Araba

Albisteak

EH Bilduk egoitza publiko eta txikien eredua eta langileen lan baldintza duinak aldarrikatu ditu


Mikel Otero: "Etorkizun hobe bati ateak irekitzeko, faxismoa behin betiko baztertzeko, XXI. mendeko erronka handiei aurre egiteko, ingurumen politika eraldatzailea garatzeko, ezkerreko botoa, boto ekologista, boto feminista, langileen botoa, boto eraldatzailea EH Bildun batu behar da"

| 2020-07-03 10:51:00

Mikel Otero EH Bilduren Arabako zerrendaburuak agerraldia egin du gaur San Martingo adinekoen egoitzaren aurrean; izan ere, COVID 19aren ondorioz kutsagune nagusietako bat izan zen hiri horretan. Bizi izan dugun osasun-krisiak gogor jo du, eta bereziki gure adinekoak, eta oraingo sistemaren akatsak agerian utzi ditu, zainketen arloan ditugun gabezia guztiak ikusi ditugulako. Hori dela eta, Arabako zerrendaburuak esan du EH Bilduren apustua "egoitza publiko eta txikien eredua" dela, "Auzoz auzo, herriz herri, zaintzeko ardura profesionalen edo senideen ardura bakarrik izan ez dadin, gizarte osoak parte hartu behar du adinekoekin batera hainbat jardueratan".

Mikel Otero EH Bilduko Arabako zerrendaburuak adinekoentzako egoitza-zentroen gaineko kontrol publikoa bermatzea eskatu du, eta, aldi berean, egunero gutxienez bi orduko zuzeneko arreta izatea. Bien bitartean, adinekoentzako egoitza-zentroen gaineko kontrol publikoa bermatu behar da, egunean gutxienez bi orduko arreta zuzena bermatuta izan behar baitute, eta egoitza-zentroen % 70 indibidualak izan behar dira.

Arabako Foru Aldundiak emandako azken datuen arabera, 139 pertsona hil dira egoitzetan eta kutsatutakoak 555 baino gehiago dira. Infektatutako pertsonen artean, langile askok ez dute izan beren lana berme osoz egiteko behar beste segurtasun-ekipamendurik.

Aste honetan bertan jakin dugu fiskaltzak ikerketa bat ireki duela, beste egoitza pribatu batean, erabiltzaile gaixo bat beranduegi ospitalera eramateagatik. "Horrek, gure zaintza sistemak ez duela funtzionatzen agerian utzi du", adierazi du Oterok, eta EH Bilduk egoitza publiko eta txikien eredu berri bat eskatzen duela gaineratu du, baita langileen lan baldintza duinak ere.

Ildo horretan, EH Bilduk bi proposamen zehatz ditu. Lehenengoa da 1.500 euroko aparteko ordainsaria ordaintzea egoitza-zentroetako langile guztiei. Bigarrena, legez 65 urtetik aurrerako gutxieneko pentsio nahikoa bermatzea, 1080 euroko pentsioa, etxean urte luzez senideen zaintza beren gain hartu duten milaka emakumeei.

Bestalde, Mikel Otero EH Bilduko Arabako hautagaiak agerraldia egingo du Maddalen Iriarte EH Bilduko lehendakarigaiarekin eta Eba Blanco Arabako zerrendetako bigarrenarekin batera. Oterok ohartarazi duenez, herrialde honetako eskuinak, arkume larruz jantzita, etorkizunari aurre egiteko eredu kontrajarririk ez dagoela sinetsarazi nahi digu, nahiz eta halakorik badagoen. "Ezkerreko eta eskuineko politikak daude. Eta hemen, Araban, Bizkaian eta Gipuzkoan, ezkerreko alternatibak EH Bildu du izena. Uztailaren 12an ezkerreko botoa EH Bildun batu behar da. Etorkizun hobe bati ateak irekitzeko, faxismoa behin betiko baztertzeko, XXI. mendeko erronka handiei aurre egiteko, ingurumen politika eraldatzaileak garatzeko, ezkerreko botoa, boto ekologista, boto feminista, langileen botoa, EH Bilduko boto eraldatzailearen inguruan batu behar dira", adierazi du Arabako zerrendaburuak.