Nafarroa

Enpresen deslokalizazioari aurre egiteko Foru Legea proposatu du EH Bilduk

| 2020-06-06 12:13:00

EH Bildu Nafarroa Talde Parlamentarioak enpresen deslokalizazioari aurre egiteko neurriak biltzen dituen Foru Lege Proposamen bat erregistratu du Nafarroako Parlamentuan.

Adolfo Araiz parlamentarioak adierazi duenez, "enpresei laguntzeak eta industria-jarduerari mesede egingo dion ingurune bat sortzeak duen garrantziaz jabetuta, aldi berean kontuan hartu behar da laguntza publikoek enpresak epe luzera irauteko konpromisoa izan behar dutela kontrapartida gisa". Horregatik, "ekimen legegile honen helburua enpresen deslokalizazioa zailtzea eta Nafarroako enplegua eta ehun-produktiboa babestea da, erantzukizuna eta konpromisoa indartuz".

Foru Lege Proposamenean jasotzen denez, “ekoizpena Nafarroatik kanpora eraman eta aurreko 10 urteetan laguntza publikoak jaso dituzten enpresek laguntza horiek itzuli egin beharko dituzte. Laguntzatzat hartuko dira Nafarroako Foru Komunitateko Aurrekontu Orokorrei buruzko Foru Legearen esparruan ematen diren diru-laguntzak eta erakunde autonomoek, zuzenbide pribatuko erakunde publikoek, sozietate publikoek, fundazioek eta mankomunitateek erakunde bakoitzaren aurrekontuen kargura ematen dituztenak”.

Halaber, parlamentariak adierazi duenez, "lege baliagarria izango da beren ekoizpena deslokalizatu nahi duten enpresek bi aldiz pentsatu behar izan dezaten urrats hori eman aurretik, eta, are gehiago, ekoizpena itxi edo lekualdatzeari uko egin diezaioten. Jakin badakigu COVID-19ren krisiarekin Nafarroako ehun-produktiboak laguntzak beharko dituela hura berreskuratu eta eraldatzeko, baina, era berean, ikusi dugu nola enpresa batzuk (hala nola, Nissan multinazionalak Bartzelonan iragarri duenez) bere interes ekonomikoengatik deslokalizazio berriak planteatzeko arriskua badagoen, nahiz eta laguntza handiak jaso”.

Enpresen deslokalizazioak enpleguan eta ehun produktiboan dituen "ondorio larriez" ohartarazi du Adolfo Araizek, eta azaldu du "gero eta nabarmenagoa den fenomeno horrek ondorio oso larriak eragin ditzakeela Nafarroako ehun industrialean: batetik, deslokalizazioaren fenomenoaren ondorioz enpleguak zuzenean galtzea; bestetik, deslokalizazioaren edo mehatxuaren ondorioz lan-baldintzetan atzera egitea”. Ildo horretan, “enpresak deslokalizazioaren mehatxura jotzean, soldatak murriztu egiten dira, eta lan-baldintzak okertu. Horregatik, pertsona gehiago daude, soldata jaso arren, pobreziatik atera ezin dutenak ."


 

EH Bilduk kultur talka-plana proposatu du

| 2020-05-20 13:34:00

EH Bildu Nafarroa Talde Parlamentarioak bi zuzenketa aurkeztu ditu zeinen bidez Nafarroako Gobernua premiatzen duen "kultur talka-plan bat ezartzera sektorearen krisi larriari aurre egiteko”. Koalizio soberanistak adierazi duenez, "Nafarroako Gobernuak iragarritako neurrietatik haratago, maiatzaren 5eko Estatuko Gobernuaren Errege Dekretuan aurreikusitako neurrien kopia mimetikoa baino ez direnak, Nafarroak Talka Plan bat behar du, COVID-19 krisiak kulturaren arloan eragin dituen ondorio larriak arintzeko neurri zehatzak jasoko dituena".

Talka Planaren barruan jasotako neurrien artean, EH Bilduk "oinarrizko estaldura ekonomikoa" proposatzen du "jarduera artistikoari dedikazio esklusiboa eskaini arren, langabezia-prestazioa jasotzeko Gizarte Segurantzaren Lege Orokorra aldatzeko ezohiko neurrian eta autonomoen sektoreari zuzendutako laguntzetan sartu ezin diren artista eta profesionalentzat".

Era berean, "Sektore Publikoak Nafarroako hainbat artista eta talderen kontzertuak eta emanaldi eszenikoak eskuratzea planteatzen da, etorkizunean egiteko, egungo mugak gainditzen direnean". Plan horren beste puntu batek "kultura propioari eta euskarazko ekoizpenei laguntzeko neurri espezifikoak" proposatzen ditu, baita "kultur ekimenei eta sustapen pribatuko jaialdiei zuzendutako" beste neurri batzuk ere. Ildo beretik, "Nafarroako sektore publikoaren aparteko hornidura Nafarroako arte garaikidea eskuratzeko", eta, azkenik, "Kultur Bonuen formulak kultur kontsumoa sustatzeko".

Zuzenketak PSNk, Geroa Baik, Podemos-Ahal Duguk eta I-Ek aurkeztutako mozioari zuzenduta daude, kulturako lanbideei buruzko lege-proiektu bat bultzatzea helburu duenari, alegia, eta bihar, osteguna, Nafarroako Parlamentuan egingo den osoko bilkuran eztabaidatuko dena. Zentzu horretan, EH Bilduk "Nafarroako Gobernuari mezu argi bat bidaltzeko beharra" azaldu du, "pertsona askoren premiazko beharrei erantzuteko". "Premiazko beharrizanen aurrean ekintzarik ez egiteak Nafarroako jarduera eta proiektu artistiko eta kulturalak behin betiko desagertzea ekar dezakeela jakin behar dugu", azpimarratu du koalizio soberanistak.

EH Bilduk azpimarratu duenez, "sektorearen zati handi baten jarduna jendetza biltzen den eta distantzia sozialari eusteko diseinatuta ez dauden espazioetan oinarritzen delarik, krisi honekin ikusi dute programazio guztia desagertu egin dela eta ez dutela inolako ziurtasunik noiz eta zein baldintzatan berrekin ahal izango dioten jarduerari".

Horregatik guztiagatik, eta "artistaren estatusak bere jarduera garatu behar izan duen egoera historiko bidegabea zuzentzeko berehalako hausnarketa eskatzen duenez", EH Bilduren ustez, "lehentasunezkoa da sektore kulturala artatzea eta bere egoera delikatua arintzeko neurriak martxan jartzea".