Kongresua-Senatua

Aurrerapen sozialak lehenetsi ditu EH Bilduk Kongresuan aurkeztu dituen lehen egitasmoetan

Ezkerreko indar subiranisten koalizioak lehen proposamenak erregistratu ditu euskal erakundeen burujabetza handitzeko bidean: 1.080 euroko gutxieneko pentsioak, 1.200 euroko gutxieneko soldatak, lan erreformen indargabetzea eta eskualdatzeko falta diren eskumenen transferentzia.

| 2019-06-21 11:00:00

Euskal erakundeen burujabetza handitu eta herritarren bizi baldintzak hobetzeko asmoz, legegintzaldiko lehentasun sozialak ezarri ditu EH Bilduk Kongresuan aurkeztu dituen lehen legez besteko proposamenetan. Gaur erregistratutako aurreneko egitasmoaren bitartez, 1.080 €-ko gutxieneko pentsioak bermatzea eta pentsiodunen aldarrikapenei bide ematea nahi du EH Bilduk. Gizarte Segurantzaren transferentziaren eskutik, pobreziaren muga baino txikiagoa den pentsiorik ez onartzeko konpromisoa hartu du koalizio abertzaleak, Europako Eskubide Sozialen Gutunari jarraiki.

Beste lehentasunetako bat, Hego Euskal Herrian, 1.200 euroko gutxieneko soldata –urtean 14 ordainsarirekin- indarrean sartzea da. Neurri horri esker, gutxieneko soldata tokian-tokiko errealitate sozioekonomikora, bizi-mailara eta eredu produktibora egokitzea nahi du indar subiranistak, sindikatu eta eragileen eskariei bide emanda. Horretarako, ezinbestekotzat jotzen du 2010eko (PSOE) eta 2012ko (PP) lan erreformak bertan behera uztea, lan harremanak eta negoziazio kolektiboa lehenetsiko dituen eredu propio bat abian jartzeko. “Prekaritateari aurre egitea, lan baldintzak hobetzea eta bizi proiektu duin eta egonkorrak garatzea lagun dezake soldatak igotzea”, adierazi du Mertxe Aizpurua diputatuak.

Horrez gain, 2012. urtean onartutako Aurrekontu Egonkortasun Legea indargabetzea exijitzeko, legez besteko proposamena aurkeztu du EH Bilduk, tokiko erakundeentzat “itogarria” dela iritzita. “Izaera birzentralizatzea du, herritarren zerbitzura dauden erakundeen funtzionamendua mugatu eta baldintzatzen duelako bete-betean”, nabarmendu du EH Bilduko ordezkariak, eta gaineratu: “Lege honek zuzenean kolpatzen ditu tokiko erakundeen eskumenak eta udalen autonomia txikitzen du. Beren burua kudeatzeko gaitasun nahikoa dute udalek. Ez dira heldugabeak, ez dute inoren tutelarik behar superabita zertara bideratu erabakitzeko”.

Gaur-gaurkoz eskualdatzeko falta diren Gernikako Estatutuko 36 eskumenen eta Nafarroako Foru Hobekuntzako 25 eskumenen transferentzia lehenbailehen egitea ere nahitaezkoa da EH Bildurentzat. Transferentziak sei hilabeteko epean gauzatzeko egutegi bat adostu zuten Espainiako Gobernuak eta Eusko Jaurlaritzak, baina garaiz betetzeko borondaterik ez dutela ikusita, EH Bilduk legez besteko proposamen bat aurkeztu du Espainiako Gobernuari eskatuz bizkortu dezala prozedura y sar ditzala egutegi horretan Gizarte Segurantzari eta Espetxeen kudeaketari dagozkion eskumenak, duela 40 urte hitzartutakoa irmo betez. Azken lau hamarkadotako menpekotasun egoera albo batera utzi eta berdinetik berdinerako harremana eraikitzeko garaia dela uste du EH Bilduk.

Adostutako elkarlan estrategikoa irudikatu dute EH Bilduk eta ERCk Senatuko talde parlamentarioaren lehen bileran

Legegintzaldiko erronkak aztertzeko lehen bilera egin dute ‘Esquerra Republicana-EH Bildu’ talde parlamentarioko 15 senatariek. Ezker subiranistek indarrak biderkatzeko duten gaitasuna goraipatu du Gorka Elejabarrieta bozeramaile albokoak.

| 2019-06-18 11:43:00

Hurrengo hilabeteotako erronkak aztertzeko lehen bilera egin dute gaur EH Bilduko eta ERCko senatariek Senatuan osatu duten talde parlamentario partekatu gisa. Legegintzaldian zehar hizpide izango dituzten ildoez eztabaidatu dute. Ezker subiranisten gorakadaren isla eta joan den hauteskundeetan jasotako babesaren adierazle, Senatuko hirugarren talde handiena izango da ‘Esquerra Republicana-EH Bildu’ deiturikoa, soilik PSOEk eta PPk osatutako taldeen atzetik.

Gaur eguerdian eginiko bileran, EH Bilduko eta ERCko 15 senatariek elkar ezagutzeko aukera izan dute. Euskal Herriko eta Kataluniako herritarren erabakitzeko eskubidearen, preso politiko guztien askatasunaren eta eskubide sozialen alde lan egiteko konpromisoa hartu dute guztiek. Martxan jarraitzen dute, gainera, bi alderdien arteko elkarlan estrategikoa aurrera eramateko sortu diren bi jarraipen batzordeak: batzorde estrategikoa eta operatiboa.

Talde parlamentarioaren bozeramailetza Mirella Cortések hartuko du, aurreko legealdian ERC senatari izandakoak. Bozeramailearen ondokoak, berriz, Bernat Picornell (ERC) eta Gipuzkoako senatari eta koalizio abertzalearen nazioarteko arduradun Gorka Elejabarrieta izango dira. Senatuan bidelagun izango dituen senatariek bildu ostean, bi indar subiranisten arteko akordioa goraipatu du Elejabarrietak. Helburu amankomunetara iristeko asmoz, ezker subiranistek indarrak batzeko, aliantzak sustatzeko eta eraginkortasuna biderkatzeko daukaten gaitasuna nabarmendu du, gainera, “une oro banantzeko hautua hartzen duten alderdien aurrean”.

Ildo berean, Elejabarrietak gogorarazi du EH Bilduk eta ERCk elkarrekin jokatuko dutela Sanchezen inbestidura saioaren partida, eta jarrera amankomun bat adosteko lanean dihardutela. EH Bilduren nazioarteko arduradunak Espainiako presidente izateko hautagaiari eskatu dio elkarrizketaren eta akordioaren bidea urra dezala behingoz, “ez errepresioarena”. Elejabarrietak uste du Sanchezek euskal herritarren eta katalanen aldarrikapenei bizkarra ematen badie berriro ere, nekez osatuko duela horrenbeste desio duen agintaldi egonkorra. Elejabarrietari Idurre Bideguren batu zaio Senatuan, berriki Eusko Legebiltzarrak izendatutako senatari autonomikoa eta zortzi urtez Bermeoko (Bizkaia) alkate izandakoa.

ALBISTEAK

Inbestidura saiorako jarrera bateratua adostetik hurbil daudela esan dute ERCk eta EH Bilduk

2019-06-28 14:50:00

Bi alderdietako ordezkariak Bartzelonan bildu dira inbestidura saiorako jarrera bateratua adosten hasteko eta aliantza estrategikoa martxan jartzeko.

Aurrerapen sozialak lehenetsi ditu EH Bilduk Kongresuan aurkeztu dituen lehen egitasmoetan

2019-06-21 11:00:00

Ezkerreko indar subiranisten koalizioak lehen proposamenak erregistratu ditu euskal erakundeen burujabetza handitzeko bidean: 1.080 euroko gutxieneko pentsioak, 1.200 euroko gutxieneko soldatak, lan erreformen indargabetzea eta eskualdatzeko falta diren eskumenen transferentzia.

Adostutako elkarlan estrategikoa irudikatu dute EH Bilduk eta ERCk Senatuko talde parlamentarioaren lehen bileran

2019-06-18 11:43:00

Legegintzaldiko erronkak aztertzeko lehen bilera egin dute ‘Esquerra Republicana-EH Bildu’ talde parlamentarioko 15 senatariek. Ezker subiranistek indarrak biderkatzeko duten gaitasuna goraipatu du Gorka Elejabarrieta bozeramaile albokoak.

ERCk eta EH Bilduk taldea partekatuko dute Senatuan eta Kongresuan koordinazio estrategikoarekin jarraituko dute, talde propiorik osatu ez arren

2019-05-28 13:57:00

Kongresuan koordinazio politikoari eta estrategikoari eustea erabaki dute, taldea partekatu ez arren, dituzten helburu politikoak erdietsi ahal izateko