Legebiltzarra

EH Bilduk koherentzia eskatu dio PSEri, alokairuen prezioak mugatzeko lege proposamenari bide emateko

Koalizioaren iritziz, ulertezina litzateke Gobernu espainolean alokairuen prezioak mugatzea adostu duten alderdiek hemen horren kontra agertzea. “Urkulluren Gobernua Diaz Ayuso PPkoaren pare jarriko da?”.

| 2020-02-05 12:45:00

Maider Otamendi eta Ander Rodriguez legebiltzarkideek dei zuzena egin diete gaur Podemos eta, bereziki, PSEri Legebiltzarrean koherentziaz jokatu eta alokairuen prezioak mugatzeko EH Bilduk aurkeztutako lege proposamenari bide eman diezaioten. Izan ere, gogorarazi dutenez, bi alderdi horiek alokairuen prezioak mugatzeko neurriak abiatzea adostu dute Gobernu espainolean, hain justu, EH Bilduk proposatutakoa, eta, beraz, “ulertezina litzateke hemen Madrilen sinatu dutenaren kontra egitea eta gure lege proposamenaren tramitazioa eragoztea”.
Madrilen ez bezala, Jaurlaritzan PSE, EAJrekin batera, alokairuen prezioak mugatzearen aurka agertu zen abenduan, EH Bilduren proposamena tramitatzearen kontra, Sanchez eta Iglesiasek gobernu-programa sinatu baino lau egun lehenago. Sinadura horren ostean, hala ere, PSEk atzera egin behar du, Otamendi eta Rodriguezen iritziz, eta bide eman behar dio EH Bilduren proposamenari. “Harremanetan gaude PSErekin zein Podemosekin, uste dugulako aurrerapauso garrantzitsua eman dezakegula etxebizitzen prezioa kontrolatzeko, kasu honetan alokairuei dagokienez. Ulertezina litzateke PSEk hemen blokeatzea Espainian proposatzen ari dena”.
Horren haritik, Rodriguezek galdetu du ea Urkulluren Gobernua “Diaz Ayuso PPkoaren pare jarriko den, alokairuen prezioak mugatzearen aurka”. Gogora ekarri duenez, Madrilgo erkidegoko presidentea intsumiso deklaratu da eta iragarri du ez dituela alokairuen prezioak mugatuko, PSOE-Podemosen gobernu programak dioenaren kontra. Bada, “Urkullu Diaz Ayusorekin lerrokatuko da?”.
EH Bilduko ordezkariek azpimarratu dute euskal instituzioek, inoren zain egon gabe, alokairuen prezioak mugatzeko izan ditzaketen eskumen guztiak baliatu behar dituztela, alokairuen prezioak frenorik gabe ari direlako igotzen eta egoera jasanezina delako. Alemanian eta Frantzian, esaterako, alokairuen prezioak mugatzeko sistemak jarri dituzte martxan jada eta, berriki, Nazio Batuen Erakundeak norabide horretan lan egitea gomendatu die Estatuei. Bada, horixe da EH Bilduk Legebiltzarrean proposatu duena, “lege bat, Euskal Zuzenbide Zibilak ematen dituen aukerak erabiliz, alokairuetan gehienezko prezio bat ezartzeko, betiere etxebizitzaren baldintzak eta ezaugarriak kontuan hartuta”. Maider Otamendik azaldu duenez, gehienezko prezioa ezarriko litzateke “etxebizitza merkatu tenkatua duten eremuetan, hau da, alokairuen garestitzea bereziki larria izan den eremuetan, eta zonalde horietan alokairuak ez lirateke legalak izango prezio horren gainetik”.
 

EH Bilduk estatus politikoari buruzko proposamena aurkezteko eskatu die EAJ, Podemos eta PSEri, eztabaida eremu publikora ateratzeko

Unai Urruzunok autogobernu ponentzia hiltzen uzteko asmoa egotzi die eta estatus berriaren beharra gizarteratzeko kanpaina bat iragarri du. “Urkulluk dio Jaurlaritzaren eskuduntzetatik at dagoela pentsioak edota soldatak hobetzea, baina aldi berean uko egiten zaio eskumenak zabaltzeari; hori da larriena”.

| 2020-01-31 15:24:00

Mikel Legarda EAJk proposatutako adituaren agerraldiarekin amaitu da Autogobernu Ponentziak erabakitako agerraldien fasea eta orain ez EAJk, ez PSEk, ez Podemosek ez dakite zer egin. Ponentzia berriz biltzeko datarik ere ez dago eta, hori horrela, EH Bilduk eskari argia egin die hiru alderdi horiei: Legebiltzarrak onartutako eta agindutako norabidearen kontra badoa ere, estatus politiko berriaren testu artikulatua adostu dute EAJ, Podemos eta PSEk eta haiei dagokie, beraz, testu hori lege proposamen gisa formalki aurkeztea, horren inguruko eztabaidari bide emateko eta eremu pribatutik publikora ateratzeko, Unai Urruzunok adierazi duenez.
Urruzunok eztabaida hori eta ponentzia bera hiltzen uzteko asmoa egotzi die eta EH Bilduren konpromisoa berretsi du hori hala izan ez dadin. Horren haritik, iragarri du koalizioak sozializazio kanpaina bat abiatu duela estatus politiko berri baterako egiten duen proposamena gizarteratzeko, haren oinarriak, edukia eta helburuak ezagutzera emate aldera. Hala, EH Bilduk zuzenean aurkeztuko die arlo guztietako eragileei eta hitzaldiak eta bestelako ekitaldi publikoak ere antolatuko ditu herri eta hirietan estatus politiko berriaren beharra zertan datzan eta horrek ekarriko lituzkeen onurak azaltzeko. Gainera, ez du baztertu EH Bilduk bere proposamen propioa aurkeztea Legebiltzarrean, baldin eta EAJ, PSE eta Podemosek haiena aurkezteari uko egiten badiote, estatus berriari buruzko eztabaida publikoa ezin delako etengabe atzeratu eta euskal gizarteak argi jakin behar duelako non dagoen gai horretan alderdi bakoitza.
Urruzunok azpimarratu duenez, atzoko greba orokorrak agerian utzi du berriro ere estatus politiko berriaren premia. “Urkulluk esan du greba horretako aldarrikapen asko gure eskuduntzetatik harago doazela, alegia, guk ez dugula erabakitzeko ahalmenik ez pentsioetan ez soldatetan. Hori ez da guztiz egia, Jaurlaritzak, borondatea baldin badu, baduelako egitekorik. Katalunian, esaterako, Generalitatek erabaki politiko irmoa adierazi du gutxieneko soldata 1.239 eurora igotzeko. Baina larriena ez da eskumen falta argudiatzea behar diren neurriak ez hartzeko; larriena da hori esatea eta aldi berean gure eremu konpetentziala zabaltzeari uko egitea. Ez dugu eskumenik, esaten dute, baina aldi berean uko egiten diote eskumen gehiago izateari, hori da gertatzen ari dena eta hori da erabat larria dena”.
Horri jarraituz, EH Bilduko legebiltzarkideak salatu du EAJ, PSE eta Podemosek adostutako testu artikulatuan ez dagoela erabakitzeko eskubiderik. “Konstatazio bat baino ez da; hala esan dute ponentziatik pasatu diren aditu gehienek. Areago, horietako batek argi azaldu du erabakitzeko eskubidea xedapen gehigarri batean aipatzea, EAJk egin duen moduan, efekturik gabeko desideratum bat, autoengainu bat, baino ez dela, eta EAJk bere burua engainatzea zilegi bada ere, onartezina dena jendea engainatzea da”.
Urruzunoren esanetan, EAJ, PSE eta Podemosek adostutako testu artikulatuan ez dago Araba, Bizkaia eta Gipuzkoako botere konpetentziala handitzeko inolako asmorik eta, praktikan, egungo Autonomia Estatutuarekin alderatuta, ia ez dago aldaketarik. “Ez dago gizarte segurantzarik, ez dago lan harremanetarako euskal esparrurik… Zein da aldea 1979ko Estatutuarekin? Hori da erantzun behar duten galdera, eta horri ezin diotenez erantzun egoki bat eman, horren inguruko eztabaida hiltzen utzi nahi dute”.
 

ALBISTEAK

Larria eta onartezina da EITB EAJ eta Confebasken interes partikularren zerbitzura jartzea

2020-03-31 19:15:00

Hedabide publikoek beti bermatu behar dituzten neutraltasun ideologikoa eta objektibotasuna urratzea egotzi die EH Bilduk EITBko arduradunei. EAJri ez zaio EITBren irudia kaltetzea axola, haren instrumentalizazioari etekin politikoa ateratzen badio.

Larrialdi egoera honetan Legebiltzarrak bere izaera berreskuratu behar du proposamenak bideratu eta Jaurlaritzaren gaineko kontrola bermatzeko

2020-03-27 19:19:00

EH Bilduk salatu duenez, “EAJ eta PSE demokrazia batean ezinbestekoa den kontrol parlamentarioa ekidin nahian dabiltza oposizioaren ekimen politikoa galarazteko eta Urkulluren Gobernua blindatzeko”.

EH Bilduk ohartarazi du Zaldibarren kutsatzaile arriskutsuak isurtzen ari direla uretara, urtean batez beste onartutakoa baino askoz gehiago

2020-02-26 15:07:00

Uraren Euskal Agentziak eginiko analisiek erakusten dute beruna, kadmioa eta zianuroa bezalako gai toxikoen isurketen parametroak benetan txarrak direla. “Datuak ikusita, lehentasunezkoa da Deba ibaiaren arro osoan neurriak hartzea kutsadura saihesteko”, azpimarratu du Mikel Oterok.

EAJk nahita blokeatu du euskara doan ikasteko legea eta orain propaganda eta elektoralismoari ekin dio

2020-02-12 14:00:00

“Guztiz lotsagarria da EAJ ateratzea euskara doan ikasteko eskubidearen berme gisa, 2018az geroztik EH Bilduren lege proposamena etengabe oztopatu ostean. EAJk ez ditu helburu ez euskara ez gizartea, gainetik bere interes alderdikoiak jartzen ditu beti”.