Legebiltzarra

Jaurlaritzak ebidentzia onartu eta atzera egin behar izan du enplegu erregulazio sariak osatzeko

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

| 2020-06-18 17:39:00

EH Bilduren iritziz, aldi baterako enplegu erregulazioan dauden langileen langabezia sari txikienak (urtean 20.000 euro baino gutxiagoko soldatak) 100 eta 150 eurorekin osatuko dituela iragarrita, Jaurlaritza aitortzen ari da ebidentzia onartu behar izan duela eta, hortaz, atzera egin ere bai. Izan ere, Nerea Kortajarenak gogora ekarri duenez, “duela gutxira arte ez EAJk ez PSEk ez zuten osagarri horren beharrik ikusten, euren ustez, erregulazioan dauden langileen estaldura maila nahikoa zelako”.

Horren haritik, azaldu du Kortajarenak, EH Bilduk erregulazio espediente horiek osatzeko proposamena egin zuen maiatzean Legebiltzarrean, baina EAJ eta PSE kontra agertu eta atzera bota zuten. Koalizioaren planteamendua gaur Artolazabal eta San Jose sailburuek iragarritakoa baino harago zihoan, anbizio handiagoa zeukan, hainbat kasutan, langileen egoeraren arabera, 400 euroko osagarriak aurreikusita, adibidez. “Bistakoa da hobe dela 100 edo 150 euroko osagarri bat ezer ez baino, baina tamalgarria da horrenbeste denbora alferrik galtzea eta azkenean anbizio gutxiko neurri bat planteatzea, bai laguntzaren zenbatekoari dagokionez, bai onuradunen kopuruaren dagokionez. Osagarria 44.000 langilek kobratuko dutela esan dute, baina gaur egun 100.000 dira aldi baterako enplegu erregulazioan jarraitzen dutenak, eta pandemia hasi zenetik 170.00 inguru izan dira guztira; hau da, Urkulluren Gobernuak ez die inolako erantzunik emango hamarnaka milaka langileri”.

Kasu honetan gertatu denak berriro frogatzen du, Kortajarenaren irudiko, “Jaurlaritzak ez duela ekimena hartzeko gaitasunik, ez dela arazoei tamainako erantzunak emateko gauza; lehenik eta behin, sindikatuak osagarria eskatzen hasi zirenean, EAJ eta PSEk horren beharra ukatzeari ekin zioten, gero horren kontra bozkatu zuten Diputazio Iraunkorrean, eta azkenean atzera egin eta oso motz geratzen den osagarri bat onartu behar izan dute. Beti berandu, atzetik, arazoei aurrea hartu gabe”.

EH Bilduko legebiltzarkidearen esanetan, “kaltetutako langileak modu iraunkorrean Diru-Sarrerak Bermatzeko Errentaren bidez babestu beharrean, guk proposatu bezala, Jaurlaritzak Enplegu Sailak kudeatuko duen laguntza bat sortzea hobetsi du, baina autonomo eta kulturgileentzako laguntzekin gertatu dena ikusita, okerrena espero dezakegu, enegarren lardaskeria”.

EAJ eta PSEk Legebiltzarra barik gobernatzea erabaki dute haientzat oztopo bat delakoan

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

| 2020-06-11 13:13:00

EAJ eta PSEk oztopotzat dute Legebiltzarra, euren interes alderdikoiei kalte egiten dielakoan, eta pandemiaren etapa honetan berau gabe, existitu ez bailitzan, gobernatzea erabaki dute. Gaur EH Bilduren proposamenak blokeatu dituzte berriro ere Mahaian, Diputazio Iraunkorrean eztabaidatzeko aukera bertan behera utzita. Euren ohiko jokaera izan da, ia sistematikoa, Urkulluk Legebiltzarra desegin zuenetik, oposizioaren ahotsa, EH Bildurena bereziki, isilarazteko.

Irailean hasiko den ikasturteari begira hezkuntza komunitatean ezinegona eta ziurgabetasuna erabatekoak diren honetan, EAJk eta PSEk erabaki dute ez dela beharrezkoa datorren ikasturtearen planifikazioaz eztabaidatzea eta EH Bilduren legez besteko proposamena tramitatzeari uko egin diote, jakin badakitelako proposamen horrek (gehienez 15 ikasle gelako egotea, %20 irakasle gehiago kontratatzea eta ikasle guztiei ‘on-line’ ikasteko baliabide teknologikoak bermatzea) Hezkuntza Sailaren planifikazio falta agerian utziko zuelako. Ikastetxe guztietan osasuna eta hezkuntza kalitatea bermatzeko irailean hartu beharreko neurriak orain eztabaidatu eta adostu behar dira, Legebiltzarrean eta sektoreko eragileekin ere bai, eta sekulako arduragabekeria da eztabaida hori eragoztea, hain justu Isabel Celaaren Ministerioaren irizpideak bat ez datozenean Lakuako Hezkuntza Sailaren asmoekin.

Osakidetzako Lehen Arreta indartzeko EH Bilduren proposamena ere (bertako plantilla %10 handitzea) atzera bota dute EAJ eta PSEk, eztabaidatzeko aukerarik eman gabe. Euren erabakia iraingarria da Osakidetzako langile guztientzat. EAJ eta PSE ez dira oraindik konturatu txaloak ez direla nahiko, osasun sistema publikoa indartzeko neurri eraginkorrak behar direla. Gaurkoa bezalako erabakiekin erakusten ari dira pandemian ez dutela ezer ikasi eta ez dutela azken urteotan Osakidetzan egin dituzten murrizketak iraultzeko borondaterik.

EH Bilduren iritziz, EAJ eta PSE Legebiltzarreko Mahaian duten jarrera murriztaile orokorretik harago, bereziki salagarria da nola jokatzen ari den Bakartxo Tejeria otsailaz geroztik. Legebiltzarreko presidentea izanik, berari dagokio instituzioak krisialdi honetan bete beharko zituzkeen funtzioak indartzea, baina, hori egin beharrean, Legebiltzarra debaluatzeari ekin dio, instituzioa EAJren interes partikularren menpe jarrita.

ALBISTEAK

EH Bilduren ekimenez, Legebiltzarrak bat egingo du bihar Torturaren Biktimei Laguntzeko Egunarekin

2020-06-25 11:47:00

Legebiltzarrak torturaren aurkako kartela jarriko du lehen aldiz fatxadan, torturaren biktimak aitortu eta pairatu duten bidegabekeria salatzeko.

Jaurlaritzak ebidentzia onartu eta atzera egin behar izan du enplegu erregulazio sariak osatzeko

2020-06-18 17:39:00

EH Bilduk gogora ekarri du osagarri hori proposatu zuela Legebiltzarrean eta EAJ eta PSE kontra agertu zirela. Denbora alferrik galdu dute horren ondorioz eta anbizio gutxiko neurria iragarri dute orain, aldi baterako enplegu erregulazioan egon diren eta dauden milaka langile kanpo utzita.

EAJ eta PSEk Legebiltzarra barik gobernatzea erabaki dute haientzat oztopo bat delakoan

2020-06-11 13:13:00

EH Bilduk oposizioaren proposamenak ia sistematikoki blokeatzea eta isilaraztea egotzi die EAJ eta PSEri. Ez dute Diputazio Iraunkorrak euren politiken gabeziak agerian uztea nahi eta gaur datorren ikasturtearen planifikazioaz eta Osakidetzako Lehen Arreta indartu beharraz eztabaidatu ahal izatea galarazi dute.

Montai auziak erakusten du EAJren karneta edukitzeak abantailak ematen dituela kontratu publikoak lortzeko orduan

2020-06-09 12:29:00

“Herri duin batean ezin da pentsatu normala dela, eta are gutxiago onargarria, gobernuan dagoen alderdikoa izateagatik erraztasunak izatea Administrazioarekin kontratatzeko”. EH Bilduk azalpenak eskatu ditu Legebiltzarrean Montai Taldeari esleitutako kontratuei buruz.