AKTUALITATEA

EH Bilduk Trantsizio Ekologikoari buruzko barne prozesua amaitu du, Idazkaritzak “oso emankorra, eraikitzailea eta itxaropentsua” bezala baloratu duena
| 2025-07-01

Trantsizio Ekologikoa eta Euskal Herriak krisi klimatikoaren aurrean artikulatu behar duen erantzuna eztabaidagai izan dira azken hilabeteetan ezker soberanistaren barne foroetan. EH Bilduren Mahai Politikoak, bere III. Kongresuaren ondoren, barne prozesu bat martxan jartzea erabaki zuen, XXI. mendeko erronka nagusietako bati aurre egiteko estrategia hausnartzeko eta adosteko helburuarekin.

Prozesu horren ezaugarri nagusia bilkideen parte-hartze aktiboa izan da, eta Mahai Politikoak Bizigintza izeneko oinarrizko ponentzian planteatutako tesia eskualdez eskualde eztabaidatzeko aukera izan dute. Gainera, eztabaidaren garrantzia eta interes handia ikusita, EH Bilduren zuzendaritzak oso positibotzat jo du prozesuan zehar beste hiru ponentzia alternatibo aurkeztu izana, eta ponentzia horien edukiak ere ezker soberanistako militantzia osoak onartutako araudiari jarraiki zabaldu eta eztabaidatu izana.

Eztabaida emankorra eta eredugarria izan da, berriro ere agerian uzten duena EH Bilduk eta bere oinarri militanteak garaiko eztabaidei ausardiaz eta Euskal Herriko lehen indar politikoa izateak dakarren arduraz aurre egiteko duten gaitasuna. Gainera, konplexurik gabeko erakunde bizi baten isla da, zalantzarik gabe etorkizuneko eztabaidetarako aurrekaria den prozesu bat osatu ondoren ikasturte politikoa ixten duena.

Hona hemen bozketa telematikoaren emaitzak:

  • BIZIGINTZA (Oinarrizko Ponentzia): 76,67 %

  • EKOHAZI (Ponentzia Alternatiboa): 8,55 %

  • ERA ALDATUZ (Ponentzia Alternatiboa): 5,08 %

  • GURE BAZTERRAK (Ponentzia Alternatiboa): 2,66 %

  • BOTO ZURIAK: 7,04 %

Uda ostean, eta irailean EH Bilduk egingo duen Konferentzia Politikoari begira, barne prozesu honetan adostutako edukiak eta estrategiak xehetasunez ezagutzen joango dira. Oinarrizko Ponentziak, dozenaka zuzenketa partzialez eta jasotako ekarpenez aberastua, eta ponentzia alternatiboetan ere inspiratua, arrakastaz jaso ditu eztabaidaren espiritua eta kalitatea.

Edonola ere, eztabaida bizi hau ez da betiko ixten. Egindako ariketa parte-hartzaileari esker, datozen urteetan ezker soberanistak garatuko dituen abiapuntua, jarrera bateratua eta ekintza ildoa finkatu daitezke. Hori guztia islatuko da EH Bilduk lurralde osoan trantsizio energetiko justu eta ordenatu baten alde bultzatzen duen lan zabalari gehituko zaizkion ekimen politiko eta instituzionaletan. Politika horiek, gainera, funtsezkoak dira ezker soberanistak Euskal Herriko lehen indar munizipalista gisa garatzen duen udal lanean.