AKTUALITATEA

| 2026-01-28 13:04:00

EH Bildu Zigoitiak Bengolarrako obrak amaitzeko datarik ez izatea deitoratu du

Otsailaren 15ean lau urte beteko dira Bengolarrako eraikina birgaitzeko obrak hasteko kontratua formalizatu zenetik, eta atzerapenek diru-laguntza arriskuan jar dezakete.

Zigoitiko EH Bildu udal taldeak berriro ere salatu ditu Bengolarrako obrek pairatzen dituzten «amaigabeko atzerapenak».

Otsailaren 15ean lau urte beteko dira Bengolarrako eraikina birgaitzeko obrak hasteko kontratua gauzatu zenetik. «Urte hasierarekin batera obren amaiera iragartzea gustatuko litzaiguke, baina hori ezinezkoa izango da, oraindik hainbat amaierako lan egiteke baitaude obra jaso ahal izateko», adierazi dute EH Bildutik. Atzerapen horren ondorioz, udala PIREP diru-laguntza jasotzeko ezarritako azken datara iristeko arriskuan dago; diru-laguntza horren zenbatekoa 1.043.577,19 eurokoa da.

Horrela, EH Bilduren arabera, gobernu taldea bi aukeren aurrean dago: «Enpresari falta diren amaierako lanak egitera behartzea —50.000 euro inguruko balioa dutenak— edo, enpresak hori onartzen ez badu, kontratuaren zati hori berriro lizitatzera ateratzea; horrek obra are gehiago atzeratuko luke eta PIREP diru-laguntza galtzea ekarriko luke».

«Tamalez, obra hau benetako putzu beltza bilakatu da; lau urteko bizitza kultural eta soziala galdu dira Zigoitian, eta ez da neurri eraginkorrik hartu egoera hori arintzeko obrak iraun duen bitartean».

Era berean, EH Bilduk salatu nahi izan du atzerapen horiek guztiak udalarentzat eta udalerriarentzat zer ondorio izaten ari diren. «Egoera honen ondorioz, Bengolarrako eraikina herritarren eskura ez egoteaz gain, izapide hauek sortzen duten lan-karga eta burokraziak udaleko langileen lana blokeatzera ere eramaten ari dira».

«Lanean jarraituko dugu eta proposamenak aurkezten, Bengolarra ahalik eta azkarren Zigoitiko bizitza sozial eta kulturalerako erreferentziazko espazio bihur dadin berriro, urte askotan izan den bezala», amaitu dute EH Bildutik.