prekarioa da. BBK Live dugu horren adibide argia. PNVk eta PSEk holako ekitaldiei ia 9 milioi euro  eskaintzen dioten bitartean, iaz baino milio bat euro gehiago, Enplegu Planei 4.321.637 eskaintzen dizkiote. 4 milioi euroko desberdintasuna.

Euskalduntze-planak garrantzi handia izan behar duen hiri batean, Euskara Saileko aurrekontua mantendu egiten da; egitura mantentzeko beharrezkoa dena baino ez da igo. Udal honek euskararen erabilera sustatzeko duen sentsibilitate eskasaren adibide. Era berean, Haurtzarorako eta Gazteentzako arloari dagokionez, partidak murrizten dira, eta botiloiaren prebentziorako bezalako programak bertan behera gelditzen dira.

Harritzekoa da Udal Gobernuak pertsonak politika publikoen erdigunean jartzearen inguruan hitz egitea, eta ostean Gizarte Ekintzako aurrekontua %0,89a baino ez dela handitu egiaztatzea. Aurrekontu hori ez da nahikoa inondik inora dauden beharrei erantzuna emateko. Gaineratzekoa da, udal etxebizitzen aurrekontua %10a murriztu dela, etxebizitza-eskaria handitu egin den urte honetan, jendartearen beharrak handitzen doazen bitartean, aurrekontua ez da igotzen, murriztu baizik.

Mugikortasun eta Jasangarritasun arloari dagokionez, gabezia larriak daude hirian benetako mugikortasun jasangarria lortzeko. Horren adibide argia bizikleta bidezko mugikortasunerako azpiegituretara bideratutako partida milioi bat euro jaitsi dela.  

Arreta deitzen digun beste atal bat aurrekontu partehartzailerena da, izan ere, aurrekontu orokorra igo bada ere, iazko partida berdina mantentzen da. Aurten 325 proposamen herritar jaso dira, eta Udal Gobernuak 10 baino ez ditu aukeratu. Parte hartzearen aldeko apustua azkeneraino eraman behar da, eta benetako prozesu parte hartzaile batean, hiritarrek eurek aukeratu beharko lukete zeintzuk izango diren martxan jarriko diren proiektuak eta ez Udal Gobernuak.

150 emendakin

Egoera honi buelta emateko eta beste hiri eredu bat defendatzeko asmoz, EH Bildu Bilbotik 150 emendakin baino gehiago aurkeztu ditugu, 21,3 suposatzen dutenak. Emendakin hauekin, EH Bildutik Bilbo eta bilbotarrekin dugun konpromisoan sakondu nahi dugu. Bilbotarron bizi kalitatea hobetzeko asmoz, zentzuzkoak, konkretuak eta kuantifikatuak diren emendakinak dira aurkeztu ditugunak, eskubideak berreskuratzen jarraitzeko,  ezberdintasunekin amaitzeko eta herritarren ongizatean laguntzeko.

Adibide bezala, indarkeria matxista pairatu duten emakumeak gogoratzeko eta aitortzeko toki bat jartzeko azterketa eskatu dugu, baita indarkeria matxista jasan duten emakumeentzako asistentzia juridikoaren partida handitzea ere. Ildo beretik, indarkeriaren biktima izan direnentzako larrialdi laguntza espezifikoan inbertsioak handitzea eskatu dugu, eta aldi berean Bilbok emakumeen etxea izatea eta Udalak autodefentsa feminista ikastaroak antolatu ditzan proposatu dugu.

Hurbileko polizia izateko eskubideetan formakuntza zehatza izateko eskaera egin dugu, baita indarkeria matxista eta diskriminaziorako unitate berezi bat. Aldi berean, indarkeria matxista salatzera zein atxilotu dituzten emakumeen beharrei erantzun ahal izateko, atxilotze-gune guztien egokitzapena proposatu dugu.

Arlo sozialean, gizarte zerbitzuetan langile gehiago eskatu ditugu (gizarte langileak, etxez-etxeko laguntza, GLLen kudeaketa, gizarte inklusioa), eta ildo beretik, gazteen artean ludopatia prebenitzeko plana martxan jartzea.

Irisgarritasuna eta hiriko auzo desberdinetako udal ekipamenduak hobetzea, txirrindulariak espazio publikotik segurtasunarekin ibiltzeko azpiegiturak,  egokitutako jolas guneak eta frontoiak estaltzea dira gure beste emendakinetako batzuk. Era berean, euskara ikasteko doakotasunean pausuak ematearen alde apustu egiten dugu gure emendakinekin eta Bilbo jasangarriagoa izateko emendakinak baita ere.

Aurkeztutako emendakinekin gure asmoa aurrekontuak bilbotarrak zaintzeko bitartekoa izatea da, eta Bilbo etorkizunera prestatzen ari den hiri inklusibo eta jasangarria bilakatzea.

 

 

EH Bilduk Bilbok gogor salatu ditu Faktoria Lila eta Pikara Magazinen kontrako eraso faxistak eta langileei bere elkartasuna helarazi die

| 2019-11-13 13:59:00

EH Bildu Bilbok gogor salatu ditu Faktoria Lilak eta Pikara Magazinek berriro ere jasan dituzten eraso faxistak  eta matxistak eta bere babes eta elkartasun osoa helarazi die Irantzu Varelari eta bere lankide guztiei. “Eraso horiek adierazpen askatasunaren kontrako eta mugimendu feministaren kontrako erasoak dira eta onartezinak dira gure gizartean”, adierazi du.

Arazoaren larritasunaren aurrean, EH Bilduren esanetan, “instituzioek premiazko erantzun integrala eman behar dute, behingoz, eta hori lortzeko lanean jarraituko dugu politika feministak bultzatzen”.

“Faxismoak mugimendu feministaren kontrako gorroto diskurtsoa normalizatu nahi du, baina ez dute lortuko”, azpimarratu du.

ALBISTEAK

EH Bilduk azalpenak eskatu ditu BAM Magisteritza eskola eraisteko baimena berehala ematearen inguruan

2021-03-17 12:02:00

Abaunza, Narbaiza eta Gilen agerraldia eskatu du, hirigintzaren eremuaz gain, hezkuntzaren eta osasunaren esparruari eragiten dion gaia delako

EH Bilduk eskatu du Bilbok agroekologian eta elikadura-subiranotasunean oinarritutako elikadura-estrategia bat ezar dezala

2020-08-06 11:33:00

Lehen urrats gisa, Bilbo "Agroekologiaren aldeko Hirien Sarean" sar dadila eskatu du, tokiko elikadura-sistemak eraikitzeko