Legebiltzarra

EAJk zeharo itota dauden milaka autonomoak iraindu ditu EH Bilduk proposatutako laguntzak eztabaidatzeari uko eginez

EH Bilduk Nafarroako eredua aplikatzea proposatu du 2.200 euroko laguntzak emateko, baina EAJk, PSErekin batera, ez du premiazkotzat jo Diputazio Iraunkorrean horretaz eztabaidatzea. Berdin egin du hezkuntza arloan: EH Bilduk ikasturte amaiera sektorearekin adostea planteatu du, baina hori ere atzera bota du, eztabaida bera ere galarazita.

| 2020-05-14 17:57:00

EAJk euren negozioak itxita eduki behar izan dituzten eta ekonomikoki itota dauden milaka eta milaka langile autonomoei azaldu behar die ez dela premiazkoa Legebiltzarrean haientzako laguntzei buruz eztabaidatzea. EAJren jarrera, EH Bilduk helburu horrekin aurkeztutako proposamena tramitera onartzeari uko eginez, irain ikaragarria da merkataritzan, ostalaritzan, turismoan eta bestelako sektoreetan aritzen diren autonomoentzat, are gehiago Jaurlaritzak gaizki eta berandu iragarri dituen dirulaguntzak oso motz geratzen direnean, autonomoek beraiek ere salatu dutenez.

EH Bilduk berriro salatu behar du EAJk, PSEren babesarekin, Legebiltzarreko Mahaia alderdikeriaz erabiltzen ari dela etengabe, gaurkoan EH Bilduren legez besteko hiru proposamen atzera botatzeko. Antza, egoera kritiko honetan gezurra dirudien arren, EAJren iritziz ez da premiazkoa ez autonomoak babesteko neurriez, ez ikasturte amaiera hezkuntza eragileekin adosteaz, ez etxebizitza gastuak arintzeko laguntzez eztabaidatzea. Horiek ziren EH Bilduren proposamenen helburuak, baina EAJk eta PSEk horiei buruzko eztabaida bera ere galarazi dute. Hala, Diputazio Iraunkorra astelehenean batzartuko da, baina gai bakar bat eztabaidatuko du, familientzako laguntzak hobetzeko EH Bilduren legez besteko proposamena. Izan ere, Elkarrekin Podemosek Osakidetza sendotzeko aurkeztutako ekimena ere atzera bota dute gobernuko alderdiek.

Autonomoak babesteko proposamena eztabaidatu gabe atzera botatzea bereziki larria da. Nafarroan adostu dutena EAEn egitea proposatu du EH Bilduk, pandemiaren ondorioz itxi behar izan duten autonomoei 2.200 euroko laguntza bat emateko. Kontuan hartu behar da autonomoen egoera kritikoa dela, milaka lanpostu eta negozio kolokan daudela eta autonomoek beraiek Jaurlaritzak iragarritako laguntzak oso eskasak direla ohartarazi dutela, baina, hala eta guztiz ere, EAJk EH Bilduren proposamena blokeatu du haren lehentasuna Urkullu Gobernuaren politiken gabeziak ezkutatzea delako, ez autonomoen egoera hobetu dezaketen neurriak aztertzea.

Halaber, Jaurlaritzaren nora ezaren ondorioz hezkuntza komunitatean anabasa erabatekoa den honetan, ulergaitza da ikasturte amaieraren baldintzak sektoreko eragileekin adosteko proposamena eztabaidatzeari uko egitea. Gaur bertan jakin dugu Hezkuntza Sailak azkenean atzera egin duela eta eskoletara itzultzeko data hilaren 25era arte atzeratzea erabaki duela. Egoera honetan are premiazkoagoa zen EH Bilduren proposamena eztabaidatzea, Lakua garaiz dagoelako ikastetxeetan bete beharreko baldintzak eta protokoloak hezkuntza komunitatearekin adosteko, baina EAJk Urkullurentzat deserosoak diren debateak saihestea lehenetsi du berriz ere.

Terrazetako anabasa Jaurlaritzaren laguntza faltaren ondorio ere bada, ohartarazi du EH Bilduk

Iker Casanova: “Premia ekonomikoak bultzatuta ireki behar izan dute ostalari eta merkatari askok, baldintzak ematen ez diren arren”. Laguntzak (2.200€) behingoz bideratzeko exijitu dio Jaurlaritzari, “gutxieneko bermeak eduki bitartean negozioa itxita mantendu ahal izateko ere bai”. EH Bilduren proposamena bidean da jada Legebiltzarrean.

| 2020-05-12 13:19:00

EH Bilduk kezkaz eta arduraz hartu du atzo ostalaritzak eta, oro har, merkataritzaren sektore osoak bizi izan zuen anabasa. “Jokabide batzuk arduragabeak eta salatzeko modukoak izan direla ezkutatu gabe”, Iker Casanovak adierazi du “anabasa eta nahaspila hori Jaurlaritzaren laguntza faltaren ondorio” ere badela. “Sektorea eta autonomoak orokorrean instituzioek abandonaturik daude eta ostalari eta merkatari askok premia ekonomikoak derrigortuta eta etsipenak bultzatuta ireki behar izan dute, nahiz eta edozein negoziok behar dituen baldintzak benetan ematen ez diren. Bi hilabete igaro dira euren negozioak itxi eta etxera joan zirenetik eta Gobernua oraindik ez da dirulaguntzak emateko gai izan; are okerrago, laguntzak berriro atzeratzea erabaki duela jakin dugu gaur. Lotsagarria da”.

EH Bilduren ordezkariak dirulaguntza horien premia aldarrikatu du, “sektorearen biziraupena bermatzeko”, eta azpimarratu du behar-beharrezkoak izango direla “negozioak berme guztiekin, ez atzo bezala, berriro irekitzea posiblea izan arte”. Hori da, hain justu, EH Bilduk Legebiltzarrean aurkeztu duen proposamena; alegia, laguntzak eman eta luzatzea negozioak bideragarriak izan arte. Casanovaren hitzetan, “autonomoei negozioa itxita mantentzeko aukera eman behar zaie laguntzak moztu gabe; babes hori izango dutela jakinda, beraiek erabaki behar dute berriro irekitzen duten edo normaltasun egoera batera iritsi arte itxoitea hobesten duten, osasun arriskua murriztuta. Bestela, arrisku horretaz gainera, bi hilabeteko itxieraren ondoriozko galera ekonomikoei gutxieneko baldintzak izan gabe irekitzeak ekarriko dituen galerak gehitu beharko dizkiete”.

Diputazio Iraunkorrak eztabaidatuko duen EH Bilduren proposamenak Nafarroako eredua aplikatzea planteatzen du. “Han adostu eta onartu duten bezala, hemen ere Jaurlaritzak 2.200 euroko dirulaguntza eman diezaieke jarduera eten behar izan duten autonomoei, 700 eurokoa fakturazioan gutxienez %30eko murrizketa pairatu dutenei. Borondate politikoa baino ez da behar. Hori da eskatzen duguna”.

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.