Legebiltzarra

Athletic eta Realeko emakume futbolariek grebaren arrazoiak azalduko dituzte Legebiltzarrean, EH Bilduk gonbidatuta

Diana Urrearen iritziz, “greba baliagarria da emakumeek kirolean ere pairatzen duten prekarietatea eta diskriminazioa ikustarazteko”.

| 2019-10-29 12:30:00

Athletic eta Realeko emakumezkoen taldeetako ordezkariak azaroaren 20an agertuko dira Legebiltzarrean, Kultura, Euskara eta Kirol Batzordean, azaroaren 16tik aurrera, lan baldintza duinen eta aukera berdintasunaren alde, Lehen Mailako emakume futbolariak grebara joatera bultzatu dituzten arrazoiak azaltzeko. Diana Urrea EH Bilduko legebiltzarkideak eskatu du euren agerraldia, “azal ditzaten egunerokoan bizi duten egoera eta dituzten aldarrikapenak”. Izan ere, “nahiz eta emakume futbolariek abiatu duten borrokan Legebiltzarrak eskuduntzarik ez izan, komenigarria da lehen eskutik ezagutzea zein den euren eguneroko errealitatea, zein diren euren aldarrikapenak, horrek guztiak balio izango digulako berdintasunaren aldeko borrokan kirolean ere politikak zehaztu eta adosterako garaian”.
Urrearen ustez, “emakumeok kirolean ere pairatzen dugun prekarietatea eta diskriminazioa ikustarazteko baliagarria izan da emakume futbolariek hartutako bidea, horrek guztiak eragin zuzena baitu bizitzako esparru guztietan, kiroletik harago, emakumeon ikusgarritasuna eta pairatzen dugun diskriminazio egoera azaleratzeko”. Horren ildotik, erantsi du, “salaketa ez da nahikoa, ezinbestekoa da guztion artean aukera berdintasunaren bidean neurri eraginkorrak hartzea; esaterako, berdintasun irizpideak ezartzea diru publikoaren erabileran, instituzioek ekimenak eta jarduerak finantzatzen dituztenean”.
 

EH Bilduren ekimenez, Legebiltzarrak merkataritza arloko aurrekontua bikoizteko eskatu dio Jaurlaritzari

Zaldunbordako proiektuaren aurka ere agertu da Parlamentua, Hondarribi inguruko tokiko merkataritzari kalte handia egingo diolakoan. EH Bilduk sustatu du merkataritzari buruzko eztabaida monografikoa, sektorearen egoera benetan larria delako

| 2019-10-28 14:58:00

EH Bilduk proposatu bezala, Legebiltzarrak lau urtetan merkataritza arloko aurrekontua bikoizteko eskatu dio Jaurlaritzari, urtero %25eko igoera gutxienez, alegia, sektoreak duen garrantzi ekonomiko eta sozialak hala behar duelakoan, Iker Casanovak adierazi duenez. Parlamentuak merkataritzari buruzko eztabaida monografikoa egin du gaur, EH Bilduk eskatuta, sektorearen egoera larriari zer nolako irtenbideak eman aztertzeko. Izan ere, 2008tik 2016ra bitartean 5.000 denda baino gehiago (%16) desagertu dira Araba, Bizkaia eta Gipuzkoan.

Casanova pozik agertu da eztabaidaren emaitzarekin, EH Bilduk hainbat akordio garrantzitsu lortu baititu. Aurrekontua bikoiztu beharra, lehena, baina ez bakarra. Hala, gehiengo parlamentarioak (EAJ eta PSE izan ezik) Zaldunbordan makro-outlet bat eraikitzeko proiektua bertan behera uzteko eskatu du, EAJk Hondarribian sustatu duen proiektu hori saltoki handiei buruzko legearen kontrakoa delako eta kalte handia egingo diolako eskualde osoko tokiko merkataritzari. “Proiektu horrek aurrera eginez gero, Urkullu lehendakaria eta Merkataritza eta Lurralde Antolamenduko sailburuak, biak PSEkoak, inguruko denden txikizioaren arduradun izango dira”, ohartarazi du Casanovak.

Adostasuna erabatekoa izan da, ordea, alderdien artean denda tradizional eta historikoen figura sortzearen alde, EH Bilduk proposatu bezala. Horrek, azaldu du koalizioko legebiltzarkideak, babes eta laguntza neurri bereziak suposatuko ditu denda horietarako. Halaber, talde parlamentario guztiak bat etorri dira Merkataritzako Aholku Batzordea berraktibatzeko. Casanovak gogora ekarri du organo hori ez dela batzartu 2015az geroztik, eta, bere iritziz, ezinbestekoa da berriz ere aktibatzea, sektoreko eragileek zuzenean parte har dezaten eragiten dieten erabakiak hartzerakoan. “Gobernantza eredu berria behar da, koordinatua, partekatua eta parte-hartzailea”.

EH Bilduk 38 proposamen aurkeztu ditu guztira gaurko saio monografikoan, besteak beste, saltoki handien gaineko zerga berezi bat sortzea. Casanovak azaldu duenez, “gune horiek efektu kaltegarriak dituzte gizartearentzat, hala nola, azpiegiturak eraiki beharra, lurzoruaren erabilera masiboa eta trafikoa, publikoa eta pribatua, areagotzea; beraz, zilegi da hori guztia zergapetzea”. Hala ere, Legebiltzarrak ez du proposamena onartu, EAJ, PSE eta PP kontra agertu direlako.

ALBISTEAK

Terrazetako anabasa Jaurlaritzaren laguntza faltaren ondorio ere bada, ohartarazi du EH Bilduk

2020-05-12 13:19:00

Iker Casanova: “Premia ekonomikoak bultzatuta ireki behar izan dute ostalari eta merkatari askok, baldintzak ematen ez diren arren”. Laguntzak (2.200€) behingoz bideratzeko exijitu dio Jaurlaritzari, “gutxieneko bermeak eduki bitartean negozioa itxita mantendu ahal izateko ere bai”. EH Bilduren proposamena bidean da jada Legebiltzarrean.

EH Bilduk ikasleen itzulera hezkuntza komunitatearekin adosteko eskatu dio Jaurlaritzari

2020-05-11 13:25:00

EH Bilduk proposamena aurkeztu eta Diputazio Iraunkorra berriz biltzeko galdegin du. Rebeka Uberaren iritziz, “Hezkuntza Sailaren aldebakartasuna ez da bidezkoa, Despotismo Ilustratuaren garaikoa da”.

EAJ Legebiltzarreko Mahaia alderdikeriaz erabiltzen ari da oposizioaren ekimen politikoa mugatzeko

2020-05-07 17:04:00

Mahaiak ez ditu EH Bilduren legez besteko bi proposamen tramitera onartu eta Elkarrekin Podemos-IUren jarduera politikoa blokeatzen jarraitzen du. Eba Blancok eta Jon Hernandezek EAJ eta PSEri egotzi diete “Mahaian duten gehiengoa oposizioaren lana eragozteko eta Jaurlaritza babesteko baliatzea”.

EH Bilduk alokairurako laguntzak motz geratzen direla ohartarazi du eta igotzeko eskatu dio Jaurlaritzari

2020-05-06 14:36:00

EH Bilduk proposamena eramango du Diputazio Iraunkorrera zenbatekoak handitzeko eta laguntza jasotzeko epea sei hilabetez luzatzeko.