Nafarroa

Kultur sektorean premiazko neurriak hartzeko plana martxan jartzeko eskatu dio EH Bilduk Nafarroako Gobernuari

| 2020-04-15 13:40:00

EH Bildu Nafarroa Talde Parlamentarioak "COVID-19k Nafarroako kultur sektore osoan duen eraginaren indar berezia" nabarmendu du, eta Nafarroako Gobernuari eskatu dio lan-mahai bat sortzeko, eragile ezberdinen parte hartzeaerkin.

EH Bilduk azaldu duenez, "osasun-krisiak gogor jo du gure gizartearen esparru askotan, hildako ehunka pertsonarekin". Hala ere, koalizio subiranistak adierazi duenez, "krisiak eta horren ondorioek erakunde publikoen ekintza eta esku-hartzea eskatzen dute hainbat arlotan, eta kultur sektorea horietako bat da, zalantzarik gabe".

EH Bilduk prentsa ohar batean azaldu duenez, "bertan behera geratu dira ekitaldi kultural guztiak, eta horrek eragina izan du artisten, kultur sustatzaileen, auditorioen, aretoen eta sektoreko enpresen jardunean...". Hala, "uneotan Nafarroako Gobernuaren menpeko kultur ekipamendu gehienak itxi dira jendearentzat: museoak, artxiboak, liburutegiak (herritarrei ematen zaien arreta telefonikoa eta telematikoa salbatuz) eta abar". Era berean, "udarako aurreikusita dauden berezko kultur programa gehienak (Erriberriko Antzerki Jaialdia, Organo Zikloa, Lizarrako Antzinako Musika Astea, Erdi Aroko Ikasketen Astea…) airean daude, DNA gelditu da, Nafarroako Dantza Jaialdia, apirilean egitekoa zena...".

Ildo horretan, EH Bilduk adierazi du kultura "funtsezko elementua" dela "bai gizartearen eraketan, bai integrazioan eta garapenean ere". Horrela, 'COVID-19ren pandemiak eragindako krisiaren aurrean Nafarroako aktibo kulturalen adierazpena'-ri erantzunez, Talde Parlamentarioak publikoki eskatu dio Nafarroako Gobernuari Kultura Sektoreari Laguntzeko Premiazko Neurrien Plan bat egiteko. "Plan horren edukia eta irismenean kultur sektore desberdinek parte hartuko dute, eta Nafarroako sektore kulturalari laguntzeko neurri ekonomikoak, finantzarioak eta araudiak aktibatzea izango du xede".

Pertsona guztien oinarrizko beharrak bermatzeko eskatu dio EH Bilduk Nafarroako Gobernuari

| 2020-04-07 12:39:00

EH Bildu Nafarroa Talde Parlamentarioak hainbat eskaera helarazi dio Mª Carmen Maeztu Eskubide Sozialetako kontseilariari, gizarte arloari dagozkionak, "ahal den neurrian, COVID-19ko krisiaren ondorioz Nafarroan familia ugarik jasan behar izan dituzten baldintza ekonomiko larriak arintzea" helburu dutenak.

Horren harira, EH Bilduk eskatu du "premiaz izapidetu daitezela osasun krisiaren ondorioz sortutako beharrei erantzuteko laguntza eskaerak". Horretarako, Talde Parlamentarioak Gizarte Eskubideen Departamentuari helarazi dio "beharrezkoa dela Nafarroako Gobernuko langileak berrantolatzea edota langile gehiago kontratatzea departamentu hori indartzeko, baita toki entitateetako gizarte zerbitzuak ere, larrialdietarako eta errenta bermaturako laguntzak eskatzeko tramite guztiak arintzeko asmoz".

Ildo beretik, EH Bilduren ustez, "bizi dugun salbuespen uneak exijitzen du hemendik aurrera eskatzen diren laguntzak ahalik eta azkarren ematea". Hortaz, eskatu du "osasun krisiaren aurretik emandako errenta bermatuak berritzeko prozedurak birplanteatzeko, eta ondoren justifikatu beharko diren ofiziozko berritzeak planteatzeko aukera aztertzeko".

Era berean, EH Bilduk ezinbestekotzat jotzen du, Maeztu kontseilariari jakinarazi dion bezala, "Madrildik datozen ia 5 milioiko laguntzak berehala banatzea, kontseilariak berak martxoaren 17an iragarritakoak, udalek eta mankomunitateek larrialdiko une hauetan eskura izan ditzaten".

Horrela, EH Bilduk eskatu du "azken asteotan izan diren zehapen-espedienteak bertan behera uzteko eta osasun krisia igaro arte ez tramitatzeko".

Azkenik, EH Bilduk prentsa ohar batean azaldu duenez, "pertsona askok ez dituzte ezagutzen salbuespen egoera honetan jaso ditzaketen laguntzak", eta, horregatik, koalizioak Nafarroako Gobernuari eskatu dio "beharrezko baliabide guztiak erabil ditzala herritar guztiei laguntza ekonomiko horiek jasotzeko dagozkien eskubideen berri emateko".