Legebiltzarra

EH Bilduk eta Elkarrekin Podemosek eskatu dute Osasun sailburua uztailean ager dadila Legebiltzarrean

Rebeka Ubera eta Cristina Macazagaren iritziz, Nekane Murgak azalpenak eman behar ditu ezinbestean Osasun Sailaren jokabidea argitzeko. “Dokumentazioa gorde eta ez dio behar bezala lagundu Osakidetzako Lan Eskaintza Publikoa ikertzen ari den epaitegiari”.

| 2019-06-21 14:19:00

~~EH Bildu eta Elkarrekin Podemos talde parlamentarioek Legebiltzarreko Mahaiak uztaila habilitatu dezala eskatu dute Nekane Murga Osasun sailburua Osasun Batzordean ager dadin, bertan argitzeko nolako jokatu duen haren Sailak Osakidetzako Lan Eskaintza Publikoaren auzian. Rebeka Ubera eta Cristina Macazaga legebiltzarkideek behar-beharrezkotzat jo dute uztaila habilitatzea, Legebiltzarrak lehenbailehen ezagutu behar dituelako Murgaren azalpenak.
EH Bildu eta Elkarrekin Podemos taldeetako legebiltzarkideen iritziz, “Osasun Sailaren jokabidea ezbaian dago, berak eginiko barne ikerketan bildutako dokumentazio osoa lehenengo minutuan fiskalaren eta epailearen esku utzi beharrean, hainbat grabazio eta agiri gorde zituelako eta ez zituelako epaitegira bidali epaileak berak espresuki eskatu arte. Hori dela eta, lasai asko uler daiteke Osasun Saila, ikerketa bultzatzen lagundu ordez, oztopatzen saiatu dela”.
“Lan Eskaintza Publikoan gertaturiko irregulartasunak epaitegian daudenetik argitaratu den informazioa ezagututa, agerikoa da Osasun Sailak ez diola Justiziari behar bezala lagundu oposizioetan jazo dena argitzeko eta horretan egon daitezkeen ardurak, politikoak barne, zehazteko; Murgaren Departamentuaren borondate falta argia da”, Ubera eta Macazagaren esanetan.
 

Euskadiko Eskola Kontseilua demokratizatzeko eta ahalduntzeko Lege proposamena aurkeztu du EH Bilduk

Erakundearen funtzionamendua 1988 Legean arautu zenez, ez dio gaur egungo errealitateari erantzuten. Hortaz, Hezkuntza komunitatearen parte hartzea eta elkarlana sustatzeko tresnak berritu egin behar dira

| 2019-06-21 13:31:00

EH Bilduko legebiltzarkide Rebeka Uberak Euskadiko Eskola Kontseiluari buruzko 13/1988 Legea hobetzera bideratuta dagoen Lege Proposamen bat aurkeztu du gaur Legebiltzarrean. 2018an Lege horren egokitzapen bat egin zen arren, aldaketa oso mugatua eta testimoniala izan zen. Horregatik, indarrean jarraitzen du orain dela hogei urte onartutako araudiak, eta ez dio erantzuten gaur egungo errealitateari. Hortaz, Euskadiko Eskola Kontseiluaren funtzionamendua garai berrietara egokitu behar da, praktika demokratikoagoak sustatzeko helburuarekin.

Hori dela eta, EH Bilduk 12 artikulu dituen Lege Proposamen bat aurkeztu du, Kontseiluan parte hartzea sustatzeko eta Osoko Bilkuraren eskuduntzak zabaltzeko. Adibidez, gaur egun Kontseiluko lehendakariaren esku dauden erabaki batzuk modu demokratikoagoan hartzea proposatzen da. Horrela, “Euskadiko Eskola Kontseiluaren erabaki lotesle guztiak Osoko Bilkuran hartuko dira, hala nola, Hezkuntza Sailari (edo bestelako sail edo erakunderi) bidali beharreko irizpenak Osoko Bilkuran bozkatuko dira”. Bestetik, Kontseiluko lehendakariaren izendapena Legebiltzarraren esku geratuko litzateke, eta ez Hezkuntza sailaren menpe, orain arte bezala.

Rebeka Uberaren ustez, “Euskadiko Eskola Kontseilua inoiz baino beharrezkoagoa du esku artean ditugun erronka konplexuen aurrean desberdinen arteko erantzun partekatuak eta adostuak erdiestea”. Horregatik, EH Bilduk 13/1988 Legeko  hainbat artikulu hobetzeko proposamena egi du, “etorkizunera begira, Hezkuntza eremuan behar diren eraldaketak bideratu behar direlako, hezkuntza komunitatearen parte hartze eta elkarlana garatzeko beharrezkoak diren espazio eta bitartekoei bide emanez”.

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.