Nafarroa

COVID-19 duten gaixoak osasun pribatura bideratzeagatiko baldintza ekonomikoen negoziazioari buruz galdetu dio EH Bilduk Gobernuari

| 2020-05-09 10:12:00

EH Bildu Nafarroa Talde Parlamentarioak galdera idatzi bat eta ahozko beste bat erregistratu ditu datorren osteguneko osoko bilkurarako, Nafarroako Gobernuko presidenteari zuzenduta, martxoaren 15ean alarma egoera indarrean sartu zenetik osasun pribatura bideratu diren koronabirusarekin gaixotutako pazienteen kopurua eta ezaugarriak ezagutzeko, bai eta Nafarroako Gobernuak entitate pribatu horiei tarifak negoziatzeko planteatuko dizkien irizpideak ezagutzeko ere.
 

EH Bildu Nafarroak galdera hau egin du duela egun batzuk Gobernuko presidenteak pandemia egoera honetan lankidetza publiko-pribatuaren termino ekonomikoak oraindik negoziatu ez direla esan zuenelako. Bakartxo Ruiz bozeramaileak gogorarazi duenez, onartutako lehen Errege Dekretuaren eta gerora emandako Ministro Aginduaren bidez (COVID-19ak eragindako osasun-krisiaren egoera kudeatzeko neurriak jasotzen zituenak), "autonomia erkidegoek eskura izango dituzte osasun-zentro pribatuak eta bertako langileak".

Horren harira, Bakartxo Ruizek adierazi duenez, "Nafarroako Gobernuak osasun sistema osoa 'Nafarroako osasun sistema integratutzat' jo du aste hauetan zehar, eta, beraz, uste dugu kostu-prezioan edo Osasunbideak ezartzen dituen erreferentziako prezioekin egin beharko litzatekeela". Hala, "ezin da izan sektore pribatua publikoa baino garestiago gertatzea pandemia honi aurre egiteko, are gehiago Nafarroako Gobernuak baliabide publiko eta pribatuak erabili direla adierazi duenean", gaineratu du taldeko bozeramaileak.
 

Hori dela eta, beharrezkotzat jo du "Nafarroako Gobernuaren jarrera eta negoziazioa nola egingo den argitzea".

 

EH Bildu pozik agertu da Gobernuak azken Foru Lege Dekretuan onartutako premiazko neurrietan bere ekarpenak jaso izateagatik

| 2020-04-18 10:45:00

Nafarroako Gobernuak, joan den asteazkenean, Koronabirusaren osasun-krisiak (COVID-19) eragindako inpaktuari erantzuteko premiazko neurriak jasotzen dituen Foru Lege Dekretua onartu ondoren, EH Bildu Nafarroa Talde Parlamentarioak Nafarroako Gobernuari eskatu dio araudia garatzeko pertsona autonomoentzat onartutako laguntzak "ahalik eta eperik laburrenean kobratu ahal izateko".

 

Adolfo Araiz EH Bilduko parlamentariaren hitzetan, "laguntza hauek Gobernuaren eta gure Talde Parlamentarioaren arteko negoziazioaren emaitza dira, Gobernuak ulertu baitu legezko arauak aurrera ateratzeko modurik onena elkarrizketa eta ondorengo akordioa direla, aurreko jarrerak zuzenduz. Halaber, Gobernuaren jarrera jakin batzuen ondorioz, oposizioko taldeek bat egin behar izan zuten neurri berri horiei buruzko akordioa ahalbidetu duten bozketa batzuetan ".

 

Araizek adierazi duenez, "EH Bildun ziur gaude, Navarra Suma-ren zuzenketa gure botoekin onartu izan ez balitz, ez zela posible izanen gure zuzenketan jarduera utzi behar izan duten autonomoentzat defendatzen genuen laguntza onartzea". Parlamentariaren hitzetan, "pozten gara Gobernuak ulertu duelako posible dela hitz egitea, negoziatzea eta adostea, gero eta gehiago krisi ekonomiko eta sozial bihurtzen ari den krisi sanitarioaren eraginpean dagoen jendearen egoera hobetzeko".

 

Ildo horretan, EH Bildu pozik agertu da Nafarroako Gobernuak Foru Lege Dekretu horretan sartu dituelako "egin genizkion ekarpen guztiak, adibidez, herritarrek Kultura Departamentuari egin nahi dizkioten dohaintzetarako diru-sarreren partida bat irekitzearena, ezohiko ekintzetarako bideratuta dagoena, krisiaren ondorio ekonomikoak arintze aldera kulturaren sektorean". Onartutako dekretuak, halaber, "premiazko prozeduraren bidez kontratatuko duten Departamentuen ekintzen gaineko finantza-kontrol iraunkorraren beharra" jasotzen du, "Kontu-hartzailetzak normalean egiten dituen kontratuen aurretiko fiskalizazioa etetearen aurrean", gaineratu du Araizek.

 

Hala, "EH Bilduk proposatuta, ikerketa zientifiko eta teknikoko jardueren azpikontratazioari %60ko muga ezarri dio Gobernuak, eta diru publikoarekin finantzatuko dira", azpimarratu du. Foru parlamentariaren hitzetan, "Gobernuak jarduera guztiak azpikontratatu ahal izatea nahi zuen eta, gainera, ez zituen aurreikusten funts horien erabilera eta xedea egiaztatzeko eta kontrolatzeko lanak".

 

Era berean, Araizek azaldu duenez, "gure beste ekarpen baten bidez, Gobernuak aldatu egin zuen Toki Erakundeen Larrialdietarako Laguntzak banatzeko irizpideari buruzko hasierako asmoa; horrela, biztanleen irizpide bakarra ezabatu zen, planteatu zitzaizkien irizpide bidezkoagoengatik, hala nola pobreziaren mugaren azpitik bizi diren pertsonak, langabeak, 65 urtetik gorakoak eta COVID-19k kutsatutakoak”.

 

Azkenik, EH Bilduko parlamentariak nabarmendu duenez, "kontratazio publikoari buruzko neurrien artean, Gobernuak gure talde parlamentarioak helarazi zion beste proposamen bat jaso zuen; horren arabera, kontratu publikoak eteten zaizkien enpresek kalte-ordainak jaso ahal izateko, beti ere kontratu horri atxikitako enpleguari eusten diotela egiaztatu beharko dute, jaso nahi duten aldi osoan".