Legebiltzarra

EH Bilduren ekimenez, Legebiltzarrak ‘cohousing’ etxebizitza eredu kolaboratiboa sustatzeko eskatu dio Lakuari

Maider Otamendiren ustez, “etxebizitza eredu berriek erantzun alternatiboa eskaini diezaiekete merkatu librean erostea edo alokatzea ia ezinezko duten kolektibo askori”.

| 2019-12-05 17:55:00

EH Bilduren proposamen bati jarraituz, Legebiltzarrak Jaurlaritzari eskatu dio gaur “jabetza kolektiboan oinarritzen diren erabilera-lagapeneko kooperatibak sustatzeko”, etxebizitza arloan dagoen eskariaren beharretara egokitzen diren eredu berriak bilatu eta ezartze aldera. Hala, Parlamentuak “elkarlanean oinarritutako etxebizitza-iniziatibak (etxebizitza kolaboratiboak) garatu ahal izateko marko legal bat” definitzera dei egin dio, bai eta ‘cohousing’ eredua sustatzeko ere, “elkarlanean oinarritzen den bizitza-proiektu berritzaile gisa”.  Besteak beste, gaur onartutako ekimenaren helburua “udalerrietatik egin nahi diren etxebizitza-eredu berriak sustatzen laguntze da, bereziki adinekoentzako eta gazteentzako etxebizitza kolaboratiboko edo etxebizitza partekatuko ekimenetan”.
Proposamenaren egile Maider Otamendi EH Bilduko legebiltzarkideak azaldu duenez, “merkatu librean etxebizitza bat erostea edo alokatzea ezinezkoa da kolektibo askorentzat, eta babes publikoko alokairuan eskaintza hain da urria ezinezkoa baita dagoen eskariari egoki erantzutea. Hala, jende askorentzat egiturazko arazoa da etxebizitzarena eta, soluziorik eraginkorrena alokairuko etxebizitza parke publikoa handitzea bada ere, bistakoa da politika instituzionalak oso motz geratzen direla”.
Bada, Otamendiren iritziz, “komunitatean eta elkarlanen oinarritzen diren etxebizitza eta bizikidetza eredu berriak sustatzea beharrezkoa da, eredu berritzaile horiek jendartean dauden hainbat beharri beste era batean erantzun ahal dietelako; egoera prekarizatuan bizi diren gazteei emantzipaziorako aukera ahalbidetuz, edo gero eta zaharragoa den jendartean zaintza krisiari aurre egiteko beste bizimodu alternatibo bat eskainiz, adibidez”.

EH Bilduk proposatu eta Legebiltzarrak Skolae hezkidetza programaren balioa aldarrikatu du

Parlamentuak Nafarroako ikastetxeetan garatzen ari den eta Unescok saritu duen programa horren kontrako sektore atzerakoienen gurutzada salatu du.

| 2019-12-02 13:53:00

EH Bilduren legez besteko proposamena aintzat hartuta, Gasteizko Legebiltzarrak pasa den legealdian Nafarroako Gobernuak sustatutako Skolae hezkidetza programaren balioak aldarrikatu ditu gaur, bai eta babesa adierazi ere hezkuntza proiektu horren egileei, Nafarroako sektore atzerakoienek epaitegietara eraman baitituzte. Horren ildotik, Skolae-ren kontrako “hainbat sektoreren gurutzada” salatu eta programa horren judizializazioa baztertu du. Talde parlamentarioen adostasuna ia erabatekoa izan da, PP bakarrik geratu baita akordiotik at.
Oihana Etxebarrieta EH Bilduko legebiltzarkideak pozik hartu du lortutako akordioa, baina deitoratu du, hala ere, Legebiltzarra harago joan ez izana. Izan ere, koalizio subiranistaren jatorrizko ekimenak Araba, Bizkai eta Gipuzkoan ere “osatu eta garatu beharreko hezkidetza programetan Skolae-ren edukiak zein metodologiak erreferentzia eta eredu gisa hartzea” proposatzen zuen, baina EAJ eta PSEk uko egin diote Hezkuntza Sailari norabide horretan lan egiteko eskatzeari.
Akordioa ere Lanbide Heziketaren arloan
Legebiltzarrak, EH Bilduren ekimenez berriro ere, TKgune programa arautzeko eskatu dio Jaurlaritzari, Lanbide Heziketari buruzko Legeak xedatutakoaren arabera, Lanbide Heziketako ikastetxeen eta enpresen arteko elkarlana garatze aldera, enpresa txiki eta ertainak lehenetsita. Rebeka Uberak azaldu duenez, “TKgune programa arautzea beharrezkoa zen orain arte Hezkuntza Sailak ikastetxe eta enpresen arteko elkarlana zerbitzuen prestazio gisa ulertu duelako eta, hala, elkarlan horren izaera desitxuratu duelako, Lanbide Heziketa maiz lan esku merkearen sustatzaile bilakatu baitu”.
Aho batez onartutako erdibideko proposamenaren arabera, Lakuak “TKgune programa garatzeko eta finantzatzeko eredua berraztertu” beharko du, “ikastetxeek egokitasunez uztartu dezaten ikasleen prestakuntza eta enpresekiko elkarlana, berau ez dadin lehia desleiala izan ikerketa eta garapen teknologikora dedikatzen diren inguruko enpresentzat”.
 

ALBISTEAK

EH Bilduk Diputazio Iraunkorra deitzea galdegin du Mozal Digitalaren aurka jotzeko epeak premiaz aritzea eskatzen duelako

2020-01-10 14:31:00

Josu Estarronak gogorarazi du otsailaren 5ean amaituko dela epea Lakuak Gobernu espainolaren lege-dekretuaren aurkako bide legala jorratzeko. “Ezinbestekoa da, beraz, Legebiltzarra premiaz biltzea, dekretu horrek era onartezinean jotzen duelako funtsezko askatasun eta eskubideen kontra”.

EH Bilduk adituen agerraldiak publikoak izan daitezela eskatu du Autogobernuari buruzko Ponentzian

2020-01-10 14:29:00

Jokoan dagoena Araba, Bizkai eta Gipuzkoako herritar guztien etorkizuna da eta horrek gardentasuna eskatzen du. Ez du zentzurik Estatus Politiko Berriaren lanketan aritu diren adituek Legebiltzarrean eman beharreko azalpenak ia sekretuak izatea.

EAJ eta PSEk uko egin diote ustelkeriaren kontrako neurriak Diputazio Iraunkorrean eztabaidatzeari premia ez duelakoan

2019-12-27 15:51:00

EH Bilduk Legebiltzarreko Diputazio Iraunkorra deitzeko eskatu du De Miguel auziak azaleratu dituen sistema eta ustelkeriaren kontrako neurriak berehala hartzeko, baina EAJ eta PSEk eskari hori blokeatu dute.

Alokairuen prezioa mugatzeari ezezkoa emanda, Lakuak ontzat jo du espekulazioa etxebizitza merkatuan

2019-12-26 16:00:00

Espekulatzaileei mugak jarri beharrean, Jaurlaritza alokairuen prezioa mugatzeko EH Bilduren lege proposamena tramitatzearen aurka agertu da gaur. Euskal Zuzenbide Zibilaren garapenaren bidez etxebizitzen alokairuaren gaia arautzeari uko egin dio.