Araba

EH Bildu-k erresidentzia pribatuen eskua hartze eta kontrol zuzena Aldundiaren esku gera dadin azpimarratu du

Plantillak indartzeko beharra ikusita, EH Bildu-k beren espezialitateko azken ikasturtea egiten ari diren pertsonak gizarte-zerbitzuetan sartu ahal izatea proposatu du, Erizaintzako eta Medikuntzako ikasleekin egin den bezala.

| 2020-03-31 09:32:00

EH Bilduk erresidentzia pribatuen esku hartzea eta kontrol zuzena lehenbailehen hartzeko eskatu dio berriro Arabako Foru Aldundiari. Gainera, duela astebete bezala, batzarkide taldeak berretsi du garrantzitsua dela COVID19-aren testa 48 ordu baino gutxiagoan egitea baliabide sozial, publiko eta pribatuetako langile guztiei, lehentasuna emanez adineko pertsonei eta ezintasunen bat duten pertsonak edo patologia anizkoitzak dituzten pertsonak artatzen dituzten zentroei.

Arabako Batzar Nagusietan baliabide sozialen plantilak babesteko eta indartzeko egindako proposamenen barruan egin ditu eskaera horiek EH Bildu-k. Proposamen horien artean daude, besteak beste, langileen positiboak eta bajak handitzeko aurreikuspena egitea, gizarte-zerbitzuak arreta gabe gera ez daitezen berrantolaketa-planak diseinatzea, gizarte-baliabideetako langile guztiek NBE egokiak eta nahikoak dituztela bermatzea edo "baimen berezia" ematea gaur egun Gizarte Langintzako, Gizarte Hezkuntzako, Gizarte Integrazioko, Laguntzaile Soziosanitarioko eta Sukaldaritzako azken ikasturtean dauden pertsonei. Eta aisialdiko begiraleek, berriz, beren jardueretara egokitzen diren gizarte-baliabideetan lan egin ahal izango dute.

Prentsa ohar baten bidez, EH Bildu-k adierazi du proposamen horiek aurkezten dituztela alde batetik, beren lanpostuetan jarraitzen duten jarduneko langileak babestu ahal izateko, eta, bestetik, langileen lan-bajek eragindako baliabideen plantillak indartzeko.

"Egungo gizarte eta osasun krisiak gure gizarteko sektore ahulenetan eta artatzen dituzten gizarte baliabide ezberdinetan jarri du arreta", salatu du Kike Fernandez de Pinedo EH Bildu-ko Batzar Nagusietako bozeramaileak. "'Lan sozialak', bere termino zabalenean, bere garrantzi handia utzi du agerian, pertsona orok izan beharko lukeen zuzentasun sozialean eta duintasunean oinarritutako gizarte justuago bat lortzeko".

Horregatik, Fernandez de Pinedoren arabera, Foru Erakundeak lehentasuna eman behar die langile guztiei une hauetan bereziki.

Zenbat langile izan dira kutsatuak?

Bestalde, EH Bildu-k informazio-eskaera bat erregistratu du Gizarte politiketako Foru Diputatuari zuzenduta, Saileko baliabideetako zenbat langile kutsatu diren, berrogeialdian dauden edo COVID19 zerbitzuak Alarmako Estatuaren hasieratik gaur arte bajan dauden jakiteko.

Amaitzeko, eskaera berean, EH Bildu-k adierazi du "ezinbestekoa" dela informazio hori egunero ematea, egoitza publiko zein pribatuei dagokienez.

Argantzongo Udalak desinfekzio lanei ekin die berriro

Kontsulta medikoak Trebiñun artatzen dira, beti ere aldez aurretik hitzordua eskatuta

| 2020-03-30 10:56:00

Argantzongo Udalak erabilera komuneko tokiak desinfektatzeko lanei ekin die berriro astelehen honetan. Joan den astelehenean hasi zituzten lan horiek, eta astean hiru egunetan egiten dituzte (astelehenetan, asteazkenetan eta ostiraletan), eta udal langileen bitartez eramaten dituzte aurrera.

Neurri bat baino ez da. Joan den martxoaren 12an bere kirol eta kultur instalazioak itxi zituen udalerri. Ordutik, ludoteka, informatika gela, zentro sozio-kulturala, padel pista, gimnasioa, Siloko erabilera anitzeko gela eta erromesen aterpetxea itxita daude.

Argantzongo anbulategia ere itxita dago. Horren ordez, COVID19 birusarekin bateragarriak diren sintomak dituzten bizilagunek (sukarra, arnasteko zailtasuna …) 945 360 140 telefonora deitu eta Trebiñuko anbulatoriora joan behar dute, beti ere aldez aurretik hitzordua eskatuta.

Bestalde, Argantzongo Udalak herritarrei arreta telematikoa eskaintzen die 945.373.006 telefonoan eta udaletxea@lapuebladearganzon.es helbide elektronikoan. Bestalde, gizarte langileak pertsona ahulenak artatzen jarraitzen du 947.35.42.21 telefonoaren bidez.

Pablo Ortiz de Latierro herriko alkatearen esanetan, "lehen unetik hartu dira osasun agintariek gomendatutako neurriak, kutsatze kopurua handitu ez dadin". Era berean, "kutsatze horiei aurrea hartzeko gomendioak jarraitzera" animatu ditu bizilagunak.

 

 

ALBISTEAK

Donemiliagak adinekoei laguntzeko programa konfinamendura egokitu du

2020-04-03 12:27:00

Udalak, boluntarioekin batera, desinfekzio lanak egiten ditu udalerriko 15 herrietan

EH Bildu-k hala eskatuta, Arabako Batzar Nagusietako Bozeramaileen Batzordeak talde guztien parte-hartzea ahalbidetuko duen akordioa eztabaidatuko du

2020-04-03 09:29:00

Kike Fdz de Pinedo: “Egungo impasse egoerak larriki hondatzen ari ditu Foru Gobernuaren gaineko jarraipen, kontrol eta fiskalizazio funtzio legitimoa egiteko ditugun gutxieneko baliabideak. EH Bildu-tik beste parte-hartze eta kontrol mota bat posible dela uste dugu, non denok lekua izango dugun"

Zalduondok konfinamenduari buruzko argazki lehiaketa antolatu du

2020-04-02 10:45:00

Bidalitako materialarekin erakusketa bat antolatuko da alarma egoeraren ostean