Nafarroa

Testa Residencial-ek kaltetutako familiei Gobernuak irtenbide azkar bat emateko eskatu du EH Bilduk

| 2020-02-13 13:07:00

EH Bilduren ustez, "oso kezkagarria da 160 familia kalean geratzea, alokairuen bat-bateko igoera handia ordaindu ezin dutelako", Sanduzelai, Arrotxapea eta Buztintxurin Testa Residencial inbertsio funtsak hainbat eraikin erosi ostean. Gainera, "kontuan hartu behar da kaltetutako pertsona gehienak baliabide gutxiko familiak, pentsiodunak edo desgaitasunen bat duten pertsonak direla, eta horiek beren etxeetatik alde egin beharko dutela, bestelako tokirik izan gabe, eta erabateko babesgabetasun-egoeran geratzen direlarik".

Era berean, EH Bilduk salatu duenez, "familia horiek are egoera kritikoagoan geratzen dira" alokairu babestuko kontratuak amaitzean Nafarroako Gobernuaren diru-laguntzak jasotzeari uzten diotelako.

Zentzu horretan, koalizioaren udal taldeak egin duen bezala, EH Bildu Nafarroak Iruñea etxegabetzerik gabeko hiri izendatu zutela gogorarazi du, eta "kaltetutako familiei erantzun azkar eta eraginkorra" emateko eskatu dio Nafarroako Gobernuari. EH Bilduren arabera, "Gobernuare ardura da bazterketa soziala jasateko arriskuan geratzen diren pertsona horien beharrei erantzutea eta etxebizitza duina bermatzea".

Hori dela eta, Jose Maria Aierdi Lurralde Antolamendu, Etxebizitza, Paisaia eta Proiektu Estrategikoetako sailburuaren premiazko agerraldia eskatu du EH Bildu Talde Parlamentarioak, etxebizitza tasagatik kaltetutako pertsonen egoerari buruzko azalpena eman dezan.

Nafarroan 200 guardia zibil gehiago sartzea gaitzesten du EH Bilduk

| 2020-02-10 16:48:00

EH Bildu Talde Parlamentarioaren bozeramailekide Adolfo Araizek kritikatu egin du Guardia Zibilak Nafarroan 200 agente gehiago sartzeko erabakia, Espainiako Gobernuaren ordezkariak iragarritakoari jarraiki. "Erabaki honek joan den larunbatean eskuinak eta ultraeskuinak deitutako elkarretaratzeari emandako erantzuna dirudi, non ikusi ahal izan genuen nola erabiltzen zen Nafarroa propaganda helburuekin, eta Nafarroako autogobernuaren zein Foruzaingoaren aurkako aldarrikapenak egin ziren", gaitzetsi du Araizek.

Zentzu horretan, EH Bilduko parlamentariak gogorarazi duenez, "Nafarroa da segurtasun kidego ezberdinek, eraginkortasun ezaren adibide argi batean, eskumen berdinak erabiltzen dituzten lurralde bakarra". Eta, era berean, gaitzetsi egin du "Nafarroak Europako polizia ratio altuena duela eta badirudi batzuek horrela izaten jarrai dezan nahi dutela".

Beraz, Araizek eskatu bezala, "lehenbailehen egin behar dira transferentziak, ez bakarrik trafikoaren arloan, baita herritarren segurtasunaren arloan ere, horiek Nafarroari baitagozkio, Foruzaingoa Nafarroan erreferentziazko polizia izan dadin, dagozkion segurtasun-eskumenak garatuz", eta "ez dadin jarraitu  Guardia Zibilaren edo Polizia Nazionalaren agenteen ratioa handitzen eskuinaren eskakizun jakin batzuk betetzeko”.

ALBISTEAK