Gipuzkoa

Gipuzkoako Aldundiaren aurrekontu proposamenak gipuzkoarren aberastasunaren banaketa desorekatuan sakondu eta ezberdintasunak areagotuko ditu

| 2019-10-30 09:54:00

• Aurrekontu osoa %4,53 igo den bitartean, Gizarte Zerbitzuetara bideratutako partida %2,44 baino ez da igo. 
• Ekonomiaren bilakaera positiboa den testuinguru honetan, gehiago dutenek langileek baino ahalegin fiskal baxuagoa egiten dute.
 • Datozen asteetarako, iaz ez bezala, zuzenketak entzuteko eta aztertzeko jarrera irekia eskatzen die EH Bilduk EAJ eta PSEri.

 

Gipuzkoako Foru Aldundiak aurkeztutako aurrekontu proposamenari lehen irakurketa eginda, nabarmentzekoa da aurrekontua hazten den bitartean, behar nagusiei bideratutako partidak ez direla neurri berdinean hazi eta dirua biltzeko sistemak gipuzkoarren artean ezberdintasunak gero eta handiagoak izatea eragiten duela.

 

Hasteko, dirua biltzeko sistemak kezkatzen gaitu; esfortzu fiskala langileriaren bizkar jartzen baita eta ez da jasotzen jaso zitekeen guztia. Diru bilketari dagokionez, bi datu zehatz azpimarratzeko. Batetik, Sozietateen eta Ondarearen gaineko zergen bitartez jasotakoaren pisu portzentuala gero eta baxuagoa da. Aurten Sozietate zergaren bidez diru bilketa osoaren %6,38 bakarrik bildu da; iaz, %6,66. Azken urteotako joerak argi erakusten du Sozietate zergaren bidez jasotzen denaren ekarpena gero eta txikiagoa dela. Ondarearen gaineko zerga bidez, berriz, %1,3a soilik bildu da. Bestetik, bildutakoaren portzentaia nagusia langileek ordaintzen dugunetik jasotzen da. PFEZ aren bidez jasotzen da biltzen den diru guztiaren %37,66 eta BEZ-aren bidez %39,27; bi horiek gehituta %76,93.

 

Argi ikusten da zerga bidez biltzen den diruaren lautik hiru soldatapeko herritarren gain jartzen dutela, eta enpresa irabaziak eta aberastasun gehien dituztenek egiten duten ekarpenak gero eta pisu gutxiago duela. Horrek erakusten du ekonomiaren bilakaera positiboa den testuinguru honetan, gehiago dutenek langileek baino ahalegin fiskal baxuagoa egiten dutela.

 

Gastuari dagokionez, gizarte politiketara bideratzen den gastua aurrekontu osoaren %46,54koa da 2020an (Adinberri eta Elkarrekin kontuan hartuta). 2019an puntu bat handiagoa zen, eta oso urruti daude biak 2015an bideratu zen batezbestekotik (%49,39). Iaztik hona politika sozialek izandako igoera aurrekontu guztiaren igoeraren batezbestekoa baino baxuagoa izango da. Zehazki, aurrekontu orokorra %4,53 igo den bitartean, gizarte zerbitzuen partida %2,44 baino ez.

 

Berdintasunaren alorrean, oraindik ere bete gabe jarraitzen du aho batez onartutako 2015eko Emakumeen eta gizonen berdintasunerako foru arauak. 2019rako 8 milioi inguru aurreikusten ziren, proposamen honek 2.228.000 euro jasotzen ditu, foru arauak exijitzen duenetik oso urruti. Iaztik hona %0,8a bakarrik igotzea proposatzen du.

 

Larrialdi klimatikoari dagokionez, erronka horri aurre egiteko jartzen diren baliabideak, urriak eta sinbolikoak baino ez dira. Ingurumen departamentuaren pisua, bigarren baxuena da, Diputatu Nagusiaren departamentuaren ondoren. 26.955.180 euro jasotzen ditu proposamenak, hau da, aurrekontu osoaren %3,1 besterik ez dute bideratu nahi ingurumen politiketara.

 

Gauzak horrela, EH Bilduk garbi adierazi du aurrekontu horiek ez dietela erantzuten Gipuzkoak dituen erronka nagusiei eta denbora ertain nahiz luzean aurre egin beharko diegun krisi ezberdinei.

Datozen asteetan aurrekontuak sakonago aztertzeko aukera izango dugu eta egin beharreko zuzenketak egingo ditugu. Iaz ez bezala, zuzenketak entzuteko eta aztertzeko jarrera eskatzen diegu bi alderdi gobernukideei. 
 

Aizpurua: “Subiranisten elkarlanak eta ordezkaritza indartsu batek ekidin dezake PSOEk eskuinari besarkatuta bukatzea”

Gipuzkoako ezker subiranista Madrilen ordezkatzea nahi dugun pertsonak elkartu gara gaur hemen. Gure jardun eta ibilbide profesionalean eta politikoan zintzotasunez egin dugu lan, bakoitzak bere eremuan. Emandako hitza betetzen dugula erakutsi dugu, fidagarriak garela. Esandakoa betetzen dugu eta atsedenik hartu gabe aritzen gara lanean, ezarritako helburuak betetzeko.

| 2019-10-28 17:34:00

 

Euskal Herriko gizarteari, eta batez ere Gipuzkoako gizarteari, gaur helerazi nahi diogu inoiz baino garrantzitsuagoa dela ezker subiranistak ahots propioa eta ordezkaritza indartsua izatea Madrilen, Espainiako Estatuak eta bere botere faktikoek abian duten inboluzio antidemokratikoari aurre egin ahal izateko. Hutsik egingo ez duen ahots soberanista behar dugu Madrilen, fidagarria, euskal jendartearen interesak alderdi interesen aurretik jarriko dituena. Espainiako Estatuko gainontzeko indar subiranistekin elkarlanean aritzeko gai izango dena. EH Bilduren eta hemen ditugun pertsonen ahotsa da hori.

 

Espainiako Estatua egiten ari den injustizien lekuko izan gara asteburu luze honetan, bai Euskal Herrian eta bai Katalunian. Ehundaka mila pertsona kalera irtetea eta horrek daukan indarraren lekuko izan nintzen larunbatean, espetxeratuta dauden ordezkari independentistak berehala aske uzteko eta autodeterminazio eskubide demokratikoa aldarrikatzeko Bartzelonan egin zen manifestazio erraldoian. Bertan egon ziren Kataluniako indar subiranista guztietako ordezkariak. Batasun eta kemen horrek emaitzak ekarriko ditu. Eta zer esan larunbatean Iruñean ikusitakoaz, Altsasuko gazteei eta haien familiei elkartasuna eta babesa agertzeko mobilizazioan. Hamarnaka mila pertsona elkar hartuta, Espainiako Estatuaren bidegabekeriak eta bere izaera atzerakoia salatuz. Eredugarriak izan ziren bi mobilizazioak, txanpon berarekin bi aldeak islatzen dituztenak.

 

Bi mobilizazio erraldoi horien aurretik, aurrekaririk gabeko ekimen baten egoteko aukera izan nuen, joan den ostiralean, Bartzelonan: Espainiako Estatuko indar subiranistetako ordezkariak elkar hartuta, gutxieneko programa bat izenpetzen eta beren herrien autodeterminazio eskubideareb defentsan elkarlanean aritzeko konpromiso publikoa hartzen; azken baten, jendarte eta herri erabat demokratikoak eraikitzeko helburua izango duen bidea bultzatzeko konpromisoa hartuaz. Ohore izan zen ekitaldi horretan egotea. Eta ohorea izango da elkarlan horrek emango dituen emaitza berrien parte izatea.

 

Hori guztia gertatzen zen bitartean, duela bi urteko urriaren 3an Borboiak egindako diskurtsoarekin abian jarri zen kontraerreformaren beso politikoa ordezkatzen duten alderdi politikoak Bartzelonako kaleetara irten ziren atzo. PSOE, PP, Ciudadanos, eta baita Vox, eskutik helduta eta Espainiako banderekin Bartzelonako kaleetan, Espainiako batasunaren defentsan. Bai, duela hilabete batzuk gobernu “aurrerakoiaren” berme eta balio demokratikoen defendatzaile gisa aurkezten zitzaigun PSOE bera Bartzelonako kaleetan izan zen atzo Europako eskuin atzerakoienarekin, eskuetan Espainiako bandera zeukala.

 

PSOEk bi aukera izango ditu azaroaren 10eko hauteskundeen ostean: Espainiako eskuinari besarkatu, Espainiako batasun hautsiezina bermatzea helburu bakar daukan inboluzio antidemokratikoan sakontzeko; edo, Estatu osoko indar subiranistekin batera aritu, nazio aniztasuna eta herrien autodeterminazio eskubidea errespetatu, demokraziarako bidea eginez.

 

Euskal gizarteak oso argi izan behar du gauza bat: Euskal Herriko, Kataluniako eta Galiziako subiranisten ordezkaritza indartsu batek bakarrik ekidingo du PSOEk Espainiako eskuinari besarkatuta bukatzea. Ekuazio oso sinplea eta erraza da: PSOEren asmoak aldatzeko ordezkaritza indartsua lortzen dugu subiranistok edo Espainiako Estatuak kontraerreforma antidemokratikoan sakontzeko bidean aurrera egingo du, horrek herritarren ongizate politiko, ekonomiko eta sozialean dituen ondorio kaltegarriekin.

ALBISTEAK

Xua bere gurasoekin etxera ekartzeko eskatu dute Gipuzkoako Batzar Nagusiek

2020-01-08 16:01:00

Gipuzkoako Batzar Nagusietako 4 alderdik (EAJ, Elkarrekin Gipuzkoa, PSE eta EH Bilduk) Xua Etxera Gurasoekin plataformak egindako eskaria aurkeztu eta onartu dute.

Gipuzkoako aurrekontuek uko egin diete zaintza duintzeari

2019-12-20 13:43:00

Gaur Batzar Nagusietan onartu diren aurrekontuei ezezkoa adierazi die EH Bilduk. Juan Karlos Izagirrek adierazi du ezin dela ulertu gizarte politiketan dauden beharrei ez erantzutea eta bitartean justifikatu gabeko gastuak proposatzea.