Gipuzkoa

Mendi eta baso politika iraunkorra orain

Mirene Begiristainen, Gipuzkoako EH Bilduko batzarkidearen iritzi artikulua

| 2020-06-05 11:13:00

Azken hilabete hauetako krisialdiak nabariagoa egin du ezinbestean gure ingurunearekin dugun harremana eredu orekatu eta iraunkor batean oinarritu behar dela lehenbailehen.



Harreman orekatu horrek bere baitan hartzen du gure mendi eta basoekin dugun harremana, ezinbestekoa dugularik baso naturalak birsortzea atmosferako CO2 ezabatzeko, klima aldaketari aurre egiteko eta biodibertsitatearen galera geldiarazteko.



Nazioarteko ebidentzia zientifikoek aspaldidanik azpimarratu dute eukaliptoa espezie exotiko eta inbaditzailea dela eta Kantauriko mendietan edo eremu konfinatuetatik kanpo erabiltzeak mehatxu asko dakarrela. Izan ere, biodibertsitatean eta paisaian duen eraginaz gain, eragin zuzena du ubide eta ibaiertzetako landarediaren kontserbazioan –hil ala biziko mehatxupean dauden espezientzat–, uraren kalitatean –eta beraz gure osasunean–, lurzoruaren kontserbazioan, uholde arriskuaren kudeaketan, eta abar. Gainera, basoak soiltzeak, magalak pistaz josteak, lur mugimenduak eragiteak eta lurzorua trinkotzeak kalte konponezinak dakartzate. Kontuan izan behar dugu ere, aldaketa klimatikoaren ondorioak are larriagoak izango direla hazkuntza azkarreko landaketak nagusitzen diren heinean.



Azken urteetako mendi eta basoen kudeaketa eredua behin baino gehiagotan auzitan jarri izan da baina bere kalteak handituz doaz azken hamarkadetan. Azken urtean ere, saiakera bat baino gehiago egin ditugu EH Bildutik bai Gipuzkoako Aldundiarekin eta Gipuzkoako Batzar Nagusietan ekimen desberdinen bitartez mendi eta basoen inguruko eztabaida zabaldu eta etorkizuneko eredu baten proposamena lantzeko. Baina, beste behin, hainbatetan aipatzen den lankidetza bidezko gobernantza eza nabarmendu da.



Gipuzkoako Foru Aldundiak mendi eta baso politikan eskumen garrantzitsuak ditu, aurrekontuan ere bideratzen diren dirulaguntzek erakusten duten lez. Beraz, ardura handiak nabarmenduta, gure basoak berreskuratzeko eta klima babesteko, eta, gipuzkoar guztion mendi eta baso politika iraunkor baterako, baso ondarea zaindu eta handitzearen aldeko estrategia lehenestea premiazkoa da. Gaur egungo eredutik, hobekuntza marjina handia dago, basoaren kudeaketarako ikuspegi integrala barneratuz eta horretarako beharrezkoak diren bitartekoak jarriz.



Hori guztia kontuan izanik, eta gaur, ekainak 5, ostirala, Nazioarteko Ingurumen Eguna dela medio, eukaliptoaren gaiari espezifikoki eta gure mendi eta basoen kontserbazioren ereduari orokorrean lehenbailehen eusteko dugun ardura eta urgentzia azpimarratu nahi dugu. Zentzu horretan, deia egin nahi dugu politika publikoetan gaurtik bertatik epe luzeko iraunkortasunaren erronkarekin koherentzian jarduteko, hurrengo legealdian mendi-basoen zaintza jasangarrirako legea helburu erreal bihurtzeko eta lurraldez lurralde ditugun eskumenak horretarako egokitzeko. EH Bilduren konpromisoa azpimarratu nahi dugu bide hori jorratzeko, tokian tokikotik hasita eta intzidentzia politikoa dugun esparru guztietan.

Erraustegiaren inguruko errekako isurketak argitzeko, Asensio Ingurumen diputatuaren agerraldia eskatuko du EH Bilduk

| 2020-06-05 07:58:00

Pasa den maiatzaren 9an Zubietako erraustegitik gertu pasatzen den Arkaitzerreka ibaian ehundaka arrain eta aingira hilik agertu ziren. Fiskaltza ingurumenaren eta, beraz, osasunaren kontrako isuri hau ikertzen ari da, baina Gipuzkoako Hondakinen Konsortzioko arduradunek ere azalpenak eman behar dituztela argi ikusten du EH Bilduk. Horregatik, Gipuzkoako Batzar Nagusietan azalpen guztiak eman ditzan, Jose Ignacio Asensio Ingurumen diputatua eta GHKko presidentearen agerraldia eskatuko dugu.


Kezkagarria da oraindik frogetan dagoen erraustegiak dagoeneko bere lehen istripu larria izatea. Arkaitzerreka ibaiaren inguruan ez dago beste industriarik ezta kutsakorra izan daitekeen beste aktibitaterik. Hasiera batean, Gipuzkoako Hondakinen Kontsorzioak ibaiaren bizitza hiltzea erraustegiko isuri batek probokatu zuela ezeztatu bazuen ere, ondoren, amoniakoaren isuria erraustegia kudeatzen duen enpresaren ardura zela esan zuen.

ALBISTEAK

Maddalen Iriartek autokritika eskatu dio Urkulluri Osakidetzako langileen osasuna arriskuan jartzeagatik

2020-07-05 21:27:00

Lehendakarigaiak oso larritzat jo du Justizia Auzitegi Nagusiaren epaia, osasun larrialdian Osakidetzak bertako langileak arrisku larrian ipini zituela egiaztatu duelako. Hori urteetako murrizketen ondorio izan dela esan du Iriartek, eta salatu du Urkulluk are murrizketa gehiago egin nahi dituela hala eta guztiz ere.

Maddalen Iriarte: “Gure herria zutik jarri nahi duela dio Urkulluk, zutik Euskadin, belauniko Madrilen”

2020-06-30 21:36:00

Gipuzkoako ekitaldi nagusia Donostian izan da gaur, Arkaitz Rodriguez eta Mertxe Aizpuruarekin.

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

2020-06-30 13:32:00

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

2020-06-29 19:23:00

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.