AKTUALITATEA

EH Bilduk errefusatu egin du Julio Ruiz de Aldaren figura goraipatzeko Voxek Lizarran deitu duen hitzaldia

| 2026-02-25 11:41:00

EH Bilduren ustez, ekintza honek nabarmen urratzen ditu hiriko herritarren eskubideak eta askatasunak, eta Lizarrako memoria demokratikoarekiko errespetu falta larria da. Urraketa hori are nabarmenagoa da aurten 1936ko estatu-kolpetik 90 urte bete direnean. Gertaera horrek oinaze eta sufrimendu izugarria eragin zuen Lizarrako ehunka familiarengan, eta horren ondorioek sakonki markatu zuten gure hiriaren historia kolektiboa.

Mikel Kolomo EH Bilduko bozeramaileak adierazi duenez, horrelako ekitaldiak antolatzeak "frankismoaren gorazarrea eta bizikidetzarekin, memoria historikoarekin eta gure gizartea gidatu behar duten balio demokratikoekin bat egiteko atzerapausoa dira". Era berean, Mikel Kolomok gogorarazi duenez, "biktimen oroimena eta errepresioa jasan zutenekiko errespetua edozein ekintza publikoren erdigunean kokatu behar dira beti". Horregatik, frankismoa goraipatzeko espazio publikoak erabiltzeko eskaeraren aurrean, Udalak jarrera irmoa eta ekintza horien aurkakoa izan behar du.

Horrekin batera, Lizarrako Udalak Ruiz de Alda kalea kale-izendegitik kentzeko eskaera eta eskakizuna berretsi du EH Bilduk, memoria demokratikoaren eta konponketaren printzipioekin bat etorriz.

Azkenik, alderdi soberanistak dei egin die herritarrei probokazioetan ez erortzeko. "Bizikidetza, errespetua eta memoria historikoa dira ultraeskuindarren diskurtsoei aurre egiteko eta gizarte justuagoa, pluralagoa eta demokratikoagoa eraikitzen jarraitzeko bidea".