Kongresua-Senatua

Adostutako elkarlan estrategikoa irudikatu dute EH Bilduk eta ERCk Senatuko talde parlamentarioaren lehen bileran

Legegintzaldiko erronkak aztertzeko lehen bilera egin dute ‘Esquerra Republicana-EH Bildu’ talde parlamentarioko 15 senatariek. Ezker subiranistek indarrak biderkatzeko duten gaitasuna goraipatu du Gorka Elejabarrieta bozeramaile albokoak.

| 2019-06-18 11:43:00

Hurrengo hilabeteotako erronkak aztertzeko lehen bilera egin dute gaur EH Bilduko eta ERCko senatariek Senatuan osatu duten talde parlamentario partekatu gisa. Legegintzaldian zehar hizpide izango dituzten ildoez eztabaidatu dute. Ezker subiranisten gorakadaren isla eta joan den hauteskundeetan jasotako babesaren adierazle, Senatuko hirugarren talde handiena izango da ‘Esquerra Republicana-EH Bildu’ deiturikoa, soilik PSOEk eta PPk osatutako taldeen atzetik.

Gaur eguerdian eginiko bileran, EH Bilduko eta ERCko 15 senatariek elkar ezagutzeko aukera izan dute. Euskal Herriko eta Kataluniako herritarren erabakitzeko eskubidearen, preso politiko guztien askatasunaren eta eskubide sozialen alde lan egiteko konpromisoa hartu dute guztiek. Martxan jarraitzen dute, gainera, bi alderdien arteko elkarlan estrategikoa aurrera eramateko sortu diren bi jarraipen batzordeak: batzorde estrategikoa eta operatiboa.

Talde parlamentarioaren bozeramailetza Mirella Cortések hartuko du, aurreko legealdian ERC senatari izandakoak. Bozeramailearen ondokoak, berriz, Bernat Picornell (ERC) eta Gipuzkoako senatari eta koalizio abertzalearen nazioarteko arduradun Gorka Elejabarrieta izango dira. Senatuan bidelagun izango dituen senatariek bildu ostean, bi indar subiranisten arteko akordioa goraipatu du Elejabarrietak. Helburu amankomunetara iristeko asmoz, ezker subiranistek indarrak batzeko, aliantzak sustatzeko eta eraginkortasuna biderkatzeko daukaten gaitasuna nabarmendu du, gainera, “une oro banantzeko hautua hartzen duten alderdien aurrean”.

Ildo berean, Elejabarrietak gogorarazi du EH Bilduk eta ERCk elkarrekin jokatuko dutela Sanchezen inbestidura saioaren partida, eta jarrera amankomun bat adosteko lanean dihardutela. EH Bilduren nazioarteko arduradunak Espainiako presidente izateko hautagaiari eskatu dio elkarrizketaren eta akordioaren bidea urra dezala behingoz, “ez errepresioarena”. Elejabarrietak uste du Sanchezek euskal herritarren eta katalanen aldarrikapenei bizkarra ematen badie berriro ere, nekez osatuko duela horrenbeste desio duen agintaldi egonkorra. Elejabarrietari Idurre Bideguren batu zaio Senatuan, berriki Eusko Legebiltzarrak izendatutako senatari autonomikoa eta zortzi urtez Bermeoko (Bizkaia) alkate izandakoa.

ERCk eta EH Bilduk taldea partekatuko dute Senatuan eta Kongresuan koordinazio estrategikoarekin jarraituko dute, talde propiorik osatu ez arren

Kongresuan koordinazio politikoari eta estrategikoari eustea erabaki dute, taldea partekatu ez arren, dituzten helburu politikoak erdietsi ahal izateko

| 2019-05-28 13:57:00

ERC eta EH Bilduko zuzendaritza politikoek Senatuan talde propioa osatzea erabaki dute. Kongresuan, ordea, ez dute taldea partekatuko, baina koordinazio politikoari eta estrategikoari eustea erabaki dute, taldea partekatu ez arren, dituzten helburu politikoak erdietsi ahal izateko.

ERCk eta EH Bilduk uste dute instituzioetan taldea partekatzeak edo ez egiteak ez dituela aldentzen zehaztutako helburuetatik eta adostutako akordio estrategikotik. Ezkerreko bi indar subiranistek azpimarratu dute kontu teknikoak direla horiek guztiak, hauteskundeen ostean izandako emaitzetatik eratorritako baliabideen optimizazioa baita garrantzitsuena.

ERCk eta EH Bilduk lotutako aliantza estrategikoak eta elkarlanerako akordioak lau ardatz nagusi jasotzen ditu, gutxienekoen programa baten baitan:

  • - Gure nazioen autodeterminazio eskubidearen defentsa.
  • - Preso politiko guztiak aske uztea eta erbesteak daudenak itzultzea.
  • - Errepresioaren aurkako eta oinarrizko eskubideen defentsa.
  • - Politika austeriziden eta neoliberalen eta eskuin muturraren eta faxismoaren gorakadaren aurrean, eskubide ekonomikoen eta sozialen defentsa.
  • - Pertsonak politika publikoen erdigunean jarriko dituen eredu sozial eta ekonomikoaren defentsa.

Akordio politiko hori gauzatzeko, ERCk eta EH Bilduk honakoa adostu dute:

  • - Kongresuan eta Senatuan ekimen politiko bateratua izatea.
  • - Masa izaera zein izaera instituzionala izango duten egitasmo adostuak gauzatzea.
  • - Nazioarteko komunitatean politika koordinatuta eta bateratua izatea.
  • - Estaturik gabeko beste nazioekin elkarlanerako esparruak bilatzea modu bateratuan.

Akordio horren ondoren, ERCk eta EH Bilduk bi jarraipen batzorde eratu zituzten: batzorde estrategikoa eta batzorde operatiboa. Hain justu, Madrilgo zein Europako instituzioetan bi indar politikoek, adostutako gutxieneko akordioaren baitan, egingo duten elkarlana bermatzea eta dinamizatzea izango da bi jarraipen batzordeen zeregina.

ALBISTEAK

Uholdeek Tafallaldean eragindako kalteei aurre egiteko neurriak eskatu dizkio EH Bilduk Madrili

2019-07-09 13:09:00

Koalizio subiranistak legez besteko proposamen bat eta galdera sorta bat aurkeztu du Kongresuan, Espainiako Gobernuari berehala esku har dezala exijituz. Diru laguntzen programa integral bat martxan jartzea eta oinarrizko zerbitzuak ahalik eta azkarren berrezartzea ezinbestekotzat jo du EH Bilduk.

Inbestidura saiorako jarrera bateratua adostetik hurbil daudela esan dute ERCk eta EH Bilduk

2019-06-28 14:50:00

Bi alderdietako ordezkariak Bartzelonan bildu dira inbestidura saiorako jarrera bateratua adosten hasteko eta aliantza estrategikoa martxan jartzeko.

Aurrerapen sozialak lehenetsi ditu EH Bilduk Kongresuan aurkeztu dituen lehen egitasmoetan

2019-06-21 11:00:00

Ezkerreko indar subiranisten koalizioak lehen proposamenak erregistratu ditu euskal erakundeen burujabetza handitzeko bidean: 1.080 euroko gutxieneko pentsioak, 1.200 euroko gutxieneko soldatak, lan erreformen indargabetzea eta eskualdatzeko falta diren eskumenen transferentzia.

Adostutako elkarlan estrategikoa irudikatu dute EH Bilduk eta ERCk Senatuko talde parlamentarioaren lehen bileran

2019-06-18 11:43:00

Legegintzaldiko erronkak aztertzeko lehen bilera egin dute ‘Esquerra Republicana-EH Bildu’ talde parlamentarioko 15 senatariek. Ezker subiranistek indarrak biderkatzeko duten gaitasuna goraipatu du Gorka Elejabarrieta bozeramaile albokoak.