Legebiltzarra

EH Bilduk Bel Pozuetaren adierazpenak zentsuratzea egotzi dio EITBri

EH Bilduko hautagaia den aitzakiapean, Euskadi Irratiak Pozuetaren hitzak emititzeari uko egin zion Auzitegi Gorenak Altsasuko gazteen aurkako epaia argitaratu zuen egunean. Geroa Baiko hautagaiari, ordea, elkarrizketa egin zioten egun berean Radio Euskadin.

| 2019-10-16 14:00:00

EH Bilduk EITBn zentsuraren aplikazioa salatu behar du gaur beste behin, oraingoan Bel Pozuetaren aurka. Izan ere, Euskadi Irratiak haren adierazpenak zentsuratu zituen pasa den asteazkenean, hilak 9; alegia, Auzitegi Gorenak Altsasuko gazteen aurkako epaia argitaratu zuen egunean. Prozesu horren hasieratik ohikoa izan denez, Pozuetak horren inguruko iritzia eman zuen Altsasuko gurasoen bozeramaile gisa eta Euskadi Irratiak haren hitzak grabatu zituen, baina gero ez zituen emititu, goi kargu batek hala erabakita, Pozueta Nafarroan Kongresurako EH Bilduren hautagaia den aitzakiapean. Egun berean, baina, EITBren beste irrati batean, Radio Euskadin, hain zuzen, elkarrizketa egin zioten Geroa Baiko hautagai Maria Solanari, Skolae programari buruz.

Unai Urruzuno legebiltzarkidearen iritziz, “kasu honetan gertatutakoak frogatzen du, beste behin, EITBk ez diola neurri bera aplikatzen EH Bilduri, edozerk balio duela EH Bilduren ordezkariak eta euren adierazpenak ez emititzeko, EAJren ordezkariei bertako mikrofonoak ia egunero eskaintzen dizkion bitartean”. Horren harira, Urruzunok gogora ekarri du EITBren erreforma integrala aztertzen ari den ponentzia parlamentarioan Euskal Herriko Unibertsitateak aurkeztutako txostena. “EHUk inkesta bat egin du EITBn bertan, langileen artean, eta, besteak beste, ondorengo ondoriora iritsi da: bertako kazetariek beraiek uste dute EITBren informazioaren tratamendua Jaurlaritzaren eta hau osatzen duten alderdi politikoen aldekoa dela”.

Pozuetak Altsasuko guraso bezala eginiko adierazpenen zentsura ez da kasu isolatu bat, EITBn guztiz hedaturik dagoen praktika oso baten azken adibidea baizik. Hori dela eta, EH Bilduk kontuak eskatuko dizkio datorren asteko Kontrol Plenoan Bingen Zupiria Kultura sailburuari eta EITBko zerbitzu juridikoen arduradunaren agerraldia ere galdegingo du Legebiltzarrean, azal dezan hilaren 9an Pozuetaren adierazpenak emititzeak hauteskunde kanpainetan aplikatu beharrekoa den araudiaren kontra joko zuen, horixe izan baitzen adierazpen horiek zentsuratzeko erabilitako argudioa.

EH Bilduk lege bat proposatu du Administrazioan behin-behinekotasuna amaitzeko eta enplegua egonkortzeko

Behin-behinean kronifikatutako lanpostuak azaleratu eta Lan Eskaintza Publikoen bitartez egonkortzea du helburu lege proposamenak.

| 2019-10-15 16:50:00

EH Bilduk lege proposamena aurkeztu du Legebiltzarrean EAEko Administrazio Publikoan behin-behinekotasuna murrizteko eta enplegua egonkortzeko. Rebeka Uberak azaldu duenez, “egun behin-behinean beteta dauden egiturazko lanpostuak finkatu behar dira, enplegu hori egonkortu behar da, eta horrek Lan Eskaintza Publikoak deitzea eskatzen du, egoera horretan urteak daramatzaten langile eta lanpostuei begira, plaza horiek guztiak behin betiko betetzeko; horretarako aurkeztu dugu lege proposamena, Administrazioak behingoz bete dezan egiturazko aldi baterako enplegua finkatzeko eta plantillak egonkortzeko 2009an Negoziazio Mahai Orokorrean hartu zuen konpromisoa”. Legebiltzarrak onartuz gero, EH Bilduk proposatutako legea EAEko Administrazioari eta haren organismo autonomo, zuzenbide pribatuko erakunde publiko, sozietate publiko, fundazio eta partzuergoei aplikatuko zaie.
EH Bilduko legebiltzarkideak ezinbestekotzat jo du “Administrazioaren plantilla estrukturalak plantilla funtzionalekin orekatzea, bai eta enplegu publikoa duintzea ere, eta helburu hori lortzeko lehen urratsa sistema publikoa sendotzea da, langileen egonkortasuna  oinarritzat hartuta”.
Uberak gogora ekarri du EAEko sistema publikoan enpleguaren behin-behinekotasun tasa ikaragarria dela, %35ekoa, batez beste, eta azken urteotan portzentajea igo dela Jaurlaritzak sustaturiko kontratazio politikaren ondorioz. “Ez da kasualitatea dugun behin-behinekotasun tasa, eta horri belaunaldi aldaketa eta Madrilek ezarritako arau murriztaileak gehitzen badizkiogu, egoera penagarria da”. Joera horrek prekarietatea baino ez du sustatzen eta agerian uzten du, Uberaren iritziz, Enplegua Egonkortzeko Legea onartzearen premia. “Euskal Administrazioaren baitan egiten ari den kontratazio politikaren norabidea egokitzeko, lehenengo urratsa enpleguaren behin-behinekotasun tasa jasanezin horiek gainditzea da”.
 

ALBISTEAK

Terrazetako anabasa Jaurlaritzaren laguntza faltaren ondorio ere bada, ohartarazi du EH Bilduk

2020-05-12 13:19:00

Iker Casanova: “Premia ekonomikoak bultzatuta ireki behar izan dute ostalari eta merkatari askok, baldintzak ematen ez diren arren”. Laguntzak (2.200€) behingoz bideratzeko exijitu dio Jaurlaritzari, “gutxieneko bermeak eduki bitartean negozioa itxita mantendu ahal izateko ere bai”. EH Bilduren proposamena bidean da jada Legebiltzarrean.

EH Bilduk ikasleen itzulera hezkuntza komunitatearekin adosteko eskatu dio Jaurlaritzari

2020-05-11 13:25:00

EH Bilduk proposamena aurkeztu eta Diputazio Iraunkorra berriz biltzeko galdegin du. Rebeka Uberaren iritziz, “Hezkuntza Sailaren aldebakartasuna ez da bidezkoa, Despotismo Ilustratuaren garaikoa da”.

EAJ Legebiltzarreko Mahaia alderdikeriaz erabiltzen ari da oposizioaren ekimen politikoa mugatzeko

2020-05-07 17:04:00

Mahaiak ez ditu EH Bilduren legez besteko bi proposamen tramitera onartu eta Elkarrekin Podemos-IUren jarduera politikoa blokeatzen jarraitzen du. Eba Blancok eta Jon Hernandezek EAJ eta PSEri egotzi diete “Mahaian duten gehiengoa oposizioaren lana eragozteko eta Jaurlaritza babesteko baliatzea”.

EH Bilduk alokairurako laguntzak motz geratzen direla ohartarazi du eta igotzeko eskatu dio Jaurlaritzari

2020-05-06 14:36:00

EH Bilduk proposamena eramango du Diputazio Iraunkorrera zenbatekoak handitzeko eta laguntza jasotzeko epea sei hilabetez luzatzeko.