Legebiltzarra

Sekulako axolagabekeria da Larrialdietako buruari espedientea ere ez irekitzea konfinamendua apurtzeagatik

Castro Urdialeseko udaltzaingoak isuna ipini dio konfinamendua ez errespetatzeagatik. EH Bilduren iritziz, “kasua larria da eta Osasun Sailak espedientea ireki behar dio berehala, horren emaitzaren araberako neurriak hartzeko”.

| 2020-05-05 16:13:00

Ulertezina da, sekulako arduragabekeria, Osasun Sailak neurri bat bera ere hartu ez izana jakin duenean Jon Sanchez Ibarluzea Osakidetzako Larrialdietako buruak alarma egoeran ezarritako konfinamendua apurtu zuela eta Castro Urdialeseko udaltzaingoak isuna jarri zuela horregatik”. Rebeka Ubera EH Bilduko legebiltzarkidearen iritziz, Jaurlaritzak espedientea ireki behar dio ezinbestean Sanchez Ibarluzeari. “Larria eta onartezina da horrelako kargu batek konfinatzeko agindua ez errespetatzea, arduradun politikoek, are gehiago osasun arloko arduradunek, eredugarriak izan behar dutelako salbuespen egoera honetan”. Izan ere, alarma egoeran debekaturik badago ere, Osakidetzako Larrialdietako zuzendaria Castro Urdialeseko bigarren etxebizitzara joan zen apirilaren 20an, eta biharamunean bertako udaltzaingoak isuna ipini zion konfinamendua apurtzeagatik.

Nekane Murga Osasun sailburuak hala izan zela eta bera jakinaren gainean zegoela aitortu behar izan du gaur goizean, baina, hala eta guztiz ere, azaldu du bere departamentuak ez duela inolako neurririk hartu, ez eta Sanchez Ibarluzeari espedientea ireki ere. Uberak “axolagabekeriaz eta utzikeriaz aritzea” egotzi dio sailburuari horregatik, “jazotarikoa ezagutu bezain laster espedientea ireki eta Larrialdietako buruari azalpenak eskatu izan behar zizkiolako”. EH Bilduko legebiltzarkideak horixe egiteko eskatu dio beraz, “espedientea berehala irekitzeko eta neurriak lehenbailehen hartzeko, espediente horren emaitzaren araberakoak, aldez aurretik bat bera ere baztertu gabe”.

Uberak gogora ekarri du pasa den astean San Eloy Ospitaleko gerentearen kasua ere argitara atera zela, alarma egoeran kirofanoak kasu arinentzat itxita egon arren, berari faborezko tratua eman eta ebakuntza egin ziotelako. “Gaur Larrialdietako buruaren kasua ezagutu dugu, baina legea eta arauak berdinak dira guztiontzat eta ez dago goi karguei tratu berezi bat ematea; alderantziz, haiei eredu ematea tokatzen zaie”.

Nafarroan bezala, Lakuak ere 2.200 euroko dirulaguntza eman behar die itxi behar izan duten autonomoei

EH Bilduk ezinbestekotzat jo du autonomoak babestea eta, Nafarroako ereduari jarraituz, proposamena eramango du Legebiltzarrera. Egoera normalizatu arte itxita jarraitzeko aukera izan behar dute autonomoek, laguntzak galdu gabe. “Urkulluk mugitzen hasi behar du, orain arte autonomoak abandonaturik eduki dituelako”.

| 2020-05-05 16:11:00

EH Bilduk autonomoei laguntzeko proposamen zehatza eramango du Legebiltzarreko Diputazio Iraunkorrera, Iker Casanovak iragarri duenez, pandemiaren ondorioz sektorearen egoera kritikoa dela iritzita. “Milaka lanpostu kolokan daude eta arazoa areagotzen ari da Jaurlaritzaren gaitasun politiko faltagatik, Jaurlaritza ez delako neurriak hartzeko gai izaten ari. Urkulluk autonomoak abandonatu ditu. 50 egun pasa dira alarma egoera ezarri zenetik eta milaka langile autonomo lanik eta diru-sarrerarik gabe geratu dira merkataritzan, ostalaritan eta turismoan, eta sekulako porrota izan ziren 3 milioi eskas haietako laguntzetatik harago, Lakuako Gobernua oraindik ez da gai izan neurri zehatz bat ere aktibatzeko sektoreari laguntzeko”.

Laguntza eraginkorrak bideratu ezean milaka lanpostu eta negozio desagertuko direla ohartarazi du Casanovak eta, hori hala izan ez dadin, proposamen zehatza egin du, “Nafarroan indarrean sartu diren autonomoentzako dirulaguntzak aktibatzea”, hain zuzen. Halaxe proposatuko du EH Bilduk Gasteizko Legebiltzarrean, Jaurlaritzak 2.200 euroko laguntza eman diezaien jarduera eten behar izan duten autonomoei. Casanovak zehaztu duenez, laguntza 700 eurokoa litzateke osasun krisiaren ondorioz fakturazioan gutxienez %30eko murrizketa pairatu duten autonomoen kasuan. “Nafarroan hala egin dute, EH Bildurekin adostuta, eta hango Gobernuan dauden alderdiak dira, hain justu, Lakuan daudenak; beraz, han egin dutena hemen ere egiteko borondate politikoa baino ez da behar”.

EH Bilduren proposamena harago doa, dena den. Legez berriro irekitzeko baimena izan arren, negozio askok une hori ekonomikoki bideragarriak izan arte atzeratu beharko dutela jabeturik, Casanovak autonomoentzako babes-neurriak luzatzeko eskatu du, hala nola kuotak etetea, atzerapenak eta hobariak, normaltasunera itzuli bitartean. “Laguntzak moztu gabe, autonomoei itxita jarraitzeko aukera eman behar zaie, egoera guztiz normalizatu bitartean”.

Halaber, EH Bilduk beharrezkotzat jo du Jaurlaritzak Lan Autonomoaren Euskal Mahaia sortzea, instituzioekin eta sektoreko eragileekin batera lan autonomoa estrategikoki babesteko plan integral bat diseinatzeko.

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.