Legebiltzarra

EH Bilduk ekimena hartu du Memoria Historikoaren Legean Frankismoaren biktimentzako kalte-ordainak txertatzeko

EAJ eta PSEk atzera bota dute Frankismoaren Krimenen aurkako Plataformaren lege proposamena, Jaurlaritza legea lantzen ari den aitzakiapean. EH Bilduk mespretxutzat jo du erabaki hori, eta salatu du Gobernuaren aurreproiektuak ez dituela kalte-ordainak aurreikusten.

| 2019-10-17 15:03:00

Legebiltzarrak ez du Memoria Historikoaren Euskal Legea legealdi honetan onartuko, EAJ eta PSEk, PPrekin batera, atzera bota dutelako EH Bilduk eta Podemosek gaur defendatu dugun lege proposamena, jatorrian Frankismoaren Krimenen aurkako Plataformak aurkeztu zuena, hain zuzen ere. Julen Arzuagak arduragabekeriaz aritzea egotzi die EAJ eta PSEri, euren ezezkoak galarazten duelako Frankismoaren biktimei merezi eta behar duten aitortza eta erreparazioa legealdia amaitu aurretik ematea. “Borondatea egon balitz, Memoria Historikoaren Legea legealdi honetan bertan izango genuke”.
Arzuagak EAJren justifikazioak eta aitzakiak desmuntatu ditu, jeltzaleek behin baino gehiagotan esan dutelako EAEn soberan zegoela horrelako lege bat onartzea. Frankismoaren Krimenen aurkako Plataformak herri ekimen legegilea aurkeztu zuen arte. Orduan bai, orduan atera zen Jaurlaritza, korrika eta presaka, legea prestatzen ari zela esanez. “Ekimena Plataformak hartzea da, antza, EAJk gustuko ez duena, horrek ezbaian jartzen duelako memoriaren gainean eduki nahi duen monopolioa”.
EH Bilduko legebiltzarkideak ezinbestekotzat jo du Memoria Historikoaren Legea onartzea eta lege horretan Frankismoaren biktimentzako kalte-ordainak txertatzea eta arautzea. Jaurlaritzak, baina, kalte-ordainak ezagutzera eman duen aurreproiektuaren zirriborrotik kanpo utzi ditu, horren inguruko erabakia gerorako utzita. Hala ere, legean biktimentzako kalte-ordainak txertatuko direla bermatzeko, Arzuagak legez besteko proposamena aurkeztu du gaur bertan, batzorde tekniko batek sei hilabeteko epean horri buruzko azterlan bat egin dezan. “Azterlan horrek erreparazio neurriak deskribatuko ditu eta ondorioak aterako ditu estaldura mailaz zein hutsune konpongarriez, gero Legebiltzarrak kalte-ordain osagarri horiek bidezkoak eta bideragarriak diren aztertu eta Memoria Historikoaren Legean txertatzeko”.
 

EH Bilduren ekimenez, Legebiltzarrak bestelako politikak eskatu dizkio Lakuari gazteen emantzipazioa errazteko

Josu Estarronak lehentasunezkotzat jo du enplegu eta etxebizitza politikak aldatzea, Jaurlaritzak orain arte erabili dituen formulek kale egin dutelako.

| 2019-10-17 11:56:00

EH Bilduk proposatuta, Legebiltzarrak aho batez ezinbestekotzat jo du gaur “politika publikoetan jauzi bat egitea gazteen emantzipazio adina aurreratzeko”, eta neurriak har ditzala galdegin dio Jaurlaritzari, helburu hori lortze aldera. Zehazki, aldaketak eskatu ditu enplegu eta etxebizitza politiketan, arlo horiek “emantzipaziorako zutabe nagusiak” direlakoan.
Hala, Soldata Arrakala Murrizteko Estrategian emakumezko gazteentzako kalitatezko enplegua sortzeko lan ildo berezitua txertatzeko eskatu dio Gobernuari, bai eta enplegu egonkor eta kalitatezkoa sortzeko politikak garatzeko ere, gazteek pairatzen duten egiturazko prekarietateari aurre egitea derrigorrezkoa delako.
Etxebizitza politikari dagokionez, adostutakoaren arabera, alokairurako diru-laguntzak ematen dituen Gaztelagun programan sartzeko baldintzak aldatu beharko ditu Lakuak, gazte gehiagorengana iristeko asmoz. Halaber, alokairurako etxebizitza parke publikoa premiaz handitu eta lehentasuna eman beharko die gazteei eta, azkenik, gazteriaren behar espezifikoak kontuan izango dituzten etxebizitza tipologia edo elkarbizitza eredu berriak sustatu beharko ditu, hala nola, etxebizitza komunitarioak eta kooperatibak.
Josu Estarrona EH Bilduko legebiltzarkidearen esanetan, “gaurkoa lehen urratsa da orain arte porrot egin duten Jaurlaritzaren politikak zuzentzen hasteko”. Azaldu duenez, premiazkoa eta ezinbestekoa da gazteak emantzipatzea ezinezko egiten duten faktoreetan eragitea; hau da, enpleguan eta etxebizitzan. “Zer nolako emantzipazio datuak espero ditzakegu gazteen artean langabezia tasa Europakoa halako bi baldin bada? Nola emantzipatuko dira bataz besteko soldata 1.000 eurora iristen ez bada eta kontratuetan behin-behinekotasuna eta prekarietatea guztiz orokortuta badaude? Nola emantzipatuko dira alokairuen prezioetan neurria galdu baldin bada? Arazo horien oinarrira jo behar dugu ezinbestean politika esanguratsuen bidez, emantzipazio adina aurreratu nahi izanez gero”.
 

ALBISTEAK

Terrazetako anabasa Jaurlaritzaren laguntza faltaren ondorio ere bada, ohartarazi du EH Bilduk

2020-05-12 13:19:00

Iker Casanova: “Premia ekonomikoak bultzatuta ireki behar izan dute ostalari eta merkatari askok, baldintzak ematen ez diren arren”. Laguntzak (2.200€) behingoz bideratzeko exijitu dio Jaurlaritzari, “gutxieneko bermeak eduki bitartean negozioa itxita mantendu ahal izateko ere bai”. EH Bilduren proposamena bidean da jada Legebiltzarrean.

EH Bilduk ikasleen itzulera hezkuntza komunitatearekin adosteko eskatu dio Jaurlaritzari

2020-05-11 13:25:00

EH Bilduk proposamena aurkeztu eta Diputazio Iraunkorra berriz biltzeko galdegin du. Rebeka Uberaren iritziz, “Hezkuntza Sailaren aldebakartasuna ez da bidezkoa, Despotismo Ilustratuaren garaikoa da”.

EAJ Legebiltzarreko Mahaia alderdikeriaz erabiltzen ari da oposizioaren ekimen politikoa mugatzeko

2020-05-07 17:04:00

Mahaiak ez ditu EH Bilduren legez besteko bi proposamen tramitera onartu eta Elkarrekin Podemos-IUren jarduera politikoa blokeatzen jarraitzen du. Eba Blancok eta Jon Hernandezek EAJ eta PSEri egotzi diete “Mahaian duten gehiengoa oposizioaren lana eragozteko eta Jaurlaritza babesteko baliatzea”.

EH Bilduk alokairurako laguntzak motz geratzen direla ohartarazi du eta igotzeko eskatu dio Jaurlaritzari

2020-05-06 14:36:00

EH Bilduk proposamena eramango du Diputazio Iraunkorrera zenbatekoak handitzeko eta laguntza jasotzeko epea sei hilabetez luzatzeko.