Legebiltzarra

EH Bilduk matrikulazio prozesuan segregazioa ekiditeko irizpideak aplikatzeko eskatu dio Hezkuntza Sailari

Rebeka Uberak proposamena aurkeztu du Legebiltzarrean araudia zorrotz bete dadin eta, hala, ikasle guztien aukera berdintasuna berma dadin.

| 2020-01-22 17:45:00

Hezkuntza Sailak 2020-2021 ikasturterako matrikulazio prozesua aurkeztu du gaur eta, horren haritik, EH Bilduk legez besteko proposamena erroldatu du Legebiltzarrean prozesu horren baitan ikasle guztien aukera berdintasuna bermatzeko. Proposamenaren helburua, Rebeka Uberak azaldu duenez, indarrean dagoen matrikulazio araudia zorrotz betetzea da, eskola segregazioa saihesteko. Izan ere, “matrikulazio prozesua oinarri nagusietakoa da segregazioari aurre egiteko eta herritarren arteko mailaketa hezkuntza esparruan murrizten joateko, gizarte kohesioa eta inklusioa helburu izanda”.
Helburu horiekin, hain justu, EH Bilduk matrikulazioari buruzko dekretua aldatzea proposatu du behin baino gehiagotan eta orain, aldatu bitartean, “indarrean den araudia behar bezala betetzeko eskatu behar zaio Jaurlaritzari, maiz ez dituelako segregazioari oinarritik heltzeko hartu beharreko neurriak hartzen”. Hori dela eta, Uberak aurkeztutako proposamenak Hezkuntza Sailari eskatzen dio berma dezala matrikulazio prozesuan aplikatu beharreko irizpideek ez dutela familia eta ikasleen aukera berdintasuna urratu, betiere segregazioa ekiditeko helburuarekin.
 

EH Bilduk Mina del Morro Santutxuko ikastetxearen afera Legebiltzarrera ekarriko du

Rebeka Uberak ekimen sorta aurkeztu du ikastetxeak irekita jarraituko duela bermatzeko asmoz. Hezkuntza sailburuak 3 urteko gela ixtearen azken helburua eskola bera ixtea den argitu beharko du osoko bilkuran.

| 2020-01-21 12:18:00

Legebiltzarrak Mina del Morro-Larreagaburu Santutxuko ikastetxe publikoaren etorkizuna aztertuko du EH Bilduren ekimenez, Rebeka Uberak ekimen sorta aurkeztu baitu Hezkuntza Sailaren asmoak salatzeko eta atzera egin dezala eskatzeko. Izan ere, Cristina Uriarte buru duen Sailak 2 urteko gela itxi zuen iaz aipatutako ikastetxean eta aurten jokaldia errepikatu nahi du 3 urteko gelarekin, bertako eskola komunitatearen iritzia eskatu eta aintzat hartu gabe gainera, eta horrek guztiak, EH Bilduren iritziz, agerian uzten du Jaurlaritzaren azken helburua eskola bera ixtea dela. Horixe bera argitu beharko du Uriarte sailburuak Kontroleko Osoko Bilkuran, Uberak haren asmoen inguruko xehetasunak eskatu baitizkio. Halaber, idatziz erantzuteko galdera sorta bideratu dio jada Hezkuntza Sailaren planak ahalik eta hobekien azal ditzan, eta Mina del Morro-Larreagaburu eskolako hezkuntza-komunitatearen ordezkariak Legebiltzarrean ager daitezela ere galdegin du, Jaurlaritzaren planei buruz duten iritziari bozgorailu bat emateko. Bilboko EH Bildu ere lanean ari da Udaletxean eta auzoan bertan arazoari irtenbide ezberdinak bilatu nahian.

Uberak azpimarratu duenez, “Bilboko Santutxu auzoak kalitatezko hezkuntza eskaintza euskaldun, inklusibo, laiko eta publikoa behar du, eta hori, gaur egun, Mina del Morro-Larreagaburu, Luis Briñas eta Karmelo ikastolaren eskaintzan inbertituz gauzatu daiteke soilik”. Bada, “behar-beharrezkoa da Mina del Morro-Larreagaburu eskolaren hezkuntza proiektua indartzeko baliabideak handitzea eta instituzioen zein hezkuntza komunitatearen inplikazioa bermatzea, bai eta Lakuak auzoan bultzatu nahi duen masifikazioa, homogeneizazioa eta makro-zentroak ekiditea ere”.

Horren haritik, EH Bilduko legebiltzarkideak 2 eta 3 urteko haurren matrikulazioa berriz irekitzeko eskatu dio Hezkuntza Sailari eta, hala, bat egin du Mina del Morro-Larreagaburu eskolak berak, Luis Briñasek eta Karmelo ikastolak abiatu duten aldarrikapen-dinamikarekin, “Santutxun kalitatezko hezkuntza euskaldun, inklusibo, laiko, hezkidetzaile eta publikoaren alde”. Gaur arratsaldean bertan EH Bilduk parte hartuko du deitu duten mobilizazioan.

ALBISTEAK

Larria eta onartezina da EITB EAJ eta Confebasken interes partikularren zerbitzura jartzea

2020-03-31 19:15:00

Hedabide publikoek beti bermatu behar dituzten neutraltasun ideologikoa eta objektibotasuna urratzea egotzi die EH Bilduk EITBko arduradunei. EAJri ez zaio EITBren irudia kaltetzea axola, haren instrumentalizazioari etekin politikoa ateratzen badio.

Larrialdi egoera honetan Legebiltzarrak bere izaera berreskuratu behar du proposamenak bideratu eta Jaurlaritzaren gaineko kontrola bermatzeko

2020-03-27 19:19:00

EH Bilduk salatu duenez, “EAJ eta PSE demokrazia batean ezinbestekoa den kontrol parlamentarioa ekidin nahian dabiltza oposizioaren ekimen politikoa galarazteko eta Urkulluren Gobernua blindatzeko”.

EH Bilduk ohartarazi du Zaldibarren kutsatzaile arriskutsuak isurtzen ari direla uretara, urtean batez beste onartutakoa baino askoz gehiago

2020-02-26 15:07:00

Uraren Euskal Agentziak eginiko analisiek erakusten dute beruna, kadmioa eta zianuroa bezalako gai toxikoen isurketen parametroak benetan txarrak direla. “Datuak ikusita, lehentasunezkoa da Deba ibaiaren arro osoan neurriak hartzea kutsadura saihesteko”, azpimarratu du Mikel Oterok.

EAJk nahita blokeatu du euskara doan ikasteko legea eta orain propaganda eta elektoralismoari ekin dio

2020-02-12 14:00:00

“Guztiz lotsagarria da EAJ ateratzea euskara doan ikasteko eskubidearen berme gisa, 2018az geroztik EH Bilduren lege proposamena etengabe oztopatu ostean. EAJk ez ditu helburu ez euskara ez gizartea, gainetik bere interes alderdikoiak jartzen ditu beti”.