Legebiltzarra

Jaurlaritzak kosmetika egin du aurrekontuen bilgarria aldatuz, baina edukia iazko bera da

EH Bilduk proposamen eraikitzaileak iragarri ditu aurrekontuen proiektuak dituen gabezia estrategikoak zuzentzeko. “Gastu arauak euskal ekonomiaren garapena itotzen du”, ohartarazi du Leire Pinedok.

| 2019-11-11 12:37:00

EH Bilduren iritziz, Jaurlaritzak Legebiltzarrari igorri dion 2020ko aurrekontuen proiektuak “aurreko aurrekontuen bide berberari jarraitzen dio eta oinarri bera du”, baina oraingoan “Lakua aurrekontuak beste modu batez janzten saiatu da, benetan direna baino gehiago direla, erakargarriagoak, irudikatu nahian”.
Leire Pinedok hala esan dio gaur goizean Ogasun sailburuari Legebiltzarrean, aurrekontuen aurkezpenean. EH Bilduko legebiltzarkidearen hitzetan, “Gobernua alferrik saiatu da saltzen aurrekontu hauek arlo batzuetan berritzaileak direla eta aurten apustu sendoa egin dutela genero berdintasunaren alde eta larrialdi klimatikoaren kontra, baina errealitatea oso ezberdina da”. Izan ere, “aurrekontu hauek ez dira iazkoak baino berdeagoak, ez eta feministagoak ere. Pakete bertsua da, bilgarri eta diskurtso politago batean, baina EH Bilduk ez dio begiratuko ez bilgarriari, ez diskurtsoari, benetako edukiari baizik. Kosmetikatik harago joan nahi dugu”.
Hori horrela, Pinedok iragarri du “EH Bilduk proposamen eta neurri paliatiboak jarriko dituela mahai gainean, aurrekontu proiektuak dituen gabezia eta akats estrategikoak eta oinarrizkoak zuzendu eta konpontzeko, bai eta ekonomia, erronka ekologiko, industrial eta soziolaborala hauspotzeko ere”. Azaldu duenez, “Jaurlaritzaren esku egongo da gabezia estrategiko horiek zuzentzeko borondatea izatea eta, hala bada, EH Bildu prest egongo da aurrekontuen onartzea ahalbidetzeko”.
EAJ-PSEren proiektuaren edukiari dagokionez, legebiltzarkideak ohartarazi du “zorpetzea ez dela erabiltzen jarduera ekonomikoa eta enplegua suspertzeko, ez eta aldaketa klimatikoaren kontrako politikak sustatzeko ere, zor berria –880 milioi euro baino gehiago– zor zaharra amortizatzeko erabiltzen baita”.
Halaber, Pinedok aurrekontu-egonkortasun markoa bere horretan eta hitzik esan gabe onartzearen ondorioak ekarri ditu gogora. “Europan marko hori ezbaian dago ekonomia suspertzeko politikak egiteko aukera mugatzen duelako, nahiz eta, euskal kasuan bezala, politika horiek ikuspegi fiskal eta finantzario batetik egingarriak izango liratekeen”. Horren haritik, EH Bilduko ordezkariak berretsi du “gastu araua euskal ekonomiaren garapena itotzen ari dela, eta Lakuak berdin jarraituz gero, Madrilek inposatutako arauak hitzik esan gabe betetzen, egoera honek luze joko du”. Alternatibak egon badaude, azpimarratu du: “Finantzen eta aurrekontuen kudeaketan zorrotzak izan gaitezke eta aldi berean ekonomiaren garapena bultzatu eta beharrizan sozialei erantzun, baina horretarako funtsezkoa da tresna guztiak gure esku edukitzea”. Sailburuari esan dionez, “hori bateragarria eta egingarria da, eta, Lakuan nahi izanez gero, bide hori elkarrekin egin dezakegu”,
 

EH Bilduren lege proposamena tramitatzeari uko eginda, Lakuak behin-behinekotasuna betikotu nahi du Administrazioan

Bere ezezkoa justifikatzeko Jaurlaritzak Enplegu Publikoari buruzko lege proiektua duela argudiatzea zinismo hutsa da, EAJk berak otsailaz geroztik paralizaturik duelako proiektu horren tramitazioa.

| 2019-11-06 14:47:00

EH Bilduk irmo salatu du EAEko Administrazio Publikoan behin-behinekotasuna murrizteko eta enplegua egonkortzeko urrian aurkeztu zuen lege proposamenari Jaurlaritzak eman dion erantzuna, Legebiltzarrean tramitatzearen aurkakoa. Rebeka Uberak azaldu du koalizioaren proposamenak helburu duela “egun Administrazioan behin-behinean beteta dauden egiturazko lanpostuak, bai eta bete gabe daudenak ere, finkatzea, enplegu hori egonkortzea, eta horretarako behar diren Lan Eskaintza Publikoak deitzea”. Izan ere, EAEko sistema publikoan behin-behinekotasun tasa ikaragarria da, %35ekoa, batez beste, eta azken urteotan portzentajea igo da gainera, prekarietatea are gehiago areagotuz. “Joera hori zuzendu beharrean, Jaurlaritza kontrakoa egiten ari da gure lege proposamena tramitatzearen aurka agertzean, dena dagoen bezala uzteak behin-behinekotasuna betikotzea eta prekarietatea are gehiago zabaltzea ekarriko duelako praktikan”.
Uberaren iritziz, “zinismo hutsa da, gainera, argudiatzea, Lakuak egin duen moduan, EH Bilduren proposamena soberan dagoela Enplegu Publikoaren Lege Proiektua martxan dagoelako Legebiltzarrean; EAJk berak, Parlamentuko Erregelamenduak dioenari muzin eginez, proiektu horren tramitazioa paralizaturik dauka iragan otsailaz geroztik, Gobernuko alderdiak akordio batera iristeko gai ez direlako, ez sindikatuekin, ez oposizioko talde parlamentarioekin".
 

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.