Legebiltzarra

2020ko Aurrekontua zuzendu behar da eta Gobernuak argitu behar du zer aldatzeko prest dagoen

Maddalen Iriartek azpimarratu du ez dagoela politika feministak garatzeko eta krisi klimatikoari aurre egiteko neurri berririk: “Aurten aurrekontuari beste zelofan bat ipini diote, baina edukiak bere horretan jarraitzen du”

| 2019-11-14 13:57:00

EH Bilduk kezka adierazi du 2020ko Aurrekontu Proiektuan Gobernuak “gauza bat esan, eta beste bat egin” duelako. Aurrekontu Proiektuaren Zuzentarauak aurkeztu zituztenean, berdintasuna, aldaketa klimatikoaren kontrako neurriak edota kalitatezko enplegua aipatu zituzten, besteak beste. “Hitzak oso erraz esaten dira, baina gero benetako finantziaziorik ez baldin badaukate, hutsean geratzen dira. Behin zenbakiak aztertuta, sailburuen azalpenak entzunda, uste dugu horixe egin duela Jaurlaritzak: Diskurtsoa aldatu du, beste zelofan bat ipini dio eta zenbakiak beste modu batez ordenatu ditu, baina aurrekontuen mamiak, edukiak, bere horretan jarraitzen du, aldaezin, iaz bezala”, adierazi du Maddalen Iriartek.

EH Bilduko bozeramaileak azpimarratu du, adibidez, ez dagoela dirurik Legebiltzarrak onartutako Jasangarritasun Energetikoaren Legea betetzeko. “Legeak 100 milioi euroko funtsa aurreikusten zuen, eta derrigorrez bete behar da. Non daude aldaketa klimatikoari aurre egiteko 100 milioiak? 2020ko Aurrekontu Proiektuan ez daude”.

Bestetik, Gobernuak behin eta berriro saldu du proiektua genero ikuspegiarekin egin dela, baina zenbakiak begiratuta, ez dago diru gehiago berdintasunerako. Era berean, ez dira aurreikusten pentsionisten beharrei erantzuteko neurri berriak, ezta kalitatezko enplegua bermatzeko ere.

Beraz, aurrekontuetan hitzak aldatu dituzte, baina zifrak ez. Etiketa aldatu nahi izan diote, salmenta hobea izateko, baina produktua bere horretan mantendu dute. Horregatik, Iriartek Azpiazuri galdetu dio: “Zer egiteko prest dago Gobernu hau? Zer aldatzeko prest dago aurrekontuak adosteko?”. EH Bilduko bozeramaileak iragarri du proposamen bat prestatzen ari dela aurrekontuak aldatzeko, eta adierazi du eskua luzatuta daukala Gobernuarekin akordio bat bilatzeko. “Hori bai, Gobernua aurrekontua aldatzeko prest ez badago, iaz gertatu zen bezala, ez da akordiorik egongo”.

PSOEren Gobernuak mehatxu egin du saltoki handiak ezartzea mugatzen duen euskal legea Konstituzionalera eramatearekin

EH Bilduk gogora ekarri du legea Legebiltzarrak aho batez onartu zuela eta borondate demokratiko hori errespetatzeko eskatu dio Madrili. Iker Casanovaren iritziz, “Gobernu espainolak agerian utzi du berriro gure autogobernu eta eskubideak blindatzeko marko baten beharra daukagula”.

| 2019-11-13 09:39:00

Pedro Sanchez buru duen Gobernuak saltoki handiak irekitzea edota handitzea eragozten duen euskal legea Auzitegi Konstituzionalera eramatearekin mehatxatu du Jaurlaritza, Estatuko Administrazioaren eskumenak urratzen dituelakoan. Mehatxu horren berri eman eta salaketa publikoa egin du gaur Iker Casanovak, “erabaki horrekin PSOEren Gobernua demokraziaren eta autogobernuaren kontra kokatzen baita”.
EH Bilduko legebiltzarkideak azaldu duenaren arabera, mehatxu horren ondorioz, Madril eta Lakuako gobernuek osatutako Aldebiko Batzordea irailean bildu zen eta, publiko egin gabe, aipatutako legearekin Madrilek dituen desadostasunak konpontzeko negoziazioak irekitzea erabaki zuen, Jaurlaritzak atzo EAEko Aldizkari Ofizialean argitaratu zuenez. Horren haritik, Casanovak Jaurlaritzaren isiltasuna eta oskurantismoa kritikatu ditu, bai eta “euskal gizarteari informazio hori ezkutatzea” egotzi ere. “Orain arte ez dugu ezer jakin horretaz, informazio hori ukatu zaigu. Beste batzuetan hain garrantzitsuak ez diren kontuak publikoki salatzen ditu Jaurlaritzak, baina kasu honetan ez du hitzik esan. Aldebiko Batzordearen ebazpena Aldizkari Ofizialean argitaratu du, hori baino ez”. Ebazpen horren arabera, PSOEren Gobernuak legearen sei artikuluren kontra jo du, “eta legeak guztira zortzi artikulu besterik ez dituela kontuan hartuta, bistakoa da erasoaren tamaina eta merkataritza txikiaren babesean izan dezakeen eragin zeharo kaltegarria”, ohartarazi du Casanovak.
Madrilek ezbaian jarri duen legea, Establezimendu Komertzial Handien Lurralde Antolamenduari buruzkoa, iragan ekainean onartu zuen Legebiltzarrak aho batez, PSEren botoak barne; beraz, “borondate demokratiko argi hori errespetatzeko” eskatu dio EH Bilduko legebiltzarkideak Gobernu espainolari. Halaber, Jaurlaritzari galdegin dio “baliabide guztiak erabil ditzala gure erabakia eta gure demokrazia defendatzeko eta Legebiltzar honen gaitasun legegilea babesteko”.
Casanovak azpimarratu duenez, ekainean onarturiko legea aurrerapauso garrantzitsua izan zen saltoki handi gehiago irekitzearen arriskua neutralizatzeko eta, hala, merkataritza txikia babesteko, baina orain, PSOEren mehatxua gauzatuz gero, babes hori ezerezean gera liteke. “Horrek agerian uzten du berriro gure autogobernua eta gure eskubideak blindatzeko marko baten beharra daukagula, estatus berri bat behar dugula Estatuarekiko harremana berdintasunean oinarritzeko”. Izan ere, “duela gutxi gure ikasleentzako bekak murriztu zituzten Madrilen eta orain merkataritza txikia babesteko neurriak hartzen ere ez digute utzi nahi. Herri honek bere burua Madrilen baimena eskatu gabe gobernatzeko gaitasuna eta eskubidea du eta gaur salatzen ari garena bezalako erasoek oso argi uzten digute tresna guztiak eskuratu behar ditugula euskal herritarrek arlo guztietan dituzten premiak behar bezala asetzeko”.
 

ALBISTEAK

EH Bilduk soldata igoera sustatu du ikertzaile bekadunentzat, aurrekontu-akordioan jasotakoa baino askoz handiagoa

2019-12-12 15:02:00

EH Bilduren ekimenez, Legebiltzarrak 2020an 2013ko soldata maila berreskuratzeko eskatu dio Jaurlaritzari, %7-9ko igoerak, eta kasu batzuetan %40koa, ekarriko dituena. Gobernu eta Podemosen arteko akordioak ez du inolako igoerarik aurreikusten datorren urterako.

EH Bilduren ekimenez, Legebiltzarrak Plentziako portua berrantolatzeko proiektua gelditzeko eskatu dio Lakuari

2019-12-11 15:48:00

Lanak hasi aurretik portuaren eta itsasadarraren garbiketa eta babesa bermatu eta ontzi guztien inbentarioa egiteko galdegin dio Jaurlaritzari, bai eta prozesu parte-hartzailea irekitzeko ere, proiektua hobetze aldera.

Oso larria da Podemosek Diru-Sarrerak Bermatzeko Legearen murrizketak ontzat ematea

2019-12-05 17:57:00

Jasangarritasun Energetikoaren Legearen 100 milioiko finantziazioa eskatzeari ere uko egin dio aurrekontuei buruzko akordioan. Gutxienez 2024. urterako uzten du legea betetzeko obligazioa.

EH Bilduren ekimenez, Legebiltzarrak ‘cohousing’ etxebizitza eredu kolaboratiboa sustatzeko eskatu dio Lakuari

2019-12-05 17:55:00

Maider Otamendiren ustez, “etxebizitza eredu berriek erantzun alternatiboa eskaini diezaiekete merkatu librean erostea edo alokatzea ia ezinezko duten kolektibo askori”.