AKTUALITATEA

| 2024-04-29 12:16:00

Joan den urtarrilaren 31n, 2024ko lehen osoko bilkura egin zen, eta bertan, batez ere, aurtengo aurrekontuak jorratu ziren. Jakina da Udalaren egoera ekonomikoak, azken urteotan hobera egin duen arren, ez duela uzten urte berean inbertsio gehiegi egiten. Horregatik, aurrekontuek ia ez dute inbertsio berriak egiteko ahalmenik, eta daudenak aurreko legegintzaldiaren jarraipena dira. Iaz hasi ziren proiektuak, eta aurten jarraipena dute.

Osoko bilkuraren hasieran, EH Bilduk gobernu taldeari gogorarazi zion aurrekontuei buruz aurkeztutako dokumentazioa osatu gabea zela eta ez zuela Foru Arauan ezarritakoa betetzen. Hala eta guztiz ere, EH Bilduk ez zuen nahi izan hori oztopo izatea aurrekontuak onartzeko, udalerriaren funtzionamendurako ezinbestekoak baitira.

Elkarlanean aritzeko eta ekarpenak egiteko asmoz, EH Bilduk aurrekontuei 8 zuzenketa aurkeztu zizkien, behar bezala aztertuak, justifikatuak, aurreko legealdietako esperientzian oinarrituak eta guztiz beharrezkoak, hala nola: Gazteriaren Kontseilua sortzea; bideak zolatzea (Ukerriako pista eta Zedelika eta Erriparen arteko aldapa); tokiko merkataritzak bere erakusleihoetan inbertsioak egiteko laguntzak; lorategietarako partida handitzea, eta Museorako mantenimendu-partida handitzea leihoak konpontzeko; udal-sukaldaritzatik etxez etxeko janari-sistema bat hasteko partida bat bideratzea, Urduñako Elikadura Estrategiaren barruan jada jasota dagoen ekintza bultzatzeko; elikadurarako eskubidea, eta azkenik, Gama errepidea oinezkoentzako bihurtzea. 

Proposamen horiek oso ehuneko txikia ziren aurrekontu osoarekiko. Hala ere, EAJk kontra bozkatu zuen. Denak!

EAJk herritarrei azaldu beharko die zergatik baztertu dituen.