Legebiltzarra

EH Bilduk ikasleen itzulera hezkuntza komunitatearekin adosteko eskatu dio Jaurlaritzari

EH Bilduk proposamena aurkeztu eta Diputazio Iraunkorra berriz biltzeko galdegin du. Rebeka Uberaren iritziz, “Hezkuntza Sailaren aldebakartasuna ez da bidezkoa, Despotismo Ilustratuaren garaikoa da”.

| 2020-05-11 13:25:00

EH Bilduk legez besteko proposamena aurkeztu du Legebiltzarrean eta Diputazio Iraunkorra berriz biltzeko eskatu du ikasturte amaieraren baldintzak eztabaidatzeko. Koalizioak, zehazki, ikasleen itzulera eta, oro har, itzulera horren baldintzak hezkuntza komunitatearekin adosteko eskatzen dio Jaurlaritzari. Izan ere, Rebeka Uberak salatu duenez, “Hezkuntza Saila erabaki guztiak bere kasa hartzen ari da, aldebakartasunez, sektoreko eragileen iritzia kontuan hartu gabe, eta hori ez da bidezkoa; Cristina Uriarte sailburua Despotismo Ilustratuan bezala ari da, eta ulertu behar du garai hori aspaldi amaitu zela, gauzak hezkuntza komunitatearekin adostea ezinbestekoa dela ikasturtea ahalik eta hobekien amaitu ahal izateko”.

EH Bilduko legebiltzarkidearen iritziz, “lekuz kanpo dago Jaurlaritzak itzulera data sektorearekin adosten ez saiatzea eta datorren astelehenean itzultzeko agindua ematea, inposatzea, baldintzak aldez aurretik negoziatu eta adostu gabe”. Uberak Arantxa Tapia sailburuak herenegun egin zituen adierazpenak gogora ekarri ditu gainera, “irakasleei eman zien tratua iraingarria izan zelako”.

EAJk eta PSEk Legebiltzarreko Mahaian blokeatzen ez badute, EH Bilduren proposamena datorren astelehenean eztabaidatu beharko da beranduenez Diputazio Iraunkorrean.

Ikastetxeetara noiz itzuli adosteko ez ezik, bestelako neurriak ere planteatzen ditu koalizioaren ekimenak, hala nola ikastetxe bakoitzak autonomia izan dezala bere ezaugarrien araberako plan propioa egiteko, ikasgela bakoitzean gehien jota 15 ikasle baino ez daitezela egon eta 200 ikasletik gorako ikastetxeetan erizain bat edota erizain laguntzaile bat kontratatu dadila. Ikasle kopuru horretara iristen ez diren ikastetxeek protokolo bat zehaztu beharko lukete herri edo auzoko osasun zentroarekin, EH Bilduren proposamenaren arabera.

EAJ Legebiltzarreko Mahaia alderdikeriaz erabiltzen ari da oposizioaren ekimen politikoa mugatzeko

Mahaiak ez ditu EH Bilduren legez besteko bi proposamen tramitera onartu eta Elkarrekin Podemos-IUren jarduera politikoa blokeatzen jarraitzen du. Eba Blancok eta Jon Hernandezek EAJ eta PSEri egotzi diete “Mahaian duten gehiengoa oposizioaren lana eragozteko eta Jaurlaritza babesteko baliatzea”.

| 2020-05-07 17:04:00

EAJ eta PSEk Legebiltzarreko Mahaian duten gehiengoa baliatu dute gaur EH Bilduren legez besteko bi proposamen atzera botatzeko, tramitatu gabe, eta aldi berean Elkarrekin Podemos-IUren jarduera politikoa blokeatzen jarraitzen dute, legez besteko proposamenak aurkezteko eta beste taldeenak zuzentzeko aukera itxita. EH Bilduren proposamenei dagokienez Eba Blancok azaldu duenez, “krisi egoera honetan gezurra dirudien arren, esan digute ez dela premiazkoa aztertzea zein diren hartu beharreko neurriak Osakidetza deseskalada faserako prestatzeko, hala nola lehen faseko kontratazioak mantentzea, Lehen Arreta eta Zainketa Intentsiboko Unitateak indartzea edota ohe kopuruak berraztertzea. Eta erantzuna berbera izan da bigarren proposamenaren kasuan, ez dela premiazkoa datorkigunari aurre egiteko estrategia elkarlanean diseinatu eta adostea”.

Eba Blanco EH Bilduko legebiltzarkidearen eta Jon Hernandez Elkarrekin Podemos-IUkoaren esanetan, “gaurkoa aspaldikoa den EAJren estrategia politikoaren azken adibidea izan da: Legebiltzarreko Mahaia alderdikeriaz erabiltzen ari da oposizioaren ekimen politikoa oztopatu eta mugatzeko. PSErekin batera, organo horretan duten gehiengoa oposizio osoaren lana eragozteko eta Jaurlaritzaren irudia babesteko baliatzen dute etengabe, Urkullurentzat deserosoak diren debateak saihesteko”.

Blancok eta Hernandezek Bakartxo Tejeria presidenteak egoera honetan duen ardura azpimarratu dute bereziki. “Legebiltzarreko presidente gisa, Tejeriaren erantzukizuna Legebiltzarrak krisialdi honetan berez izan beharko lukeen protagonismoa aktibatzea eta bete beharko lukeen funtzio garrantzitsua sustatzea da, baina hori egin beharrean, kontrakoa egiten ari da; bere helburua Legebiltzarra desaktibatzea izan da hasieratik, ahalik eta desagertuen egon dadila, horixe delako Urkullu eta EAJri gehien komeni zaiena”.

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.