Legebiltzarra

EH Bilduren ekimenez, Legebiltzarrak iraupen luzeko langabeziaren aurkako talka-plana eskatu dio Lakuari

Nerea Kortajarenak ohartarazi du EAEn iraupen luzeko 56.000 langabe daudela. “Ezinbestekoa da Gobernuak pertsona horiek erreskatatzea”.

| 2019-10-10 14:59:00

EH Bilduren ekimen bati jarraituz, Legebiltzarrak talka-plan iraunkor bat, hiru urtekoa, sustatzeko eskatu dio gaur Jaurlaritzari Lanbidek iraupen luzeko langabetuak egoki artatu eta laneratu ditzan. Podemos eta PPk bat egin dute koalizioaren proposamenarekin eta EAJ eta PSE izan dira kontra agertu diren bakarrak.
Nerea Kortajarenak akordio parlamentarioaren garrantzia azpimarratu du, Araban, Bizkaian eta Gipuzkoan iraupen luzeko 56.000 langabetu daudelako, langabetu guztien erdia, hain zuzen, eta ezinbestekoa delako, beraz, Lakuak pertsona horiek guztiak erreskatatzea. EH Bilduko legebiltzarkideak gogora ekarri du Legebiltzarrak berariazko neurriak eskatu zituela aho batez 2018ko ekainean iraupen luzeko langabeziaren aurka, baina, salatu duenez, Urkulluren Gobernuak ez ditu horrelako neurriak txertatu bere jardunean.
Gaur eskatutako talka-planaren baitan Jaurlaritzak, Lanbideren bitartez, protokolo berezi bat indarrean jarri beharko du langabe bakoitzari arreta jarraitua bermatzeko banan-banako arreta, prestakuntza, orientazioa, bitartekaritza eta laneratzeko aukerak landuz. Lan horretan lehenetsiko dira langabe kopuru altuenak dituzten udalerri eta eskualdeak.
Halaber, Lakuak enplegu-planen egungo egitura aldatu beharko du iraupen luzeko langabetuen egoerari egokitzeko, betiere kontratazioaren kalitatea bermatuz, eta iraupen luzeko langabetuak kontratatzeko irizpideak txertatu beharko ditu kontratu publiko guztietan, berariazko klausula sozialen bidez.
 

Legebiltzarrak Jaurlaritzaren inakzioa eta kontrol falta egiaztatu du eskola jantokien kudeaketan

EH Bilduk itun bat eskaini du jantokien kudeaketa eredua aldatzeko, eskola komunitateei autonomia emango dien eredu deszentralizatu baten alde.

| 2019-10-10 14:56:00

EH Bilduk aintzat hartu du Jaurlaritzaren zuzeneko kudeaketako eskola jantokien zerbitzua esleitzeko prozesua ikertu duen batzorde parlamentarioaren ebazpena, gaur goizean Legebiltzarrak onartu duena EAJ eta PSEren oposizioarekin. Eva Lopez de Arroyabek ebazpenak jasotzen dituen ondorioak azpimarratu ditu, “zehatzak eta oso argiak” direlakoan. Lehenik eta behin, azaldu du, “enpresen praktika kolusorioa egiaztaturik geratu da, EAEko Auzitegi Nagusiak eta Gorenak ere ebatzi duten moduan”. Halaber, zerbitzuaren gainkostua egon dela ere argi geratu da, eta horrek familien poltsikoei eragin diela. Eta larriena, egiaztatu da Jaurlaritzaren aldetik inakzioa eta kontrol falta egon zela salaketak jaso zituenean.
EH Bilduko legebiltzarkidearen ustez, gaur onartutako ebazpena “erregenerazio demokratikorako aukera” bat da eta Lakuak Legebiltzarraren gomendioak aintzat hartu eta egikaritu beharko lituzke. Horren haritik, Lopez de Arroyabek nabarmendu du ikerketa batzordean agerian geratu dela jantokien kudeaketa eredua aldatzeko beharra. “Eredua 2003az geroztik aplikatzen ari da eta agorturik dago; aldaketa posible ez ezik, beharrezkoa ere bada; zerbitzu horrekin harremana duten pertsona guztiak horixe eskatzen ari dira”.
Legebiltzarkideak ituna eskaini du norabide horretan lan egiteko, eta azaldu du EH Bilduren iritziz kudeaketa eredu deszentralizatu batera jo behar dela, zerbitzuaren erabiltzaileek erabakitzeko eskubidea emango diona eta eskola komunitateen autonomia aitortuko duena.
 

ALBISTEAK

Larria eta onartezina da EITB EAJ eta Confebasken interes partikularren zerbitzura jartzea

2020-03-31 19:15:00

Hedabide publikoek beti bermatu behar dituzten neutraltasun ideologikoa eta objektibotasuna urratzea egotzi die EH Bilduk EITBko arduradunei. EAJri ez zaio EITBren irudia kaltetzea axola, haren instrumentalizazioari etekin politikoa ateratzen badio.

Larrialdi egoera honetan Legebiltzarrak bere izaera berreskuratu behar du proposamenak bideratu eta Jaurlaritzaren gaineko kontrola bermatzeko

2020-03-27 19:19:00

EH Bilduk salatu duenez, “EAJ eta PSE demokrazia batean ezinbestekoa den kontrol parlamentarioa ekidin nahian dabiltza oposizioaren ekimen politikoa galarazteko eta Urkulluren Gobernua blindatzeko”.

EH Bilduk ohartarazi du Zaldibarren kutsatzaile arriskutsuak isurtzen ari direla uretara, urtean batez beste onartutakoa baino askoz gehiago

2020-02-26 15:07:00

Uraren Euskal Agentziak eginiko analisiek erakusten dute beruna, kadmioa eta zianuroa bezalako gai toxikoen isurketen parametroak benetan txarrak direla. “Datuak ikusita, lehentasunezkoa da Deba ibaiaren arro osoan neurriak hartzea kutsadura saihesteko”, azpimarratu du Mikel Oterok.

EAJk nahita blokeatu du euskara doan ikasteko legea eta orain propaganda eta elektoralismoari ekin dio

2020-02-12 14:00:00

“Guztiz lotsagarria da EAJ ateratzea euskara doan ikasteko eskubidearen berme gisa, 2018az geroztik EH Bilduren lege proposamena etengabe oztopatu ostean. EAJk ez ditu helburu ez euskara ez gizartea, gainetik bere interes alderdikoiak jartzen ditu beti”.